ដើម្បីយកតម្រាប់លោកយេស៊ូ សូម . . .
មានចិត្តអាណិតមេត្ដា
ក្នុងនាមជាបុរសល្អឥតខ្ចោះ លោកយេស៊ូមិនមានការព្រួយបារម្ភនិងការខ្វល់ខ្វាយច្រើនដូចមនុស្សទេ។ យ៉ាងណាក្ដី លោកយេស៊ូនៅតែយល់អារម្មណ៍របស់មនុស្ស។ លោកសុខចិត្តធ្វើអ្វីៗលើសពីតម្រូវការ។ ពិតណាស់ ចិត្តអាណិតមេត្ដាជំរុញលោកឲ្យជួយអ្នកឯទៀត។ សូមពិចារណាគំរូរបស់លោកក្នុងជំពូកទី៣២, ៣៧, ៥៧, ៩៩។
ស្រួលទាក់ទង
មនុស្សគ្រប់វ័យទាំងចាស់ទាំងក្មេងមានអារម្មណ៍ថា ពួកគេអាចប្រស្រ័យទាក់ទងជាមួយនឹងលោកយេស៊ូ ពីព្រោះលោកមិនបានធ្វើឲ្យពួកគេគិតថាលោករវល់ពេក ឬថាខ្លួនលោកជាមនុស្សសំខាន់នោះឡើយ។ បណ្ដាជនដឹងថាលោកយេស៊ូចាប់អារម្មណ៍នឹងពួកគេម្នាក់ៗ ដូច្នេះពួកគេមានអារម្មណ៍ស្រួលពេលនៅជិតលោក។ ដើម្បីដឹងអំពីគុណសម្បត្ដិនេះ សូមអានជំពូកទី២៥, ២៧, ៩៥។
អធិដ្ឋានជានិច្ច
លោកយេស៊ូអធិដ្ឋានទៅបិតាដោយអស់ពីចិត្តយ៉ាងទៀងទាត់ នៅពេលដែលលោកនៅម្នាក់ឯង ហើយនៅពេលដែលលោកនៅជាមួយនឹងអ្នកគោរពប្រណិប័តន៍ពិតរបស់ព្រះ។ លោកអធិដ្ឋានក្នុងស្ថានភាពជាច្រើន មិនគ្រាន់តែមុនពេលពិសាអាហារប៉ុណ្ណោះទេ។ លោកអធិដ្ឋានដើម្បីអរគុណបិតាលោក សរសើរតម្កើងលោក និងស្វែងរកការណែនាំមុនធ្វើការសម្រេចចិត្តសំខាន់ផ្សេងៗ។ សូមពិចារណាអំពីគំរូរបស់លោកយេស៊ូក្នុងជំពូកទី២៤, ៣៤, ៩១, ១២២, ១២៣។
គិតពីប្រយោជន៍អ្នកឯទៀត
នៅពេលខ្លះ ទោះជាលោកយេស៊ូត្រូវការការសម្រាកនិងការលម្ហែកាយក៏ដោយ លោកនៅតែគិតអំពីសេចក្ដីត្រូវការរបស់អ្នកឯទៀតជាមុន។ លោកមិនមានចិត្តគំនិតគិតពីប្រយោជន៍ផ្ទាល់ខ្លួនជាមុននោះឡើយ។ ម្ដងនេះទៀត លោកទុកគំរូមួយដែលយើងអាចធ្វើតាមយ៉ាងដិតដល់។ សូមរៀនអំពីរបៀបដែលគំរូនេះបានត្រូវបង្ហាញក្នុងជំពូកទី១៩, ៤១, ៥២។
ចេះអភ័យទោស
លោកយេស៊ូមិនគ្រាន់តែបង្រៀនអំពីការអភ័យទោសប៉ុណ្ណោះទេ តែលោកបង្ហាញការអភ័យទោសនៅពេលដែលលោកប្រព្រឹត្តទៅលើអ្នកកាន់តាមលោកនិងអ្នកឯទៀត។ សូមរំពឹងគិតអំពីគំរូរបស់លោកក្នុងជំពូកទី២៦, ៤០, ៦៤, ៨៥, ១៣១។
មានចិត្តខ្នះខ្នែង
ទំនាយក្នុងគម្ពីរចែងថាសត្រូវរបស់លោកយេស៊ូនឹងសម្លាប់លោក ហើយជនជាតិយូដាភាគច្រើននឹងបដិសេធមិនទទួលស្គាល់លោកយេស៊ូជាមេស្ស៊ីទេ។ ហេតុនេះ លោកយេស៊ូមិនចាំបាច់ព្យាយាមជួយជនជាតិនោះទេ។ ទោះជាយ៉ាងនោះក៏ដោយ លោកបានខ្នះខ្នែងជួយពួកគេឲ្យគោរពប្រណិប័តន៍តាមរបៀបត្រឹមត្រូវ។ លោកទុកគំរូក្នុងការមានចិត្តខ្នះខ្នែងសម្រាប់អ្នកកាន់តាមទាំងអស់ដែលជួបប្រទះការមិនអើពើ ឬថែមទាំងជួបការប្រឆាំងបៀតបៀនទៀតផង។ សូមអានជំពូកទី១៦, ៧២, ១០៣។
មានចិត្តរាបទាប
លោកយេស៊ូប្រសើរជាងមនុស្សដែលមានភាពមិនល្អឥតខ្ចោះឆ្ងាយណាស់។ ជាឧទាហរណ៍ លោកមានចំណេះនិងប្រាជ្ញាច្រើនជាងពួកគេ។ ម្យ៉ាងទៀត ដោយសារលោកមានភាពល្អឥតខ្ចោះ លោកប្រាកដជាមានរាងកាយមាំមួននិងសតិបញ្ញាប្រសើរជាងមនុស្សដែលនៅជុំវិញលោក។ ទោះជាយ៉ាងណាក្ដី លោកបម្រើអ្នកឯទៀតដោយចិត្តរាបទាប។ អ្នកនឹងឃើញមេរៀនអំពីរឿងនេះក្នុងជំពូកទី១០, ៦២, ៦៦, ៩៤, ១១៦។
ចេះអត់ធ្មត់
លោកយេស៊ូតែងតែបង្ហាញចិត្តអត់ធ្មត់ចំពោះពួកសាវ័ករបស់លោកនិងអ្នកឯទៀត នៅពេលដែលពួកគេមិនបានយកតម្រាប់គំរូរបស់លោក ឬក៏ធ្វើតាមអ្វីដែលលោកបានមានប្រសាសន៍។ ដោយចិត្តអត់ធ្មត់ លោកប្រាប់ម្ដងហើយម្ដងទៀតអំពីមេរៀនដែលពួកគេត្រូវដឹង ដើម្បីពួកគេអាចចូលទៅជិតព្រះយេហូវ៉ាថែមទៀត។ សូមពិចារណាគំរូអំពីចិត្តអត់ធ្មត់របស់លោកយេស៊ូក្នុងជំពូកទី៧៤, ៩៨, ១១៨, ១៣៥។