ជំពូកទី២៧
«ធ្វើជាសាក្សីបញ្ជាក់យ៉ាងសព្វគ្រប់»
ប៉ូលជាប់គុកនៅក្រុងរ៉ូម ប៉ុន្តែគាត់នៅតែបន្តផ្សព្វផ្សាយ
មានមូលដ្ឋានលើសកម្មភាព ២៨:១១-៣១
១. តើប៉ូលនិងគ្នារបស់គាត់ជឿជាក់អំពីអ្វី? ហើយហេតុអ្វី?
ឥឡូវប្រហែលជានៅឆ្នាំ៥៩ គ.ស. អ្នកទោសប៉ូល ព្រមទាំងបងប្អូនរួមជំនឿពីរនាក់ទៀត គឺលូកា និងអារីស្តាក កំពុងជិះនៅលើសំពៅមួយដែលមានអក្សរថា «កូនរបស់ព្រះសឺស»។ (សកម្ម. ២៧:២) សំពៅនេះទំនងជាសំពៅធំសម្រាប់ដឹកគ្រាប់ធញ្ញជាតិ ហើយកំពុងធ្វើដំណើរចេញពីកោះម៉ល់តានៅសមុទ្រមេឌីទែរ៉ានេ ឆ្ពោះទៅកាន់ស្រុកអ៊ីតាលី។ ពួកអ្នកផ្សព្វផ្សាយទាំងនេះ ខុសគ្នាពីពួកនាវិកសំពៅ ដោយសារពួកគាត់មិនបន់ស្រន់សុំការការពារពីកូនប្រុសរបស់ព្រះសឺសទេ (កូនរបស់ព្រះសឺសគឺជាកូនភ្លោះ មួយឈ្មោះខាសស្ទ័រ និងមួយទៀតឈ្មោះផូលុច)។ (សកម្ម. ២៨:១១) ផ្ទុយទៅវិញ ប៉ូលនិងគ្នារបស់គាត់គោរពប្រណិប័តន៍ព្រះយេហូវ៉ា ហើយជឿជាក់ថាលោកនឹងជួយពួកគាត់ ពីព្រោះព្រះយេហូវ៉ាបានប្រាប់ពួកគាត់ឲ្យដឹងថា ប៉ូលនឹងធ្វើជាសាក្សីបញ្ជាក់អំពីសេចក្ដីពិតនៅក្រុងរ៉ូម ហើយថាគាត់នឹងត្រូវតស៊ូក្ដីនៅចំពោះមុខសេសារ។—សកម្ម. ២៣:១១; ២៧:២៤
២, ៣. តើសំពៅដែលដឹកប៉ូលធ្វើដំណើរតាមផ្លូវណា? ហើយតើអ្នកណាតែងគាំទ្រប៉ូលក្នុងការធ្វើដំណើរតាំងពីដើមដល់ចប់?
២ បន្ទាប់ពីសំពៅចូលចតបានបីថ្ងៃ នៅកំពង់ផែស៊ីរ៉ាគូសក្នុងក្រុងស៊ីស៊ីលី ជាក្រុងដ៏ស្រស់ស្អាតដូចក្រុងអាថែននិងក្រុងរ៉ូម សំពៅក៏ចេញដំណើរទៅកាន់ក្រុងរេគៀម ដែលនៅចុងភាគខាងត្បូងនៃស្រុកអ៊ីតាលី។ បន្ទាប់មក ដោយសារខ្យល់បក់ពីទិសខាងត្បូង សំពៅបានធ្វើដំណើរអស់ចម្ងាយ៣២០គីឡូម៉ែត្រ ដែលលឿនជាងធម្មតា។ រួចនៅថ្ងៃទី២ សំពៅបានមកដល់កំពង់ផែពូតេអូលីនៃស្រុកអ៊ីតាលី (សព្វថ្ងៃនៅជិតក្រុងនេផល)។—សកម្ម. ២៨:១២, ១៣
៣ ឥឡូវ ប៉ូលបានមកដល់គោលដៅចុងក្រោយគឺក្រុងរ៉ូម ជាកន្លែងដែលគាត់នឹងទៅបង្ហាញខ្លួននៅចំពោះមុខអធិរាជនីរ៉ូ។ ក្នុងការធ្វើដំណើរតាំងពីដើមដល់ចប់ «ព្រះនៃការសម្រាលទុក្ខគ្រប់យ៉ាង»បាននៅជាមួយនឹងប៉ូល។ (២កូ. ១:៣) ដូចដែលយើងនឹងឃើញ ព្រះយេហូវ៉ាតែងតែគាំទ្រប៉ូលជានិច្ច ហើយប៉ូលក៏មិនដែលបាត់បង់ចិត្តខ្នះខ្នែងក្នុងកិច្ចផ្សព្វផ្សាយដែរ។
‹ប៉ូលអរគុណព្រះ ហើយក៏មានកម្លាំងចិត្ត› (សកម្មភាព ២៨:១៤, ១៥)
៤, ៥. (ក) តើប៉ូលនិងគ្នារបស់គាត់បានទទួលភាពរាក់ទាក់យ៉ាងណាពីបងប្អូននៅកំពង់ផែពូតេអូលី? ហើយហេតុអ្វីបានជាប៉ូលមានសេរីភាពច្រើនម្ល៉េះ? (ខ) តើតាមរបៀបណាគ្រិស្តសាសនិកអាចទទួលប្រយោជន៍ពីការប្រព្រឹត្តល្អរបស់ខ្លួនសូម្បីតែកំពុងជាប់គុក?
៤ នៅកំពង់ផែពូតេអូលី ប៉ូលនិងគ្នារបស់គាត់‹រកឃើញបងប្អូន ហើយពួកគេបានសុំប៉ូលនិងគ្នារបស់គាត់ឲ្យស្នាក់នៅជាមួយអស់៧ថ្ងៃ›។ (សកម្ម. ២៨:១៤) នេះពិតជាគំរូដ៏ប្រសើរមែន ដែលបងប្អូនគ្រិស្តសាសនិកបង្ហាញចិត្តរាក់ទាក់! បងប្អូនដែលបានស្វាគមន៍ប៉ូលនិងគ្នារបស់គាត់យ៉ាងរាក់ទាក់និងកក់ក្ដៅ ប្រាកដជាបានទទួលការលើកទឹកចិត្តយ៉ាងខ្លាំងពីពួកគាត់។ ក៏ប៉ុន្តែ ហេតុអ្វីបានជាអ្នកទោសប៉ូលមានសេរីភាពច្រើនម្ល៉េះ? នេះប្រហែលជាដោយសារទាហានរ៉ូមដែលនៅយាមប៉ូល ទុកចិត្តប៉ូលទាំងស្រុង។
៥ ស្រដៀងគ្នាដែរ នៅសព្វថ្ងៃអ្នកបម្រើជាច្រើនរបស់ព្រះយេហូវ៉ា មិនថាពួកគេជាប់គុក ឬជាប់ជំរំឃុំឃាំងទេ ពួកគេច្រើនតែទទួលបាននូវសេរីភាពមួយកម្រិត ដោយសារការប្រព្រឹត្តល្អរបស់ពួកគេជាគ្រិស្តសាសនិក។ ជាឧទាហរណ៍ នៅប្រទេសរ៉ូម៉ានី បុរសម្នាក់ដែលបានត្រូវកាត់ទោសឲ្យជាប់គុក៧៥ឆ្នាំ ពីបទប្លន់ បានចាប់ផ្ដើមសិក្សាគម្ពីរ។ បន្ទាប់មក គាត់បានកែប្រែការប្រព្រឹត្តជាច្រើនរបស់ខ្លួន។ ដូច្នេះ មន្ត្រីពន្ធនាគារបានប្រគល់ភារកិច្ចមួយឲ្យគាត់ គឺឲ្យចូលទៅក្រុងដើម្បីទិញសម្ភារដាក់ក្នុងគុក! ទោះជាយ៉ាងណាក៏ដោយ អ្វីដែលសំខាន់បំផុត គឺការប្រព្រឹត្តល្អរបស់យើង លើកតម្កើងព្រះយេហូវ៉ា។—១ពេ. ២:១២
៦, ៧. តើតាមរបៀបណាបងប្អូននៅក្រុងរ៉ូមបង្ហាញសេចក្ដីស្រឡាញ់យ៉ាងជ្រាលជ្រៅចំពោះប៉ូលនិងគ្នារបស់គាត់?
៦ ប៉ូលនិងគ្នារបស់គាត់ទំនងជាដើរអស់ចម្ងាយប្រហែល៥០គីឡូម៉ែត្រ ពីកំពង់ផែពូតេអូលី ទៅក្រុងកាពួ។ ក្រុងកាពួស្ថិតនៅលើផ្លូវអាពីយូស ជាផ្លូវដែលនាំទៅដល់ក្រុងរ៉ូម។ ផ្លូវដ៏ល្បីនេះក្រាលដោយថ្មកំបោរសំប៉ែតធំៗ អមដោយទេសភាពដ៏ស្រស់ស្អាតនៃជនបទរបស់ស្រុកអ៊ីតាលី ហើយនៅកន្លែងខ្លះតាមផ្លូវនេះ ក៏អាចមើលឃើញសមុទ្រមេឌីទែរ៉ានេដែរ។ ផ្លូវអាពីយូសក៏នាំអ្នកដំណើរឆ្លងកាត់កន្លែងមួយហៅថា វាលភក់ប៉ូនទីន ដែលមានចម្ងាយប្រហែល៦០គីឡូម៉ែត្រពីក្រុងរ៉ូម។ ក្នុងតំបន់វាលភក់ប៉ូនទីន មានផ្សារអាពីយូស។ លូកាបានសរសេរថា ពេលបងប្អូននៅក្រុងរ៉ូម«បានទទួលដំណឹងអំពីយើង» បងប្អូនខ្លះបានធ្វើដំណើរឆ្ងាយ រហូតមកដល់ផ្សារអាពីយូស។ រីឯបងប្អូនខ្លះទៀត ពួកគេរង់ចាំនៅកន្លែងមួយឈ្មោះថាផ្ទះសម្នាក់បី ដែលមានចម្ងាយប្រហែល៥០គីឡូម៉ែត្រពីក្រុងរ៉ូម។ នេះពិតជាការបង្ហាញសេចក្ដីស្រឡាញ់ដ៏ជ្រាលជ្រៅមែន!—សកម្ម. ២៨:១៥
៧ ផ្សារអាពីយូសមិនមែនជាកន្លែងស្រួលសម្រាក សម្រាប់អ្នកធ្វើដំណើរដ៏នឿយហត់ទេ។ កវីជនជាតិរ៉ូមឈ្មោះហូរេស បានរៀបរាប់ថា ផ្សារនោះគឺជាកន្លែងដែល«ប្រមូលផ្ដុំទៅដោយអ្នកដើរទូក និងម្ចាស់ផ្ទះសម្នាក់ដែលឈ្លើយ»។ បន្ថែមទៅទៀត គាត់បានសរសេរថា៖ «ទឹកនៅទីនោះកខ្វក់ខ្លាំងណាស់»ឬមានក្លិនស្អុយ សូម្បីតែបរិភោគអាហារក៏មិនចូលដែរ! ទោះជាអ្វីៗនៅទីនោះមិនស្រួលក៏ដោយ បងប្អូនដែលមកពីក្រុងរ៉ូមបានរង់ចាំប៉ូលនិងគ្នារបស់គាត់ដោយចិត្តរីករាយ ដើម្បីអមដំណើរពួកគាត់ទៅកាន់ក្រុងរ៉ូម ដែលជាដំណើរចុងក្រោយរបស់ពួកគាត់។
៨. ហេតុអ្វីប៉ូលអរគុណព្រះ‹កាលដែលគាត់ឃើញបងប្អូន›?
៨ កំណត់ហេតុចែងថា៖ «កាលដែលប៉ូលឃើញបងប្អូន គាត់អរគុណព្រះ ហើយក៏មានកម្លាំងចិត្ត»។ (សកម្ម. ២៨:១៥) ហេតុអ្វីប៉ូលអរគុណព្រះ? មែនហើយ គ្រាន់តែប៉ូលបានឃើញមុខបងប្អូនជាទីស្រឡាញ់ទាំងនោះ នេះធ្វើឲ្យគាត់ធូរស្រាលក្នុងចិត្ត ហើយមានកម្លាំងឡើងវិញ។ ក្នុងចំណោមបងប្អូនទាំងនោះ ប៉ូលបានស្គាល់បងប្អូនខ្លះរួចហើយ។ គាត់ដឹងថាសេចក្ដីស្រឡាញ់ដែលមិនគិតប្រយោជន៍ខ្លួន ជាផលផ្លែមួយនៃឫទ្ធានុភាពរបស់ព្រះ។ (កាឡ. ៥:២២) នៅសព្វថ្ងៃ ឫទ្ធានុភាពបរិសុទ្ធក៏ជំរុញចិត្តគ្រិស្តសាសនិកឲ្យខិតខំជួយគ្នាទៅវិញទៅមក ហើយសម្រាលទុក្ខអស់អ្នកដែលត្រូវការជំនួយ។—១ថែ. ៥:១១, ១៤
៩. តើតាមរបៀបណាយើងអាចបង្ហាញចិត្តគំនិតដូចបងប្អូនដែលបានទៅទទួលស្វាគមន៍ប៉ូល?
៩ ជាឧទាហរណ៍ ឫទ្ធានុភាពបរិសុទ្ធជំរុញចិត្តបងប្អូនដែលចង់បង្ហាញចិត្តរាក់ទាក់ ឲ្យទទួលស្វាគមន៍អ្នកត្រួតពិនិត្យប្រចាំមណ្ឌល សាសនទូត និងអ្នកបម្រើពេញពេលឯទៀត ពីព្រោះបងប្អូនទាំងនេះបានលះបង់ប្រយោជន៍ខ្លួនយ៉ាងខ្លាំង ដើម្បីបម្រើព្រះយេហូវ៉ាច្រើនជាង។ ដូច្នេះ សូមសួរខ្លួនអ្នកថា ‹តើខ្ញុំអាចធ្វើអ្វីថែមទៀត ដើម្បីបង្ហាញចិត្តរាក់ទាក់និងគាំទ្រចំពោះទស្សនកិច្ចរបស់អ្នកធ្វើដំណើរត្រួតពិនិត្យនិងប្រពន្ធគាត់(បើរៀបការហើយ)? តើខ្ញុំអាចរៀបចំពេលដើម្បីផ្សព្វផ្សាយជាមួយនឹងពួកគាត់បានទេ?›។ បើអ្នកធ្វើដូច្នេះ អ្នកនឹងទទួលពរជាបរិបូរ។ ជាឧទាហរណ៍ សូមស្រមៃគិតថា បងប្អូនដែលមកពីក្រុងរ៉ូមមានអំណរខ្លាំងយ៉ាងណា ពេលបានស្ដាប់ប៉ូលនិងគ្នារបស់គាត់រៀបរាប់អំពីបទពិសោធន៍ដ៏គួរឲ្យលើកទឹកចិត្ត។—សកម្ម. ១៥:៣, ៤
«គ្រប់ទីកន្លែងគេតែងនិយាយប្រឆាំង» (សកម្មភាព ២៨:១៦-២២)
១០. តើនៅក្រុងរ៉ូមប៉ូលស្ថិតក្នុងស្ថានភាពបែបណា? ហើយក្រោយពីគាត់មកដល់បាន៣ថ្ងៃ តើគាត់ធ្វើអ្វី?
១០ នៅទីបំផុត ប៉ូលនិងគ្នារបស់គាត់បានមកដល់ក្រុងរ៉ូម ហើយ«ប៉ូលបានត្រូវអនុញ្ញាតឲ្យស្នាក់នៅម្នាក់ឯង ជាមួយនឹងទាហានម្នាក់ដែលយាមគាត់»។ (សកម្ម. ២៨:១៦) ជាធម្មតា អ្នកទោសដែលជាប់ឃុំឃាំងតែងត្រូវគេដាក់ច្រវាក់ជាប់នឹងអ្នកយាម ដើម្បីការពារកុំឲ្យរត់គេចខ្លួន។ ទោះជាប៉ូលជាប់ច្រវាក់ក៏ដោយ គាត់មិននៅស្ងៀមទេ គាត់នៅតែប្រកាសដំណឹងអំពីរាជាណាចក្ររបស់ព្រះ។ ក្រោយពីប៉ូលសម្រាកអស់បីថ្ងៃដើម្បីបំបាត់ការនឿយហត់ ប៉ូលសុំគេឲ្យហៅពួកបុរសដែលមានមុខមាត់ក្នុងចំណោមជនជាតិយូដានៅក្រុងរ៉ូមឲ្យមកជួបគាត់ ដើម្បីគាត់អាចណែនាំខ្លួន និងបញ្ជាក់ភ័ស្តុតាងឲ្យពួកគេយល់។
១១, ១២. តើប៉ូលបាននិយាយអ្វីដើម្បីលុបបំបាត់ភាពរើសអើងរបស់ជនជាតិយូដា?
១១ ប៉ូលបាននិយាយថា៖ «បងប្អូនអើយ ខ្ញុំមិនបានធ្វើអ្វីប្រឆាំងនឹងបណ្ដាជនឬទំនៀមទម្លាប់បុព្វបុរសរបស់យើងទេ។ ទោះជាយ៉ាងនោះក៏ដោយ គេបានប្រគល់ខ្ញុំជាអ្នកទោសពីក្រុងយេរូសាឡិម ទៅក្នុងកណ្ដាប់ដៃជនជាតិរ៉ូម។ ក្រោយពីសួរចម្លើយខ្ញុំ អ្នកទាំងនោះចង់ដោះលែងខ្ញុំ ដោយឃើញថាខ្ញុំមិនបានធ្វើអ្វីឲ្យសមនឹងទទួលទោសដល់ស្លាប់ឡើយ។ ប៉ុន្តែ ជនជាតិយូដាចេះតែជំទាស់ ទើបខ្ញុំត្រូវសុំលើករឿងក្ដីទៅសេសារ តែមិនមែនដោយសារខ្ញុំមានរឿងអ្វីដែលចង់ចោទប្រកាន់ជាតិខ្ញុំទេ»។—សកម្ម. ២៨:១៧-១៩
១២ ដោយហៅពួកអ្នកស្ដាប់ដែលជាជនជាតិយូដាថា«បងប្អូន» ប៉ូលបានលើកចំណុចមួយដែលពួកគេយល់ស្រប ដើម្បីលុបបំបាត់ភាពរើសអើងដែលប្រហែលជាមានក្នុងចិត្តរបស់ពួកគេ។ (១កូ. ៩:២០) បន្ថែមទៅទៀត គាត់បានបញ្ជាក់យ៉ាងច្បាស់ថា គាត់មកទីនេះមិនមែនដើម្បីចោទប្រកាន់ជនរួមជាតិរបស់គាត់ទេ ប៉ុន្តែដើម្បីប្ដឹងទៅសេសារ។ នេះជាលើកទី១ដែលបុរសជនជាតិយូដាទាំងនោះ បានដឹងអំពីសំណុំរឿងរបស់ប៉ូល។ (សកម្ម. ២៨:២១) ហេតុអ្វីជនជាតិយូដានៅតំបន់យូឌាមិនប្រាប់ពួកគេអំពីរឿងរបស់ប៉ូល? សៀវភៅយោងមួយបានរៀបរាប់ថា៖ «ក្រោយពីរដូវត្រជាក់ សំពៅរបស់ប៉ូលបានទៅដល់ស្រុកអ៊ីតាលីមុនគេ តែតំណាងរបស់អាជ្ញាធរយូដាដែលនៅក្រុងយេរូសាឡិមមិនទាន់ទៅដល់ទេ ហើយសំបុត្រអំពីរឿងក្ដីនោះក៏មិនទាន់ទៅដល់ដែរ»។
១៣, ១៤. តើប៉ូលបាននិយាយពាក្យអ្វីដើម្បីចូលប្រធានបទអំពីរាជាណាចក្រ? ហើយតើយើងអាចធ្វើតាមគំរូរបស់គាត់យ៉ាងដូចម្ដេច?
១៣ ឥឡូវ ប៉ូលចាប់ផ្ដើមចូលប្រធានបទអំពីរាជាណាចក្រ ដោយប្រើពាក្យដែលជំរុញចិត្តជនជាតិយូដាដែលមកជួបគាត់ ឲ្យមានការចង់ដឹងកាន់តែខ្លាំង។ គាត់និយាយថា៖ «ហេតុនេះហើយបានជាខ្ញុំសុំគេឲ្យ[ហៅ]អ្នករាល់គ្នាមក ដើម្បីខ្ញុំអាចជួបនិងអាចនិយាយជាមួយនឹងអ្នករាល់គ្នា ព្រោះខ្ញុំជាប់ច្រវាក់នេះដោយសារតែសេចក្ដីសង្ឃឹមរបស់អ៊ីស្រាអែល»។ (សកម្ម. ២៨:២០) ប្រាកដណាស់ សេចក្ដីសង្ឃឹមនោះជាប់ទាក់ទងយ៉ាងខ្លាំងជាមួយមេស្ស៊ីនិងរាជាណាចក្ររបស់លោក ដូចដែលបានផ្សព្វផ្សាយដោយគ្រិស្តសាសនិក។ ប៉ុន្តែ ពួកបុរសចាស់ទុំជនជាតិយូដាតបវិញថា៖ «យើងគិតថាជាការត្រឹមត្រូវឲ្យយើងឮអ្នកនិយាយផ្ទាល់អំពីគំនិតរបស់អ្នក ព្រោះយើងដឹងច្បាស់ថានៅគ្រប់ទីកន្លែងគេតែងនិយាយប្រឆាំងនិកាយនេះ»។—សកម្ម. ២៨:២២
១៤ ពេលយើងមានឱកាសផ្សព្វផ្សាយដំណឹងល្អ យើងអាចធ្វើតាមគំរូរបស់ប៉ូលដោយនិយាយពាក្យដែលបំផុសគំនិត ឬសួរសំណួរដែលជំរុញចិត្តអ្នកស្ដាប់ឲ្យកាន់តែចាប់អារម្មណ៍។ យោបល់ល្អៗមាននៅក្នុងសៀវភៅការវែកញែកពីបទគម្ពីរ សៀវភៅចូរទទួលប្រយោជន៍ពីការអប់រំក្នុងសាលាកិច្ចបម្រើផ្សាយ និងសៀវភៅចូរព្យាយាមក្នុងការអាននិងការបង្រៀន។ តើអ្នកកំពុងទាញយកប្រយោជន៍ពីសៀវភៅទាំងនេះឬទេ?
‹ការធ្វើជាសាក្សីបញ្ជាក់យ៉ាងសព្វគ្រប់›ជាគំរូល្អសម្រាប់យើង (សកម្មភាព ២៨:២៣-២៩)
១៥. ស្ដីអំពីរបៀបដែលប៉ូលបាននិយាយ តើមានចំណុចសំខាន់បួនយ៉ាងអ្វី?
១៥ ដល់ថ្ងៃសន្យាជួបគ្នា ជនជាតិយូដាបានមកកន្លែងស្នាក់នៅរបស់ប៉ូល ដោយ«មានគ្នាច្រើនជាងមុន»។ ប៉ូលចាប់ផ្ដើមពន្យល់ពួកគេ‹តាំងពីព្រឹកដល់ល្ងាច ដោយធ្វើជាសាក្សីបញ្ជាក់យ៉ាងសព្វគ្រប់អំពីរាជាណាចក្ររបស់ព្រះ ហើយខំបញ្ជាក់ហេតុផលដើម្បីឲ្យពួកគេជឿអំពីលោកយេស៊ូ ដោយផ្អែកលើច្បាប់ម៉ូសេនិងសេចក្ដីបង្រៀនរបស់ពួកអ្នកប្រកាសទំនាយ›។ (សកម្ម. ២៨:២៣) សូមកត់សម្គាល់ចំណុចសំខាន់បួនយ៉ាង អំពីរបៀបដែលប៉ូលបាននិយាយ៖ ទី១ គាត់ផ្ដោតទៅលើរាជាណាចក្ររបស់ព្រះ។ ទី២ គាត់ព្យាយាមទាក់ទាញចិត្តអ្នកស្ដាប់ ដោយខំបញ្ជាក់ហេតុផល។ ទី៣ គាត់វែកញែកពីបទគម្ពីរ។ ទី៤ គាត់លះបង់ប្រយោជន៍ផ្ទាល់ខ្លួន ដោយផ្សព្វផ្សាយ«តាំងពីព្រឹកដល់ល្ងាច»។ នេះពិតជាគំរូដ៏ល្អមែន! តើមានលទ្ធផលអ្វី? លូការៀបរាប់ថា៖ «អ្នកខ្លះចាប់ផ្ដើមជឿ . . . តែអ្នកខ្លះទៀតមិនព្រមជឿទេ»។ ដូច្នេះ ក៏មានជម្លោះកើតឡើង ហើយពួកគេ«ចាប់ផ្ដើមចាកចេញទៅ»។—សកម្ម. ២៨:២៤, ២៥ក
១៦-១៨. ពេលប៉ូលឃើញប្រតិកម្មមិនល្អរបស់ជនជាតិយូដានៅក្រុងរ៉ូម ហេតុអ្វីបានជាគាត់មិនភ្ញាក់ផ្អើល? ហើយតើយើងគួរមានអារម្មណ៍យ៉ាងណា ពេលមនុស្សឯទៀតបដិសេធដំណឹងដែលយើងផ្សាយ?
១៦ ប៉ូលមិនភ្ញាក់ផ្អើលទេចំពោះប្រតិកម្មរបស់ជនជាតិយូដាទាំងនោះ ពីព្រោះគាត់ធ្លាប់ជួបប្រតិកម្មស្រដៀងគ្នានេះពីមុន ហើយការប្រព្រឹត្តដូចនោះក៏បានត្រូវប្រាប់ទុកក្នុងគម្ពីរដែរ។ (សកម្ម. ១៣:៤២-៤៧; ១៨:៥, ៦; ១៩:៨, ៩) ដូច្នេះ ជនជាតិយូដាដែលចាកចេញទៅដោយមិនព្រមទទួលយកដំណឹងល្អ ប៉ូលបាននិយាយទៅពួកគេថា៖ «អ្វីដែលឫទ្ធានុភាពបរិសុទ្ធបាននិយាយទៅកាន់ពួកបុព្វបុរសរបស់អ្នករាល់គ្នា តាមរយៈអេសាយជាអ្នកប្រកាសទំនាយ នោះគឺត្រឹមត្រូវណាស់ ពេលថា៖ ‹ចូរទៅឯបណ្ដាជននេះ ហើយនិយាយថា៖ «អ្នករាល់គ្នានឹងស្ដាប់ឮ តែមិនយល់អត្ថន័យអ្វីសោះ ហើយអ្នករាល់គ្នានឹងមើល តែមិនឃើញអ្វីសោះ។ ពីព្រោះចិត្តរបស់បណ្ដាជននេះបានទៅជារឹង»›»។ (សកម្ម. ២៨:២៥ខ-២៧) ពាក្យភាសាដើមដែលបានត្រូវបកប្រែថា«រឹង» សំដៅទៅលើចិត្តដែល«ក្រាស់ឃ្មឹក»។ ម្ល៉ោះហើយ ដំណឹងរាជាណាចក្រព្រះមិនអាចជ្រាបចូលក្នុងចិត្តរបស់ពួកគេបានទេ។ (សកម្ម. ២៨:២៧) នេះពិតជាគួរឲ្យសោកស្ដាយណាស់!
១៧ ក្នុងពាក្យបញ្ចប់ ប៉ូលបាននិយាយថា មិនដូចជនជាតិយូដាទាំងនោះ «ប្រជាជាតិនានា . . . ប្រាកដជានឹងស្ដាប់»។ (សកម្ម. ២៨:២៨; ចសព. ៦៧:២; អេ. ១១:១០) ពិតណាស់ សាវ័កប៉ូលអាចនិយាយអំពីរឿងនេះដោយមានទំនុកចិត្ត ពីព្រោះគាត់បានឃើញដោយផ្ទាល់ថា ជនជាតិដទៃជាច្រើនបានទទួលយកដំណឹងរាជាណាចក្រ!—សកម្ម. ១៣:៤៨; ១៤:២៧
១៨ ដូចប៉ូលដែរ យើងមិនចាំបាច់មានអារម្មណ៍អន់ចិត្តឡើយ ពេលមនុស្សឯទៀតបដិសេធដំណឹងដែលយើងផ្សាយ។ យ៉ាងណាមិញ យើងដឹងថាមានមនុស្សតិចណាស់ដែលនឹងរកឃើញផ្លូវទៅកាន់ជីវិត។ (ម៉ាថ. ៧:១៣, ១៤) ម្យ៉ាងទៀត ពេលមនុស្សដែលមានចិត្តស្មោះចូលរួមក្នុងការគោរពប្រណិប័តន៍ពិត សូមយើងរីករាយទទួលស្វាគមន៍ពួកគេយ៉ាងអស់ពីចិត្ត។—លូក. ១៥:៧
«ផ្សព្វផ្សាយ . . . អំពីរាជាណាចក្ររបស់ព្រះ» (សកម្មភាព ២៨:៣០, ៣១)
១៩. តើប៉ូលបានធ្វើអ្វីដើម្បីទាញយកប្រយោជន៍ច្រើនបំផុតពីស្ថានភាពរបស់គាត់?
១៩ លូកាបានបញ្ចប់សំណេររបស់គាត់ ដោយប្រើពាក្យពេចន៍យ៉ាងល្អ និងដោយសេចក្ដីស្រឡាញ់ថា៖ «ប៉ូលស្នាក់នៅក្នុងផ្ទះដែលគាត់ជួលអស់ពីរឆ្នាំ ហើយគាត់តែងតែទទួលអស់អ្នកដែលមកជួបគាត់យ៉ាងរាក់ទាក់។ គាត់ក៏ផ្សព្វផ្សាយប្រាប់ពួកគេអំពីរាជាណាចក្ររបស់ព្រះ ហើយបង្រៀនអំពីលោកម្ចាស់យេស៊ូគ្រិស្តដោយក្លាហានបំផុត និងដោយគ្មានអ្វីមករារាំងគាត់ឡើយ»។ (សកម្ម. ២៨:៣០, ៣១) ប៉ូលជាគំរូដ៏ល្អក្នុងការបង្ហាញជំនឿ ចិត្តខ្នះខ្នែង និងការទទួលអ្នកឯទៀតដោយរាក់ទាក់!
២០, ២១. សូមលើកឧទាហរណ៍ខ្លះអំពីអស់អ្នកដែលបានទទួលប្រយោជន៍ពីកិច្ចផ្សព្វផ្សាយរបស់ប៉ូលនៅក្រុងរ៉ូម។
២០ ក្នុងចំណោមអស់អ្នកដែលប៉ូលបានទទួលដោយចិត្តសប្បុរស មានបុរសម្នាក់ឈ្មោះអូណេស៊ីម ជាខ្ញុំបម្រើដែលរត់ចេញពីម្ចាស់នៅក្រុងកូឡុស។ ប៉ូលបានជួយអូណេស៊ីមឲ្យទៅជាអ្នកកាន់តាមគ្រិស្ត ហើយជាលទ្ធផល អូណេស៊ីមបានទៅជា«បងប្អូនស្មោះត្រង់និងជាទីស្រឡាញ់»របស់ប៉ូល។ តាមពិត ប៉ូលបាននិយាយថា៖ «កូនរបស់ខ្ញុំ គឺអូណេស៊ីម។ ខ្ញុំបានទៅជាឪពុករបស់គាត់»។ (កូឡ. ៤:៩; ភីលេ. ១០-១២) ប៉ូលច្បាស់ជាបានទទួលការលើកទឹកចិត្តជាខ្លាំងពីបទពិសោធន៍នេះ! a
២១ បងប្អូនឯទៀតក៏បានទទួលប្រយោជន៍ពីគំរូដ៏ល្អរបស់ប៉ូលដែរ។ ប៉ូលបានសរសេរទៅបងប្អូននៅក្រុងភីលីពថា៖ «អ្វីៗដែលបានកើតឡើងដល់ខ្ញុំ បានជួយធ្វើឲ្យដំណឹងល្អជឿនទៅមុខវិញ។ ម្ល៉ោះហើយ ពួកអង្គរក្សរបស់អធិរាជនិងអ្នកឯទៀតទាំងប៉ុន្មានដឹងជាទូទៅថា ខ្ញុំជាប់ចំណងដោយសារកាន់តាមគ្រិស្ត ហើយការដែលខ្ញុំជាប់ចំណង បានធ្វើឲ្យបងប្អូនភាគច្រើនក្នុងកិច្ចបម្រើលោកម្ចាស់មានទំនុកចិត្ត ហើយឥឡូវពួកគាត់មានចិត្តក្លាហានជាងមុន ដើម្បីប្រកាសបណ្ដាំរបស់ព្រះដោយចិត្តអង់អាច»។—ភី. ១:១២-១៤
២២. តើប៉ូលបានប្រើពេលវេលាដែលជាប់ឃុំនៅក្រុងរ៉ូម ឲ្យកើតប្រយោជន៍ច្រើនបំផុតយ៉ាងដូចម្ដេច?
២២ ប៉ូលបានប្រើពេលវេលាដែលជាប់ឃុំនៅក្រុងរ៉ូមឲ្យកើតប្រយោជន៍ច្រើនបំផុត ដោយសរសេរសំបុត្រសំខាន់ៗ ដែលឥឡូវជាផ្នែកនៃបទគម្ពីរគ្រិស្តសាសនិកជាភាសាក្រិច។ b សំបុត្រទាំងនោះបានផ្ដល់ប្រយោជន៍ដល់គ្រិស្តសាសនិកនៅសតវត្សរ៍ទី១ ដែលប៉ូលបានសរសេរទៅឲ្យ។ យើងក៏ទទួលប្រយោជន៍ពីសំបុត្ររបស់ប៉ូលដែរ ពីព្រោះអ្វីដែលគាត់សរសេរក្រោមការដឹកនាំរបស់ព្រះ គឺនៅតែមានប្រសិទ្ធភាពដល់សព្វថ្ងៃនេះ។—២ធី. ៣:១៦, ១៧
២៣, ២៤. ទោះជានៅសព្វថ្ងៃគ្រិស្តសាសនិកជាច្រើនជាប់គុកដោយអយុត្តិធម៌ក្ដី តើពួកគេអាចរក្សាអំណរនិងបន្តផ្សព្វផ្សាយដូចប៉ូលតាមរបៀបណា?
២៣ សៀវភៅសកម្មភាពមិនបានចែងអំពីពេលណា ដែលប៉ូលបានត្រូវដោះលែងទេ។ ប៉ុន្តែ យ៉ាងហោចណាស់ ប៉ូលជាប់គុកអស់បួនឆ្នាំគឺ ពីរឆ្នាំនៅក្រុងសេសារៀ និងពីរឆ្នាំនៅក្រុងរ៉ូម។ c (សកម្ម. ២៣:៣៥; ២៤:២៧) ទោះជាយ៉ាងនោះក្ដី ប៉ូលនៅតែរក្សាទស្សនៈវិជ្ជមាន ហើយព្យាយាមធ្វើអ្វីទាំងអស់ដែលគាត់អាចធ្វើបានដើម្បីបន្តបម្រើព្រះ។ ស្រដៀងគ្នាដែរ នៅសព្វថ្ងៃអ្នកបម្រើជាច្រើនរបស់ព្រះយេហូវ៉ានៅតែរក្សាអំណរ និងបន្តផ្សព្វផ្សាយ ទោះជាជាប់គុកដោយអយុត្តិធម៌ដោយសារជំនឿរបស់ខ្លួនក្ដី។ សូមពិចារណាគំរូរបស់បងអាឌុលហ្វូដែលជាប់គុកនៅប្រទេសអេស្ប៉ាញ ដោយសារកាន់ជំហរអព្យាក្រឹតជាគ្រិស្តសាសនិក។ មន្ត្រីម្នាក់បាននិយាយថា៖ «យើងភ្ញាក់ផ្អើលខ្លាំងណាស់ចំពោះអ្នក។ ពេលយើងខំធ្វើឲ្យជីវិតរបស់អ្នកកាន់តែពិបាក អ្នកកាន់តែញញឹម ហើយនិយាយកាន់តែសប្បុរស»។
២៤ ក្រោយមក ពួកមន្ត្រីគុកទុកចិត្តបងអាឌុលហ្វូ ដូច្នេះពួកគេលែងបិទទ្វារបន្ទប់គុករបស់គាត់ទៀត។ ពួកឆ្មាំគុកច្រើនតែទៅជួបគាត់ដើម្បីសួរអំពីគម្ពីរ។ មានឆ្មាំគុកម្នាក់ ឲ្យតែដល់វេនគាត់យាម គាត់តែងតែចូលក្នុងបន្ទប់គុករបស់បងអាឌុលហ្វូដើម្បីអានគម្ពីរ ហើយរាល់ដងបងអាឌុលហ្វូត្រូវធ្វើជាអ្នកយាមជំនួសគាត់។ ឥឡូវ អ្នកទោសបែរជាត្រូវ«យាម»ឆ្មាំគុកទៅវិញ! សូមឲ្យគំរូដ៏ស្មោះត្រង់របស់សាក្សីទាំងនោះ ជំរុញយើងឲ្យ«មានចិត្តក្លាហានជាងមុន ដើម្បីប្រកាសបណ្ដាំរបស់ព្រះដោយចិត្តអង់អាច» ទោះជាស្ថិតក្នុងស្ថានភាពដ៏ពិបាកក៏ដោយ។
២៥, ២៦. ក្នុងរយៈពេលមិនដល់៣០ឆ្នាំ តើប៉ូលបានឃើញទំនាយដ៏អស្ចារ្យអ្វីក្លាយជាការពិត? ហើយតើទំនាយនោះបានសម្រេចដល់កម្រិតណានៅសម័យយើង?
២៥ សៀវភៅសកម្មភាពដែលពោរពេញដោយការពណ៌នាអំពីចិត្តខ្នះខ្នែងរបស់ពួកសាវ័ក បញ្ចប់ដោយពាក្យដ៏គួរឲ្យរំភើបចិត្តថា សាវ័កម្នាក់របស់គ្រិស្តត្រូវជាប់ឃុំក្នុងផ្ទះ តែបន្ត«ផ្សព្វផ្សាយ . . . អំពីរាជាណាចក្ររបស់ព្រះ»ដល់មនុស្សទាំងអស់ ដែលមកសួរសុខទុក្ខគាត់។ ក្នុងជំពូកទី១ យើងបានពិចារណាអំពីភារកិច្ចដែលលោកយេស៊ូបានប្រគល់ឲ្យពួកអ្នកកាន់តាមលោក ពេលលោកមានប្រសាសន៍ថា៖ «អ្នករាល់គ្នានឹងទទួលឫទ្ធានុភាព ពេលឫទ្ធានុភាពបរិសុទ្ធរបស់ព្រះមកសណ្ឋិតលើអ្នករាល់គ្នា ហើយអ្នករាល់គ្នានឹងធ្វើជាសាក្សីបញ្ជាក់អំពីខ្ញុំនៅក្រុងយេរូសាឡិម នៅតំបន់យូឌាទាំងមូល នៅទូទាំងស្រុកសាម៉ារី និងរហូតដល់កន្លែងឆ្ងាយបំផុតនៅផែនដី»។ (សកម្ម. ១:៨) មិនដល់៣០ឆ្នាំក្រោយមក ដំណឹងអំពីរាជាណាចក្ររបស់ព្រះ បានត្រូវ«ប្រកាសក្នុងចំណោមមនុស្សទាំងអស់នៅក្រោមមេឃ»។ d (កូឡ. ១:២៣) នេះជាភ័ស្តុតាងដ៏ជាក់ស្ដែងអំពីឥទ្ធិពលនៃឫទ្ធានុភាពរបស់ព្រះ!—សាក. ៤:៦
២៦ នៅសព្វថ្ងៃ ឫទ្ធានុភាពរបស់ព្រះបន្តដឹកនាំបងប្អូនរបស់គ្រិស្តដែលនៅសល់នៅផែនដី និង«ចៀមឯទៀត»ដែលរួមបម្រើជាមួយនឹងពួកគាត់ ឲ្យបន្ត«ធ្វើជាសាក្សីបញ្ជាក់យ៉ាងសព្វគ្រប់អំពីរាជាណាចក្ររបស់ព្រះ»នៅ២៤០ប្រទេស! (យ៉ូន. ១០:១៦; សកម្ម. ២៨:២៣) តើអ្នកកំពុងចូលរួមក្នុងកិច្ចការផ្សព្វផ្សាយយ៉ាងអស់ពីសមត្ថភាពឬទេ?
a ប៉ូលចង់ទុកអូណេស៊ីមឲ្យនៅជាមួយនឹងគាត់ ប៉ុន្តែការធ្វើបែបនេះខុសនឹងច្បាប់រ៉ូម ហើយក៏បំពានសិទ្ធិភីលេម៉ូនដែលជាម្ចាស់របស់អូណេស៊ីម និងជាអ្នកកាន់តាមគ្រិស្តដែរ។ ដូច្នេះ អូណេស៊ីមក៏ត្រឡប់ទៅឯភីលេម៉ូនវិញ ទាំងនាំយកសំបុត្រពីប៉ូលទៅជាមួយផង។ សំបុត្រនោះលើកទឹកចិត្តភីលេម៉ូនឲ្យទទួលស្វាគមន៍ខ្ញុំបម្រើដោយចិត្តសប្បុរស និងជាបងប្អូនរួមជំនឿ។—ភីលេ. ១៣-១៩
b សូមមើលប្រអប់« សំបុត្រប្រាំដែលប៉ូលបានសរសេរ ពេលជាប់ឃុំលើកទី១នៅក្រុងរ៉ូម»។
c សូមមើលប្រអប់« ជីវិតប៉ូលក្រោយឆ្នាំ៦១ គ.ស.»។
d សូមមើលប្រអប់« ដំណឹងល្អ‹បានត្រូវប្រកាសក្នុងចំណោមមនុស្សទាំងអស់›»។
