សំបុត្រពីគណៈអភិបាល
ជូនចំពោះបងប្អូនរួមជំនឿជាទីស្រឡាញ់
ដូចបងប្អូនដឹងហើយ គម្ពីរជាសៀវភៅដែលមានកំណត់ហេតុជាច្រើនអំពីមនុស្ស។ មនុស្សទាំងនោះគឺជាបុរសនិងស្ត្រីដែលស្មោះត្រង់នឹងព្រះយេហូវ៉ា។ ពួកគាត់«មានអារម្មណ៍ដូចយើង» ហើយមានការពិបាកស្រដៀងនឹងយើងដែរ។ (យ៉ាកុប ៥:១៧, កំ.ស.) ពួកគាត់ខ្លះមានបញ្ហានិងទុក្ខកង្វល់ជាច្រើន។ ពួកគាត់ខ្លះទៀតត្រូវសមាជិកក្រុមគ្រួសារនិងបងប្អូនរួមជំនឿធ្វើឲ្យឈឺចិត្តជាខ្លាំង។ ចំណែកបងប្អូនខ្លះទៀតតែងតែនឹកឃើញកំហុសដែលខ្លួនបានធ្វើពីមុន ហើយនៅតែបន្ទោសខ្លួនរហូត។
តើពួកគាត់ទាំងនោះបានចាកចេញពីព្រះយេហូវ៉ាទាំងស្រុងឬ? មិនមែនទេ។ ពួកគាត់ជាច្រើនមានអារម្មណ៍ដូចអ្នកតែងចម្រៀងសរសើរព្រះដែលបានអធិដ្ឋានថា៖ «ខ្ញុំបានបែរចេញដូចចៀមដែលវង្វេងផ្លូវ។ សូមមេត្តាស្វែងរកអ្នកបម្រើរបស់លោក ព្រោះខ្ញុំមិនបានភ្លេចបញ្ញត្តិរបស់លោកទេ»។ (ចម្រៀងសរសើរព្រះ ១១៩:១៧៦) តើអ្នកអាចយល់អារម្មណ៍របស់គាត់ឬទេ?
ព្រះយេហូវ៉ាមិនដែលភ្លេចអ្នកគោរពប្រណិប័តន៍លោកដែលបានឈប់ចូលរួមជាមួយនឹងរាស្ត្ររបស់លោកនោះទេ។ ផ្ទុយទៅវិញ លោកខំជួយពួកគាត់។ លោកច្រើនតែធ្វើដូច្នេះតាមរយៈបងប្អូនរួមជំនឿរបស់ពួកគាត់។ ជាឧទាហរណ៍ សូមគិតអំពីយ៉ូបដែលជាអ្នកបម្រើរបស់ព្រះ។ គាត់បានជួបនឹងបញ្ហាជាច្រើនដូចជា បាត់បង់ទ្រព្យសម្បត្តិ កូនៗជាទីស្រឡាញ់បានស្លាប់ ហើយខ្លួនគាត់ក៏មានបញ្ហាសុខភាពធ្ងន់ធ្ងរទៀតផង។ យ៉ូបក៏បានស៊ូទ្រាំនឹងពាក្យសម្ដីបញ្ឈឺចិត្តពីពួកអ្នកដែលគួរតែជួយគាំទ្រគាត់។ ប៉ុន្តែ យ៉ូបមិនបានងាករេចេញពីព្រះយេហូវ៉ាឡើយ ទោះជានៅពេលនោះគាត់មានគំនិតមិនត្រឹមត្រូវក៏ដោយ។ (យ៉ូប ១:២២; ២:១០) តើព្រះយេហូវ៉ាបានជួយយ៉ូបឲ្យមានចិត្តគំនិតត្រឹមត្រូវឡើងវិញយ៉ាងដូចម្ដេច?
វិធីមួយដែលព្រះយេហូវ៉ាបានជួយយ៉ូប គឺតាមរយៈបងប្អូនរួមជំនឿរបស់គាត់ម្នាក់ឈ្មោះអេលីហ៊ូ។ ពេលដែលយ៉ូបបានប្រាប់អំពីកង្វល់របស់គាត់ អេលីហ៊ូបានយកចិត្តទុកដាក់ស្ដាប់ ហើយក្រោយមកឫទ្ធានុភាពព្រះបានជំរុញគាត់ឲ្យនិយាយទៅកាន់យ៉ូប។ តើអេលីហ៊ូបាននិយាយអ្វីខ្លះ? តើគាត់និយាយរិះគន់យ៉ូប ឬព្យាយាមធ្វើឲ្យយ៉ូបបន្ទោសខ្លួន ឬធ្វើឲ្យយ៉ូបអាម៉ាស់មុខឬទេ? តើអេលីហ៊ូគិតថាខ្លួនគាត់ប្រសើរជាងយ៉ូបឬទេ? មិនមែនទេ គាត់គ្មានគំនិតដូច្នេះឡើយ! ឫទ្ធានុភាពរបស់ព្រះបានជំរុញគាត់ឲ្យនិយាយថា៖ «នៅចំពោះមុខព្រះដ៏ពិត ខ្ញុំក៏ដូចអ្នកដែរ ខ្ញុំបានត្រូវបង្កើតពីដីឥដ្ឋដូចគ្នា»។ រួចមក គាត់បានធ្វើឲ្យយ៉ូបមានទំនុកចិត្ត ដោយនិយាយថា៖ «អ្នកមិនចាំបាច់ខ្លាចខ្ញុំឡើយ ខ្ញុំមិនប្រើសម្ដីធ្ងន់ពេកធ្វើឲ្យអ្នកព្រួយចិត្តទេ»។ (យ៉ូប ៣៣:៦, ៧) ដូច្នេះ ជាជាងធ្វើឲ្យយ៉ូបកាន់តែពិបាកចិត្ត អេលីហ៊ូបានឲ្យដំបូន្មាននិងការលើកទឹកចិត្តដែលប្រកបទៅដោយសេចក្ដីស្រឡាញ់ដល់យ៉ូប។
យើងខ្ញុំចង់ឲ្យបងប្អូនដឹងថា យើងខ្ញុំក៏មានអារម្មណ៍ដូចនេះចំពោះបងប្អូនដែរ។ ហេតុនេះ យើងខ្ញុំបានរៀបចំសៀវភៅស្តើងនេះ។ មុនដំបូង យើងបានស្ដាប់និងគិតពិចារណាយ៉ាងយកចិត្តទុកដាក់អំពីកាលៈទេសៈ និងអារម្មណ៍របស់បងប្អូនមួយចំនួនដែលបានរសាត់ចេញ។ (សុភាសិត ១៨:១៣) បន្ទាប់មក យើងបានអធិដ្ឋានហើយស្រាវជ្រាវបទគម្ពីរ និងពិនិត្យមើលកំណត់ហេតុផ្សេងៗ។ កំណត់ហេតុទាំងនោះបញ្ជាក់ថាព្រះយេហូវ៉ាបានជួយអ្នកបម្រើលោកនៅសម័យមុន ដែលធ្លាប់ជួបប្រទះកាលៈទេសៈស្រដៀងនឹងបងប្អូនដែរ។ ក្រោយមក យើងបានបញ្ចូលកំណត់ហេតុគម្ពីរទាំងនោះជាមួយនឹងបទពិសោធន៍នៅសម័យនេះ ដើម្បីរៀបរៀងសៀវភៅស្តើងនេះឡើង។ ដោយក្ដីស្រឡាញ់យ៉ាងកក់ក្ដៅ យើងសូមអញ្ជើញបងប្អូនអានសៀវភៅនេះ ហើយសូមជឿជាក់ថាយើងខ្ញុំស្រឡាញ់បងប្អូនយ៉ាងស្មោះ។
Governing Body of Jehovah’s Witnesses
(គណៈអភិបាលនៃសាក្សីព្រះយេហូវ៉ា)