ជំពូកទី២
«អ្នករាល់គ្នានឹងធ្វើជាសាក្សីបញ្ជាក់អំពីខ្ញុំ»
របៀបដែលលោកយេស៊ូជួយពួកសាវ័កឲ្យត្រៀមខ្លួនដើម្បីនាំមុខក្នុងការផ្សព្វផ្សាយ
មានមូលដ្ឋានលើសកម្មភាព ១:១-២៦
១-៣. តើលោកយេស៊ូចាកចេញពីពួកសាវ័ករបស់លោកយ៉ាងដូចម្ដេច? ហើយតើនេះនាំឲ្យមានសំណួរអ្វីខ្លះ?
ពួកសាវ័កមិនចង់ឲ្យពេលវេលានោះចប់ឡើយ។ ប៉ុន្មានសប្ដាហ៍កន្លងទៅនេះ គឺពិតជាគួរឲ្យរំភើបចិត្តណាស់សម្រាប់ពួកគាត់! កាលដែលលោកយេស៊ូបានត្រូវប្រោសឲ្យរស់ឡើងវិញ បានធ្វើឲ្យពួកគាត់ប្រែពីអស់សង្ឃឹម ទៅជាមានអំណរក្រៃលែង។ ឥឡូវអស់៤០ថ្ងៃដែលលោកយេស៊ូ បានលេចមកជួបអ្នកកាន់តាមលោកអស់ជាច្រើនដង ដើម្បីបង្រៀននិងលើកទឹកចិត្តពួកគាត់ថែមទៀត។ ប៉ុន្តែ នៅថ្ងៃនេះ លោកលេចមកជួបពួកគាត់ជាលើកចុងក្រោយ។
២ កាលដែលកំពុងឈរជុំគ្នានៅលើភ្នំដើមអូលីវ ពួកសាវ័កបានស្ដាប់គ្រប់ទាំងប្រសាសន៍របស់លោកយេស៊ូ។ លុះពេលលោកមានប្រសាសន៍ចប់ លោកលើកដៃឲ្យពរដល់ពួកគាត់។ អ្វីៗហាក់ដូចជាលឿនណាស់សម្រាប់ពួកគាត់។ បន្ទាប់មក លោកចាប់ផ្ដើមឡើងផុតពីដី! ពួកអ្នកកាន់តាមសម្លឹងមើលលោក កាលដែលលោកឡើងខ្ពស់ទៅៗ។ នៅទីបំផុត ពពកបានគ្របបាំងលោកពីភ្នែកពួកគាត់។ ទោះជាលោកទៅបាត់ក៏ដោយ ពួកគាត់នៅតែសម្លឹងមើលទៅមេឃ។—លូក. ២៤:៥០; សកម្ម. ១:៩, ១០
៣ ព្រឹត្តិការណ៍នេះមានឥទ្ធិពលយ៉ាងខ្លាំង មកលើជីវិតរបស់ពួកសាវ័ក។ ក្រោយពីលោកយេស៊ូគ្រិស្តដែលជាម្ចាស់របស់ពួកគាត់ឡើងទៅស្ថានសួគ៌ តើពួកគាត់នឹងធ្វើអ្វី? យើងជឿជាក់ថា ម្ចាស់របស់ពួកគាត់បានជួយពួកគាត់ឲ្យត្រៀមខ្លួន ដើម្បីបន្តធ្វើកិច្ចការដែលលោកបានចាប់ផ្ដើម។ តើតាមរបៀបណាលោកបានបង្ហាត់បង្រៀនពួកគាត់ ឲ្យបំពេញភារកិច្ចដ៏សំខាន់នេះ? ហើយតើពួកគាត់មានប្រតិកម្មយ៉ាងណា? តើនេះទាក់ទងយ៉ាងណានឹងគ្រិស្តសាសនិកនៅសព្វថ្ងៃ? ជំពូកទី១នៃសៀវភៅសកម្មភាព មានចម្លើយដ៏គួរឲ្យលើកទឹកចិត្ត។
‹លោកយេស៊ូបានបង្ហាញខ្លួនជាច្រើនដង› (សកម្មភាព ១:១-៥)
៤. ពេលលូកាសរសេរសៀវភៅសកម្មភាព តើដើមដំបូងគាត់រៀបរាប់ទៅកាន់អ្នកណា?
៤ ពេលលូកាសរសេរសៀវភៅសកម្មភាព ដើមដំបូងគាត់រៀបរាប់ដំណើររឿងទៅកាន់ថេអូហ្វីល ដែលជាមនុស្សដូចគ្នាក្នុងសៀវភៅដំណឹងល្អរបស់លូកា។ a នេះបញ្ជាក់យ៉ាងច្បាស់ថា កំណត់ហេតុក្នុងសៀវភៅសកម្មភាព បន្តពីកំណត់ហេតុក្នុងសៀវភៅដំណឹងល្អដែលលូកាបានសរសេរ។ ក្នុងសៀវភៅសកម្មភាព លូកាចាប់ផ្ដើមដោយសង្ខេបព្រឹត្តិការណ៍ ដែលបានកត់ទុកនៅចុងបញ្ចប់នៃសៀវភៅដំណឹងល្អ ដោយប្រើពាក្យផ្សេងគ្នា និងបន្ថែមព័ត៌មានលម្អិតមួយចំនួនទៀត។
៥, ៦. (ក) តើអ្វីអាចជួយពួកអ្នកកាន់តាមលោកយេស៊ូឲ្យមានជំនឿរឹងមាំជានិច្ច? (ខ) ហេតុអ្វីជំនឿរបស់គ្រិស្តសាសនិកនៅសព្វថ្ងៃផ្អែកលើ‹ភ័ស្តុតាងច្បាស់លាស់ជាច្រើន›?
៥ តើអ្វីនឹងជួយពួកអ្នកកាន់តាមលោកយេស៊ូឲ្យមានជំនឿរឹងមាំជានិច្ច? នៅសកម្មភាព ១:៣ ចែងអំពីលោកយេស៊ូថា៖ «លោកបានបង្ហាញខ្លួន[ឬបង្ហាញភ័ស្តុតាងច្បាស់លាស់]ឲ្យពួកគាត់ឃើញជាច្រើនដង . . . ថា លោកមានជីវិតរស់នៅពិតមែន»។ ក្នុងគម្ពីរ មានតែលូកាជា«គ្រូពេទ្យជាទីស្រឡាញ់»ប៉ុណ្ណោះ ដែលប្រើពាក្យ«បង្ហាញខ្លួន» ឬបញ្ជាក់«ភ័ស្តុតាងច្បាស់លាស់»។ (កូឡ. ៤:១៤) នោះគឺជាពាក្យដែលប្រើក្នុងសំណេរវេជ្ជសាស្ត្រ និងជាពាក្យដែលមានន័យថាភ័ស្តុតាងដ៏គួរឲ្យទុកចិត្ត និងអាចជឿបាន។ លោកយេស៊ូបានផ្ដល់ភ័ស្តុតាងបែបនោះ! លោកបានលេចមកជួបពួកអ្នកកាន់តាមជាច្រើនដង។ ជួនកាលលោកលេចមកជួបម្នាក់ឬពីរនាក់ តែពេលខ្លះទៀតលោកលេចមកជួបពួកសាវ័កទាំងអស់ ហើយនៅពេលមួយលោកលេចមកជួបពួកអ្នកកាន់តាមជាង៥០០នាក់។ (១កូ. ១៥:៣-៦) ភ័ស្តុតាងទាំងអស់នេះ ពិតជាពង្រឹងជំនឿពួកអ្នកកាន់តាមលោកយេស៊ូមែន!
៦ ជំនឿរបស់គ្រិស្តសាសនិកពិតនៅសព្វថ្ងៃនេះ ក៏មានមូលដ្ឋានលើ‹ភ័ស្តុតាងច្បាស់លាស់ជាច្រើន›ដែរ។ តើមានភ័ស្តុតាងដែលបញ្ជាក់ថាលោកយេស៊ូធ្លាប់រស់នៅផែនដី ហើយស្លាប់ដើម្បីភាពខុសឆ្គងរបស់យើង រួចបានត្រូវប្រោសឲ្យរស់ឡើងវិញឬទេ? ពិតជាមានមែន! ក្នុងបណ្ដាំរបស់ព្រះ មានកំណត់ហេតុអំពីសាក្សីដែលអាចទុកចិត្តបាន នេះផ្ដល់នូវភ័ស្តុតាងដ៏គួរឲ្យជឿជាក់ទាំងអស់ដែលយើងត្រូវការ។ ការសិក្សាកំណត់ហេតុទាំងនេះ ព្រមទាំងអធិដ្ឋានសុំជំនួយពីព្រះ អាចធ្វើឲ្យជំនឿរបស់យើងកាន់តែរឹងមាំ។ សូមចាំថាជំនឿពិតមានមូលដ្ឋានលើភ័ស្តុតាងច្បាស់លាស់ មិនមែនចេះតែជឿដោយងងឹតងងុលនោះទេ។ ការមានជំនឿពិត គឺសំខាន់ចាំបាច់ដើម្បីទទួលជីវិតដែលគ្មានទីបញ្ចប់។—យ៉ូន. ៣:១៦
៧. ស្ដីអំពីការបង្រៀននិងផ្សព្វផ្សាយ តើលោកយេស៊ូបានទុកគំរូអ្វីសម្រាប់ពួកអ្នកកាន់តាមលោក?
៧ លោកយេស៊ូក៏បាន«ប្រាប់ពួកគាត់អំពីរាជាណាចក្ររបស់ព្រះ»ដែរ។ ជាឧទាហរណ៍ លោកបានពន្យល់អំពីទំនាយដែលថា មេស្ស៊ីនឹងត្រូវរងទុក្ខ ហើយស្លាប់។ (លូក. ២៤:១៣-៣២, ៤៦, ៤៧) ពេលលោកយេស៊ូពន្យល់អំពីតួនាទីរបស់លោកជាមេស្ស៊ី នោះលោកបានលើកឡើងអំពីរាជាណាចក្ររបស់ព្រះ ពីព្រោះព្រះបានតែងតាំងលោកឲ្យធ្វើជាស្ដេច។ រាជាណាចក្រព្រះគឺជាប្រធានបទ ដែលលោកយេស៊ូតែងតែលើកយកមកផ្សព្វផ្សាយ ហើយអ្នកកាន់តាមលោកសព្វថ្ងៃនេះក៏ធ្វើតាមគំរូរបស់លោកដែរ ដោយផ្សព្វផ្សាយអំពីរាជាណាចក្រព្រះ។—ម៉ាថ. ២៤:១៤; លូក. ៤:៤៣
«រហូតដល់កន្លែងឆ្ងាយបំផុតនៅផែនដី» (សកម្មភាព ១:៦-១២)
៨, ៩. (ក) តើពួកសាវ័កមានទស្សនៈមិនត្រឹមត្រូវពីរយ៉ាងអ្វី? (ខ) តើលោកយេស៊ូបានកែតម្រូវទស្សនៈរបស់ពួកគាត់យ៉ាងដូចម្ដេច? ហើយតើមានមេរៀនអ្វីសម្រាប់គ្រិស្តសាសនិកនៅសព្វថ្ងៃ?
៨ ពេលពួកសាវ័កមកជួបជុំគ្នានៅលើភ្នំដើមអូលីវ ពួកគាត់បានជួបលោកយេស៊ូជាលើកចុងក្រោយនៅផែនដី។ ពួកគាត់បានសួរលោក ដោយចង់ដឹងយ៉ាងខ្លាំងថា៖ «លោកម្ចាស់ តើលោកនឹងតាំងរាជាណាចក្រអ៊ីស្រាអែលឡើងវិញនៅពេលនេះឬ?»។ (សកម្ម. ១:៦) សំណួរដែលពួកសាវ័កបានសួរនេះ បង្ហាញទស្សនៈមិនត្រឹមត្រូវពីរយ៉ាង។ ទី១ ពួកគាត់បានសន្និដ្ឋានថា រាជាណាចក្រព្រះនឹងត្រូវស្ថាបនាឡើងវិញសម្រាប់ជនជាតិអ៊ីស្រាអែល។ ទី២ ពួកគាត់រំពឹងថារាជាណាចក្រព្រះនឹងចាប់ផ្ដើមគ្រប់គ្រងភ្លាមៗ«នៅពេលនេះ»។ តើតាមរបៀបណាលោកយេស៊ូបានជួយពួកគាត់ឲ្យកែតម្រូវទស្សនៈមិនត្រឹមត្រូវនោះ?
៩ ស្ដីអំពីទស្សនៈមិនត្រឹមត្រូវទី១ លោកយេស៊ូទំនងជាដឹងថាការយល់ដឹងរបស់ពួកគាត់ នឹងត្រូវកែតម្រូវឆាប់ៗខាងមុខនេះ។ តាមពិតនៅ១០ថ្ងៃទៀត អ្នកកាន់តាមលោកនឹងឃើញនូវការរៀបចំក្រុមថ្មីហៅថា អ៊ីស្រាអែលនៃព្រះ! ទំនាក់ទំនងរបស់ព្រះជាមួយនឹងជនជាតិអ៊ីស្រាអែលពីកំណើត ជិតដល់ទីបញ្ចប់ហើយ។ ស្ដីអំពីទស្សនៈមិនត្រឹមត្រូវទី២ លោកយេស៊ូបានរំលឹកពួកគាត់យ៉ាងសប្បុរសថា៖ «អ្នករាល់គ្នាមិនចាំបាច់ដឹងអំពីពេលវេលាឬគ្រាកំណត់ ដែលបិតានៅស្ថានសួគ៌បានសម្រេចរួចហើយនោះទេ»។ (សកម្ម. ១:៧) ព្រះយេហូវ៉ាតែងតែធ្វើតាមពេលវេលា ដែលលោកបានកំណត់ជានិច្ច។ មុនពេលលោកយេស៊ូស្លាប់ លោកបានប្រាប់ថា សូម្បីតែបុត្ររបស់ព្រះក៏មិនជ្រាបថាទីបញ្ចប់នឹងមកនៅ«ថ្ងៃនិងម៉ោង»ណានោះដែរ «មានតែបិតាដែលស្ថិតនៅស្ថានសួគ៌ប៉ុណ្ណោះដែលជ្រាប»។ (ម៉ាថ. ២៤:៣៦) រហូតមកដល់សព្វថ្ងៃ បើគ្រិស្តសាសនិកខ្វល់ខ្វាយហួសហេតុពេកអំពីពេលវេលានៃទីបញ្ចប់របស់ពិភពលោកនេះ នោះមានន័យថាពួកគេកំពុងខ្វល់ខ្វាយអំពីរឿងដែលពួកគេមិនចាំបាច់ដឹង។
១០. ដូចពួកសាវ័ក តើយើងត្រូវបណ្ដុះឲ្យមានចិត្តគំនិតបែបណា? ហើយហេតុអ្វី?
១០ ទោះជាយ៉ាងណាក្ដី យើងមិនគួរមើលងាយពួកសាវ័ករបស់លោកយេស៊ូ ដែលជាអ្នកមានជំនឿខ្លាំងនោះទេ។ ពួកគាត់ទទួលយកការកែតម្រង់ដោយចិត្តរាបទាប។ បន្ថែមទៅទៀត ទោះជាសំណួររបស់ពួកគាត់បង្ហាញអំពីទស្សនៈមិនត្រឹមត្រូវក៏ដោយ សំណួរនោះក៏បង្ហាញអំពីចិត្តគំនិតល្អរបស់ពួកគាត់ដែរ។ ម្ដងហើយម្ដងទៀត លោកយេស៊ូបានដាស់តឿនពួកអ្នកកាន់តាមលោក ឲ្យ«ចាំយាម»។ (ម៉ាថ. ២៤:៤២; ២៥:១៣; ២៦:៤១) ពួកគាត់ពិតជាបានធ្វើដូច្នេះមែន ដោយសារពួកគាត់តែងទន្ទឹងចាំមើលទីសម្អាងដែលបញ្ជាក់ថា ព្រះយេហូវ៉ាហៀបនឹងចាត់វិធានការ។ នេះក៏ជាចិត្តគំនិតដែលយើងត្រូវបណ្ដុះឲ្យមាននៅសព្វថ្ងៃដែរ។ ជាពិសេស អំឡុង«គ្រាចុងក្រោយបង្អស់»ដ៏សំខាន់នេះ យើងត្រូវចាំយាមកាន់តែខ្លាំងជាងមុនទៅទៀត។—២ធី. ៣:១-៥
១១, ១២. (ក) តើលោកយេស៊ូបានប្រគល់ភារកិច្ចអ្វីដល់ពួកអ្នកកាន់តាមលោក? (ខ) ហេតុអ្វីជាការសមរម្យដែលលោកយេស៊ូមានប្រសាសន៍អំពីឫទ្ធានុភាពបរិសុទ្ធ មុនលោកប្រាប់អំពីភារកិច្ចផ្សព្វផ្សាយ?
១១ លោកយេស៊ូបានរំលឹកពួកសាវ័កអំពីអ្វីដែលពួកគាត់ គួរយកចិត្តទុកដាក់ជាចម្បង។ លោកមានប្រសាសន៍ថា៖ «អ្នករាល់គ្នានឹងទទួលឫទ្ធានុភាព ពេលឫទ្ធានុភាពបរិសុទ្ធរបស់ព្រះមកសណ្ឋិតលើអ្នករាល់គ្នា ហើយអ្នករាល់គ្នានឹងធ្វើជាសាក្សីបញ្ជាក់អំពីខ្ញុំនៅក្រុងយេរូសាឡិម នៅតំបន់យូឌាទាំងមូល នៅទូទាំងស្រុកសាម៉ារី និងរហូតដល់កន្លែងឆ្ងាយបំផុតនៅផែនដី»។ (សកម្ម. ១:៨) ដំណឹងអំពីការប្រោសលោកយេស៊ូឲ្យរស់ឡើងវិញ នឹងត្រូវប្រកាសមុនបង្អស់នៅក្រុងយេរូសាឡិម ជាកន្លែងដែលគេបានសម្លាប់លោក។ បន្ទាប់មក ដំណឹងនោះនឹងត្រូវប្រកាសដល់តំបន់យូឌាទាំងមូល រួចដល់ស្រុកសាម៉ារី និងរហូតដល់កន្លែងឆ្ងាយៗ។
១២ ជាការសមរម្យមែន មុននឹងលោកយេស៊ូប្រាប់អំពីភារកិច្ចផ្សព្វផ្សាយដល់ពួកអ្នកកាន់តាមលោក នោះលោកបានសន្យាម្ដងទៀតថា ឫទ្ធានុភាពបរិសុទ្ធនឹងជួយពួកគេ។ តាមពិតពាក្យ«ឫទ្ធានុភាពបរិសុទ្ធ» មានជាង៤០ដងក្នុងសៀវភៅសកម្មភាព។ ម្ដងហើយម្ដងទៀត កំណត់ហេតុដ៏រស់រវើកក្នុងសៀវភៅនេះបញ្ជាក់យ៉ាងច្បាស់ថា យើងមិនអាចសម្រេចបំណងប្រាថ្នារបស់ព្រះយេហូវ៉ាបានទេ បើគ្មានជំនួយពីឫទ្ធានុភាពបរិសុទ្ធរបស់លោក។ ដូច្នេះ ជាការសំខាន់ណាស់ ដែលយើងអធិដ្ឋានសុំឫទ្ធានុភាពពីព្រះជាទៀងទាត់! (លូក. ១១:១៣) នៅឥឡូវនេះ យើងកាន់តែត្រូវការឫទ្ធានុភាពរបស់ព្រះជាងពេលណាទាំងអស់។
១៣. តើកិច្ចការផ្សព្វផ្សាយដែលព្រះប្រគល់ឲ្យរាស្ត្ររបស់លោកនៅសព្វថ្ងៃមានកម្រិតធំប៉ុនណា? ហើយហេតុអ្វីយើងគួរបំពេញភារកិច្ចនេះយ៉ាងសកម្ម?
១៣ ឥឡូវ«កន្លែងឆ្ងាយបំផុតនៅផែនដី»ក្នុងសម័យយើង គឺខុសគ្នាពីសម័យនោះ។ ទោះជាយ៉ាងណាក្ដី ដូចបានលើកឡើងនៅជំពូកមុន សាក្សីព្រះយេហូវ៉ាបានទទួលយកភារកិច្ចផ្សព្វផ្សាយយ៉ាងស្មោះអស់ពីចិត្ត ដោយសារពួកគេដឹងថាព្រះចង់ឲ្យមនុស្សគ្រប់ប្រភេទ ឮដំណឹងល្អអំពីរាជាណាចក្រលោក។ (១ធី. ២:៣, ៤) តើអ្នកកំពុងចូលរួមយ៉ាងសកម្មក្នុងកិច្ចការដែលសង្គ្រោះជីវិតនេះឬទេ? គ្មានកិច្ចការណាដែលធ្វើឲ្យស្កប់ចិត្តជាងនេះឡើយ! ព្រះយេហូវ៉ានឹងផ្ដល់កម្លាំងដែលអ្នកត្រូវការដើម្បីសម្រេចកិច្ចការនេះ។ សៀវភៅសកម្មភាពនឹងប្រាប់អ្នកយ៉ាងច្រើនអំពីវិធីផ្សព្វផ្សាយត្រឹមត្រូវ និងចិត្តគំនិតដែលអ្នកគួរមាន ដើម្បីជួយអ្នកឲ្យកាន់តែមានភាពប៉ិនប្រសប់ក្នុងកិច្ចបម្រើផ្សាយ។
១៤, ១៥. (ក) តើទេវតាបាននិយាយយ៉ាងណាអំពីការត្រឡប់មកវិញរបស់គ្រិស្ត? ហើយតើទេវតាចង់មានន័យអ្វី? (សូមមើលកំណត់សម្គាល់) (ខ) តើតាមរបៀបណាគ្រិស្តបានត្រឡប់មកវិញ‹តាមបែបដូចគ្នា› ពេលដែលលោកចាកចេញទៅ?
១៤ ដូចបានរៀបរាប់នៅដើមជំពូកនេះ លោកយេស៊ូបានឡើងផុតពីដី ហើយពួកអ្នកកាន់តាមក៏មើលលោកលែងឃើញទៀត។ ប៉ុន្តែ សាវ័កទាំង១១នាក់នៅតែសម្លឹងមើលទៅមេឃ។ ទីបំផុត ទេវតាពីររូបបានលេចមកជួបពួកគាត់ ហើយបន្ទោសតិចៗថា៖ «អ្នកស្រុកកាលីឡេអើយ ហេតុអ្វីអ្នករាល់គ្នាកំពុងឈរមើលមេឃដូច្នេះ? លោកយេស៊ូនោះហើយដែលបានត្រូវយកឡើងទៅលើមេឃ ក៏នឹងមកតាមបែបដូចដែលអ្នករាល់គ្នាឃើញលោកឡើងទៅលើមេឃដែរ»។ (សកម្ម. ១:១១) តើទេវតាចង់មានន័យថាលោកយេស៊ូនឹងត្រឡប់មកវិញ ក្នុងរូបកាយជាសាច់ឈាមឬរូបកាយដដែល ដូចសាសនាខ្លះបង្រៀនឬ? ទេវតាមិនបានមានន័យដូច្នោះទេ។ ហេតុអ្វីយើងដឹង?
១៥ ទេវតាបាននិយាយថា លោកយេស៊ូនឹងត្រឡប់មកវិញ«តាមបែបដូចដែលអ្នករាល់គ្នាឃើញ» b មិនមែនថាតាមរូបកាយដូចគ្នាទេ។ តើលោកយេស៊ូបានចាកចេញទៅ តាមបែបយ៉ាងណា? ពេលដែលទេវតាចាប់ផ្ដើមនិយាយទៅកាន់ពួកសាវ័ក លោកយេស៊ូបានឡើងទៅបាត់ពីភ្នែកពួកគាត់ហើយ។ មានតែពួកសាវ័កប៉ុណ្ណោះយល់ថា លោកយេស៊ូបានចាកចេញពីផែនដី ហើយឡើងទៅឯបិតារបស់លោកនៅស្ថានសួគ៌។ ដូច្នេះ ពេលគ្រិស្តត្រឡប់មកវិញ លោកនឹងមកតាមបែបដូចគ្នាដែរ។ ពិតជាកើតឡើងដូច្នោះមែន! សព្វថ្ងៃនេះ មានតែអស់អ្នកដែលយល់បទគម្ពីរច្បាស់ទេ ទើបដឹងថាលោកយេស៊ូកំពុងគ្រប់គ្រងជាស្ដេច។ (លូក. ១៧:២០) ម្ល៉ោះហើយ យើងត្រូវស្គាល់ភ័ស្តុតាងដែលបញ្ជាក់អំពីវត្តមានរបស់គ្រិស្ត ហើយប្រាប់អ្នកឯទៀតអំពីរឿងនោះ ដើម្បីឲ្យពួកគេយល់ថា គ្រាដែលយើងរស់នៅគឺជាគ្រាបន្ទាន់។
«សូមលោកបញ្ជាក់ថា . . . លោកបានជ្រើសរើសបុរសមួយណា» (សកម្មភាព ១:១៣-២៦)
១៦-១៨. (ក) នៅសកម្មភាព ១:១៣, ១៤ តើយើងរៀនអ្វីអំពីការជួបជុំគ្នារបស់គ្រិស្តសាសនិកដើម្បីគោរពប្រណិប័តន៍ព្រះ? (ខ) តើយើងអាចរៀនអ្វីពីគំរូរបស់ម៉ារៀជាម្ដាយលោកយេស៊ូ? (គ) ហេតុអ្វីជាការសំខាន់ដែលយើងចូលរួមកិច្ចប្រជុំគ្រិស្តសាសនិកនៅសព្វថ្ងៃ?
១៦ យើងអាចយល់មូលហេតុដែលពួកសាវ័ក «ត្រឡប់ទៅក្រុងយេរូសាឡិមវិញដោយមានអំណរពន់ពេក»។ (លូក. ២៤:៥២) ប៉ុន្តែ តើពួកគាត់នឹងធ្វើតាមបង្គាប់និងការណែនាំរបស់គ្រិស្តយ៉ាងណា? នៅសកម្មភាព ជំពូកទី១ ខ១៣និង១៤ ប្រាប់ថាពួកអ្នកកាន់តាមបានជួបជុំគ្នានៅ«បន្ទប់ខាងលើ» ហើយយើងនឹងរៀនព័ត៌មានលម្អិតដ៏គួរឲ្យចាប់អារម្មណ៍មួយចំនួនអំពីការជួបជុំគ្នានោះ។ ជាទូទៅ ផ្ទះនៅស្រុកប៉ាឡេស្ទីនច្រើនតែមានបន្ទប់នៅខាងលើ ដែលមានជណ្ដើរនៅខាងក្រៅ។ «បន្ទប់ខាងលើ»នោះ ប្រហែលជានៅក្នុងផ្ទះរបស់ម្ដាយម៉ាកុសដែលបានរៀបរាប់ក្នុងសកម្មភាព ១២:១២។ ទោះជាយ៉ាងណាក្ដី បន្ទប់នោះទំនងជាបន្ទប់សាមញ្ញ តែមានប្រយោជន៍សម្រាប់ពួកអ្នកកាន់តាមគ្រិស្តជួបជុំគ្នា។ ប៉ុន្តែ តើអ្នកណាជួបជុំគ្នានៅទីនោះ ហើយតើពួកគេធ្វើអ្វី?
១៧ សូមកត់សម្គាល់ថា ការជួបជុំគ្នានៅបន្ទប់ខាងលើនោះ មិនគ្រាន់តែមានពួកសាវ័កឬពួកបុរសប៉ុណ្ណោះទេ តែក៏«មានពួកស្ត្រីខ្លះ»ដែរ។ ក្នុងចំណោមស្ត្រីទាំងនោះ មានម៉ារៀដែលជាម្ដាយរបស់លោកយេស៊ូ។ នេះជាកំណត់ហេតុចុងក្រោយក្នុងគម្ពីរ ដែលរៀបរាប់អំពីឈ្មោះនាង។ យើងអាចស្រមៃឃើញម៉ារៀនៅទីនោះ ដើម្បីគោរពប្រណិប័តន៍ព្រះជាមួយនឹងបងប្អូនរួមជំនឿដោយចិត្តរាបទាប មិនមែនដើម្បីមានមុខមាត់ទេ។ នាងច្បាស់ជាទទួលការសម្រាលទុក្ខណាស់ ពេលឃើញកូនប្រុសទាំងបួននាក់ទៀត ដែលមិនជឿក្នុងអំឡុងដែលលោកយេស៊ូនៅរស់ តែឥឡូវបានក្លាយជាអ្នកជឿ ហើយនៅជាមួយនឹងនាងដែរ។ (ម៉ាថ. ១៣:៥៥; យ៉ូន. ៧:៥) ពួកគេបានកែប្រែចិត្តគំនិត ចាប់តាំងពីលោកយេស៊ូដែលជាបងប្រុសបានស្លាប់ ហើយបានត្រូវប្រោសឲ្យរស់ឡើងវិញ។—១កូ. ១៥:៧
១៨ បន្ថែមទៅទៀត សូមកត់សម្គាល់អំពីមូលហេតុដែលពួកអ្នកកាន់តាមជួបជុំគ្នា។ គម្ពីរចែងថា៖ ‹អ្នកទាំងអស់នេះកំពុងព្យាយាមក្នុងការអធិដ្ឋានដោយមានគោលបំណងតែមួយ›។ (សកម្ម. ១:១៤) កិច្ចប្រជុំតែងតែជាផ្នែកសំខាន់នៃការគោរពប្រណិប័តន៍របស់គ្រិស្តសាសនិក។ យើងជួបជុំដើម្បីលើកទឹកចិត្តគ្នា ដើម្បីទទួលការណែនាំនិងឱវាទពីព្រះយេហូវ៉ា ហើយសំខាន់បំផុតគឺដើម្បីគោរពប្រណិប័តន៍លោក ដែលជាបិតាស្ថានសួគ៌របស់យើង។ ពេលយើងអធិដ្ឋាន និងច្រៀងសរសើរលោកនៅឯកិច្ចប្រជុំ នេះធ្វើឲ្យលោកពេញចិត្តជាខ្លាំង ហើយនេះក៏សំខាន់ចំពោះយើងដែរ។ សូមយើងកុំគេចវេះពីកិច្ចប្រជុំដ៏ពិសិដ្ឋ និងដ៏គួរឲ្យលើកទឹកចិត្តទាំងនេះឡើយ!—ហេ. ១០:២៤, ២៥
១៩-២១. (ក) តើយើងរៀនអ្វីពីតួនាទីរបស់ពេត្រុសក្នុងក្រុមជំនុំ? (ខ) ហេតុអ្វីចាំបាច់មានអ្នកមកជំនួសយូដាស? ហើយតើយើងអាចទាញមេរៀនអ្វីពីវិធីដោះស្រាយរឿងនេះ?
១៩ ឥឡូវពួកអ្នកកាន់តាមគ្រិស្តត្រូវធ្វើការសម្រេចចិត្តដ៏សំខាន់មួយ ហើយសាវ័កពេត្រុសបាននាំមុខក្នុងការស្វែងរកដំណោះស្រាយរឿងនេះ។ (ខ១៥-២៦) យើងទទួលការលើកទឹកចិត្តពេលដឹងថា គ្រាន់តែប៉ុន្មានសប្ដាហ៍បន្ទាប់ពីពេត្រុសបដិសេធលោកម្ចាស់អស់បីដង គាត់បានកែប្រែនិងមានកម្លាំងចិត្តឡើងវិញ។ (ម៉ាក. ១៤:៧២) យើងទាំងអស់គ្នាងាយនឹងធ្វើខុស ដូច្នេះយើងត្រូវការការរំលឹកថា ព្រះយេហូវ៉ា«លោកល្អពិតមែន ហើយលោកបម្រុងតែនឹងអភ័យទោស» ដល់អស់អ្នកដែលប្រែចិត្តយ៉ាងស្មោះ។—ចសព. ៨៦:៥
២០ ពេត្រុសយល់ឃើញថា គួរមានបុគ្គលម្នាក់មកជំនួសយូដាសដែលជាសាវ័កក្បត់លោកយេស៊ូ។ ប៉ុន្តែ តើអ្នកណាគួរជំនួសគាត់? សាវ័កថ្មីគួរជាអ្នកដែលបានកាន់តាមលោកយេស៊ូរហូត ក្នុងអំឡុងពេលដែលលោកបំពេញកិច្ចបម្រើ និងដែលបានឃើញលោករស់ឡើងវិញ។ (សកម្ម. ១:២១, ២២) នេះស្របតាមពាក្យសន្យារបស់លោកយេស៊ូ ដែលថា៖ «អ្នករាល់គ្នាដែលបានកាន់តាមខ្ញុំ នឹងអង្គុយលើបល្ល័ង្ក១២ ហើយវិនិច្ឆ័យក្ដីកុលសម្ព័ន្ធអ៊ីស្រាអែលទាំង១២»។ (ម៉ាថ. ១៩:២៨) តាមមើលទៅ ព្រះយេហូវ៉ាចង់ឲ្យសាវ័ក១២នាក់ដែលជាអ្នកកាន់តាមលោកយេស៊ូ ក្នុងពេលដែលលោកបំពេញកិច្ចបម្រើនៅផែនដី ក្លាយទៅជា«ថ្មគ្រឹះ១២»នៃយេរូសាឡិមថ្មីនៅអនាគត។ (បប. ២១:២, ១៤) ហេតុនេះ ព្រះបានធ្វើឲ្យពេត្រុសយល់ថា ទំនាយអំពី«ចូរឲ្យអ្នកឯទៀតយកតំណែងត្រួតពិនិត្យរបស់គាត់» គឺត្រូវអនុវត្តចំពោះយូដាស។—ចសព. ១០៩:៨
២១ តើការជ្រើសរើសសាវ័កថ្មីបានត្រូវធ្វើឡើងយ៉ាងដូចម្ដេច? គឺដោយការចាប់ឆ្នោត ដែលជាទម្លាប់ធម្មតានៅសម័យគម្ពីរ។ (សុភ. ១៦:៣៣) ប៉ុន្តែ នេះជាលើកចុងក្រោយដែលគម្ពីរបានលើកឡើងអំពីការចាប់ឆ្នោត។ តាមមើលទៅ បន្ទាប់ពីមានការចាក់ឫទ្ធានុភាពបរិសុទ្ធ នោះគេលែងប្រើវិធីចាប់ឆ្នោតទៀត។ ទោះជាយ៉ាងណាក្ដី សូមកត់សម្គាល់អំពីមូលហេតុដែលមានការចាប់ឆ្នោត។ ពួកសាវ័កបានអធិដ្ឋានថា៖ «ឱព្រះយេហូវ៉ា លោកជ្រាបអ្វីៗដែលនៅក្នុងចិត្តរបស់មនុស្សទាំងអស់។ សូមលោកបញ្ជាក់ថា ក្នុងចំណោមបុរសពីរនាក់នេះ លោកបានជ្រើសរើសបុរសមួយណា»។ (សកម្ម. ១:២៣, ២៤) ពួកគាត់ចង់ឲ្យព្រះយេហូវ៉ាជាអ្នកជ្រើសរើស។ ជាលទ្ធផល ម៉ាធាសបានត្រូវជ្រើសរើស។ គាត់ទំនងជាអ្នកកាន់តាមម្នាក់ក្នុងចំណោមអ្នកកាន់តាម៧០នាក់ ដែលលោកយេស៊ូបានចាត់ឲ្យទៅផ្សព្វផ្សាយ។ យ៉ាងនេះ ម៉ាធាសបានទៅជាសាវ័កម្នាក់ក្នុងចំណោម«សាវ័កទាំង១២នាក់»។ c—សកម្ម. ៦:២
២២, ២៣. ហេតុអ្វីយើងគួរចុះចូលនិងធ្វើតាមការណែនាំរបស់ពួកអ្នកនាំមុខក្នុងក្រុមជំនុំ?
២២ កំណត់ហេតុនេះរំលឹកយើងអំពីសារៈសំខាន់ ដែលរាស្ត្ររបស់ព្រះមានរបៀបរៀបចំដ៏រៀបរយ។ រហូតមកដល់សព្វថ្ងៃ បងប្អូនប្រុសដែលចេះទទួលខុសត្រូវ បានត្រូវជ្រើសរើសឲ្យបម្រើជាអ្នកត្រួតពិនិត្យក្នុងក្រុមជំនុំ។ ពួកអ្នកចាស់ទុំគិតពិចារណាខគម្ពីរយ៉ាងដិតដល់ដើម្បីដឹងថា បងប្អូនប្រុសទាំងនោះមានគុណសម្បត្តិគ្រប់គ្រាន់ ស្របតាមតម្រូវការក្នុងបណ្ដាំរបស់ព្រះឬយ៉ាងណា ហើយពួកអ្នកចាស់ទុំក៏អធិដ្ឋានសុំឫទ្ធានុភាពបរិសុទ្ធរបស់ព្រះជួយណែនាំក្នុងរឿងនោះដែរ។ ហេតុនេះ ក្រុមជំនុំចាត់ទុកបងប្អូនប្រុសទាំងនោះថា បានត្រូវតែងតាំងដោយឫទ្ធានុភាពបរិសុទ្ធ។ រីឯយើងវិញ យើងបន្តចុះចូលនិងធ្វើតាមការណែនាំរបស់ពួកគាត់ ព្រមទាំងលើកស្ទួយស្មារតីសហការក្នុងក្រុមជំនុំ។—ហេ. ១៣:១៧
យើងបន្តចុះចូលនិងស្ដាប់បង្គាប់ពួកអ្នកដែលបានទទួលការតែងតាំងជាអ្នកត្រួតពិនិត្យ
២៣ ពួកអ្នកកាន់តាមទាំងនោះបានទទួលកម្លាំងចិត្ត ពេលឃើញលោកយេស៊ូរស់ឡើងវិញ។ ម្យ៉ាងទៀត ការកែលម្អរបៀបរៀបចំក្នុងក្រុមជំនុំ ក៏បានពង្រឹងជំនឿរបស់ពួកគេដែរ។ ដូច្នេះ ពួកគេបានត្រៀមខ្លួនរួចជាស្រេចសម្រាប់អ្វីដែលនឹងកើតឡើងនៅថ្ងៃខាងមុខ។ យើងនឹងពិចារណាព្រឹត្តិការណ៍សំខាន់ៗទាំងនោះនៅជំពូកបន្ទាប់។
a ក្នុងសៀវភៅដំណឹងល្អ លូកានិយាយទៅកាន់ថេអូហ្វីលថា «ថេអូហ្វីលជាទីគោរព»។ ហេតុនេះ អ្នកខ្លះគិតថាថេអូហ្វីលប្រហែលជាមានឋានៈខ្ពស់ ហើយមិនទាន់ក្លាយទៅជាអ្នកជឿទេ។ (លូក. ១:៣) ប៉ុន្តែ ក្នុងសៀវភៅសកម្មភាព លូកាគ្រាន់តែហៅគាត់ថា«ថេអូហ្វីល»ប៉ុណ្ណោះ។ បណ្ឌិតគម្ពីរខ្លះពន្យល់ថា ថេអូហ្វីលបានទៅជាអ្នកជឿ ក្រោយពីគាត់អានសៀវភៅដំណឹងល្អដែលលូកាបានសរសេរ។ ហេតុនេះបានជាពួកគេនិយាយថា លូកាបានដកពាក្យ«ជាទីគោរព» ពេលសរសេរទៅកាន់ថេអូហ្វីលក្នុងនាមជាបងប្អូនរួមជំនឿ។
b នៅទីនេះគម្ពីរប្រើពាក្យភាសាក្រិចត្រូផូស ដែលមានន័យថា«បែប» ហើយមិនប្រើពាក្យម័រភី ដែលមានន័យថា«សណ្ឋាន»នោះទេ។
c ក្រោយមកប៉ូលបានត្រូវតែងតាំងជា«សាវ័កសម្រាប់ជនជាតិដទៃ» តែគាត់មិនបានត្រូវរាប់បញ្ចូលក្នុងចំណោមសាវ័កទាំង១២នាក់ឡើយ។ (រ៉ូម ១១:១៣; ១កូ. ១៥:៤-៨) គាត់មិនមានគុណសម្បត្តិគ្រប់គ្រាន់ដើម្បីទទួលឯកសិទ្ធិពិសេសនោះទេ ពីព្រោះគាត់មិនមែនជាអ្នកកាន់តាមលោកយេស៊ូ ក្នុងពេលដែលលោកបំពេញកិច្ចបម្រើនៅផែនដីឡើយ។
