ហេតុអ្វីឪពុកម្ដាយខ្ញុំបែកគ្នា?
ជំពូកទី៤
ហេតុអ្វីឪពុកម្ដាយខ្ញុំបែកគ្នា?
អ៊ីឡេន អាយុ១៩ឆ្នាំ រៀបរាប់ថា៖ «ថ្ងៃដែលប៉ាចាកចោលពួកយើង ខ្ញុំក៏នៅផ្ទះដែរ។ ពេលនោះខ្ញុំអាយុតែ៦ឆ្នាំប៉ុណ្ណោះ ខ្ញុំមិនយល់ពីអ្វីដែលកើតឡើងទេ។ ខ្ញុំកំពុងអង្គុយមើលទូរទស្សន៍ ហើយខ្ញុំបានឮសំឡេងម៉ាក់យំ ទាំងអង្វរប៉ាកុំឲ្យទៅ។ ប៉ាចុះមកក្រោមទាំងកាន់កាបូបខោអាវ ហើយឱនមកថើបខ្ញុំ រួចនិយាយថា‹ប៉ាស្រឡាញ់កូនរហូត›។ បន្ទាប់មក គាត់ក៏ចាកចេញ ហើយខ្ញុំលែងបានឃើញមុខប៉ាអស់រយៈពេលជាយូរ។ ចាប់ពីពេលនោះមក ខ្ញុំភ័យខ្លាចឥតឈប់ថា នៅថ្ងៃណាមួយម៉ាក់ក៏នឹងចាកចេញពីខ្ញុំដែរ»។
បើឪពុកម្ដាយប្អូនលែងលះគ្នា ប្អូនប្រហែលជាមានអារម្មណ៍ថាពិភពលោកទាំងមូលក្រឡាប់ចាក់ ហើយថាខ្លួននឹងរងទុក្ខវេទនាពេញមួយជីវិត។ ការលែងលះច្រើនតែនាំឲ្យមានកំហឹង អាម៉ាស់មុខ ថប់បារម្ភ ភ័យខ្លាចការបាត់បង់ បន្ទោសខ្លួន បាក់ទឹកចិត្ត ឈឺចាប់ និងរហូតដល់ចង់សងសឹកទៀតផង។
បើឪពុកម្ដាយប្អូនទើបតែបែកបាក់គ្នា ប្អូនប្រហែលជាមានអារម្មណ៍ស្រដៀងនោះដែរ ហើយនេះមិនគួរឲ្យភ្ញាក់ផ្អើលទេ ដោយសារព្រះដែលជាអ្នកបង្កើតយើង ចង់ឲ្យកូនៗធំឡើងក្រោមការចិញ្ចឹមបីបាច់ពីឪពុកនិងម្ដាយ។ (អេភេសូរ ៦:១-៣) ឥឡូវនេះ ឪពុកម្ដាយជាទីស្រឡាញ់របស់ប្អូនមិនរស់នៅជុំគ្នាជាមួយប្អូនទៀតឡើយ។ ឪពុកម្ដាយរបស់ដានីយ៉ែលបានលែងលះគ្នា ពេលគាត់មានអាយុ៧ឆ្នាំ។ ដានីយ៉ែលប្រាប់ថា៖ «ខ្ញុំពិតជាស្រឡាញ់ឪពុកខ្ញុំខ្លាំងណាស់ ហើយចង់ទៅនៅជាមួយគាត់។ ប៉ុន្តែ ម្ដាយខ្ញុំបានទទួលសិទ្ធិចិញ្ចឹមពួកយើង»។
មូលហេតុដែលឪពុកម្ដាយបែកបាក់គ្នា
ជារឿយៗ ពេលកូនដឹងថាឪពុកម្ដាយបែកបាក់គ្នា នេះធ្វើឲ្យកូនខកចិត្តជាខ្លាំង ព្រោះមុនពេលនោះកូនមិនដឹងថាឪពុកម្ដាយមានបញ្ហានឹងគ្នាទេ ដោយសារពួកគាត់លាក់រឿងយ៉ាងជិត។ ឪពុកម្ដាយរ៉ាជែលលែងលះគ្នា ពេលនាងអាយុ១៥ឆ្នាំ។ រ៉ាជែលប្រាប់ថា៖ «ខ្ញុំពិតជាតក់ស្លុតណាស់ ពេលដឹងថាឪពុកម្ដាយខ្ញុំលែងលះគ្នា។ ខ្ញុំមិនដែលគិតថាពួកគាត់ឈប់ស្រឡាញ់គ្នាទេ»។ តាមពិតទៅ សូម្បីតែឪពុកម្ដាយដែលឈ្លោះគ្នាមិនលួសថ្ងៃ នៅពេលពួកគាត់បែកគ្នាក៏នៅតែអាចធ្វើឲ្យកូនសោកសៅជាខ្លាំងដែរ!
ប្ដីប្រពន្ធភាគច្រើនចែកផ្លូវគ្នា ដោយសារគូម្ខាងបានផិតក្បត់។ ក្រោមកាលៈទេសៈបែបនោះ ព្រះអនុញ្ញាតឲ្យគូម្ខាងទៀតដែលគ្មានកំហុសអាចលែងលះ ហើយរៀបការម្ដងទៀតបាន។ (ម៉ាថាយ ១៩:៩) ក្នុងករណីខ្លះទៀត ប្ដីប្រពន្ធបែកគ្នា ដោយសារពួកគេមាន«ចិត្តក្ដៅក្រហាយ ស្រែកគំហក និង[និយាយ]ពាក្យប្រមាថមើលងាយ»ដល់គូរបស់ខ្លួន រហូតឈានទៅដល់ការប្រើហិង្សា ដែលបណ្ដាលឲ្យគូមានការភ័យខ្លាចចំពោះសុវត្ថិភាពរបស់ខ្លួននិងកូនៗ។—អេភេសូរ ៤:៣១
បើនិយាយឲ្យត្រង់ទៅ គូអាពាហ៍ពិពាហ៍ខ្លះបានសម្រេចចិត្តចែកផ្លូវគ្នាទាំងមិនសមហេតុសមផល។ ជាជាងរួមគ្នាដោះស្រាយបញ្ហា ពួកគេគិតតែពីខ្លួនឯង ដោយគិតថាបើ«មិនសប្បាយចិត្តរស់នៅជាមួយគ្នា» ឬ«ឈប់ស្រឡាញ់គ្នាទៀត» ក៏លែងគ្នាទៅ។ នេះធ្វើឲ្យព្រះមិនពេញចិត្តឡើយ ព្រោះលោក«ស្អប់ការលែងលះ»ដោយសារមូលហេតុដូចនោះ។ (ម៉ាឡាគី ២:១៦) បន្ថែមទៅទៀត លោកយេស៊ូមានប្រសាសន៍ថា ក្រុមគ្រួសារខ្លះអាចបាក់បែកគ្នា ពេលដែលគូម្ខាងក្លាយទៅជាអ្នកកាន់តាមលោក។—ម៉ាថាយ ១០:៣៤-៣៦
ទោះបើឪពុកម្ដាយប្អូនមិននិយាយសូម្បីតែមួយម៉ាត់ អំពីមូលហេតុដែលពួកគាត់លែងលះគ្នា នេះមិនមានន័យថាពួកគាត់ឈប់ស្រឡាញ់ប្អូនឡើយ។ ពួកគាត់ប្រហែលជាពិបាកចិត្តដល់ម្ល៉េះ បានជាមិនចង់និយាយអំពីរឿងនោះ។ (សុភាសិត ២៤:១០) ណាមួយទៀត ពួកគាត់ប្រហែលជាមានអារម្មណ៍ខ្មាសក្នុងការទទួលស្គាល់ភាពបរាជ័យរបស់ខ្លួន។
អ្វីដែលប្អូនអាចធ្វើ
ដឹងពីអ្វីដែលប្អូនភ័យខ្លាច។ ដោយសារឪពុកម្ដាយលែងលះគ្នា នេះធ្វើឲ្យជីវិតប្អូនផ្លាស់ប្ដូរទាំងស្រុង។ តើប្អូនព្រួយបារម្ភអំពីអ្វីដែលប្អូនមិនធ្លាប់គិតពីមុនឬទេ? បើមែន ប្អូនអាចយកឈ្នះការភ័យខ្លាចបាន បើប្អូនដឹងពីមូលហេតុដែលនាំឲ្យប្អូនមានអារម្មណ៍ដូច្នេះ។ សូមដាក់សញ្ញា ✔ នេះនៅក្នុងប្រអប់ដែលប្អូនគិតថាជារឿងដែលធ្វើឲ្យប្អូនភ័យខ្លាចបំផុត ឬសរសេរការភ័យខ្លាចរបស់ប្អូននៅក្នុងប្រអប់ដែលមានពាក្យថា«ផ្សេងទៀត»។
□ ថ្ងៃណាមួយ ឪពុកឬម្ដាយដែលនៅជាមួយខ្ញុំក៏នឹងបោះបង់ចោលខ្ញុំដែរ។
□ ក្រុមគ្រួសារខ្ញុំមុខជាខ្វះលុយចិញ្ចឹមជីវិត។
□ ខ្ញុំប្រហែលជាមូលហេតុដែលធ្វើឲ្យឪពុកម្ដាយលែងលះគ្នា។
□ បើខ្ញុំរៀបការ ជីវិតខ្ញុំក៏នឹងបរាជ័យដែរ។
□ ផ្សេងទៀត ․․․․․
ប្រាប់កង្វល់របស់ប្អូន។ ស្ដេចសាឡូម៉ូនស្រដីថា៖ «មានពេលនិយាយ»។ (អ្នកទូន្មាន ៣:៧) ដូច្នេះ សូមស្វែងរកពេលត្រឹមត្រូវ ដើម្បីពិភាក្សាជាមួយឪពុកម្ដាយអំពីការភ័យខ្លាចរបស់ប្អូន។ សូមប្រាប់ពួកគាត់ឲ្យដឹងថាប្អូនកំពុងសោកសៅឬច្របូកច្របល់ក្នុងចិត្តខ្លាំងប៉ុណ្ណា។ យ៉ាងនេះ ពួកគាត់អាចពន្យល់អំពីអ្វីដែលកំពុងកើតឡើង ហើយនេះអាចជួយប្អូនមិនឲ្យព្រួយបារម្ភខ្លាំងពេក។ បើឪពុកម្ដាយមិនចង់ឬមិនអាចជួយដោះស្រាយកង្វល់របស់ប្អូនភ្លាមៗបាន ប្អូនគួរទៅពិគ្រោះជាមួយនឹងមនុស្សដែលមានភាពចាស់ទុំ។ គ្រាន់តែមានអ្នកណាម្នាក់ស្ដាប់ប្អូននិយាយ នោះក៏ជួយប្អូនឲ្យមានអារម្មណ៍ប្រសើរឡើងវិញដែរ។—សុភាសិត ១៧:១៧
សំខាន់ជាងនោះទៅទៀត ប្អូនមានបិតានៅស្ថានសួគ៌ ជា«ព្រះដែលស្ដាប់សេចក្ដីអធិដ្ឋាន» លោកត្រៀមខ្លួនចាំស្ដាប់ប្អូននិយាយ។ (ចម្រៀងសរសើរព្រះ ៦៥:២) សូមប្អូនប្រាប់លោកនូវអ្វីទាំងអស់ដែលមាននៅក្នុងចិត្តប្អូន «ពីព្រោះលោករមែងគិតអំពី[ប្អូន]»។—ពេត្រុសទី១ ៥:៧
អ្វីដែលត្រូវជៀសវាង
កុំចងកំហឹង។ ដានីយ៉ែលប្រាប់ថែមទៀតថា៖ «ឪពុកម្ដាយរបស់ខ្ញុំអាត្មានិយមណាស់។ ពួកគាត់មិនគិតអំពីកូនៗទេ ហើយក៏មិនខ្វល់ថាទង្វើរបស់ពួកគាត់ប៉ះពាល់យ៉ាងណាមកលើកូនៗដែរ»។ យើងអាចយល់អារម្មណ៍របស់ដានីយ៉ែល ហើយអ្វីដែលគាត់និយាយក៏អាចត្រូវខ្លះដែរ។ ប៉ុន្តែ សូមប្អូនពិចារណាសំណួរដូចតទៅ រួចសរសេរចម្លើយនៅខាងក្រោមសំណួរនីមួយៗ។
បើដានីយ៉ែលនៅតែខឹងសម្បារនិងចងកំហឹង ហេតុអ្វីនេះគឺជាការធ្វើបាបខ្លួន? (សូមអាន សុភាសិត ២៩:២២) ․․․․․
ទោះជាឪពុកម្ដាយបានធ្វើឲ្យដានីយ៉ែលឈឺចិត្តខ្លាំងក៏ដោយ ហេតុអ្វីដានីយ៉ែលគួរខំព្យាយាមអភ័យទោសឲ្យពួកគាត់? (សូមអាន អេភេសូរ ៤:៣១, ៣២) ․․․․․
តើពាក្យពិតដែលចែងនៅ រ៉ូម ៣:២៣ អាចជួយដានីយ៉ែលឲ្យមានទស្សនៈសមហេតុសមផលចំពោះឪពុកម្ដាយគាត់យ៉ាងដូចម្ដេច? ․․․․․
កុំធ្វើអ្វីដែលបំផ្លាញអនាគតខ្លួន។ ដេននីនិយាយថា៖ «ក្រោយពីឪពុកម្ដាយខ្ញុំលែងលះគ្នា ខ្ញុំធ្លាក់ទឹកចិត្ត ហើយក្រៀមក្រំណាស់។ ខ្ញុំចាប់ផ្ដើមមានបញ្ហាច្រើននៅសាលា ហើយក៏រៀនឌុបថ្នាក់អស់មួយឆ្នាំដែរ។ បន្ទាប់មកទៀត . . . ខ្ញុំចាប់ផ្ដើមឡេះឡោះ ហើយឈ្លោះជាមួយគេឯងជាញឹកញាប់»។
តើមូលហេតុអ្វីដេននីធ្វើខ្លួនជាមនុស្សឡេះឡោះ? ․․․․․
ហេតុអ្វីដេននីឧស្សាហ៍ឈ្លោះជាមួយគេ? ․․․․․
បើប្អូនគិតថាចង់ធ្វើខ្លួនមិនល្អដើម្បីឲ្យឪពុកម្ដាយឈឺចិត្ត តើគោលការណ៍នៅកាឡាទី ៦:៧ អាចជួយប្អូនឲ្យមានទស្សនៈត្រឹមត្រូវយ៉ាងដូចម្ដេច? ․․․․․
តើនឹងមានអ្វីកើតឡើងនៅពេលក្រោយមក?
បើបាក់ឆ្អឹង ប្រហែលជាត្រូវចំណាយពេលរាប់សប្ដាហ៍ឬរាប់ខែដើម្បីជាសះស្បើយ។ ចំណែករបួសផ្លូវចិត្តក៏ត្រូវការពេលដើម្បីជាឡើងវិញដែរ។ អ្នកជំនាញខ្លះនិយាយថា ការឈឺចាប់ដែលមកពីការលែងលះនឹងបាត់ទៅវិញក្នុងរយៈពេលប្រហែលបីឆ្នាំ។ នេះមើលទៅហាក់ដូចជាយូរណាស់ តែសូមចាំថាទម្រាំជីវិតរបស់ប្អូនមានភាពនឹងនរឡើងវិញ ប្អូនប្រហែលជាត្រូវឆ្លងកាត់រឿងជាច្រើនទៀត។
ជាឧទាហរណ៍ ក្រោយពីឪពុកម្ដាយលែងលះ ទម្លាប់ប្រចាំថ្ងៃក្នុងក្រុមគ្រួសារត្រូវរៀបចំសាជាថ្មី។ ម្យ៉ាងទៀត ឪពុកម្ដាយប្អូនក៏ត្រូវការពេលដើម្បីព្យាបាលផ្លូវចិត្តរបស់ពួកគាត់ដែរ។ ទាល់តែផុតពីគ្រានោះមក ទើបពួកគាត់អាចយកចិត្តទុកដាក់ចំពោះប្អូនបានច្រើនជាង។ យ៉ាងណាក៏ដោយ ពេលដែលប្អូនស៊ាំនឹងស្ថានភាពថ្មី នោះប្អូននឹងចាប់ផ្ដើមមានអារម្មណ៍ធម្មតាឡើងវិញ។
សូមអានថែមទៀតអំពីប្រធានបទនេះ ក្នុងជំពូកទី២៥ ក្បាលទី២
តើប្អូនព្រួយបារម្ភដោយសារឪពុកម្ដាយប្អូនរៀបការថ្មីឬទេ? បើដូច្នេះ តើប្អូននឹងធ្វើយ៉ាងណា?
បទគម្ពីរសំខាន់
‹មានពេលជាសះស្បើយ›។—អ្នកទូន្មាន ៣:៣
យោបល់
បើឪពុកម្ដាយលែងលះគ្នា អាចមកពីកំហុសរបស់ភាគីម្ខាង ឬភាគីទាំងពីរ។ ចូរស្វែងយល់ថានោះបណ្ដាលមកពីរឿងអ្វី ដើម្បីប្អូនអាចជៀសវាងពីរឿងនោះ ពេលប្អូនចង់ចិត្តរៀបការ។—សុភាសិត ២៧:១២
តើប្អូនដឹងទេ . . . ?
ជីវិតអាពាហ៍ពិពាហ៍របស់ឪពុកម្ដាយប្អូនប្រេះឆា មិនបានន័យថាជីវិតប្អូននឹងដូចពួកគាត់នោះទេ។
គម្រោងអនុវត្ត!
ខ្ញុំចង់ប្រាប់អារម្មណ៍ភ័យខ្លាចរបស់ខ្ញុំដល់ (សរសេរឈ្មោះបុគ្គលមានភាពចាស់ទុំដែលប្អូនចង់និយាយជាមួយ) ․․․․․
បើខ្ញុំគិតចង់ធ្វើអាក្រក់ដើម្បីតបស្នងឪពុកម្ដាយ នោះខ្ញុំនឹងឈប់គិតដោយ៖ ․․․․․
អ្វីដែលខ្ញុំចង់សួរឪពុកម្ដាយរបស់ខ្ញុំអំពីរឿងនេះគឺ ․․․․․
តើប្អូនគិតយ៉ាងណា?
● ហេតុអ្វីឪពុកម្ដាយប្រហែលជាមិនចង់ប្រាប់ប្អូនអំពីរឿងដែលពួកគាត់លែងលះគ្នា?
● ហេតុអ្វីជាការសំខាន់ដែលប្អូនគួរចាំថា ការលែងលះគឺជាបញ្ហារវាងឪពុកនិងម្ដាយប្អូន មិនមែនរវាងប្អូនទេ?
[ឃ្លាអក្សរធំនៅទំព័រ៣២]
«ណាថាលី ប្រាប់ថា៖ ‹ក្រោយពីម្ដាយចាកចោលយើង ខ្ញុំបាក់ទឹកចិត្ត ហើយយំរាល់ថ្ងៃ។ ប៉ុន្តែ ដោយសារខ្ញុំអធិដ្ឋានជារឿយៗ ជាប់រវល់ជួយអ្នកឯទៀត និងនៅជិតស្និទ្ធជាមួយមិត្តភក្ដិដែលមានភាពចាស់ទុំ នោះខ្ញុំមានអារម្មណ៍ថា ព្រះយេហូវ៉ាកំពុងជួយខ្ញុំឲ្យស៊ូទ្រាំ›»
[រូបភាពនៅទំព័រ៣៣]
ពេលឪពុកម្ដាយលែងលះគឺប្រៀបដូចជាឆ្អឹងដែលបាក់។ នេះនឹងធ្វើឲ្យឈឺចាប់អស់មួយរយៈ តែទីបំផុតរបួសនឹងជាសះស្បើយ
លោកអ្នកក៏ប្រហែលជាចូលចិត្តដែរ
ក្មេងជំទង់និងយុវវ័យ
សំណួរពីយុវវ័យ
សំណួរទូទៅពីយុវវ័យ មានដូចជារឿងខាងផ្លូវភេទ មិត្តភក្ដិ ឪពុកម្ដាយ សាលារៀន និងរឿងផ្សេងទៀត។
