មេរៀនទី០១

មានសៀវភៅពិសេសមួយដែលអាចជួយអ្នកបាន!

លេង

យើងភាគច្រើនឆ្ងល់ថា ហេតុអ្វីយើងរងទុក្ខវេទនា? តើនៅថ្ងៃខាងមុខជីវិតយើងនឹងទៅជាយ៉ាងណា? ហេតុអ្វីមនុស្សយើងស្លាប់? យើងក៏ខ្វល់ខ្វាយដែរអំពីជីវភាពប្រចាំថ្ងៃដូចជា ការរកប្រាក់ចិញ្ចឹមជីវិត ឬការជួយក្រុមគ្រួសារឲ្យមានសុភមង្គលជាដើម។ មនុស្សជាច្រើនឃើញថា សៀវភៅពិសេសមួយដែលហៅថាគម្ពីរបរិសុទ្ធ បានជួយពួកគេឲ្យរកឃើញចម្លើយចំពោះសំណួរសំខាន់ៗអំពីជីវិត ហើយគម្ពីរក៏មានយោបល់ល្អៗសម្រាប់ជីវិតប្រចាំថ្ងៃដែរ។ យើងទាំងអស់គ្នាអាចទទួលប្រយោជន៍ពីគម្ពីរបរិសុទ្ធ។

១. តើគម្ពីរឆ្លើយសំណួរអ្វីខ្លះ?

គម្ពីរមានចម្លើយចំពោះសំណួរសំខាន់ៗដូចជា៖ តើជីវិតដំបូងកើតមកពីណា? ហេតុអ្វីយើងមានជីវិត? ហេតុអ្វីមនុស្សល្អជួបទុក្ខវេទនា? តើមនុស្សស្លាប់ទៅទីណា? មនុស្សគ្រប់រូបតែងតែចង់បានសន្តិភាព ប៉ុន្តែហេតុអ្វីមានសង្គ្រាមច្រើនម្ល៉េះ? តើផែនដីនឹងទៅជាយ៉ាងណានៅពេលអនាគត? គម្ពីរលើកទឹកចិត្តឲ្យស្វែងរកចម្លើយចំពោះសំណួរដូចនេះ ហើយមនុស្សរាប់លាននាក់បានរកឃើញចម្លើយដែលធ្វើឲ្យពួកគេអស់ចម្ងល់។

២. តើគម្ពីរអាចជួយយើងឲ្យមានជីវិតសប្បាយរីករាយយ៉ាងដូចម្ដេច?

គម្ពីរមានយោបល់ល្អសម្រាប់យើង។ ជាឧទាហរណ៍ គម្ពីរបង្រៀនអំពីរបៀបជួយក្រុមគ្រួសារឲ្យមានសុភមង្គលពិត។ គម្ពីរក៏មានយោបល់អំពីវិធីកាត់បន្ថយការតានតឹងចិត្ត និងវិធីដែលជួយយើងមិនឲ្យធុញទ្រាន់នឹងការងារដែរ។ អ្នកនឹងរៀនអ្វីដែលគម្ពីរបង្រៀនអំពីរឿងទាំងនេះ ហើយអ្នកនឹងរៀនថែមទៀតពេលយើងពិភាក្សាព័ត៌មាននេះជាមួយគ្នា។ ក្រោយមក អ្នកប្រហែលជាយល់ស្របថា «គ្រប់ទាំងបទគម្ពីរ[អ្វីទាំងអស់ក្នុងគម្ពីរ] . . . មានប្រយោជន៍»។—ធីម៉ូថេទី២ ៣:១៦

សៀវភៅនេះមិនមែនជំនួសគម្ពីរទេ។ ផ្ទុយទៅវិញ សៀវភៅនេះលើកទឹកចិត្តអ្នកឲ្យពិនិត្យពិចារណាគម្ពីរដោយខ្លួនអ្នកផ្ទាល់។ ដូច្នេះ សូមអ្នកអានបទគម្ពីរដែលមានក្នុងមេរៀនទាំងនេះ ហើយប្រៀបធៀបជាមួយនឹងចំណុចដែលអ្នកកំពុងរៀន។

បង្កើនចំណេះ

សូមពិចារណាអំពីរបៀបដែលគម្ពីរបានជួយមនុស្សឯទៀត និងអំពីវិធីដែលអ្នកអាចសប្បាយក្នុងការអានគម្ពីរ ព្រមទាំងអំពីមូលហេតុដែលអ្នកគួរសុំអ្នកឯទៀតឲ្យជួយអ្នកយល់ព័ត៌មានក្នុងគម្ពីរ។

៣. គម្ពីរអាចជួយណែនាំយើង

គម្ពីរប្រៀបដូចជាពន្លឺភ្លើងពិល។ យើងអាចប្រើគម្ពីរដើម្បីជួយយើងឲ្យធ្វើការសម្រេចចិត្តល្អ និងជួយយើងឲ្យដឹងនូវអ្វីដែលនឹងកើតឡើងនៅថ្ងៃខាងមុខ។

សូមអាន ចម្រៀងសរសើរព្រះ ១១៩:១០៥ រួចពិភាក្សាសំណួរទាំងនេះ៖

តើអ្នកសរសេរបទចម្រៀងនេះគិតយ៉ាងណាអំពីគម្ពីរ?
តាមទស្សនៈរបស់អ្នក ហេតុអ្វីគាត់គិតដូច្នេះ?

៤. គម្ពីរអាចឆ្លើយសំណួររបស់យើង

ស្ត្រីម្នាក់បានរកឃើញចម្លើយក្នុងគម្ពីរចំពោះសំណួរដែលគាត់បានឆ្ងល់អស់ជាច្រើនឆ្នាំ។ លេងវីដេអូ រួចពិភាក្សាសំណួរដូចតទៅ៖

វីដេអូ: ចូរកុំអស់សង្ឃឹមឲ្យសោះ! (១:៤៨)

ក្នុងវីដេអូ តើស្ត្រីនេះធ្លាប់គិតអំពីសំណួរអ្វី?
ពេលគាត់ចាប់ផ្ដើមរៀនគម្ពីរ តើនោះបានជួយគាត់យ៉ាងដូចម្ដេច?

គម្ពីរលើកទឹកចិត្តយើងឲ្យសួរសំណួរ។ សូមអាន ម៉ាថាយ ៧:៧ រួចពិភាក្សាសំណួរនេះ៖

តើអ្នកមានសំណួរអ្វីខ្លះដែលអ្នកចង់ដឹងចម្លើយពីគម្ពីរ?

៥. អ្នកអាចសប្បាយក្នុងការអានគម្ពីរ

មនុស្សជាច្រើនចូលចិត្តអានគម្ពីរ ហើយទទួលប្រយោជន៍ពីការអាននោះ។ លេងវីដេអូ រួចពិភាក្សាសំណួរដូចតទៅ៖

វីដេអូ: ការអានគម្ពីរ (២:០៥)

ក្នុងវីដេអូ តើប្អូនៗយុវវ័យមានអារម្មណ៍យ៉ាងណាអំពីការអានសៀវភៅទូទៅ?
ហេតុអ្វីពួកគេមានអារម្មណ៍ខុសគ្នាចំពោះការអានគម្ពីរ?

គម្ពីរមានពាក្យសម្ដីដែលអាចសម្រាលទុក្ខយើង និងផ្ដល់សេចក្ដីសង្ឃឹមដល់យើង។ សូមអាន រ៉ូម ១៥:៤ រួចពិភាក្សាសំណួរនេះ៖

តើអ្នកចង់ដឹងថែមទៀតអំពីសេចក្ដីសន្យាក្នុងខគម្ពីរនេះទេ?

៦. អ្នកឯទៀតអាចជួយយើងឲ្យយល់ព័ត៌មានក្នុងគម្ពីរ

មនុស្សជាច្រើនអានគម្ពីរដោយខ្លួនឯង តែពួកគេឃើញថាការពិភាក្សាជាមួយអ្នកឯទៀតអំពីគម្ពីរក៏មានប្រយោជន៍ច្រើនដែរ។ សូមអាន សកម្មភាព ៨:២៦-៣១ រួចពិភាក្សាសំណួរនេះ៖