ជំពូកទី២៤
កុំក្លាយទៅជាចោរឲ្យសោះ!
តើធ្លាប់មានអ្នកណាម្នាក់លួចអ្វីមួយដែលជារបស់កូនទេ?— តើនោះបានធ្វើឲ្យកូនមានអារម្មណ៍យ៉ាងណា?— អ្នកណាដែលបានលួចរបស់កូននោះ គឺជាចោរ ហើយគ្មានអ្នកណាចូលចិត្តចោរទេ។ តើកូនគិតថា មនុស្សម្នាក់ក្លាយទៅជាចោរយ៉ាងដូចម្ដេច? តើគាត់កើតមកជាចោរតែម្ដងឬ?—
យើងទើបតែបានរៀនហើយថា មនុស្សកើតមកដោយមានភាពខុសឆ្គង។ ដូច្នេះ យើងទាំងអស់គ្នាជាមនុស្សមិនល្អឥតខ្ចោះ។ ប៉ុន្តែ គ្មានអ្នកណាដែលកើតមកជាចោរទេ។ ប្រហែលជាក្រុមគ្រួសារគាត់ល្អ ហើយឪពុកម្ដាយ និងបងប្អូនរបស់គាត់ជាមនុស្សទៀងត្រង់ ប៉ុន្តែដោយសារគាត់ចង់បានប្រាក់ និងវត្ថុទ្រព្យយ៉ាងខ្លាំង នោះអាចនាំឲ្យគាត់ក្លាយទៅជាចោរ។
តើកូនគិតថាអ្នកណាជាចោរមុនដំបូង?— សូមគិតអំពីរឿងនេះ។ គ្រូដ៏ល្អប្រសើរស្គាល់ចោរនោះពេលដែលលោកនៅស្ថានសួគ៌។ ចោរនោះគឺជាទេវតាមួយរូប។ ប៉ុន្តែ ដោយសារព្រះបានបង្កើតទេវតាទាំងអស់ល្អឥតខ្ចោះ ដូច្នេះ តើទេវតានោះបានក្លាយទៅជាចោរយ៉ាងដូចម្ដេច?— ក្នុងជំពូកទី៨នៃសៀវភៅនេះ យើងបានរៀនហើយថាទេវតានោះចង់បានអ្វីមួយដែលមិនមែនជារបស់ខ្លួន។ តើទេវតានោះចង់បានអ្វី? តើកូនចាំទេ?—
ក្រោយពីព្រះបានបង្កើតបុរសនិងស្ដ្រីទី១ ទេវតានោះចង់ឲ្យពួកគេគោរពប្រណិប័តន៍វា។ ទេវតានោះគ្មានសិទ្ធិទទួលការគោរពប្រណិប័តន៍ពីពួកគេឡើយ។ ការគោរពប្រណិប័តន៍នោះជារបស់ព្រះយេហូវ៉ា។ ប៉ុន្តែ ទេវតានោះបានលួចអ្វីដែលជារបស់លោក ដោយធ្វើឲ្យអាដាមនិងអេវ៉ាគោរពប្រណិប័តន៍វាវិញ។ ដូច្នេះ ទេវតានោះបានក្លាយទៅជាចោរ។ វាបានទៅជាមេកំណាចសាថាន។
តើអ្វីដែលធ្វើឲ្យមនុស្សម្នាក់ក្លាយទៅជាចោរ?— គឺការចង់បានអ្វីដែលមិនមែនជារបស់ខ្លួន។ បើគាត់ចង់បានរបស់នោះខ្លាំងពេក នេះអាចនាំឲ្យគាត់ធ្វើអាក្រក់ ទោះបីគាត់ជាមនុស្ស
ល្អក្ដី។ ជួនកាលអ្នកដែលទៅជាចោរមិនព្រមកែខ្លួន ហើយធ្វើអំពើល្អវិញទេ។ សាវ័កម្នាក់របស់លោកយេស៊ូមានចិត្តគំនិតបែបនោះ។ គាត់ឈ្មោះយូដាសអ៊ីស្ការីយ៉ុត។យូដាសដឹងថា ការលួចគេគឺខុស ពីព្រោះគាត់បានរៀនច្បាប់របស់ព្រះតាំងពីគាត់នៅក្មេងមកម៉្លេះ។ គាត់ដឹងថា មានពេលមួយព្រះបាននិយាយពីស្ថានសួគ៌ប្រាប់បណ្ដាជនរបស់លោកថា៖ ‹កុំឲ្យលួចឲ្យសោះ›។ (និក្ខមនំ ២០:១៥) ពេលយូដាសធំឡើង គាត់បានជួបគ្រូដ៏ល្អប្រសើរ ហើយបានទៅជាអ្នកកាន់តាមម្នាក់របស់លោក។ ក្រោយមកលោកយេស៊ូបានជ្រើសរើសយូដាសឲ្យធ្វើជាសាវ័កម្នាក់ក្នុងចំណោមសាវ័កទាំង១២។
លោកយេស៊ូនិងសាវ័ករបស់លោកបានធ្វើដំណើរជាមួយគ្នា ហើយបរិភោគជាមួយគ្នា។ ម្យ៉ាងទៀត ប្រាក់ទាំងអស់ដែលពួកគាត់មាន បានទុកក្នុងប្រអប់មួយ។ លោកយេស៊ូបានឲ្យយូដាសមើលខុសត្រូវប្រអប់នោះ។ ប្រាក់ទាំងនោះមិនមែនជារបស់យូដាសទេ។ ប៉ុន្តែ មួយរយៈពេលក្រោយមក តើយូដាសបានធ្វើអ្វី? តើកូនដឹងទេ?—
យូដាសចាប់ផ្ដើមយកប្រាក់ពីក្នុងប្រអប់ពេលដែលគាត់មិនត្រូវយក។ គាត់បានយកពេលដែលអ្នកឯទៀតមិនបានឃើញគាត់ ហើយគាត់ព្យាយាមរកវិធីផ្សេងៗដើម្បីបានប្រាក់ថែមទៀត។ គាត់ចាប់ផ្ដើមគិតអំពីប្រាក់គ្រប់ពេលវេលា។ ចិត្តគំនិតដ៏អាក្រក់នេះបាននាំឲ្យយូដាសធ្វើអ្វីមួយ គ្រាន់តែប៉ុន្មានថ្ងៃមុនដែលគ្រូដ៏ល្អប្រសើរបានត្រូវគេសម្លាប់។ តើគាត់បានធ្វើអ្វី? សូមស្តាប់អំពីរឿងនោះ។
បងស្រីម្នាក់របស់ឡាសាឈ្មោះម៉ារៀ ដែលជាមិត្តរបស់លោកយេស៊ូ នាងបានយកប្រេងក្រអូបដែលមានតម្លៃថ្លៃណាស់មកចាក់លាបជើងរបស់លោកយេស៊ូ។ ប៉ុន្តែ យូដាសមិនពេញចិត្តទេ។ តើកូនដឹងមូលហេតុអ្វីទេ?— គាត់ថាដោយសារប្រេងនោះអាចលក់បាន ហើយយកប្រាក់ចែកឲ្យអ្នកក្រ។ តែតាមពិតគាត់ចង់មានប្រាក់ច្រើនថែមទៀតនៅក្នុងប្រអប់ ដើម្បីគាត់អាចលួចបាន។—យ៉ូហាន ១២:១-៦
លោកយេស៊ូបានប្រាប់យូដាសកុំឲ្យរំខានម៉ារៀ ព្រោះនាងបានធ្វើការល្អហើយ។ ពេលដែលលោកយេស៊ូប្រាប់ដូចនោះ យូដាសមិនពេញចិត្តទេ។ ដូច្នេះ គាត់បានទៅជួបពួកសង្ឃនាយកដែលជាសត្រូវរបស់លោកយេស៊ូ។ ពួកគេចង់ចាប់លោកយេស៊ូ។ ប៉ុន្តែ ពួកគេចង់ចាប់លោកនៅពេលយប់ ដើម្បីកុំឲ្យមនុស្សមើលឃើញពួកគេ។
យូដាសប្រាប់ពួកសង្ឃថា៖ ‹ខ្ញុំនឹងជួយអ្នករាល់គ្នាឲ្យរកឃើញហើយចាប់លោកយេស៊ូ បើអ្នករាល់គ្នាឲ្យប្រាក់ខ្ញុំ។ តើអ្នករាល់គ្នានឹងឲ្យខ្ញុំប៉ុន្មាន?›។
ពួកសង្ឃឆ្លើយថា៖ ‹យើងនឹងឲ្យអ្នកសាមសិបកាក់ធ្វើពីប្រាក់›។—ម៉ាថាយ ២៦:១៤-១៦
យូដាសបានយកប្រាក់នោះ។ នេះប្រៀបដូចជាគាត់បានលក់គ្រូដ៏ល្អប្រសើរឲ្យបុរសទាំងនោះ! សូមកូនគិតទៅមើល ការធ្វើដូចនោះជាអំពើអាក្រក់ណាស់ មែនទេ?— តែនេះជាអ្វីដែលកើតឡើង ពេលអ្នកណាម្នាក់ក្លាយទៅជាចោរលួចប្រាក់គេ។ គាត់ស្រឡាញ់ប្រាក់ខ្លាំងជាងស្រឡាញ់អ្នកឯទៀត ហើយសូម្បីតែខ្លាំងជាងព្រះដែរ។
កូនប្រហែលជានិយាយថា៖ ‹ខ្ញុំនឹងស្រឡាញ់ព្រះយេហូវ៉ាខ្លាំងជាងអ្វីៗទាំងអស់›។ គួរឲ្យសរសើរណាស់ដែលកូនមានអារម្មណ៍ដូចនោះ។ ពេលលោកយេស៊ូជ្រើសរើសយូដាសឲ្យធ្វើជាសាវ័កម្នាក់ គាត់ក៏ប្រហែលជាមានអារម្មណ៍ដូចនោះដែរ។ មានអ្នកផ្សេងទៀតដែលប្រហែលជាមានអារម្មណ៍ដូច្នោះដែរ មុនក្លាយទៅជាចោរ។ សូមស្តាប់រឿងអំពីមនុស្សខ្លះបែបនោះ។
អ្នកបម្រើម្នាក់របស់ព្រះឈ្មោះអេកាន គាត់បានរស់នៅយូរមុនដែលគ្រូដ៏ល្អប្រសើរបានកើតមក។ អេកានបានឃើញអាវវែងដ៏ស្អាតមួយ មាសមួយដុំ និងដុំប្រាក់ខ្លះៗ។ អ្វីទាំងនោះមិនមែនជារបស់គាត់ទេ។ គម្ពីរប្រាប់ថានោះជារបស់ព្រះយេហូវ៉ា ដោយយ៉ូស្វេ ៦:១៩; ៧:១១, ២០-២២
សារវាបានត្រូវដកហូតពីសត្រូវរបស់បណ្ដាជនលោក។ ប៉ុន្តែ អេកានចង់បាននោះខ្លាំងណាស់ រហូតដល់គាត់ហ៊ានលួចវាទៀតផង។—មានឧទាហរណ៍មួយទៀត។ នៅសម័យបុរាណ ព្រះយេហូវ៉ាបានជ្រើសរើសដាវីឌឲ្យធ្វើជាស្ដេចគ្រប់គ្រងលើបណ្ដាជនអ៊ីស្រាអែល។ នៅថ្ងៃមួយ ដាវីឌបានសម្លឹងមើលស្ដ្រីដ៏ស្រស់ស្អាតម្នាក់ឈ្មោះបាតសេបា។ គាត់បានបន្តមើលបាតសេបា ហើយគិតចង់យកនាងមកផ្ទះដើម្បីធ្វើជាប្រពន្ធរបស់ខ្លួន។ ក៏ប៉ុន្តែ នាងជាប្រពន្ធរបស់អ៊ូរី។ ដូច្នេះ តើដាវីឌគួរធ្វើយ៉ាងណា?—
ដាវីឌគួរឈប់គិតអំពីការចង់បានបាតសេបា។ ប៉ុន្តែ គាត់មិនបានឈប់គិតទេ។ ដូច្នេះ ដាវីឌបានយកនាងមកផ្ទះរបស់គាត់។ រួចមក គាត់បានសាំយូអែលទី២ ១១:២-២៧
រៀបចំគម្រោងការដើម្បីសម្លាប់អ៊ូរី។ ហេតុអ្វីដាវីឌបានធ្វើអំពើអាក្រក់ទាំងនេះ?— ដោយសារគាត់ចង់បានប្រពន្ធរបស់អ្នកឯទៀត។—ប៉ុន្តែព្រះយេហូវ៉ាបានទុកជីវិតឲ្យដាវីឌ ដោយសារគាត់បានប្រែចិត្ត។ តែតាំងពីពេលនោះមក ដាវីឌបានមានបញ្ហាជាច្រើន។ កូនប្រុសរបស់គាត់ឈ្មោះអាប់សាឡំមចង់ដណ្ដើមយកតំណែងជាស្ដេច។ ដូច្នេះ អាប់សាឡំមបានឱបបណ្ដាជនហើយថើបពួកគេ ពេលដែលពួកគេមកជួបដាវីឌ។ គម្ពីរចែងថា៖ ‹អាប់សាឡំមបានលួចចិត្តពួកជនជាតិអ៊ីស្រាអែល›ឲ្យក្បត់ដាវីឌ។ គាត់ធ្វើឲ្យបណ្ដាជនទាំងនោះចង់លើកគាត់ធ្វើជាស្ដេចជំនួសដាវីឌ។—សាំយូអែលទី២ ១៥:១-១២
តើកូនធ្លាប់ចង់បានអ្វីមួយយ៉ាងខ្លាំងដូចអេកាន ដាវីឌ និងអាប់សាឡំមទេ?— បើអ្វីនោះជារបស់អ្នកផ្សេងទៀត ហើយគេប្រាប់កុំឲ្យកូនយក តែកូននៅតែយក នោះមានន័យថាកូនលួចគេហើយ។ តើសាថានដែលជាចោរមុនដំបូងចង់បានអ្វី? តើកូនចាំទេ?— វាចង់ឲ្យមនុស្សគោរពប្រណិប័តន៍វាមិនមែនព្រះទេ។ ដូច្នេះ ពេលសាថានបានធ្វើឲ្យអាដាមនិងអេវ៉ាស្តាប់បង្គាប់វា នោះមានន័យថាវាកំពុងលួចអ្វីដែលជារបស់ព្រះ។
ពេលមនុស្សណាម្នាក់មានអ្វីមួយដែលជារបស់ខ្លួន គាត់មានសិទ្ធិប្រាប់ថាអ្នកណាដែលអាចប្រើបាន។ ជាឧទាហរណ៍ ប្រហែលជាកូនទៅលេងជាមួយក្មេងឯទៀតនៅផ្ទះរបស់ពួកគេ។ បើកូនយកអ្វីមួយពីផ្ទះរបស់ពួកគេមកផ្ទះរបស់កូនវិញ តើនោះមិនអីទេឬ?— កូនអាចយកបាន បើឪពុកម្ដាយរបស់ពួកគេប្រាប់កូនឲ្យយក។ បើពួកគេមិនបានប្រាប់ឲ្យកូនយកទេ នោះមានន័យថាកូនលួចគេ។
តើអ្វីប្រហែលជាជំរុញចិត្តកូនឲ្យចង់លួច?— ដោយសារកូនចង់បានអ្វីមួយដែលមិនមែនជារបស់កូន។ ទោះជាអ្នកឯទៀតមិនបានឃើញកូនយកក៏ដោយ តើអ្នកណាឃើញកូន?— គឺព្រះយេហូវ៉ា។ ម្យ៉ាងទៀត យើងត្រូវចាំថាព្រះយេហូវ៉ាស្អប់ការលួច។ ដូច្នេះ បើកូនស្រឡាញ់ព្រះនិងអ្នកជិតខាង នោះនឹងជួយកូនកុំឲ្យក្លាយទៅជាចោរ។
គម្ពីរបញ្ជាក់យ៉ាងច្បាស់ថាការលួចគឺខុស។ សូមអាន ម៉ាកុស ១០:១៧-១៩ រ៉ូម ១៣:៩ និងអេភេសូរ ៤:២៨។