ជំពូកទី៣៨
ហេតុអ្វីយើងគួរស្រឡាញ់លោកយេស៊ូ?
សូមស្រមៃថា កូននៅក្នុងទូកមួយដែលកំពុងលិច។ តើកូនចង់ឲ្យអ្នកណាម្នាក់មកសង្គ្រោះកូនឬទេ?— ចុះបើមានអ្នកណាម្នាក់បានលះបង់ជីវិតរបស់គាត់ដើម្បីសង្គ្រោះកូន?— តាមពិត លោកយេស៊ូគ្រិស្ដបានលះបង់ជីវិតរបស់លោកដើម្បីយើង។ ដូចយើងបានរៀនក្នុងជំពូកទី៣៧ហើយថា លោកយេស៊ូបានឲ្យជីវិតរបស់លោកជាថ្លៃលោះដើម្បីសង្គ្រោះយើង។
លោកយេស៊ូមិនបានសង្គ្រោះយើងពីការលង់ទឹកនោះទេ។ បើដូច្នេះ តើលោកសង្គ្រោះយើងពីអ្វី? តើកូននៅចាំទេ?— គឺលោកសង្គ្រោះយើងពីភាពខុសឆ្គងនិងសេចក្ដីស្លាប់ដែលយើងទាំងអស់គ្នាបានទទួលពីអាដាម។ មនុស្សខ្លះបានធ្វើអំពើដ៏អាក្រក់ណាស់។ ទោះជាយ៉ាងនោះក៏ដោយ លោកយេស៊ូក៏បានស្លាប់ជំនួសពួកគេដែរ។ តើកូនសុខចិត្តប្រថុយជីវិតដើម្បីសង្គ្រោះមនុស្សដែលបានធ្វើអំពើអាក្រក់ទេ?—
គម្ពីរប្រាប់ថា៖ «កម្រមានអ្នកណាសុខចិត្តស្លាប់ដើម្បីមនុស្សសុចរិត តែដើម្បីមនុស្សល្អ ប្រហែលជាមានអ្នកដែលហ៊ានស្លាប់»។ ប៉ុន្តែ គម្ពីរពន្យល់ថាលោកយេស៊ូ‹បានស្លាប់ដើម្បីមនុស្សដែលមិនគោរពព្រះ› នោះរួមបញ្ចូលមនុស្សដែលមិនទាំងបម្រើព្រះផង! គម្ពីរប្រាប់ថែមទៀតថា៖ «គ្រិស្ដស្លាប់ដើម្បីយើង កាលដែលយើងនៅជាអ្នកធ្វើខុសនៅឡើយ»។—រ៉ូម ៥:៦-៨
តើកូននៅចាំទេថា សាវ័កមួយណាដែលពេលមុនបានធ្វើអំពើដ៏អាក្រក់?— សាវ័កនោះបានសរសេរថា៖ «គ្រិស្ដយេស៊ូបានចូលក្នុងពិភពលោកដើម្បីសង្គ្រោះអ្នកដែលប្រព្រឹត្តអំពើខុសឆ្គង ក្នុងចំណោមអ្នកទាំងនោះ ខ្ញុំខុសធ្ងន់ជាងគេ»។ សាវ័កដែលបាននិយាយពាក្យទាំងនេះ គឺជាសាវ័កប៉ូល។ គាត់បាននិយាយថាគាត់ធ្លាប់ជា«មនុស្សឥតវិចារណញ្ញាណ»ឬមិនចេះពិចារណា ហើយថាគាត់បានបន្ត«ប្រព្រឹត្តអំពើអាក្រក់»។—ធីម៉ូថេទី១ ១:១៥; ទីតុស ៣:៣
ព្រះបានចាត់បុត្ររបស់លោកឲ្យស្លាប់ដើម្បីមនុស្សដូចនោះ នេះបង្ហាញថាលោកស្រឡាញ់មនុស្សខ្លាំងណាស់! ឥឡូវ សូមកូនបើកគម្ពីរ ហើយអានអំពីរឿងនេះក្នុងសៀវភៅយ៉ូហាន ជំពូកទី៣ ខ១៦។ ខនេះចែងថា៖ «ព្រះស្រឡាញ់ពិភពលោក[ជាមនុស្សដែលរស់នៅផែនដី] ដល់ម៉្លេះបានជាលោកបានឲ្យបុត្រតែមួយរបស់លោក ដើម្បីឲ្យអស់អ្នកដែលបង្ហាញជំនឿលើបុត្រនោះអាចមានជីវិតដែលគ្មានទីបញ្ចប់ ហើយមិនត្រូវបំផ្លាញឡើយ»។
តើលោកយេស៊ូបានរងទុក្ខអ្វីខ្លះ ពេលលោកឲ្យជីវិតរបស់លោកដើម្បីយើង?
លោកយេស៊ូបានបង្ហាញថា លោកស្រឡាញ់យើងដូចបិតាលោកស្រឡាញ់យើងដែរ។ កូនប្រហែលជានៅចាំរឿងនោះក្នុងជំពូកទី៣០ ដែលរៀបរាប់អំពីលោកយេស៊ូបានរងទុក្ខជាច្រើននៅយប់ដែលគេបានចាប់លោក។ គេបានយកលោកទៅផ្ទះរបស់សម្ដេចសង្ឃកៃផា នៅទីនោះគេបានវិនិច្ឆ័យទោសលោក។ គេបាននាំសាក្សីក្លែងក្លាយមក ដើម្បីឲ្យនិយាយកុហកអំពីលោក ហើយមនុស្សបានដាល់លោក។ នៅពេលនោះដែរ ពេត្រុសបានបដិសេធមិនទទួលស្គាល់លោកយេស៊ូ។ ឥឡូវសូមឲ្យយើងស្រមៃថា យើងកំពុងនៅកន្លែងនោះ ហើយឃើញអ្វីដែលកើតឡើងក្រោយមក។
ពេញមួយយប់លោកយេស៊ូមិនបានសម្រាន្តសោះ។ ព្រឹកឡើង ពួកសង្ឃហៅសមាជិកនៃក្រុមប្រឹក្សាជាន់ខ្ពស់ឬតុលាការកំពូលរបស់ពួកយូដាមកភ្លាមៗ ដើម្បីកាត់ក្ដីម្ដងទៀត ដោយសារការវិនិច្ឆ័យទោសដែលគេធ្វើនៅពេលយប់នោះ គឺមិនស្របច្បាប់ទេ។ នៅពេលនោះដែរ ពួកគេបានចោទប្រកាន់លោកយេស៊ូពីបទប្រឆាំងព្រះ។
បន្ទាប់មក ពួកសង្ឃបានចងលោកយេស៊ូ ហើយនាំលោកទៅជួបពីឡាតជាអភិបាលរ៉ូម។ ពួកគេប្រាប់ពីឡាតថា៖ ‹យេស៊ូនេះប្រឆាំងនឹងរដ្ឋាភិបាល។ គាត់គួរតែស្លាប់›។ ប៉ុន្តែ ពីឡាតយល់ថា ពួកសង្ឃទាំងនេះកំពុងនិយាយកុហកទេ។ ដូច្នេះ ពីឡាតប្រាប់ពួកគេថា៖ ‹ខ្ញុំមិនឃើញថាបុរសនេះធ្វើខុសអ្វីទេ។ ខ្ញុំនឹងដោះលែងគាត់›។ ទោះជាពីឡាតប្រាប់យ៉ាងនោះក៏ដោយ ពួកសង្ឃនិងអ្នកឯទៀតស្រែកឡើងថា៖ ‹អត់ទេ! ត្រូវតែសម្លាប់គាត់!›។
ក្រោយមក ពីឡាតបានព្យាយាមប្រាប់ពួកគេម្ដងទៀតថា គាត់នឹងដោះលែងលោកយេស៊ូ។ ប៉ុន្តែ ពួកសង្ឃបានញុះញង់បណ្ដាជនឲ្យស្រែកឡើងថា៖ ‹បើលោកដោះលែងគាត់ លោកក៏ប្រឆាំងនឹងរដ្ឋាភិបាលដែរ! សម្លាប់គាត់ទៅ!›។ បណ្ដាជនចាប់ផ្ដើមស្រែកខ្លាំងៗ។ ដូច្នេះ តើពីឡាតបានធ្វើអ្វី? តើកូនដឹងទេ?—
ពីឡាតបានស្តាប់តាមបណ្ដាជន។ មុនដំបូងគាត់ឲ្យគេវាយលោកយេស៊ូ រួចមកបញ្ជូនលោកទៅពួកទាហានដើម្បីឲ្យគេសម្លាប់លោក។ ពួកគេបានក្រងបន្លាធ្វើជាមកុដបំពាក់លើក្បាលលោក ហើយពួកគេចំអកឲ្យដោយធ្វើជាលំឱនកាយគោរពលោក។ បន្ទាប់មក គេឲ្យលោក
យេស៊ូលីបង្គោលឈើធំមួយ ហើយនាំលោកទៅខាងក្រៅក្រុងនៅកន្លែងមួយដែលគេហៅថាកន្លែងលលាដ៍ក្បាល។ នៅទីនោះ ពួកគេបានយកដែកគោលដំដៃនិងជើងលោកយេស៊ូភ្ជាប់នឹងបង្គោលឈើ។ រួចមក ពួកគេបញ្ឈរបង្គោលនោះឡើង ដើម្បីព្យួរលោកយេស៊ូ។ ឈាមរបស់លោកហូរស្រោចខ្លួន។ លោកច្បាស់ជាឈឺចាប់ខ្លាំងណាស់។ប៉ុន្តែ លោកយេស៊ូមិនស្លាប់ភ្លាមៗទេ។ លោកត្រូវគេព្យួរនៅលើបង្គោលឈើនោះ។ ពួកសង្ឃនាយកបានចំអកឲ្យលោក។ អ្នកដែលដើរកាត់បាននិយាយថា៖ «បើអ្នកឯងជាបុត្រព្រះមែន ចូរចុះពីបង្គោលទារុណកម្មមក!»។ ប៉ុន្តែ លោកយេស៊ូដឹងអំពីគោលបំណងដែលបិតាលោកបានចាត់លោកឲ្យមកផែនដី។ ដូច្នេះ លោកដឹងថាលោកត្រូវឲ្យជីវិតដ៏ល្អឥតខ្ចោះរបស់លោក ដើម្បីឲ្យយើងអាចមានឱកាសទទួលជីវិតដែលគ្មានទីបញ្ចប់។ នៅទីបំផុត ប្រហែលជាម៉ោងបីម៉ាថាយ ២៦:៣៦–២៧:៥០; ម៉ាកុស ១៥:១; លូកា ២២:៣៩–២៣:៤៦; យ៉ូហាន ១៨:១–១៩:៣០
រសៀល លោកយេស៊ូបានបន្លឺសំឡេងយ៉ាងខ្លាំងទៅបិតាលោក ហើយផុតដង្ហើមទៅ។—លោកយេស៊ូពិតជាខុសពីអាដាមឆ្ងាយណាស់! អាដាមមិនបានបង្ហាញសេចក្ដីស្រឡាញ់ចំពោះព្រះទេ។ គាត់មិនបានស្តាប់បង្គាប់ព្រះឡើយ។ គាត់ក៏មិនបានបង្ហាញសេចក្ដីស្រឡាញ់ចំពោះយើងដែរ។ ដោយសារគាត់បានធ្វើអំពើខុសឆ្គង យើងទាំងអស់គ្នាបានកើតមកដោយមានភាពខុសឆ្គង។ ប៉ុន្តែ លោកយេស៊ូបានបង្ហាញសេចក្ដីស្រឡាញ់ចំពោះព្រះនិងចំពោះយើង។ លោកស្តាប់បង្គាប់ព្រះជានិច្ច។ បន្ថែមទៀត លោកបានឲ្យជីវិតរបស់លោក ដើម្បីដកចេញនូវផលវិបាកដែលអាដាមបានបន្សល់ទុកឲ្យយើង។
តើយើងអាចធ្វើអ្វីខ្លះដើម្បីបង្ហាញថាយើងស្រឡាញ់លោកយេស៊ូ?
តើកូនយល់តម្លៃនៃអ្វីដែលលោកយេស៊ូបានធ្វើទេ?— ពេលកូនអធិដ្ឋានទៅព្រះ តើកូនអរគុណលោកដែលបានឲ្យបុត្ររបស់លោកដល់យើងទេ?— សាវ័កប៉ូលបានដឹងគុណលោកយេស៊ូចំពោះអ្វីដែលលោកបានធ្វើដើម្បីគាត់។ ប៉ូលបានសរសេរថា បុត្ររបស់ព្រះ«បានស្រឡាញ់ខ្ញុំ ហើយបានប្រគល់ខ្លួនដើម្បីខ្ញុំ»។ (កាឡាទី ២:២០) លោកយេស៊ូបានស្លាប់ដើម្បីកូននិងដើម្បីខ្ញុំដែរ។ លោកបានឲ្យជីវិតដ៏ល្អឥតខ្ចោះរបស់លោកដើម្បីឲ្យយើងអាចមានជីវិតដែលគ្មានទីបញ្ចប់! ការដឹងអំពីនោះពិតជាជំរុញចិត្តយើងឲ្យស្រឡាញ់លោកយេស៊ូ។
សាវ័កប៉ូលបានសរសេរទៅកាន់គ្រិស្ដសាសនិកនៅក្រុងកូរិនថូសថា៖ «សេចក្ដីស្រឡាញ់ដែលគ្រិស្ដមាន ជំរុញចិត្តយើង»។ តើសេចក្ដីស្រឡាញ់របស់គ្រិស្ដគួរជំរុញចិត្តយើងឲ្យមានការប្រព្រឹត្តបែបណា? តើកូនគិតយ៉ាងណា?— សូមកត់សម្គាល់ចម្លើយរបស់សាវ័កប៉ូលថាគ្រិស្ដ«បានស្លាប់ដើម្បីមនុស្សទាំងអស់ ដើម្បីឲ្យអ្នកដែលរស់ អាចរស់ដើម្បីលោក . . . មិនមែនរស់ដើម្បី[បំពេញចិត្ត]ខ្លួនឯងទៀតទេ»។—កូរិនថូសទី២ ៥:១៤, ១៥
តើមានវិធីណាខ្លះដែលកូនអាចបង្ហាញថាកូនកំពុងរស់នៅដើម្បីបំពេញចិត្តរបស់គ្រិស្ដ? តើកូនអាចគិតឃើញទេ?— វិធីមួយគឺកូនអាចប្រាប់អ្នកឯទៀតអំពីអ្វីដែលកូនបានរៀនអំពីលោក។ សូមគិតអំពីវិធីមួយទៀត ឧបមាថាកូននៅម្នាក់ឯង ដូច្នេះឪពុកម្ដាយរបស់កូនមិនអាចឃើញអ្វីដែលកូនកំពុងធ្វើទេ ហើយអ្នកឯទៀតក៏មិនអាចឃើញកូនដែរ។ តើកូននឹងមើលអ្វីមួយក្នុងទូរទស្សន៍ឬអ៊ីនធឺណិត ដែលលោកយេស៊ូមិនពេញចិត្តឬទេ?— សូមចាំថា ឥឡូវនេះលោកយេស៊ូមានជីវិតរស់នៅ ហើយអាចឃើញអ្វីៗទាំងអស់ដែលយើងធ្វើ!
តើអ្នកណាអាចឃើញអ្វីៗទាំងអស់ដែលយើងធ្វើ?
មូលហេតុមួយទៀតដែលយើងគួរស្រឡាញ់លោកយេស៊ូ គឺយើងចង់យកតម្រាប់តាមព្រះយេហូវ៉ា។ លោកយេស៊ូបាននិយាយថា៖ «បិតានៅស្ថានសួគ៌ស្រឡាញ់ខ្ញុំ»។ តើកូនដឹងមូលហេតុដែលព្រះយេហូវ៉ាស្រឡាញ់លោកយេស៊ូ និងមូលហេតុដែលយើងគួរស្រឡាញ់លោកយេស៊ូដែរទេ?— គឺដោយសារលោកយេស៊ូសុខចិត្តស្លាប់ដើម្បីធ្វើតាមបំណងប្រាថ្នារបស់ព្រះ។ (យ៉ូហាន ១០:១៧) ដូច្នេះ សូមធ្វើតាមពាក្យក្នុងគម្ពីរដែលថា៖ «ចូរយកតម្រាប់តាមព្រះ ក្នុងនាមជាកូនជាទីស្រឡាញ់របស់លោក ចូរបន្តរស់នៅដោយបង្ហាញសេចក្ដីស្រឡាញ់ ដូចគ្រិស្ដបានស្រឡាញ់អ្នករាល់គ្នា ហើយបានប្រគល់ខ្លួនលោកដើម្បីអ្នករាល់គ្នា»។—អេភេសូរ ៥:១, ២
ដើម្បីយើងមានចិត្តកតញ្ញូជ្រាលជ្រៅចំពោះលោកយេស៊ូ និងចំពោះអ្វីដែលលោកបានធ្វើដើម្បីយើង សូមអាន យ៉ូហាន ៣:៣៥; ១៥:៩, ១០ និងយ៉ូហានទី១ ៥:១១, ១២។