ផ្នែកទី១
«ចៀមណាដែលបាត់ ខ្ញុំនឹងស្វែងរក»
ចៀមមួយកំពុងស៊ីស្មៅនៅឯវាល ដោយមិនដឹងខ្លួនវាបានឃ្លាតចេញពីហ្វូង។ ពេលវាងើបមុខឡើង វាភ័យស្រឡាំងកាំង ដោយសារមិនឃើញចៀមឯទៀតនិងគង្វាលទេ។ ឥឡូវ មេឃចាប់ផ្ដើមងងឹតហើយ។ ចៀមវង្វេងនោះកំពុងនៅក្នុងជ្រលងភ្នំមួយដែលជាតំបន់របស់សត្វសាហាវ។ ចៀមនោះគ្មានអ្នកការពារទេ។ មិនយូរក្រោយមក ចៀមនោះឮសំឡេងស្រែកហៅដែលវាធ្លាប់ស្គាល់ គឺសំឡេងរបស់គង្វាល ដែលកំពុងតែរត់មករកវា។ គង្វាលបានលើកចៀមឡើង និងដាក់វាក្នុងអាវក្រៅរបស់គាត់ ហើយបីវាមកផ្ទះវិញ។
ជាច្រើនដង ព្រះយេហូវ៉ាបានប្រដូចខ្លួនលោកទៅនឹងគង្វាល។ ក្នុងបណ្ដាំរបស់លោក លោកបានផ្ដល់ការធានាដល់យើងថា៖ «ខ្ញុំផ្ទាល់នឹងស្វែងរកចៀមខ្ញុំ ហើយខ្ញុំនឹងថែរក្សាពួកគេ»។—អេសេគាល ៣៤:១១, ១២
«ចៀមដែលខ្ញុំថែរក្សា»
តើអ្នកណាជាចៀមរបស់ព្រះយេហូវ៉ា? បើនិយាយឲ្យចំទៅ ចៀមរបស់ព្រះយេហូវ៉ាគឺជាអ្នកដែលស្រឡាញ់និងគោរពប្រណិប័តន៍លោក។ គម្ពីរចែងថា៖ «ចូរយើងលុតជង្គង់នៅចំពោះមុខព្រះយេហូវ៉ាជាអ្នកដែលបង្កើតមនុស្សយើង ចូរយើងមកក្រាបគោរពប្រណិប័តន៍លោក។ ពីព្រោះលោកជាព្រះរបស់យើង ហើយយើងជារាស្ត្ររបស់លោក លោកថែរក្សាយើងដូចជាចៀមដែលនៅឯវាលស្មៅ»។ (ចម្រៀងសរសើរព្រះ ៩៥:៦, ៧) ដូចចៀមតាមគង្វាល អ្នកគោរពប្រណិប័តន៍ព្រះយេហូវ៉ាចង់ធ្វើតាមលោកដែលជាគង្វាលរបស់ពួកគេយ៉ាងខ្លាំង។ តើពួកគេមិនដែលធ្វើខុសសោះឬ? មិនមែនទេ។ ម្ដងម្កាល ក្នុងន័យធៀបអ្នកបម្រើរបស់ព្រះបានទៅជា«ចៀមដែលវង្វេង»។ (អេសេគាល ៣៤:១២; ម៉ាថាយ ១៥:២៤; ពេត្រុសទី១ ២:២៥) ទោះជាដូច្នោះក៏ដោយ ពេលបុគ្គលម្នាក់រសាត់ចេញ ព្រះយេហូវ៉ាសង្ឃឹមជានិច្ចថាគាត់នឹងត្រឡប់មកវិញ។
តើអ្នកនៅតែមានអារម្មណ៍ថាព្រះយេហូវ៉ាជាគង្វាលរបស់អ្នកឬទេ? នៅសព្វថ្ងៃនេះ តើព្រះយេហូវ៉ាបង្ហាញយ៉ាងដូចម្ដេចថាលោកជាគង្វាល? សូមពិចារណាវិធីបីយ៉ាង៖
លោកផ្ដល់ឲ្យយើងនូវសេចក្ដីបង្រៀនដែលប្រៀបដូចជាអាហារ។ ព្រះយេហូវ៉ាមានប្រសាសន៍ថា៖ «ខ្ញុំនឹងឃ្វាលពួកគេនៅលើវាលស្មៅខៀវខ្ចី . . . ពួកគេនឹងដេកនៅលើកន្លែងដ៏ស្រស់បំព្រង ហើយពួកគេមានស្មៅខៀវខ្ចីជាអាហារ»។ (អេសេគាល ៣៤:១៤) តាមវិធីផ្សេងៗ ព្រះយេហូវ៉ាតែងតែផ្ដល់ឲ្យយើងនូវសេចក្ដីបង្រៀនដែលប្រៀបដូចជាអាហារតាមត្រូវពេល និងផ្ដល់កម្លាំងចិត្តដល់យើងជានិច្ច។ ពេលអ្នកអធិដ្ឋានសុំជំនួយពីព្រះយេហូវ៉ា តើអ្នកនៅចាំថាលោកបានតបឆ្លើយតាមរយៈអត្ថបទ សុន្ទរកថា ឬវីដេអូណាមួយឬទេ? បទពិសោធន៍នោះច្បាស់ជាធ្វើឲ្យអ្នកជឿជាក់ថាព្រះយេហូវ៉ាយកចិត្តទុកដាក់ចំពោះអ្នកផ្ទាល់ មែនទេ?
លោកការពារនិងទ្រទ្រង់យើង។ ព្រះយេហូវ៉ាសន្យាថា៖ «ចៀមណាដែលវង្វេង ខ្ញុំនឹងនាំត្រឡប់មកវិញ។ ចៀមណាដែលមានរបួស ខ្ញុំនឹងរុំរបួសឲ្យ។ ចៀមណាដែលខ្សោយ ខ្ញុំនឹងពង្រឹងកម្លាំង»។ (អេសេគាល ៣៤:១៦) ព្រះយេហូវ៉ាចម្រើនកម្លាំងដល់ចៀមដែលខ្សោយ គឺអ្នកដែលខ្សោយដោយសារមានទុក្ខកង្វល់ច្រើនពន់ពេក។ លោករុំរបួសឲ្យចៀមដែលមានរបួស ក្នុងន័យថាជួយអ្នកដែលឈឺចិត្ត ឲ្យជាសះស្បើយ ទោះជាការឈឺចិត្តនោះដោយសារបងប្អូនរួមជំនឿក៏ដោយ។ លោកធ្វើឲ្យពួកគេមានកម្លាំងចិត្តឡើងវិញ។ ម្យ៉ាងទៀត ចំពោះចៀមដែលវង្វេង និងដែលប្រហែលជាខំយកឈ្នះនឹងគំនិតមិនល្អចំពោះខ្លួនឯង លោកក៏នាំពួកគេត្រឡប់មកវិញដែរ។
លោករមែងគិតអំពីយើង។ ព្រះយេហូវ៉ាមានប្រសាសន៍ថា៖ «ខ្ញុំនឹងប្រមូលចៀមខ្ញុំពីកន្លែងដែលពួកគេបានខ្ចាត់ខ្ចាយទៅ» ហើយ«ចៀមណាដែលបាត់ ខ្ញុំនឹងស្វែងរក»។ (អេសេគាល ៣៤:១២, ១៦) ចំពោះព្រះយេហូវ៉ា ចៀមដែលវង្វេងគឺអាចត្រឡប់មកវិញបាន លោកមិនអស់សង្ឃឹមចំពោះពួកគេឡើយ។ លោកដឹងពេលមានចៀមមួយវង្វេង ហើយលោកស្វែងរកចៀមនោះ។ ពេលលោករកឃើញចៀមនោះ លោកអរសប្បាយជាខ្លាំង។ (ម៉ាថាយ ១៨:១២-១៤) ម្ល៉ោះហើយ លោកហៅអ្នកគោរពប្រណិប័តន៍លោកថា«ចៀមដែលខ្ញុំថែរក្សា»។ (អេសេគាល ៣៤:៣១) អ្នកក៏ជាចៀមមួយក្នុងចំណោមហ្វូងចៀមរបស់លោកដែរ។
ចំពោះព្រះយេហូវ៉ា ចៀមដែលវង្វេងគឺអាចត្រឡប់មកវិញបាន លោកមិនអស់សង្ឃឹមចំពោះពួកគេឡើយ។ ពេលលោករកឃើញចៀមនោះ លោកអរសប្បាយជាខ្លាំង
«សូមឲ្យអ្វីៗទាំងអស់បានដូចដើមវិញ»
ហេតុអ្វីព្រះយេហូវ៉ាស្វែងរកអ្នកនិងអញ្ជើញអ្នកឲ្យត្រឡប់មករកលោកវិញ? ពីព្រោះលោកចង់ឲ្យអ្នកមានសុភមង្គល។ លោកសន្យាថា៖ «ពរទាំងប៉ុន្មាននឹងធ្លាក់មកដូចជាភ្លៀង»ទៅលើចៀមរបស់លោក។ (អេសេគាល ៣៤:២៦) នេះជាសេចក្ដីសន្យាដែលអ្នកអាចទុកចិត្តបាន ព្រោះអ្នកធ្លាប់ឃើញភ័ស្តុតាងរួចហើយ។
អ្នកប្រហែលជានៅចាំអនុស្សាវរីយ៍ខ្លះដែលអ្នកមានកាលដែលអ្នកបានស្គាល់ព្រះយេហូវ៉ា។ ជាឧទាហរណ៍ ពេលដែលអ្នកបានរៀនសេចក្ដីពិតសំខាន់ៗជាលើកដំបូង អំពីនាមរបស់ព្រះនិងគោលបំណងរបស់លោកចំពោះមនុស្សជាតិ តើពេលនោះអ្នកមានអារម្មណ៍យ៉ាងណា? អ្នកប្រហែលជានៅចាំ ពេលអ្នកចូលរួមជាមួយបងប្អូនរួមជំនឿដោយសាមគ្គីភាពនៅសន្និបាតនិងមហាសន្និបាត តើនោះធ្វើឲ្យអ្នកមានកម្លាំងចិត្តខ្លាំងប៉ុនណា? ពេលអ្នកបានផ្សព្វផ្សាយដំណឹងល្អដល់អ្នកដែលបង្ហាញចំណាប់អារម្មណ៍យ៉ាងស្មោះ អ្នកបានត្រឡប់មកផ្ទះវិញដោយសប្បាយរីករាយនិងស្កប់ចិត្តយ៉ាងខ្លាំង មែនទេ?
អ្នកអាចមានអំណរដូចនោះម្ដងទៀត។ អ្នកបម្រើព្រះពីសម័យមុនបានអធិដ្ឋានថា៖ «ឱព្រះយេហូវ៉ាអើយ សូមលោកនាំយើងត្រឡប់មកឯលោកវិញ ហើយយើងនឹងប្រញាប់ត្រឡប់មកឯលោក។ សូមឲ្យអ្វីៗទាំងអស់បានដូចដើមវិញ»។ (បទទំនួញ ៥:២១) ព្រះយេហូវ៉ាបានតបឆ្លើយសេចក្ដីអធិដ្ឋាននោះ ហើយរាស្ត្ររបស់លោកបានត្រឡប់មកគោរពប្រណិប័តន៍លោកវិញដោយមានអំណរសាជាថ្មី។ (នេហេមា ៨:១៧) ព្រះយេហូវ៉ានឹងធ្វើដូច្នោះដែរចំពោះអ្នក។
ប៉ុន្តែ ការត្រឡប់មកព្រះយេហូវ៉ាវិញគឺស្រួលនិយាយតែពិបាកធ្វើ។ សូមពិចារណាការពិបាកខ្លះៗដែលរារាំងអ្នកមិនឲ្យត្រឡប់មកព្រះយេហូវ៉ាវិញ និងរបៀបដែលអ្នកអាចយកឈ្នះការពិបាកទាំងនោះ។
លោកអ្នកក៏ប្រហែលជាចូលចិត្តដែរ
នាទីឯកសារ
សាក្សីព្រះយេហូវ៉ា ការប្រព្រឹត្តតាមជំនឿ ផ្នែកទី១: ចេញពីសេចក្ដីងងឹត
នេះគឺជាដំណើររឿងរបស់មនុស្សមួយក្រុមដែលមានបំណងរស់នៅក្នុងពន្លឺនៃសេចក្ដីពិតពីគម្ពីរ ទោះជាពួកគេត្រូវអ្នកឯទៀតស្អប់ខ្ពើមក៏ដោយ។ គំរូរបស់ពួកគេនឹងលើកទឹកចិត្តអ្នកឲ្យបន្តបម្រើព្រះយ៉ាងស្មោះត្រង់។
