ជំពូកទី៣៩
ព្រះប្រោសបុត្រលោកឲ្យរស់ឡើងវិញ
លោកយេស៊ូបានយំពេលដែលឡាសាមិត្តភក្ដិរបស់លោកបានស្លាប់។ តើកូនគិតថាព្រះយេហូវ៉ាពិបាកចិត្តទេ ពេលឃើញលោកយេស៊ូរងទុក្ខហើយស្លាប់នោះ?— គម្ពីរប្រាប់ថា ព្រះ«ព្រួយព្រះហឫទ័យ» ហើយរហូតដល់ឈឺចិត្តពេលមានរឿងអាក្រក់កើតឡើង។—ទំនុកតម្កើង ៧៨:៤០; យ៉ូហាន ១១:៣៥
តើព្រះយេហូវ៉ាឈឺចិត្តខ្លាំងយ៉ាងណាពេលឃើញបុត្រជាទីស្រឡាញ់របស់លោកស្លាប់? តើកូនអាចស្រមៃគិតបានទេ?— លោកយេស៊ូជឿជាក់ថាព្រះនឹងមិនភ្លេចលោកទេ។ ហេតុនេះហើយ មុនលោកស្លាប់លោកបាននិយាយពាក្យចុងក្រោយថា៖ «បិតា! ខ្ញុំសូមប្រគល់ជីវិតខ្ញុំជូនលោក!»។—លូកា ២៣:៤៦
លោកយេស៊ូជឿជាក់ថាព្រះនឹងប្រោសលោកឲ្យរស់ឡើងវិញ ហើយលោកនឹងមិនត្រូវទុកចោលនៅក្នុង«ផ្នូរ»ទេ។ ក្រោយពីព្រះបានប្រោសលោកយេស៊ូឲ្យរស់ឡើងវិញ សាវ័កពេត្រុសបានដកស្រង់ពាក្យក្នុងគម្ពីរអំពីលោកយេស៊ូថា៖ «លោកមិនបានត្រូវទុកចោលក្នុងផ្នូរ ហើយសាច់របស់លោកក៏មិនបានខូចទៅដែរ»។ (សកម្មភាព ២:៣១; ទំនុកតម្កើង ១៦:១០) មែនហើយ រូបកាយរបស់លោកយេស៊ូមិនបានទុកឲ្យរលួយនៅក្នុងផ្នូរ ហើយធុំក្លិនស្អុយនោះទេ។
ពេលលោកយេស៊ូនៅផែនដី លោកថែមទាំងបានប្រាប់ពួកអ្នកកាន់តាមលោកថា លោកនឹងមិនស្លាប់យូរទេ។ លោកបានពន្យល់ពួកគាត់ថា លោកនឹង«ត្រូវគេសម្លាប់ ហើយនៅថ្ងៃទីបីលោកនឹងត្រូវប្រោសឲ្យរស់ឡើងវិញ»។ (លូកា ៩:២២) ដូច្នេះ ពួកអ្នកកាន់តាមលោកពិតជាមិនគួរភ្ញាក់ផ្អើលឡើយ ពេលដែលលោកយេស៊ូបានត្រូវប្រោសឲ្យរស់ឡើងវិញ។ ប៉ុន្តែ តើពួកគាត់បានភ្ញាក់ផ្អើលទេ?— សូមឲ្យយើងស្វែងរកចម្លើយ។
ប្រហែលជានៅម៉ោងបីរសៀលថ្ងៃសុក្រ គ្រូដ៏ល្អប្រសើរបានស្លាប់នៅលើបង្គោលទារុណកម្ម។ មានបុរសអ្នកមានម្នាក់ឈ្មោះយ៉ូសែប គាត់ជាសមាជិកនៃក្រុមប្រឹក្សាជាន់ខ្ពស់ ហើយគាត់ជាអ្នកជឿលើលោកយេស៊ូ តែគាត់លាក់មិនឲ្យអ្នកឯទៀតដឹង។ ពេលគាត់ដឹងថាលោកយេស៊ូស្លាប់ គាត់បានទៅជួបពីឡាតជាអភិបាលរ៉ូម។ គាត់បានសុំយកសពលោកយេស៊ូចុះពីបង្គោលឈើ ហើយយកទៅបញ្ចុះ។ រួចមក យ៉ូសែបបានសែងសពលោកយេស៊ូទៅសួនច្បារមួយដែលមានផ្នូរ។
ក្រោយពីគេដាក់សពលោកទៅក្នុងផ្នូរហើយ គេបានប្រមៀលថ្មធំមួយបិទខាងមុខផ្នូរ។ ដូច្នេះ ផ្នូរបានត្រូវបិទជិត។ ថ្ងៃទីបីជាថ្ងៃអាទិត្យ។ មុនថ្ងៃរះ កាលមេឃនៅងងឹតនៅឡើយ មានពួកបុរសកំពុងយាមផ្នូរ។ ពួកសង្ឃនាយកបានចាត់ពួកគេឲ្យទៅយាមនៅទីនោះ។ តើកូនដឹងថាហេតុអ្វីទេ?—
ពីព្រោះពេលលោកយេស៊ូប្រាប់ថាលោកនឹងត្រូវប្រោសឲ្យរស់ឡើងវិញ ពួកសង្ឃក៏បានឮដែរ។ ដូច្នេះ ដើម្បីការពារកុំឲ្យពួកអ្នកកាន់តាមលោកយេស៊ូលួចសពលោក ហើយប្រាប់ថាលោកបានត្រូវប្រោសឲ្យរស់ឡើងវិញនោះ ពួកសង្ឃបានដាក់ពួកអ្នកយាមនៅទីនោះ។ កាលដែលពួកគេកំពុងយាម ស្រាប់តែដីបានរញ្ជួយ ហើយមានពន្លឺភ្លឺចិញ្ចាចចិញ្ចែង។ ពន្លឺនោះមកពីទេវតារបស់ព្រះយេហូវ៉ា! ពេលពួកទាហានឃើញដូចនោះ ពួកគេភ័យខ្លាចណាស់ រហូតដល់លែងកម្រើកខ្លួន។ ក្រោយមក ទេវតានោះបានប្រមៀលថ្មចេញពីផ្នូរ។ ចំណែកឯសពលោកយេស៊ូមិននៅក្នុងនោះទេ!
ហេតុអ្វីផ្នូរនេះនៅទទេ? តើមានអ្វីបានកើតឡើង?
ដូចជាសាវ័កពេត្រុសបាននិយាយក្រោយមកថា៖ «គឺលោកយេស៊ូនេះហើយ ដែលព្រះបានប្រោសឲ្យរស់ឡើងវិញ»។ (សកម្មភាព ២:៣២) ព្រះបានប្រោសលោកយេស៊ូឲ្យរស់ឡើងវិញ ហើយឲ្យលោកមានរូបកាយស្រដៀងនឹងរូបកាយ ដែលលោកធ្លាប់មានមុនពេលលោកមកផែនដី។ ព្រះបានប្រោសលោកឲ្យរស់ឡើងវិញដោយមានរូបកាយវិញ្ញាណ ដូចរូបកាយដែលទេវតាមានដែរ។ (ពេត្រុសទី១ ៣:១៨) ដូច្នេះ ដើម្បីឲ្យមនុស្សមើលឃើញលោកយេស៊ូ លោកត្រូវតែកាឡាខ្លួនជាមនុស្សមានរូបកាយសាច់ឈាម។ តើលោកធ្វើដូច្នោះទេ?— សូមឲ្យស្តាប់អ្វីដែលកើតឡើងក្រោយពីទេវតាបានប្រមៀលថ្មចេញ។
ពេលថ្ងៃរះ ពួកទាហានបានចេញទៅ។ ម៉ារៀម៉ាក់ដាឡេននិងស្ដ្រីឯទៀតដែលជាអ្នកកាន់តាមលោកយេស៊ូបានធ្វើដំណើរមកផ្នូរ។ ពួកគាត់កំពុងនិយាយគ្នាថា៖ ‹តើអ្នកណានឹងប្រមៀលថ្មដ៏ធ្ងន់នោះចេញឲ្យយើង?›។ (ម៉ាកុស ១៦:៣) ប៉ុន្តែ ពេលពួកគាត់មកដល់ផ្នូរ ថ្មនោះបានត្រូវប្រមៀលចេញហើយ ថែមទាំងផ្នូរនៅទទេទៀត! សពលោកយេស៊ូលែងមានទៀតហើយ! រំពេចនោះ ម៉ារៀម៉ាក់ដាឡេនបានរត់ទៅប្រាប់ពួកសាវ័កខ្លះរបស់លោកយេស៊ូ។
ចំណែកស្ដ្រីផ្សេងទៀតបានចាំនៅឯផ្នូរ។ ពួកគាត់ឆ្ងល់ថា៖ ‹តើសពលោកយេស៊ូនៅឯណា?›។ ស្រាប់តែមានបុរសពីរនាក់ដែលមានសម្លៀកបំពាក់ភ្លឺចិញ្ចាចចិញ្ចែងបានលេចមក។ ពួកគាត់ជាទេវតា! ពួកគាត់បាននិយាយទៅស្ដ្រីទាំងនោះថា៖ ‹ហេតុអ្វីពួកនាងមករកលោកយេស៊ូ? លោកបានត្រូវប្រោសឲ្យរស់ឡើងវិញហើយ។ ចូរប្រញាប់ទៅប្រាប់ពួកអ្នកកាន់តាមលោក›។ ស្ដ្រីទាំងនោះច្បាស់ជារត់លឿនណាស់! នៅតាមផ្លូវមានបុរសម្នាក់មកជួបពួកគាត់។ តើបុរសនោះជាអ្នកណា? តើកូនដឹងទេ?—
បុរសនោះជាលោកយេស៊ូ ដែលបានកាឡាខ្លួនជាមនុស្សមានរូបកាយសាច់ឈាម! លោកក៏បាននិយាយទៅកាន់ស្ដ្រីទាំងនោះថា៖ ‹ចូរទៅប្រាប់ពួកអ្នកកាន់តាមខ្ញុំ›។ ឮដូច្នោះស្ដ្រីទាំងនោះរំភើបចិត្តណាស់។ ពេលពួកគាត់ជួបពួកសាវ័ក ពួកគាត់ក៏ប្រាប់ថា៖ ‹លោកយេស៊ូរស់ឡើងវិញហើយ! ពួកយើងបានឃើញលោក!›។ ម៉ារៀបានប្រាប់ពេត្រុសនិងយ៉ូហានរួចហើយអំពីផ្នូរនៅទទេ។ ដូច្នេះ ពេត្រុសនិងយ៉ូហានទៅមើលផ្នូរដោយខ្លួនគាត់ផ្ទាល់ ដូចកូនឃើញក្នុងរូបភាព។ ពួកគាត់មើលក្រណាត់ដែលគេបានរុំសពលោកយេស៊ូ ហើយក៏ឆ្ងល់អំពីអ្វីដែលបានកើតឡើង។ ពួកគាត់ចង់ជឿថាលោកយេស៊ូរស់ឡើងវិញ តែរឿងនោះហាក់ដូចជាអស្ចារ្យពេក។
តើពេត្រុសនិងយ៉ូហានប្រហែលជាកំពុងគិតអ្វី?
នៅថ្ងៃអាទិត្យដដែលនោះ លោកយេស៊ូបានបង្ហាញខ្លួនឲ្យអ្នកកាន់តាមពីរនាក់ដែលកំពុងធ្វើដំណើរទៅភូមិអេម៉ាស។ លោកយេស៊ូបានដើរបណ្ដើរហើយនិយាយជាមួយពួកគាត់បណ្ដើរ តែពួកគាត់មើលមិនស្គាល់លោកទេ ព្រោះលោកមិនមានរូបកាយសាច់ឈាមដូចគ្នានឹងរូបកាយពីមុនទេ។ ប៉ុន្តែ ពេលលោកយេស៊ូអធិដ្ឋាននិងពិសាអាហារជាមួយពួកគាត់ ទើបពួកគាត់ស្គាល់ថាជាលោក។ ពួកគាត់រំភើបចិត្តខ្លាំងណាស់ ដូច្នេះពួកគាត់ប្រញាប់ធ្វើដំណើរជាច្រើនគីឡូម៉ែតត្រឡប់ទៅក្រុងយេរូសាឡិមវិញ! ប្រហែលជាមិនយូរប៉ុន្មានក្រោយពីនោះ លោកយេស៊ូបានលេចមកជួបពេត្រុស ដើម្បីឲ្យគាត់ឃើញថាលោកបានរស់ឡើងវិញមែន។
នៅល្ងាចថ្ងៃអាទិត្យដដែលនោះ ពួកអ្នកកាន់តាមបានជួបជុំគ្នាក្នុងបន្ទប់មួយ។ ពួកគាត់បានចាក់សោបន្ទប់។ រំពេចនោះ លោកយេស៊ូលេចមកក្នុងចំណោមពួកគាត់តែម្ដង! ឥឡូវពួកគាត់ដឹងថាគ្រូដ៏ល្អប្រសើរពិតជាបានរស់ឡើងវិញមែន។ សូមស្រមៃគិតទៅមើល តើពួកគាត់សប្បាយចិត្តយ៉ាងណាពេលឃើញលោកយេស៊ូនោះ!—ម៉ាថាយ ២៨:១-១៥; លូកា ២៤:១-៤៩; យ៉ូហាន ១៩:៣៨–២០:២១
ក្នុងអំឡុងពេល៤០ថ្ងៃ លោកយេស៊ូបានលេចមកក្នុងរូបកាយសាច់ឈាមផ្សេងពីគ្នា ដើម្បីបង្ហាញឲ្យពួកអ្នកកាន់តាមលោកឃើញថាលោកបានរស់ឡើងវិញមែន។ ក្រោយមក លោកបានចាកចេញពីផែនដីត្រឡប់ទៅនៅជាមួយបិតារបស់លោកនៅស្ថានសួគ៌វិញ។ (សកម្មភាព ១:៩-១១) មិនយូរក្រោយមក ពួកអ្នកកាន់តាមលោកចាប់ផ្ដើមប្រាប់ដល់មនុស្សគ្រប់គ្នាថា ព្រះបានប្រោសលោកយេស៊ូឲ្យរស់ឡើងវិញហើយ។ សូម្បីតែពួកសង្ឃវាយពួកគាត់ ហើយពួកគាត់ខ្លះត្រូវគេសម្លាប់ក្ដី ពួកគាត់នៅបន្តផ្សព្វផ្សាយជានិច្ច។ ពួកអ្នកកាន់តាមលោកយេស៊ូដឹងថា បើស្លាប់ ព្រះនឹងប្រោសពួកគាត់ឲ្យរស់ឡើងវិញ ដូចលោកប្រោសបុត្ររបស់លោកឲ្យរស់ឡើងវិញដែរ។
ពួកអ្នកកាន់តាមលោកយេស៊ូបានប្រាប់មនុស្សអំពីការអស្ចារ្យដែលព្រះបានធ្វើ គឺលោកបានប្រោសបុត្ររបស់លោកឲ្យរស់ឡើងវិញ។ យើងក៏អាចធ្វើដូចពួកគាត់ដែរ។ យើងមិនចាំបាច់ខ្លាចទេ ទោះជាមនុស្សគំរាមថាសម្លាប់យើងក៏ដោយ។ បើយើងស្លាប់ ព្រះយេហូវ៉ាមិនភ្លេចយើងទេ លោកនឹងប្រោសយើងឲ្យរស់ឡើងវិញ ដូចលោកបានប្រោសលោកយេស៊ូឲ្យរស់ឡើងវិញដែរ។
ព្រះនឹកចាំអ្នកដែលបម្រើលោក ហើយសូម្បីតែពួកគេស្លាប់ហើយក្ដី លោកនឹងប្រោសពួកគេឲ្យរស់ឡើងវិញ។ ពេលយើងដឹងដូចនេះ ពិតជាធ្វើឲ្យយើងសប្បាយចិត្តណាស់ មែនទេ?— ការដឹងដូចនេះ គួរជំរុញចិត្តយើងឲ្យចង់ស្វែងយល់អំពីរបៀបដែលយើងអាចធ្វើឲ្យព្រះពេញចិត្ត។ តើយើងពិតជាអាចធ្វើឲ្យព្រះពេញចិត្តបានទេ? តើកូនដឹងទេ?— សូមស្តាប់អំពីរឿងនេះនៅជំពូកបន្ទាប់។
ការជឿថាលោកយេស៊ូបានត្រូវប្រោសឲ្យរស់ឡើងវិញគួរពង្រឹងជំនឿនិងសេចក្ដីសង្ឃឹមរបស់យើង។ សូមអាន សកម្មភាព ២:២២-៣៦; ៤:១៨-២០ និងកូរិនថូសទី១ ១៥:៣-៨, ២០-២៣។
លោកអ្នកក៏ប្រហែលជាចូលចិត្តដែរ
លោកយេស៊ូ ជាផ្លូវ ជាសេចក្ដីពិត ជាជីវិត
ទីបញ្ចុះសពនៅទទេ លោកយេស៊ូរស់ឡើងវិញហើយ!
ក្រោយពីលោកយេស៊ូបានត្រូវប្រោសឲ្យរស់ឡើងវិញ លោកបានលេចមកឲ្យស្ត្រីដែលជាអ្នកកាន់តាមលោកឃើញមុនគេ មិនមែនពួកសាវ័ករបស់លោកទេ។
លោកយេស៊ូ ជាផ្លូវ ជាសេចក្ដីពិត ជាជីវិត
ក្រោយពីរស់ឡើងវិញលោកយេស៊ូលេចមកជួបមនុស្សជាច្រើន
តើតាមរបៀបណាលោកយេស៊ូធ្វើឲ្យពួកអ្នកកាន់តាមជឿថាលោកបានត្រូវប្រោសឲ្យរស់ឡើងវិញ?
