តើការរួមភេទនឹងធ្វើឲ្យស្នេហាស្អិតរមួតឬ?
ជំពូកទី២៤
តើការរួមភេទនឹងធ្វើឲ្យស្នេហាស្អិតរមួតឬ?
នារីម្នាក់ឈ្មោះហេធើមានសង្សារឈ្មោះម៉ៃ។ ពួកគេទើបតែស្គាល់គ្នាត្រឹមតែពីរខែប៉ុណ្ណោះ តែហាក់ដូចជាស្គាល់គ្នាយូរហើយ។ ពួកគេផ្ញើសារឲ្យគ្នាគ្រប់ពេល។ បើនិយាយទូរស័ព្ទជាមួយគ្នាម្ដងៗសឹងតែរាប់ម៉ោង ថែមទាំងអាចដឹងចិត្តដឹងថ្លើមគ្នាទៀតផង។ ប៉ុន្តែឥឡូវ ខណៈដែលពួកគេអង្គុយក្នុងឡានក្រោមពន្លឺដួងចន្ទ ម៉ៃមិនស្កប់ចិត្តត្រឹមតែការនិយាយគ្នាប៉ុណ្ណោះទេ។
រយៈពេលពីរខែកន្លងមកនេះ ម៉ៃនិងហេធើមិនបានធ្វើហួសពីការកាន់ដៃនិងថើបថ្ពាល់គ្នាឡើយ។ ហេធើមិនចង់ធ្វើលើសពីនេះ តែក៏មិនចង់បាត់បង់ម៉ៃដែរ។ ពីមុនមក មិនដែលមានអ្នកណាធ្វើឲ្យនាងស្រស់ស្រាយនិងពិសេសដូចនេះទេ។ នាងប្រាប់ខ្លួនថា‹យើងទាំងពីរនាក់ស្រឡាញ់គ្នា ដូច្នេះយើងអាច . . . ›។
ប្អូនអាចស្មានដឹងហើយថា អ្នកទាំងពីរនោះនឹងធ្វើអ្វីជាមួយគ្នា។ ប៉ុន្តែ ប្អូនប្រហែលជានឹកស្មានមិនដល់ថា បន្ទាប់ពីម៉ៃនិងហេធើរួមភេទជាមួយគ្នាហើយ ជីវិតរបស់ពួកគេបានផ្លាស់ប្ដូរយ៉ាងខ្លាំង គឺមិនមែនផ្លាស់ប្ដូរទៅជាប្រសើរជាងឡើយ។ ហេតុអ្វី? សូមពិចារណាដូចតទៅ៖
បើប្អូនប្រឆាំងច្បាប់ធម្មជាតិដូចជាច្បាប់ទំនាញផែនដី នោះប្អូននឹងជួបគ្រោះថ្នាក់។ ច្បាប់សីលធម៌ក៏ដូចគ្នាដែរ។ ឧទាហរណ៍ច្បាប់មួយចែងថា៖ «[ចូរ]ជៀសចេញពីអំពើប្រាសចាកសីលធម៌ខាងផ្លូវភេទ»។ (ថែស្សាឡូនិចទី១ ៤:៣) តើការមិនធ្វើតាមបង្គាប់នោះនាំឲ្យមានផលវិបាកអ្វី? គម្ពីរចែងទៀតថា៖ «អ្នកណាដែលប្រព្រឹត្តអំពើប្រាសចាកសីលធម៌ខាងផ្លូវភេទ អ្នកនោះកំពុងធ្វើខុសចំពោះរូបកាយខ្លួន»។ (កូរិនថូសទី១ ៦:១៨) ហេតុអ្វីនោះជាការពិត? តើការរួមភេទមុនរៀបការនាំឲ្យមានផលវិបាកអ្វីខ្លះ? សូមប្អូនសរសេរផលវិបាកបី៖
១ ․․․․․
២ ․․․․․
៣ ․․․․․
សូមមើលអ្វីដែលប្អូនបានសរសេរ។ តើក្នុងនោះមានជំងឺកាមរោគ ការមានផ្ទៃពោះដែលមិនចង់បាន ឬការមិនពេញចិត្តពីព្រះឬទេ? នេះជាផលវិបាកយ៉ាងធ្ងន់ធ្ងរចំពោះអស់អ្នកដែលបំពានច្បាប់របស់ព្រះ ស្ដីអំពីអំពើប្រាសចាកសីលធម៌ខាងផ្លូវភេទ។
ប៉ុន្តែ ប្អូនប្រហែលជាវែកញែកថា‹ខ្ញុំគ្មានថ្ងៃជួបលទ្ធផលបែបនោះទេ›។ អ្នកណាៗក៏រួមភេទដែរ។ មិត្តភក្តិនៅសាលាអួតគ្នាអំពីរឿងដែលពួកគេបានរួមភេទ ហើយមើលទៅពួកគេមិនជួបបញ្ហាអ្វីសោះ។ ប្រហែលដូចហេធើ ប្អូនអាចគិតថាការរួមភេទនឹងធ្វើឲ្យស្នេហារបស់ប្អូនជាមួយសង្សារកាន់តែផ្អែមល្ហែម។ ម្យ៉ាងទៀត គ្មានអ្នកណាម្នាក់ចង់ឲ្យគេចំអកថាមនុស្សព្រហ្មចារីឡើយ ដូច្នេះល្អជាង បើធ្វើតាមគេ មែនទេ?
ប៉ុន្តែ សូមគិតបន្តិចសិន! ជាដំបូង មិនមែនអ្នកណាៗក៏រួមភេទទេ! ប្អូនប្រហែលជាបានដឹងអំពីរឿងនេះ តាមស្ថិតិបញ្ជាក់ថាយុវវ័យមួយចំនួនធំធ្លាប់រួមភេទ។ ជាឧទាហរណ៍ ការស្ទង់មតិមួយនៅសហរដ្ឋអាម៉េរិកបានរកឃើញថា យុវវ័យពីរនាក់ក្នុងចំណោមបីនាក់នៅអាម៉េរិកបានរួមភេទមុនរៀនចប់វិទ្យាល័យ។ តួលេខនេះបង្ហាញថាចំនួនមនុស្សដែលមិនធ្លាប់រួមភេទ នៅតែជាចំនួនមួយខ្ពស់។ ចុះយុវវ័យដែលធ្លាប់រួមភេទ យ៉ាងណាដែរ? តាមការស្រាវជ្រាវបានបង្ហាញថា ពួកគេភាគច្រើនត្រូវឆ្លងកាត់ផលវិបាកជាច្រើនដូចជា៖
ផលវិបាកទី១ ខូចចិត្ត។ យុវវ័យភាគច្រើនដែលរួមភេទមុនរៀបការនិយាយថា ពួកគេស្ដាយក្រោយ។
ផលវិបាកទី២ មិនទុកចិត្តគ្នា។ ក្រោយពីរួមភេទរួច អ្នកទាំងពីរចាប់ផ្ដើមសង្ស័យគ្នាថា‹តើគាត់ធ្លាប់រួមភេទជាមួយអ្នកផ្សេងឬទេ?›។
ផលវិបាកទី៣ ខកចិត្ត។ នារីស្ទើរតែទាំងអស់ចង់បានបុរសដែលអាចជួយការពារនាង មិនមែនកេងប្រយោជន៍ពីនាងទេ។ ចំណែកឯយុវជនភាគច្រើនក្រោយបានខ្លួនសង្សារហើយ ពួកគេមិនសូវចាប់អារម្មណ៍នាងទៀតឡើយ។
បន្ថែមទៅទៀត យុវជនមួយចំនួនប្រាប់ថា ពួកគេនឹងមិនរៀបការជាមួយមនុស្សស្រីដែលពួកគេធ្លាប់រួមភេទទេ។ ហេតុអ្វី? ពីព្រោះពួកគេចង់រៀបការជាមួយមនុស្សស្រីដែលចេះឲ្យតម្លៃព្រហ្មចារី!
បើប្អូនជានារីវិញ សម្ដីដូចនោះអាចធ្វើឲ្យប្អូនភ្ញាក់ផ្អើល ឬរហូតដល់ខឹង។ សូមចាំថាក្នុងជីវិតពិត ការជ្រុលជ្រួសខ្លួនប្រាណ«ឬទុំមុនស្រគាល» គឺខុសគ្នាឆ្ងាយពីក្នុងខ្សែភាពយន្តឬទូរទស្សន៍។ ឧស្សាហ៍កម្មកម្សាន្តច្រើនតែបង្ហាញពីការរួមភេទរបស់យុវវ័យ ថាជាការសប្បាយ ជាមនោសញ្ចេតនា និងជាស្នេហ៍ពិតទៀតផង។ ប៉ុន្តែ កុំឆាប់ជឿគេឲ្យសោះ! អ្នកដែលខំលួងលោមប្អូនឲ្យរួមភេទមុនរៀបការ គឺគិតតែពីខ្លួនឯងប៉ុណ្ណោះ។ (កូរិនថូសទី១ ១៣:៤, ៥) បើអ្នកណាម្នាក់ពិតជាស្រឡាញ់ប្អូនមែន គាត់នឹងមិនធ្វើអ្វីដែលនាំឲ្យប្អូនឈឺចាប់ទាំងផ្លូវកាយនិងផ្លូវចិត្តទេ។ (សុភាសិត ៥:៣, ៤) ម្យ៉ាងទៀត បើនរណាម្នាក់ពិតជាយកចិត្តទុកដាក់ចំពោះប្អូនមែន គាត់នឹងមិនព្យាយាមបញ្ចុះបញ្ចូលប្អូនឲ្យធ្វើអ្វីដែលព្រះមិនពេញចិត្តឡើយ។—ហេប្រឺ ១៣:៤
បើប្អូនជាបុរស ហើយកំពុងមើលចិត្តគ្នាជាមួយនារីណាម្នាក់ សូមប្អូនគិតពីទំនាក់ទំនងរបស់ប្អូនជាមួយនឹងនាង ដោយផ្អែកលើអ្វីដែលមានក្នុងជំពូកនេះ។ សូមសួរខ្លួនថា ‹តើខ្ញុំពិតជាយកចិត្តទុកដាក់នឹងសង្សារឬទេ?› បើប្អូនឆ្លើយថាមែន តើប្អូនធ្វើដូច្នោះដោយរបៀបណា? គឺភាពម៉ឺងម៉ាត់ជួយប្អូនឲ្យប្រកាន់ខ្ជាប់ច្បាប់របស់ព្រះ ហើយប្រាជ្ញាជួយប្អូនឲ្យជៀសវាងពីស្ថានភាពដែលល្បងល និងសេចក្ដីស្រឡាញ់ជួយប្អូនឲ្យគិតអំពីប្រយោជន៍នាងច្រើនជាងខ្លួនឯង។ បើប្អូនមានគុណសម្បត្តិដូចនោះ សង្សាររបស់ប្អូនទំនងជាមានអារម្មណ៍ដូចក្រមុំក្រុងស៊ូឡាមដ៏ថ្លៃថ្នូរម្នាក់ ដែលបានពោលថា៖ «ម្ចាស់ស្នេហ៍ខ្ញុំជារបស់ខ្ញុំ ហើយខ្ញុំជារបស់គាត់»។ (បទចម្រៀងសាឡូម៉ូន ២:១៦) និយាយឲ្យចំទៅ គឺប្អូននឹងក្លាយជាវីរៈបុរសក្នុងបេះដូងរបស់នាង!
មិនថាជាបុរសឬស្ត្រីទេ បើប្អូនរួមភេទមុនរៀបការ នោះប្អូននឹងបន្ថោកខ្លួន ដោយបោះចោលនូវរបស់ដ៏មានតម្លៃ។ (រ៉ូម ១:២៤) ក្រោយពី«ទុំមុនស្រគាល» មនុស្សជាច្រើនមានអារម្មណ៍ថាខ្លួនទទេស្អាត ហើយភាពបរិសុទ្ធដ៏មានតម្លៃហាក់ដូចជាត្រូវគេលួចត្រឹមតែមួយប៉ព្រិចភ្នែក! កុំឲ្យរឿងបែបនោះកើតឡើងចំពោះប្អូនឡើយ។ ពេលនរណាម្នាក់ពោលពាក្យផ្អែមល្ហែមលួងលោមប្អូនថា«បើអូនស្រឡាញ់បង អូនមុខជាគេងជាមួយបង» ពេលនោះប្អូនត្រូវតបយ៉ាងម៉ឺងម៉ាត់ថា«បើបងពិតជាស្រឡាញ់អូនមែន បងមិនគួរនិយាយពាក្យបែបនេះទេ!»។
រូបកាយរបស់ប្អូនមានតម្លៃខ្លាំងណាស់ កុំចុះចាញ់សម្ដីគេឲ្យសោះ។ សូមបង្ហាញភាពម៉ឺងម៉ាត់ក្នុងការធ្វើតាមបង្គាប់របស់ព្រះ ដើម្បីមិនប្រព្រឹត្តអំពើប្រាសចាកសីលធម៌ខាងផ្លូវភេទ។ បើថ្ងៃណាមួយប្អូនរៀបការ ប្អូនអាចរួមភេទជាប្ដីប្រពន្ធដោយក្ដីសប្បាយរីករាយ។ ប្អូននឹងមានមោទនភាពចំពោះខ្លួនឯង ដោយសារប្អូនបានរក្សាភាពបរិសុទ្ធ ប្អូននឹងរស់នៅដោយគ្មានមន្ទិល គ្មានវិប្បដិសារី និងគ្មានការព្រួយបារម្ភដែលជាញឹកញយបណ្ដាលមកពីការរួមភេទមុនរៀបការឡើយ។—សុភាសិត ៧:២២, ២៣; កូរិនថូសទី១ ៧:៣
សូមអានប្រធានបទនេះថែមទៀត នៅជំពូកទី៤ និងទី៥ ក្នុងក្បាលទី២
ហេតុអ្វីការស្ទាបអង្អែលអវយវៈភេទរបស់ខ្លួនគឺជារឿងធ្ងន់ធ្ងរ?
បទគម្ពីរសំខាន់
«ចូររត់ចេញពីអំពើប្រាសចាកសីលធម៌ខាងផ្លូវភេទ! . . . អ្នកណាដែលប្រព្រឹត្តអំពើប្រាសចាកសីលធម៌ខាងផ្លូវភេទ អ្នកនោះកំពុងធ្វើខុសចំពោះរូបកាយខ្លួន»។—កូរិនថូសទី១ ៦:១៨
យោបល់
ស្ដីអំពីទំនាក់ទំនងជាមួយនឹងមនុស្សភេទផ្ទុយ អ្វីដែលត្រូវចងចាំគឺ៖ ប្រសិនបើប្អូនមិនចង់ឲ្យឪពុកម្ដាយឃើញរឿងណាមួយរបស់ប្អូន នោះប្អូនមិនគួរធ្វើរឿងនោះឡើយ។
តើប្អូនដឹងទេ . . . ?
ក្រោយពីបានខ្លួនប្រាណហើយ មនុស្សប្រុសច្រើនតែចង់ដោះដៃចោលសង្សារស្រវារកអ្នកថ្មី។
គម្រោងអនុវត្ត!
ពេលខ្ញុំនៅជាមួយមនុស្សភេទផ្ទុយ ខ្ញុំនឹងជៀសវាងស្ថានភាពដូចជា ․․․․․
បើមនុស្សភេទផ្ទុយចង់ជួបខ្ញុំនៅកន្លែងស្ងាត់ ខ្ញុំនឹងប្រាប់ថា ․․․․․
អ្វីដែលខ្ញុំចង់សួរឪពុកម្ដាយរបស់ខ្ញុំអំពីរឿងនេះគឺ ․․․․․
តើប្អូនគិតយ៉ាងណា?
● ទោះជាប្អូនប្រហែលចង់រួមភេទមុនរៀបការក្ដី ហេតុអ្វីនោះខុស?
● បើអ្នកណាម្នាក់សុំប្អូនរួមភេទ តើប្អូននឹងនិយាយអ្វី?
[ឃ្លាអក្សរធំនៅទំព័រ១៧៦]
«ប្អូនប្រុសយ៉ូស្វេ ប្រាប់ថា៖ ‹ដោយសារយើងជាគ្រិស្តសាសនិក យើងមានគុណសម្បត្តិដែលទាក់ទាញចិត្តអ្នកឯទៀត។ ដូច្នេះ ពេលអ្នកណាម្នាក់ព្យាយាមបបួលយើងឲ្យធ្វើអ្វីមិនសមរម្យ នោះយើងត្រូវបដិសេធយ៉ាងម៉ឺងម៉ាត់។ យើងត្រូវចេះឲ្យតម្លៃនិងការពារគុណសម្បត្តិរបស់យើង!›»
[រូបភាពនៅទំព័រ១៧៦, ១៧៧]
ការរួមភេទមុនរៀបការ ប្រៀបដូចជាការយកផ្ទាំងគំនូរដ៏មានតម្លៃមកធ្វើជាកម្រាលជើង
លោកអ្នកក៏ប្រហែលជាចូលចិត្តដែរ
ក្មេងជំទង់និងយុវវ័យ
សំណួរពីយុវវ័យ
សំណួរទូទៅពីយុវវ័យ មានដូចជារឿងខាងផ្លូវភេទ មិត្តភក្ដិ ឪពុកម្ដាយ សាលារៀន និងរឿងផ្សេងទៀត។
