ជំពូកទី៤៨
កូនអាចរស់នៅក្នុងពិភពលោកថ្មីដ៏សុខសាន្តរបស់ព្រះ
ព្រះបានឲ្យអាដាមនិងអេវ៉ារស់នៅក្នុងសួនអេដែន។ ប៉ុន្តែ ដោយសារពួកគេមិនស្តាប់បង្គាប់ព្រះ ពួកគេបានស្លាប់។ ទោះជាយ៉ាងនោះក៏ដោយ ព្រះបានផ្ដល់លទ្ធភាពឲ្យកូនចៅរបស់ពួកគេ រួមទាំងយើងដែរ អាចរស់ជារៀងរហូតក្នុងសួនឧទ្យាន។ គម្ពីរប្រាប់ពីសេចក្ដីសន្យានោះថា៖ ‹ពួកអ្នកសុចរិតនឹងបានផែនដីទុកជាមរដក ហើយនឹងរស់នៅផែនដីជានិច្ច›។—ទំនុកតម្កើង ៣៧:២៩
គម្ពីរប្រាប់អំពី«មេឃថ្មី»និង«ផែនដីថ្មី»។ (អេសាយ ៦៥:១៧; ពេត្រុសទី២ ៣:១៣) «មេឃ»ដែលមានឥឡូវនេះ សំដៅទៅលើរដ្ឋាភិបាលទាំងឡាយរបស់មនុស្សនៅសព្វថ្ងៃនេះ។ ប៉ុន្តែ«មេឃថ្មី»សំដៅទៅលើរដ្ឋាភិបាលដ៏សុចរិតរបស់ព្រះ ដែលមានលោកយេស៊ូនិងអ្នកដែលគ្រប់គ្រងជាមួយនឹងលោកនៅស្ថានសួគ៌។ រដ្ឋាភិបាលនេះនឹងនាំឲ្យមានសេចក្ដីសុខសាន្តពេញផែនដី។ ដូច្នេះ ពេលរដ្ឋាភិបាលនេះគ្រប់គ្រងផែនដីទាំងមូល នោះពិតជាគ្រាដ៏សប្បាយណាស់!
ចុះកូនដឹងថា«ផែនដីថ្មី»សំដៅទៅលើអ្វីទេ?— ផែនដីថ្មីសំដៅទៅលើមនុស្សល្អដែលស្រឡាញ់ព្រះយេហូវ៉ា។ ហេតុអ្វីយើងដឹងដូច្នេះ? ពេលគម្ពីរនិយាយអំពី«ផែនដី» ជួនកាលមិនមានន័យថាផែនដីមែនទែនទេ តែសំដៅទៅលើមនុស្សដែលរស់នៅផែនដីវិញ។ (លោកុប្បត្តិ ១១:១; ទំនុកតម្កើង ៦៦:៤; ៩៦:១) ដូច្នេះ មនុស្សដែលជាផែនដីថ្មីនឹងរស់នៅផែនដីនេះ។
មនុស្សអាក្រក់ដែលរស់នៅក្នុងពិភពលោកសព្វថ្ងៃនេះ នឹងលែងមានទៀត។ សូមចាំថា នៅសម័យណូអេទឹកបានជន់លិចបំផ្លាញមនុស្សអាក្រក់ទាំងអស់។ ម្យ៉ាងទៀត ដូចយើងបានរៀនរួចហើយថា ពិភពលោកដ៏អាក្រក់នៅសព្វថ្ងៃនេះនឹងត្រូវបំផ្លាញចោលនៅហាម៉ាគេដូន។ ឥឡូវសូមឲ្យយើងពិចារណាថា តើមនុស្សនឹងមានជីវិតបែបណាក្នុងពិភពលោកថ្មីរបស់ព្រះក្រោយពីសង្គ្រាមហាម៉ាគេដូន?
តើកូនចង់រស់ជារៀងរហូតក្នុងពិភពលោកថ្មីដ៏សុខសាន្តរបស់ព្រះដែលជាសួនឧទ្យានឬទេ?— គ្មានគ្រូពេទ្យណាម្នាក់ដែលអាចជួយយើងឲ្យរស់ជារៀងរហូតបានទេ ហើយក៏គ្មានថ្នាំណាដែលអាចជួយយើងមិនឲ្យស្លាប់បានដែរ។ វិធីតែមួយគត់ដើម្បីយើងអាចរស់ជារៀងរហូត គឺដោយចូលទៅជិតព្រះ។ គ្រូដ៏ល្អប្រសើរបានប្រាប់យើងនូវរបៀបដែលយើងអាចចូលទៅជិតព្រះ។
សូមយើងបើកគម្ពីរទៅសៀវភៅយ៉ូហាន ជំពូកទី១៧ ខ៣។ ក្នុងខនេះ គ្រូដ៏ល្អប្រសើរបាននិយាយថា៖ «ដើម្បីបានជីវិតដែលគ្មានទីបញ្ចប់ ពួកគាត់ត្រូវស្គាល់លោកដែលជាព្រះពិតតែមួយឲ្យបានច្បាស់ ព្រមទាំងយេស៊ូគ្រិស្ដ ដែលលោកបានចាត់ឲ្យមក»។
តាមខគម្ពីរនេះ តើលោកយេស៊ូបាននិយាយថាយើងត្រូវធ្វើអ្វីដើម្បីរស់ជារៀងរហូត?— ដំបូងបង្អស់ យើងត្រូវស្គាល់ព្រះយេហូវ៉ាដែលជាបិតានៅស្ថានសួគ៌របស់យើងឲ្យបានច្បាស់ ព្រមទាំងបុត្ររបស់លោក ដែលបានប្រគល់ជីវិតដើម្បីយើង។ ដូច្នេះ នេះមានន័យថា យើងត្រូវសិក្សាគម្ពីរ។ សៀវភៅសូមស្តាប់គ្រូដ៏ល្អប្រសើរនេះ នឹងជួយយើងឲ្យសិក្សាគម្ពីរ។
ប៉ុន្តែ តើតាមរបៀបណាការរៀនអំពីព្រះយេហូវ៉ានឹងជួយយើងឲ្យរស់ជារៀងរហូត?— តាមធម្មតា យើងត្រូវបរិភោគអាហារជារៀងរាល់ថ្ងៃ ដូចគ្នាដែរ យើងក៏ត្រូវរៀនអំពីព្រះយេហូវ៉ាជារៀងរាល់ថ្ងៃដែរ។ គម្ពីរចែងថា៖ «មនុស្សមិនត្រូវរស់ដោយសារតែនំប៉័ងប៉ុណ្ណោះទេ តែដោយសារគ្រប់ទាំងប្រសាសន៍ដែលចេញពីមាត់ព្រះយេហូវ៉ាមក»។—ម៉ាថាយ ៤:៤
ម្យ៉ាងទៀត យើងក៏ត្រូវស្គាល់លោកយេស៊ូគ្រិស្ដឲ្យបានច្បាស់ដែរ ពីព្រោះព្រះបានចាត់បុត្ររបស់លោកឲ្យដកយកភាពខុសឆ្គងរបស់យើង។ គម្ពីរចែងថា៖ «គ្មានសេចក្ដីសង្គ្រោះតាមរយៈអ្នកណាទៀតឡើយ» ហើយគម្ពីរក៏ចែងដែរថា៖ «អ្នកណាដែលបង្ហាញជំនឿលើបុត្ររបស់លោក អ្នកនោះមានជីវិតដែលគ្មានទីបញ្ចប់»។ (សកម្មភាព ៤:១២; យ៉ូហាន ៣:៣៦) ប៉ុន្តែ តើការ«បង្ហាញជំនឿ»លើលោកយេស៊ូមានន័យអ្វី?— នេះមានន័យថា យើងពិតជាជឿទៅលើលោកយេស៊ូ ហើយទទួលស្គាល់ថាយើងមិនអាចរស់ជារៀងរហូតបានទេ បើគ្មានលោក។ តើយើងជឿដូច្នោះឬទេ?— បើយើងជឿដូច្នោះមែន ជារៀងរាល់ថ្ងៃ យើងនឹងស្តាប់គ្រូដ៏ល្អប្រសើរ ហើយយើងនឹងធ្វើតាមបង្គាប់របស់លោក។
វិធីល្អមួយដើម្បីស្តាប់គ្រូដ៏ល្អប្រសើរ គឺអានសៀវភៅនេះម្ដងហើយម្ដងទៀត។ ម្យ៉ាងទៀត សូមកូនពិនិត្យមើលនិងរំពឹងគិតអំពីរូបភាពទាំងអស់ដែលមានក្នុងសៀវភៅនេះដែរ។ សូមសាកល្បងមើល ដើម្បីដឹងថាកូននឹងឆ្លើយយ៉ាងណាអំពីរូបភាពទាំងនេះ។ សូមអានសៀវភៅនេះជាមួយនឹងឪពុកឬម្ដាយរបស់កូន។ បើឪពុកឬម្ដាយរបស់កូនមិនអាចអានជាមួយនឹងកូនបានទេ សូមអានសៀវភៅនេះជាមួយនឹងអ្នកពេញវ័យ ឬជាមួយនឹងក្មេងៗឯទៀត។ បើកូនអាចជួយអ្នកផ្សេងទៀតឲ្យស្តាប់គ្រូដ៏ល្អប្រសើរ ហើយជួយពួកគេឲ្យដឹងអំពីអ្វីដែលពួកគេត្រូវធ្វើដើម្បីរស់ជារៀងរហូតក្នុងពិភពលោកថ្មីរបស់ព្រះ នោះពិតជាប្រសើរណាស់ មែនទេ?—
គម្ពីរប្រាប់យើងថា៖ ‹ពិភពលោកនេះកំពុងឈានទៅរកការសាបសូន្យ›។ ប៉ុន្តែ គម្ពីរក៏ពន្យល់ប្រាប់ដែរ អំពីរបៀបដែលយើងអាចរស់ជារៀងរហូតក្នុងពិភពលោកថ្មីរបស់ព្រះ ដោយចែងថា៖ «អ្នកណាដែលធ្វើតាមបំណងប្រាថ្នារបស់ព្រះ អ្នកនោះនឹងនៅជាប់ជារៀងរហូតវិញ»។ (យ៉ូហានទី១ ២:១៧) តើតាមរបៀបណាយើងអាចរស់ជារៀងរហូតក្នុងពិភពលោកថ្មីដ៏សុខសាន្តរបស់ព្រះ? តើកូនដឹងទេ?— ត្រូវហើយ គឺយើងត្រូវស្គាល់ព្រះយេហូវ៉ាឲ្យបានច្បាស់ ព្រមទាំងលោកយេស៊ូដែលជាបុត្រជាទីស្រឡាញ់របស់លោក។ ប៉ុន្តែ យើងក៏ត្រូវធ្វើតាមអ្វីដែលយើងបានរៀនដែរ។ យើងសង្ឃឹមថា ពេលកូនសិក្សាសៀវភៅនេះ នោះនឹងជួយកូនឲ្យធ្វើដូច្នោះមែន។
