ជំពូកទី៩
«ខ្ញុំនឹងឲ្យពួកគេមានចិត្តតែមួយ»
គោលចំណុច: គោលរឿងអំពីការរៀបចំឡើងវិញ និងរបៀបដែលគោលរឿងនេះបានត្រូវបកស្រាយក្នុងទំនាយអេសេគាល
១-៣. តើពួកបាប៊ីឡូនបានចំអកមើលងាយអ្នកគោរពប្រណិប័តន៍ព្រះយេហូវ៉ាយ៉ាងដូចម្ដេច? ហើយហេតុអ្វី?
សូមស្រមៃគិតថាអ្នកជាជនជាតិយូដាស្មោះត្រង់ដែលកំពុងរស់នៅក្នុងក្រុងបាប៊ីឡូន។ អ្នកនិងជនរួមជាតិបានត្រូវនិរទេសទៅទីនោះអស់រយៈពេលប្រហែល៥០ឆ្នាំមកហើយ។ ដូចទម្លាប់រាល់ដងនៅថ្ងៃឈប់សម្រាក អ្នកកំពុងធ្វើដំណើរទៅជួបបងប្អូនរួមជំនឿដើម្បីគោរពប្រណិប័តន៍ព្រះយេហូវ៉ា។ កាលដែលអ្នកដើរតាមផ្លូវដែលមានមនុស្សអ៊ូអរ អ្នកឃើញវិហារធំៗនិងទីបូជារាប់មិនអស់។ មនុស្សម្នាមូលគ្នាទៅទីនោះ ដើម្បីជូនគ្រឿងបូជានិងច្រៀងជូនព្រះផ្សេងៗ ដូចជាព្រះម៉ាឌូកជាដើម។
២ ពេលអ្នកជួបបងប្អូនមួយក្រុមតូចដែលនៅដាច់ឡែកពីគេ អ្នកនិងពួកគេខំរកកន្លែងស្ងាត់ ប្រហែលនៅតាមដងព្រែកដើម្បីអធិដ្ឋាន ច្រៀងចម្រៀងសរសើរព្រះ និងរំពឹងគិតអំពីបណ្ដាំរបស់លោកជាមួយគ្នា។ * កាលដែលអ្នកកំពុងអធិដ្ឋាន អ្នកឮសំឡេងទូកផ្សេងៗកំពុងចូលទៅចតតាមមាត់ព្រែក។ នៅទីនោះ អ្នកមានអារម្មណ៍ធូរចិត្តបន្តិច។ អ្នកសង្ឃឹមថាមនុស្សនៅម្ដុំនោះនឹងមិនឃើញអ្នក ហើយមករំខានកិច្ចប្រជុំដូចដែលគេធ្លាប់ធ្វើនោះទេ។ ហេតុអ្វីមនុស្សទាំងនោះចូលចិត្តធ្វើដូច្នេះ?
៣ បាប៊ីឡូនមានប្រវត្តិឈ្នះសង្គ្រាមជាច្រើន ហើយជនជាតិបាប៊ីឡូនគិតថាពួកគេខ្លាំងក្លា ដោយសារមានជំនួយពីព្រះរបស់ពួកគេ។ ចំពោះជនជាតិបាប៊ីឡូន ការបំផ្លាញក្រុងយេរូសាឡិមបង្ហាញថាព្រះម៉ាឌូករបស់ពួកគេខ្លាំងក្លាជាងព្រះយេហូវ៉ា! ម្ល៉ោះហើយ ពួកគេចំអកមើលងាយព្រះរបស់អ្នកនិងរាស្ត្ររបស់លោក។ ពេលខ្លះពួកគេចំអកឡកឡឺយថា៖ «ចូរច្រៀងចម្រៀងរបស់ស៊ីយ៉ូនឲ្យយើងស្ដាប់មួយបទមក»! (ចសព. ១៣៧:៣) ព្រោះចម្រៀងជាច្រើនអបអរជ័យជម្នះរបស់ស៊ីយ៉ូនទៅលើសត្រូវរបស់ព្រះយេហូវ៉ា។ ម្ល៉ោះហើយ ពួកបាប៊ីឡូនប្រហែលជាចូលចិត្តចំអកមើលងាយចម្រៀងបែបនោះ។ ប៉ុន្តែ ក៏មានចម្រៀងដែលរៀបរាប់អំពីពួកបាប៊ីឡូនដែរ។ ជាឧទាហរណ៍ ចម្រៀងមួយច្រៀងថា៖ «ពួកគេបានបំផ្លាញក្រុងយេរូសាឡិមឲ្យទៅជាសំណង់បាក់បែក . . . មនុស្សនៅជុំវិញយើងចំអកមើលងាយនិងឡកឡឺយឲ្យយើង»។—ចសព. ៧៩:១, ៣, ៤
៤, ៥. តើទំនាយអេសេគាលផ្ដល់សេចក្ដីសង្ឃឹមអ្វី? ហើយតើយើងនឹងពិចារណាអ្វីក្នុងជំពូកនេះ? (សូមមើលរូបភាពនៅដើមអត្ថបទ)
៤ បន្ថែមទៅទៀត ក៏មានពួកយូដាដែលក្បត់ជំនឿចាំសើចចំអកឲ្យអ្នក ព្រោះអ្នកមានជំនឿទៅលើព្រះយេហូវ៉ានិងអ្នកប្រកាសទំនាយរបស់លោក។ ទោះបីជាយ៉ាងនោះក៏ដោយ ការគោរពប្រណិប័តន៍ពិតផ្ដល់ការសម្រាលទុក្ខដល់អ្នកនិងក្រុមគ្រួសារអ្នក។ អ្នកមានអារម្មណ៍សប្បាយរីករាយ ដោយសារបានអធិដ្ឋាននិងច្រៀងចម្រៀងសរសើរព្រះជាមួយបងប្អូនរួមជំនឿ។ ការអានបណ្ដាំរបស់ព្រះធ្វើឲ្យអ្នកមានអារម្មណ៍ស្រស់ស្រាយណាស់។ (ចសព. ៩៤:១៩; រ៉ូម ១៥:៤) សូមស្រមៃថានៅថ្ងៃនេះ មានបងប្អូនរួមជំនឿម្នាក់យកអ្វីពិសេសមួយមកកិច្ចប្រជុំ។ អ្វីនោះគឺជារមូរដែលមានទំនាយរបស់អេសេគាល។ អ្នកចូលចិត្តស្ដាប់សេចក្ដីសន្យារបស់ព្រះយេហូវ៉ាដែលថា លោកនឹងនាំរាស្ត្ររបស់លោកត្រឡប់ទៅស្រុកកំណើតរបស់ពួកគេវិញ។ ពេលគេអានទំនាយដូចនោះឮៗ អ្នកពិតជារំភើបចិត្តណាស់ ហើយអ្នករំពឹងគិតអំពីសេចក្ដីសង្ឃឹមនោះ គឺថានៅថ្ងៃណាមួយអ្នកនិងក្រុមគ្រួសារអ្នកអាចត្រឡប់ទៅស្រុកកំណើតវិញ ហើយជួយក្នុងការរៀបចំឡើងវិញ ជាកិច្ចការដ៏គួរឲ្យរំភើប!
៥ ទំនាយរបស់អេសេគាលបញ្ជាក់ម្ដងហើយម្ដងទៀតអំពីសេចក្ដីសន្យានៃការរៀបចំឡើងវិញ។ សូមយើងពិចារណាសេចក្ដីសន្យាទាំងនោះដែលពោរពេញទៅដោយសេចក្ដីសង្ឃឹម។ តើតាមរបៀបណាសេចក្ដីសន្យាទាំងនោះបានកើតឡើងចំពោះជននិរទេស? តើទំនាយទាំងនោះមានន័យយ៉ាងណានៅសម័យយើង? ចំពោះទំនាយខ្លះ យើងក៏នឹងពិចារណាអំពីការកើតឡើងលើកចុងក្រោយនៅថ្ងៃអនាគតដែរ។
«ពួកគេនឹងត្រូវចាប់យកទៅធ្វើជាឈ្លើយ ហើយនឹងត្រូវនិរទេស»
៦. តើតាមរបៀបណាព្រះព្រមានរាស្ត្រលោកដែលបះបោរប្រឆាំងម្ដងហើយម្ដងទៀត?
៦ តាមរយៈអេសេគាល ព្រះយេហូវ៉ាបានប្រាប់រាស្ត្ររបស់លោកយ៉ាងចំៗនូវរបៀបដែលលោកនឹងដាក់ទោសពួកគេចំពោះការបះបោរប្រឆាំង។ លោកមានប្រសាសន៍ថា៖ «ពួកគេនឹងត្រូវចាប់យកទៅធ្វើជាឈ្លើយ ហើយនឹងត្រូវនិរទេស»។ (អេគ. ១២:១១) ដូចយើងបានរៀននៅជំពូកទី៦ អេសេគាលថែមទាំងបានធ្វើការសម្ដែងអំពីការដាក់ទោសនោះទៀតផង។ ប៉ុន្តែ នោះមិនមែនជាការព្រមានលើកដំបូងទេ។ តាំងពីសម័យម៉ូសេ ជិត១.០០០ឆ្នាំមុនព្រះយេហូវ៉ាបានព្រមានរាស្ត្រលោកថា បើពួកគេនៅតែបះបោរប្រឆាំង ពួកគេនឹងត្រូវចាប់យកទៅធ្វើជាឈ្លើយ។ (បច. ២៨:៣៦, ៣៧) ពួកអ្នកប្រកាសទំនាយ ដូចជាអេសាយនិងយេរេមា ក៏បានប្រាប់ការព្រមានស្រដៀងគ្នាដែរ។—អេ. ៣៩:៥-៧; យេ. ២០:៣-៦
៧. តើតាមរបៀបណាព្រះយេហូវ៉ាបានដាក់ទោសរាស្ត្ររបស់លោក?
៧ ប៉ុន្តែគួរឲ្យស្ដាយណាស់ ពួកគេភាគច្រើនមិនបានអើពើនឹងការព្រមានទាំងនោះទេ។ ក្រោយមក ព្រះយេហូវ៉ាឈឺចិត្តយ៉ាងខ្លាំង ដោយសាររាស្ត្ររបស់លោកបានបះបោរប្រឆាំង គោរពបូជារូបព្រះ ប្រព្រឹត្តមិនស្មោះត្រង់ ហើយទៅជាខូចអាក្រក់ក្រោមឥទ្ធិពលរបស់គង្វាលដ៏ទុច្ចរិត។ ហេតុនេះ ព្រះអនុញ្ញាតឲ្យពួកគេរងការអត់ឃ្លានដែលជាអន្តរាយដ៏ធំនិងនាំឲ្យមានការអាម៉ាស់ ព្រោះស្រុកពួកគេ«ជាស្រុកដែលសម្បូរទឹកដោះនិងទឹកឃ្មុំហូរហៀរ»។ (អេគ. ២០:៦, ៧) បន្ទាប់មក ដូចដែលព្រះយេហូវ៉ាបានប្រកាសទុកជាយូរមកហើយ លោកអនុញ្ញាតឲ្យរាស្ត្រដ៏វៀចវេររបស់លោកត្រូវនិរទេស។ នៅឆ្នាំ៦០៧ មុនគ.ស. នេប៊ូក្នេសាស្ដេចស្រុកបាប៊ីឡូនបានវាយប្រហារជាលើកចុងក្រោយ ហើយបំផ្លាញក្រុងយេរូសាឡិមនិងវិហារ។ ជនជាតិយូដារាប់ពាន់នាក់ដែលនៅរស់ បានត្រូវចាប់យកទៅធ្វើជាឈ្លើយនៅបាប៊ីឡូន។ នៅទីនោះ ពួកគេរងការប្រឆាំងនិងការចំអកមើលងាយ ដូចដែលបានរៀបរាប់នៅដើមជំពូកនេះ។
៨, ៩. តើតាមរបៀបណាព្រះបានផ្ដល់ការព្រមានដល់ក្រុមជំនុំគ្រិស្តសាសនិកអំពីការក្បត់ជំនឿ?
៨ ស្ដីអំពីការជាប់ជាឈ្លើយនៅបាប៊ីឡូន តើក្រុមជំនុំគ្រិស្តសាសនិកបានជួបនឹងស្ថានភាពស្រដៀងនោះឬទេ? ពិតជាជួបមែន! ដូចពួកយូដានៅសម័យបុរាណពួកអ្នកកាន់តាមគ្រិស្ត ក៏ទទួលការព្រមានទុកជាមុនដែរ។ នៅដើមកិច្ចបម្រើរបស់លោកយេស៊ូ លោកមានប្រសាសន៍ថា៖ «ចូរប្រយ័ត្នចំពោះពួកអ្នកប្រកាសទំនាយមិនពិត ដែលមកឯអ្នករាល់គ្នាដោយក្លែងខ្លួនជាសត្វចៀម។ ប៉ុន្តែតាមពិត ពួកគេជាឆ្កែចចកដែលស្រេកឃ្លានជាខ្លាំង»។ (ម៉ាថ. ៧:១៥) ច្រើនឆ្នាំក្រោយមក ព្រះបានដឹកនាំសាវ័កប៉ូលឲ្យកត់ទុកការព្រមានស្រដៀងគ្នា ដែលថា៖ «ខ្ញុំដឹងថា ក្រោយពីខ្ញុំចាកចេញទៅនឹងមានមនុស្សខ្លះដែលប្រៀបដូចជាឆ្កែចចកដ៏សាហាវ ចូលមកក្នុងចំណោមអ្នករាល់គ្នា ហើយពួកគេនឹងមិនប្រព្រឹត្តដោយស្លូតបូតចំពោះហ្វូងចៀមទេ ហើយពីចំណោមអ្នករាល់គ្នានឹងមានអ្នកខ្លះក្រោកឡើងនិយាយបង្ខុសសេចក្ដីពិត ដើម្បីអូសទាញពួកអ្នកកាន់តាមឲ្យទៅតាមពួកគេវិញ»។—សកម្ម. ២០:២៩, ៣០
៩ គ្រិស្តសាសនិកបានរៀនអំពីរបៀបសម្គាល់បុរសដែលនាំឲ្យមានគ្រោះថ្នាក់ទាំងនោះ ហើយបានជៀសចេញពីពួកគេ។ ពួកបុរសចាស់ទុំគ្រិស្តសាសនិកបានទទួលការណែនាំឲ្យដកពួកអ្នកក្បត់ជំនឿចេញពីក្រុមជំនុំ។ (១ធី. ១:១៩; ២ធី. ២:១៦-១៩; ២ពេ. ២:១-៣; ២យ៉ូន. ១០) ទោះជាយ៉ាងណាក្ដី ដូចពួកអ៊ីស្រាអែលនិងពួកយូដានៅសម័យបុរាណ បន្តិចម្ដងៗគ្រិស្តសាសនិកជាច្រើនលែងយកចិត្តទុកដាក់នឹងការព្រមានដែលប្រកបដោយសេចក្ដីស្រឡាញ់ទៀត។ រហូតដល់ចុងសតវត្សរ៍ទី១ ការក្បត់ជំនឿបានជ្រៀតចូលក្នុងក្រុមជំនុំ។ នៅពេលនោះ យ៉ូហានដែលជាសាវ័កចុងក្រោយ គាត់នៅរស់នៅឡើយ។ គាត់សង្កេតឃើញថាក្រុមជំនុំគ្រិស្តសាសនិកចាប់ផ្ដើមខូចអាក្រក់ និងពេញទៅដោយការបះបោរប្រឆាំង។ យ៉ូហានជាបុគ្គលតែម្នាក់គត់ដែលនៅសល់ គាត់បានជួយទប់ស្កាត់ឥទ្ធិពលដ៏អាក្រក់នោះ។ (២ថែ. ២:៦-៨; ១យ៉ូន. ២:១៨) ចុះក្រោយពីយ៉ូហានស្លាប់ តើមានអ្វីកើតឡើង?
១០, ១១. ស្ដីអំពីឧទាហរណ៍របស់លោកយេស៊ូអំពីស្រូវសាលីនិងស្រងែ តើមានអ្វីកើតឡើងចាប់ពីសតវត្សរ៍ទី២ គ.ស.?
១០ ក្រោយពីយ៉ូហានស្លាប់ រឿងប្រៀបប្រដូចរបស់លោកយេស៊ូអំពីស្រូវសាលីនិងស្រងែចាប់ផ្ដើមកើតឡើង។ (សូមអាន ម៉ាថាយ ១៣:២៤-៣០) ដូចលោកយេស៊ូបានប្រាប់ទុកជាមុន សាថានបានលួចសាបព្រោះ«ស្រងែ»ឬគ្រិស្តសាសនិកក្លែងក្លាយទៅក្នុងក្រុមជំនុំ។ យ៉ាងនេះ ក្រុមជំនុំបានត្រូវបង្ខូចយ៉ាងលឿន។ ព្រះយេហូវ៉ាច្បាស់ជាឈឺចិត្តខ្លាំងណាស់ ពេលឃើញក្រុមជំនុំដែលបុត្ររបស់លោកបានស្ថាបនាក្លាយទៅជាខូចអាក្រក់ដោយការគោរពបូជារូបព្រះ និងពិធីបុណ្យមកពីទំនៀមទម្លាប់ផ្សេងៗដែលទាក់ទងនឹងសាសនាមិនពិត ព្រមទាំងសេចក្ដីបង្រៀនមិនពិតដែលមកពីទស្សនវិទូ និងសាសនារបស់សាថាន! តើព្រះយេហូវ៉ាបានធ្វើអ្វី? ដូចលោកបានធ្វើចំពោះពួកអ៊ីស្រាអែលដែលមិនស្មោះត្រង់ លោកបណ្ដោយឲ្យពួកគេជាប់ជាឈ្លើយ។ ចាប់ពីសតវត្សរ៍ទី២ គ.ស. គឺពិបាកសម្គាល់គ្រិស្តសាសនិកដែលប្រៀបដូចជាស្រូវសាលី ព្រោះមានគ្រិស្តសាសនិកក្លែងក្លាយជាច្រើន។ ហេតុនេះ ក្នុងន័យម្យ៉ាងក្រុមជំនុំគ្រិស្តសាសនិកពិតជាប់ជាឈ្លើយក្រោមបាប៊ីឡូនដ៏ខ្លាំងក្លាជាចក្រភពសាសនាមិនពិត។ នៅដំណាលគ្នានោះ គ្រិស្តសាសនិកក្លែងក្លាយក៏ស្ថិតនៅក្រោមឥទ្ធិពលនៃចក្រភពដ៏ខូចអាក្រក់នេះដែរ។ ដូច្នេះ ពេលគ្រិស្តសាសនិកក្លែងក្លាយមានគ្នាកាន់តែច្រើនឡើងៗ ពិភពគ្រិស្តសាសនាបានលេចមក។
១១ ទោះជានៅគ្រាងងឹតក្រោមការកាន់កាប់របស់ពិភពគ្រិស្តសាសនាអស់ជាច្រើនសតវត្សរ៍ក៏ដោយ ក៏មានគ្រិស្តសាសនិកពិតខ្លះប្រៀបដូចជា«ស្រូវសាលី»ដែលបានត្រូវរៀបរាប់ក្នុងរឿងប្រៀបប្រដូចរបស់លោកយេស៊ូដែរ។ ដូចជនជាតិយូដាជាជននិរទេសដែលបានត្រូវរៀបរាប់នៅអេសេគាល ៦:៩ គ្រិស្តសាសនិកពិតបាននឹកចាំព្រះពិត។ ពួកគេខ្លះបានបង្ហាញចិត្តក្លាហានប្រឆាំងនឹងលទ្ធិមិនពិតពីពិភពគ្រិស្តសាសនា។ ជាលទ្ធផល ពួកគេរងការប្រមាថមើលងាយនិងការបៀតបៀនជាខ្លាំង។ តើព្រះយេហូវ៉ាមានបំណងបោះបង់ចោលរាស្ត្ររបស់លោកឲ្យនៅក្នុងស្ថានភាពងងឹតនេះរហូតឬ? មិនមែនទេ! ដូចព្រះយេហូវ៉ាប្រព្រឹត្តទៅលើពួកអ៊ីស្រាអែលសម័យបុរាណ លោកមិនចេះតែខឹងរហូតទេ ហើយលោកដាក់ទោសពួកគេស្របតាមកំហុសរបស់ពួកគេ។ (យេ. ៤៦:២៨) បន្ថែមទៅទៀត ព្រះយេហូវ៉ាមិនទុកឲ្យរាស្ត្ររបស់លោកអស់សង្ឃឹមទេ។ សូមយើងគិតម្ដងទៀតអំពីជនជាតិយូដាដែលជាប់ជាឈ្លើយនៅបាប៊ីឡូនសម័យបុរាណ ហើយសូមពិចារណាអំពីរបៀបដែលព្រះយេហូវ៉ាផ្ដល់សេចក្ដីសង្ឃឹមដល់ពួកគេ គឺរំដោះពួកគេឲ្យរួចពីការជាប់ជាឈ្លើយ។
អស់ជាច្រើនសតវត្សរ៍ គ្រិស្តសាសនិកពិតបានរងការបៀតបៀនពីសំណាក់បាប៊ីឡូនដ៏ខ្លាំងក្លា (សូមមើលវគ្គ១០, ១១)
«ខ្ញុំនឹងឈប់ខឹងពួកគេ»
១២, ១៣. នៅទីបំផុត ហេតុអ្វីកំហឹងរបស់ព្រះយេហូវ៉ាទាស់នឹងរាស្ត្ររបស់លោកដែលជាជននិរទេសនៅសម័យអេសេគាលបានរសាយទៅ?
១២ ព្រះយេហូវ៉ាបង្ហាញច្បាស់ថាលោកខឹងនឹងរាស្ត្រលោក តែលោកក៏បានជួយពួកគេឲ្យមានទំនុកចិត្តថាកំហឹងដ៏សុចរិតរបស់លោកនឹងមិនមានជារៀងរហូតទេ។ ជាឧទាហរណ៍ សូមកត់សម្គាល់ពាក្យដូចតទៅ៖ «ខ្ញុំនឹងឈប់ខឹងពួកគេ ហើយកំហឹងរបស់ខ្ញុំនឹងរសាយទៅ រួចខ្ញុំនឹងស្ងប់ចិត្ត។ ក្រោយពីខ្ញុំបញ្ចេញកំហឹងដ៏ខ្លាំងក្រៃលែងទាស់នឹងពួកគេ ពួកគេនឹងដឹងច្បាស់ថា ខ្ញុំយេហូវ៉ាបាននិយាយទៅពួកគេដើម្បីបញ្ជាក់ថា ខ្ញុំតម្រូវឲ្យមានភក្ដីភាពផ្ដាច់មុខ»។ (អេគ. ៥:១៣) នៅទីបំផុត ហេតុអ្វីកំហឹងរបស់ព្រះបានរសាយទៅ?
១៣ ជនជាតិយូដាដែលស្មោះត្រង់ក៏បានត្រូវចាប់យកទៅធ្វើជាឈ្លើយជាមួយនឹងជនជាតិយូដាដែលមិនស្មោះត្រង់ដែរ។ បន្ថែមទៅទៀត តាមរយៈអេសេគាលព្រះយេហូវ៉ាបានប្រកាសទុកជាមុនថា រាស្ត្រខ្លះរបស់លោកដែលកំពុងជាប់ជាឈ្លើយនឹងប្រែចិត្ត។ អស់អ្នកដែលប្រែចិត្តនឹងរំពឹងគិតអំពីទង្វើដ៏គួរឲ្យខ្មាសដែលពួកគេបានធ្វើទាស់នឹងព្រះយេហូវ៉ា ហើយពួកគេនឹងអង្វរសុំការពេញចិត្តនិងការអភ័យទោសពីលោក។ (អេគ. ៦:៨-១០; ១២:១៦) អេសេគាលនៅក្នុងចំណោមអស់អ្នកដែលស្មោះត្រង់ឯទៀត រួមមានដានីយ៉ែលនិងមិត្តភក្ដិបីនាក់របស់គាត់។ តាមពិត ដានីយ៉ែលរស់នៅជាយូរអង្វែង ហើយគាត់បានឃើញការចាប់ផ្ដើមនិងទីបញ្ចប់នៃការជាប់ជាឈ្លើយ។ គាត់បានអធិដ្ឋានអស់ពីចិត្តអំពីការសោកស្ដាយចំពោះអំពើខុសឆ្គងរបស់ជនជាតិអ៊ីស្រាអែល។ សេចក្ដីអធិដ្ឋានរបស់គាត់បានត្រូវកត់ទុកនៅក្នុងដានីយ៉ែលជំពូកទី៩។ អារម្មណ៍របស់គាត់ច្បាស់ជាដូចអារម្មណ៍របស់ជនជាតិយូដារាប់ពាន់នាក់ដែលជាប់ជាឈ្លើយ ដែលចង់ទទួលការអភ័យទោសនិងទទួលពរពីព្រះយេហូវ៉ា។ ដូច្នេះ សេចក្ដីសន្យារបស់ព្រះអំពីការដោះលែងនិងការរៀបចំឡើងវិញក្នុងសៀវភៅអេសេគាល ពិតជាគួរឲ្យរំភើបចិត្តណាស់!
១៤. ហេតុអ្វីព្រះយេហូវ៉ានាំរាស្ត្ររបស់លោកទៅស្រុកកំណើតរបស់ពួកគេវិញ?
១៤ ប៉ុន្តែ មានមូលហេតុសំខាន់ជាងក្នុងការដោះលែងនិងរៀបចំរាស្ត្ររបស់ព្រះយេហូវ៉ាឡើងវិញ។ ការជាប់ជាឈ្លើយអស់រយៈពេលជាយូរបានត្រូវបញ្ចប់ មិនមែនដោយសារតែរាស្ត្ររបស់លោកសមនឹងទទួលនោះទេ តែដោយសារជាពេលដែលព្រះយេហូវ៉ាធ្វើឲ្យនាមរបស់លោកបានបរិសុទ្ធនៅចំពោះមុខប្រជាជាតិទាំងឡាយ។ (អេគ. ៣៦:២២) ពេលនោះ ពួកបាប៊ីឡូននឹងដឹងច្បាស់ថាព្រះទាំងអស់របស់ពួកគេ រួមទាំងព្រះម៉ាឌូក មិនអាចតតាំងជាមួយនឹងព្រះយេហូវ៉ាជាម្ចាស់ដ៏ឧត្ដមបំផុតបានទេ។ សូមពិចារណាអំពីសេចក្ដីសន្យាប្រាំដែលព្រះយេហូវ៉ាបានឲ្យអេសេគាលប្រាប់ដល់ជនរួមជាតិរបស់គាត់ដែលជាជននិរទេស។ ដំបូង សូមឲ្យយើងពិចារណាអំពីសេចក្ដីសន្យានីមួយៗថាមានន័យយ៉ាងណាចំពោះជនជាតិយូដាដែលស្មោះត្រង់។ បន្ទាប់មក យើងនឹងពិនិត្យមើលអំពីរបៀបដែលសេចក្ដីសន្យាទាំងនោះបានកើតឡើងក្នុងកម្រិតធំជាង។
១៥. ចំពោះពួកអ្នកដែលត្រឡប់ទៅស្រុកកំណើតវិញ តើពួកគេត្រូវផ្លាស់ប្ដូរអ្វីខ្លះដែលទាក់ទងនឹងទំនៀមទម្លាប់សាសនា?
១៥ សេចក្ដីសន្យាទី១: លែងមានការគោរពបូជារូបព្រះឬការប្រព្រឹត្តដ៏គួរឲ្យស្អប់ខ្ពើមដែលទាក់ទងនឹងសាសនាមិនពិត។ (សូមអាន អេសេគាល ១១:១៨; ១២:២៤) ដូចយើងបានពិចារណារួចហើយនៅក្នុងជំពូកទី៥ ក្រុងយេរូសាឡិមនិងវិហារបានត្រូវធ្វើឲ្យស្មោកគ្រោកដោយទំនៀមទម្លាប់សាសនាមិនពិត ដូចជាការគោរពបូជារូបព្រះជាដើម។ ដូច្នេះ បណ្ដាជនបានទៅជាខូចអាក្រក់ ហើយឃ្លាតឆ្ងាយពីព្រះយេហូវ៉ា។ តាមរយៈអេសេគាល ព្រះយេហូវ៉ាបានប្រាប់ទុកជាមុនថារាស្ត្ររបស់លោកដែលជាជននិរទេស អាចទន្ទឹងចាំគ្រាដែលពួកគេអាចរួមចំណែកម្ដងទៀតក្នុងការគោរពប្រណិប័តន៍ដែលស្អាតស្អំនិងបរិសុទ្ធ។ ចំណែកពរឯទៀតនៃការស្ថាបនាឡើងវិញអាស្រ័យទៅលើកត្តាដ៏សំខាន់នេះ គឺការរៀបចំឡើងវិញរបស់ព្រះសម្រាប់ការគោរពប្រណិប័តន៍ពិត។
១៦. ស្ដីអំពីស្រុកកំណើតរបស់រាស្ត្រលោក តើព្រះយេហូវ៉ាបានសន្យាអ្វី?
១៦ សេចក្ដីសន្យាទី២: ការត្រឡប់មកស្រុកកំណើតវិញ។ ព្រះយេហូវ៉ាបានប្រាប់ជននិរទេសថា៖ «ខ្ញុំនឹងប្រគល់ស្រុកអ៊ីស្រាអែលឲ្យអ្នករាល់គ្នា»។ (អេគ. ១១:១៧) នេះគឺជាសេចក្ដីសន្យាដ៏អស្ចារ្យណាស់ ព្រោះពួកបាប៊ីឡូនដែលចំអកមើលងាយរាស្ត្ររបស់ព្រះ ច្បាស់ជាមិនឲ្យពួកគេមានសង្ឃឹមត្រឡប់ទៅស្រុកកំណើតរបស់ខ្លួនវិញឡើយ។ (អេ. ១៤:៤, ១៧) ដរាបណាពួកអ្នកដែលត្រឡប់ទៅស្រុកកំណើតវិញបន្តស្មោះត្រង់ ដរាបនោះទឹកដីរបស់ពួកគេនឹងមានជីជាតិ ហើយបង្កើតផលជាបរិបូរដើម្បីផ្គត់ផ្គង់ពួកគេ និងនាំឲ្យពួកគេមានការងារដ៏គាប់ចិត្ត។ ពួកគេនឹងលែងនឹកចាំការអាម៉ាស់និងទុក្ខលំបាកដែលមកពីការអត់ឃ្លានទៀតហើយ។—សូមអាន អេសេគាល ៣៦:៣០
១៧. តើនឹងមានអ្វីកើតឡើងចំពោះគ្រឿងបូជាសម្រាប់ជូនព្រះយេហូវ៉ា?
១៧ សេចក្ដីសន្យាទី៣: ការជូនគ្រឿងបូជានៅលើទីបូជារបស់ព្រះយេហូវ៉ានឹងមានឡើងវិញ។ ដូចយើងបានរៀននៅជំពូកទី២ ក្រោមច្បាប់ម៉ូសេ ការជូនគ្រឿងបូជាគឺជាផ្នែកដ៏សំខាន់មួយក្នុងការគោរពប្រណិប័តន៍ពិត។ ដរាបណាជននិរទេសដែលត្រឡប់មកវិញបន្តស្ដាប់បង្គាប់និងមានភាពស្អាតស្អំខាងជំនឿ ដរាបនោះព្រះយេហូវ៉ានឹងព្រមទទួលគ្រឿងបូជារបស់ពួកគេ។ ដូច្នេះ ពួកគេអាចទទួលការជម្រះភាពខុសឆ្គង ហើយរក្សាចំណងមិត្តភាពជិតស្និទ្ធជាមួយនឹងព្រះ។ ព្រះយេហូវ៉ាបានសន្យាថា៖ «ពូជពង្សអ៊ីស្រាអែលទាំងមូលនឹងគោរពប្រណិប័តន៍ខ្ញុំ ហើយខ្ញុំនឹងពេញចិត្តពួកគេ។ នៅទីនោះហើយដែលអ្នករាល់គ្នានឹងជូនវិភាគទាននិងគ្រឿងបូជាដ៏ល្អបំផុតដល់ខ្ញុំ ពោលគឺអ្វីៗទាំងអស់ដែលបរិសុទ្ធ»។ (អេគ. ២០:៤០) ការគោរពប្រណិប័តន៍ពិតនឹងត្រូវរៀបចំឡើងវិញជាប្រាកដ ហើយនាំឲ្យរាស្ត្ររបស់ព្រះទទួលពរយ៉ាងបរិបូរ។
១៨. តើព្រះយេហូវ៉ានឹងឃ្វាលរាស្ត្រលោកយ៉ាងដូចម្ដេច?
១៨ សេចក្ដីសន្យាទី៤: គង្វាលអាក្រក់នឹងត្រូវដកចេញ។ មូលហេតុចម្បងមួយដែលនាំឲ្យរាស្ត្រព្រះធ្វើខុសយ៉ាងធ្ងន់ធ្ងរ គឺដោយសារឥទ្ធិពលអាក្រក់ពីពួកបុរសដែលនាំមុខ។ ព្រះយេហូវ៉ាបានសន្យាថាលោកនឹងផ្លាស់ប្ដូរស្ថានភាពនេះ។ ស្ដីអំពីគង្វាលដ៏អាក្រក់ទាំងនោះ ព្រះបានសន្យាថា៖ «ខ្ញុំឈប់ឲ្យពួកគេឃ្វាលចៀមខ្ញុំទៀត... ខ្ញុំនឹងសង្គ្រោះចៀមខ្ញុំពីមាត់ពួកគេ»។ ប៉ុន្តែ ព្រះយេហូវ៉ាបានធានាដល់រាស្ត្រដ៏ស្មោះត្រង់របស់លោកថា៖ «ខ្ញុំនឹងថែរក្សាចៀមខ្ញុំ»។ (អេគ. ៣៤:១០, ១២) តើលោកនឹងធ្វើដូច្នេះយ៉ាងដូចម្ដេច? លោកនឹងតែងតាំងពួកបុរសស្មោះភក្ដីឲ្យធ្វើជាគង្វាលជំនួសពួកគេវិញ។
១៩. ស្ដីអំពីសាមគ្គីភាព តើព្រះយេហូវ៉ាបានសន្យាអ្វី?
១៩ សេចក្ដីសន្យាទី៥: សាមគ្គីភាពក្នុងចំណោមពួកអ្នកគោរពប្រណិប័តន៍ព្រះយេហូវ៉ា។ សូមស្រមៃគិតថាមុនការនិរទេស ពួកអ្នកគោរពប្រណិប័តន៍ស្មោះត្រង់កើតទុក្ខខ្លាំងយ៉ាងណា ពេលឃើញរាស្ត្ររបស់ព្រះបាក់បែកគ្នា។ ដោយសារទទួលឥទ្ធិពលអាក្រក់ពីពួកអ្នកប្រកាសទំនាយក្លែងក្លាយនិងគង្វាលទុច្ចរិត នោះបណ្ដាជនបានបះបោរប្រឆាំងនឹងពួកអ្នកប្រកាសទំនាយស្មោះត្រង់ដែលជាតំណាងព្រះយេហូវ៉ា។ បណ្ដាជនថែមទាំងបែកទៅជាក្រុមផ្សេងៗ ហើយប្រឆាំងគ្នាទៀតផង។ ដូច្នេះ ផ្នែកមួយដ៏គួរឲ្យទាក់ទាញចិត្តនៃការរៀបចំឡើងវិញ គឺសេចក្ដីសន្យាតាមរយៈអេសេគាល ដែលថា៖ «ខ្ញុំនឹងឲ្យពួកគេមានចិត្តតែមួយ ហើយខ្ញុំនឹងដាក់ចិត្តគំនិតថ្មីក្នុងពួកគេ»។ (អេគ. ១១:១៩) ដរាបណាជនជាតិយូដាដែលត្រឡប់មកវិញរក្សាសាមគ្គីភាពជាមួយព្រះយេហូវ៉ានិងជនរួមជាតិរបស់ខ្លួន ដរាបនោះសត្រូវមិនអាចយកឈ្នះពួកគេបានឡើយ។ ដោយរួបរួមគ្នាជាប្រជាជាតិតែមួយ ពួកគេអាចនាំឲ្យព្រះយេហូវ៉ាទទួលការសរសើរតម្កើងម្ដងទៀត ជាជាងឲ្យលោករងការប្រមាថមើលងាយនិងអាប់ឱនកិត្តិយស។
២០, ២១. តើតាមរបៀបណាព្រះយេហូវ៉ាធ្វើតាមសេចក្ដីសន្យារបស់លោកចំពោះជននិរទេសដែលត្រឡប់មកវិញ?
២០ តើព្រះយេហូវ៉ាបានសម្រេចសេចក្ដីសន្យាទាំងប្រាំចំពោះជនជាតិយូដាដែលត្រឡប់មកវិញទេ? ជាការល្អឲ្យយើងចាំពាក្យរបស់យ៉ូស្វេជាអ្នកបម្រើស្មោះត្រង់នៅសម័យបុរាណ ដែលថា៖ «សេចក្ដីសន្យាដ៏ប្រសើរទាំងអស់ដែលព្រះយេហូវ៉ាបានមានប្រសាសន៍ទៅអ្នករាល់គ្នា គ្មានប្រសាសន៍ណាមួយដែលមិនកើតឡើងឡើយ។ សេចក្ដីសន្យាទាំងអស់បានសម្រេច គ្មានពាក្យណាមួយដែលមិនក្លាយជាការពិតទេ»។ (យ៉ូស. ២៣:១៤) ដូចនៅសម័យយ៉ូស្វេ ព្រះយេហូវ៉ាច្បាស់ជាធ្វើតាមសេចក្ដីសន្យារបស់លោកចំពោះជនជាតិយូដាដែលបានត្រឡប់មកស្រុកកំណើតវិញដែរ។
២១ ពួកយូដាទាំងនោះបានឈប់គោរពបូជារូបព្រះ ហើយឈប់ធ្វើតាមទំនៀមទម្លាប់ដ៏គួរឲ្យស្អប់ខ្ពើមពីសាសនាមិនពិតដែលនាំឲ្យពួកគេឃ្លាតឆ្ងាយពីព្រះយេហូវ៉ា។ ទោះជាមានស្ថានភាពយ៉ាប់យ៉ឺនក៏ដោយ ក៏ពួកគេនៅតែបន្តរស់នៅក្នុងស្រុកកំណើតរបស់ខ្លួន។ ពួកគេខំសាបព្រោះដាំដុះ ហើយរីករាយនឹងជីវិតនៅទីនោះ។ ក្នុងចំណោមកិច្ចការដំបូងដែលពួកគេបានធ្វើ គឺសង់ទីបូជារបស់ព្រះយេហូវ៉ាឡើងវិញក្នុងក្រុងយេរូសាឡិម រួចជូនគ្រឿងបូជានៅលើទីបូជានោះ។ (អែស. ៣:២-៦) ព្រះយេហូវ៉ាបានឲ្យពួកគេនូវគង្វាលល្អដែលមានទស្សនៈដូចលោក។ គង្វាលទាំងនោះមានអែសរ៉ាជាសង្ឃដ៏ស្មោះត្រង់និងជាអ្នកចម្លងឯកសារ រួមទាំងអភិបាលនេហេមា អភិបាលសេរ៉ូបាបិល និងសម្ដេចសង្ឃយ៉ូស្វេ។ គង្វាលទាំងនោះក៏រួមមានអ្នកប្រកាសទំនាយដ៏ក្លាហាន ដូចជាហាកាយ សាការី និងម៉ាឡាគីផងដែរ។ ដរាបណាបណ្ដាជនធ្វើតាមការណែនាំពីព្រះ ដរាបនោះពួកគេមានសាមគ្គីភាពដែលពួកគេខានពិសោធអស់រយៈពេលជាយូរមកហើយ។—អេ. ៦១:១-៤; សូមអាន យេរេមា ៣:១៥
២២. តើតាមរបៀបណាយើងដឹងថាទំនាយអំពីការរៀបចំឡើងវិញនឹងកើតឡើងក្នុងកម្រិតធំជាង?
២២ ការដែលសេចក្ដីសន្យារបស់ព្រះយេហូវ៉ាអំពីការរៀបចំឡើងវិញបានកើតឡើងនៅលើកដំបូង ពិតជាគួរឲ្យលើកទឹកចិត្តណាស់! ការកើតឡើងនោះបង្ហាញឲ្យឃើញទុកជាមុននូវអ្វីដ៏អស្ចារ្យជាងដែលនឹងកើតឡើងនៅថ្ងៃខាងមុខ។ ហេតុអ្វីយើងដឹង? ព្រោះសេចក្ដីសន្យាទាំងនោះមានល័ក្ខខ័ណ្ឌគឺថាលោកនឹងធ្វើតាមសេចក្ដីសន្យារបស់លោកដរាបណារាស្ត្ររបស់លោកបន្តស្ដាប់បង្គាប់។ គួរឲ្យស្ដាយណាស់ ពួកយូដាលែងស្ដាប់បង្គាប់ព្រះ រួចបះបោរប្រឆាំងលោក។ ប៉ុន្តែដូចយ៉ូស្វេប្រាប់ ប្រសាសន៍របស់ព្រះយេហូវ៉ាតែងតែក្លាយជាការពិត។ ដូច្នេះ សេចក្ដីសន្យារបស់ព្រះនឹងកើតឡើងម្ដងទៀតអស្ចារ្យជាងនិងយូរអង្វែងជាង។ សូមយើងពិចារណានូវរបៀបដែលសេចក្ដីសន្យាទាំងនោះបានកើតឡើង។
«ខ្ញុំនឹងពេញចិត្តអ្នករាល់គ្នា»
២៣, ២៤. តើ«គ្រាដែលលោកធ្វើអ្វីៗទាំងអស់ជាថ្មីឡើងវិញ»ចាប់ផ្ដើមនៅពេលណា ហើយតាមរបៀបណា?
២៣ ក្នុងនាមជាសិស្សគម្ពីរ យើងដឹងថារបៀបរបបពិភពលោកដ៏ទុច្ចរិតនេះបានចូលដល់គ្រាចុងក្រោយបង្អស់នៅឆ្នាំ១៩១៤។ ប៉ុន្តែ ចំពោះរាស្ត្ររបស់ព្រះយេហូវ៉ា គ្រានេះមិនធ្វើឲ្យពួកគេពិបាកចិត្តទេ។ តាមពិត គម្ពីរបញ្ជាក់ថាឆ្នាំ១៩១៤ជាទីចាប់ផ្ដើមនៃគ្រាដ៏គួរឲ្យរំភើប ពោលគឺ«គ្រាដែលលោកធ្វើអ្វីៗទាំងអស់ជាថ្មីឡើងវិញ»។ (សកម្ម. ៣:២១) ហេតុអ្វីយើងដឹង? តើមានអ្វីកើតឡើងនៅស្ថានសួគ៌ក្នុងឆ្នាំ១៩១៤? នៅឆ្នាំនោះ លោកយេស៊ូដែលជាមេស្ស៊ីបានត្រូវតែងតាំងជាស្ដេច! តើព្រឹត្តិការណ៍នេះទាក់ទងយ៉ាងណានឹងគ្រាធ្វើអ្វីៗទាំងអស់ជាថ្មី? សូមចាំថាព្រះយេហូវ៉ាបានសន្យានឹងដាវីឌថា ស្ដេចដែលមកពីវង្សត្រកូលរបស់គាត់នឹងគ្រប់គ្រងជារៀងរហូត។ (១ប្រ. ១៧:១១-១៤) ប៉ុន្តែ ពេលបាប៊ីឡូនបំផ្លាញក្រុងយេរូសាឡិមនៅឆ្នាំ៦០៧ មុនគ.ស. ការគ្រប់គ្រងដែលមកពីវង្សត្រកូលដាវីឌបានត្រូវបង្អាក់។
២៤ លោកយេស៊ូជា«កូនមនុស្ស»និងជាពូជពង្សដាវីឌ ដូច្នេះលោកមានសិទ្ធិស្នងរាជ្យពីស្ដេចដាវីឌ។ (ម៉ាថ. ១:១; ១៦:១៣-១៦; លូក. ១:៣២, ៣៣) នៅឆ្នាំ១៩១៤ ពេលព្រះយេហូវ៉ាតែងតាំងលោកយេស៊ូឲ្យធ្វើជាស្ដេចនៅស្ថានសួគ៌ ‹គ្រាធ្វើអ្វីៗទាំងអស់ជាថ្មី›បានចាប់ផ្ដើម។ នេះបើកឱកាសឲ្យព្រះយេហូវ៉ាបន្តកិច្ចការរៀបចំឡើងវិញ តាមរយៈស្ដេចដ៏ល្អឥតខ្ចោះ។
២៥, ២៦. (ក) តើពេលណាការជាប់ជាឈ្លើយក្រោមបាប៊ីឡូនដ៏ខ្លាំងក្លាបានដល់ទីបញ្ចប់? ហើយយើងដឹងយ៉ាងដូចម្ដេច? (សូមមើលប្រអប់«ហេតុអ្វីនៅឆ្នាំ១៩១៩?») (ខ) ចាប់ពីឆ្នាំ១៩១៩ តើទំនាយអំពីអ្វីបានចាប់ផ្ដើមកើតឡើង?
២៥ ក្នុងចំណោមកិច្ចការដំបូងដែលលោកយេស៊ូធ្វើក្នុងនាមជាស្ដេច លោកសហការជាមួយបិតាក្នុងការពិនិត្យមើលការគោរពប្រណិប័តន៍ពិតរបស់រាស្ត្រព្រះ។ (ម៉ាឡ. ៣:១-៥) ដូចលោកយេស៊ូប្រកាសទុកជាមុនក្នុងឧទាហរណ៍អំពីស្រូវសាលីនិងស្រងែ អស់រយៈពេលជាយូរយើងពិបាកសម្គាល់គ្រិស្តសាសនិកពិតដែលព្រះបានរើសតាំងដែលប្រៀបដូចជាស្រូវសាលី និងគ្រិស្តសាសនិកក្លែងក្លាយដែលប្រៀបដូចជាស្រងែ។ * ប៉ុន្តែ រដូវច្រូតកាត់បានចាប់ផ្ដើមនៅឆ្នាំ១៩១៤ ពេលនោះយើងអាចសម្គាល់ក្រុមទាំងពីរយ៉ាងច្បាស់។ អស់ជាច្រើនទសវត្សរ៍មុនឆ្នាំ១៩១៤ និស្សិតគម្ពីរដ៏ស្មោះត្រង់បានបកអាក្រាតកំហុសឆ្គងដ៏ធ្ងន់ធ្ងររបស់ពិភពគ្រិស្តសាសនា ហើយចាប់ផ្ដើមញែកខ្លួនពីអង្គការសាសនាដ៏ខូចអាក្រក់នោះ។ នោះជាគ្រាដែលព្រះយេហូវ៉ារៀបចំរាស្ត្រលោកឡើងវិញទាំងស្រុង។ ដូច្នេះ ពីរបីឆ្នាំក្រោយ«រដូវច្រូតកាត់» គឺនៅដើមឆ្នាំ១៩១៩ រាស្ត្ររបស់ព្រះមានសេរីភាពយ៉ាងពេញលេញពីបាប៊ីឡូនដ៏ខ្លាំងក្លា។ (ម៉ាថ. ១៣:៣០) ពួកគេលែងជាប់ជាឈ្លើយទៀតហើយ!
២៦ ទំនាយអំពីការរៀបចំឡើងវិញក្នុងសៀវភៅអេសេគាល បានកើតឡើងក្នុងកម្រិតធំជាងអ្វីដែលរាស្ត្ររបស់ព្រះនៅសម័យបុរាណបានពិសោធ។ សូមឲ្យយើងពិនិត្យមើលរបៀបដែលសេចក្ដីសន្យាទាំងប្រាំដែលយើងបានពិចារណារួចហើយ បានកើតឡើងក្នុងកម្រិតធំជាង។
២៧. តើតាមរបៀបណាព្រះយេហូវ៉ាបានសម្អាតរាស្ត្ររបស់លោកពីការគោរពបូជារូបព្រះ?
២៧ សេចក្ដីសន្យាទី១: លែងមានការគោរពបូជារូបព្រះនិងទំនៀមទម្លាប់សាសនាដែលគួរឲ្យស្អប់ខ្ពើម។ នៅចុងសតវត្សរ៍ទី១៩ និងដើមសតវត្សរ៍ទី២០ គ្រិស្តសាសនិកស្មោះត្រង់បានជួបជុំគ្នាជាក្រុមតូចៗ ហើយចាប់ផ្ដើមបោះបង់ចោលទំនៀមទម្លាប់សាសនាមិនពិត។ លទ្ធិផ្សេងៗដូចជាព្រះបីអង្គរួមតែមួយ ព្រលឹងអមតៈ និងភ្លើងនរក បានត្រូវដកចេញពីសេចក្ដីបង្រៀនរបស់ពួកគេ ដោយសារគ្មានមូលដ្ឋានក្នុងគម្ពីរនិងមានប្រភពមកពីសាសនាមិនពិត។ គ្រិស្តសាសនិកពិតបានយល់យ៉ាងច្បាស់ថាការប្រើរូបផ្សេងៗក្នុងការគោរពប្រណិប័តន៍ គឺជាការគោរពបូជារូបព្រះ។ រីឯការប្រើឈើឆ្កាងវិញ បន្តិចម្ដងៗរាស្ត្ររបស់ព្រះក៏យល់ឃើញថាជាការគោរពបូជារូបព្រះដែរ។—អេគ. ១៤:៦
២៨. តើរាស្ត្ររបស់ព្រះយេហូវ៉ាបានត្រូវនាំទៅស្រុកកំណើតវិញក្នុងន័យអ្វី?
២៨ សេចក្ដីសន្យាទី២: រាស្ត្ររបស់ព្រះបានត្រូវនាំទៅស្រុកកំណើតវិញក្នុងន័យធៀប។ ក្រោយពីបោះបង់ចោលសាសនាដែលមកពីបាប៊ីឡូន គ្រិស្តសាសនិកស្មោះត្រង់បានត្រឡប់ទៅស្រុករបស់ពួកគេក្នុងន័យថាពួកគេអាចគោរពប្រណិប័តន៍ព្រះយេហូវ៉ាតាមរបៀបបរិសុទ្ធ។ ពួកគេបានទទួលពរពីព្រះ ហើយលែងខ្វះចំណេះពីលោកទៀត។ (សូមអាន អេសេគាល ៣៤:១៣, ១៤) ក្នុងជំពូកទី១៩ យើងនឹងរៀនថែមទៀតថាព្រះយេហូវ៉ាឲ្យពរដល់រាស្ត្រលោក ដោយផ្ដល់សេចក្ដីបង្រៀនជាបរិបូរដើម្បីពង្រឹងចំណងមិត្តភាពជាមួយលោក។—អេគ. ១១:១៧
២៩. នៅឆ្នាំ១៩១៩ តើតាមរបៀបណាកិច្ចផ្សព្វផ្សាយបានរីកចម្រើនយ៉ាងលឿន?
២៩ សេចក្ដីសន្យាទី៣: ការជូនគ្រឿងបូជានៅលើទីបូជារបស់ព្រះយេហូវ៉ាមានឡើងវិញ។ នៅសតវត្សរ៍ទី១ គ.ស. គ្រិស្តសាសនិកបានរៀនថាពួកគេត្រូវជូនគ្រឿងបូជាដល់ព្រះ តែមិនមែនជូនសត្វជាគ្រឿងបូជាទេ គឺជូនពាក្យសរសើរដល់ព្រះយេហូវ៉ា ហើយផ្សព្វផ្សាយប្រាប់អ្នកឯទៀតអំពីលោក។ នេះមានតម្លៃជាងជូនសត្វជាគ្រឿងបូជាឆ្ងាយណាស់។ (ហេ. ១៣:១៥) ក្នុងអំឡុងការជាប់ជាឈ្លើយអស់ជាច្រើនសតវត្សរ៍ គ្មានការរៀបចំជូនគ្រឿងបូជាដូចនោះទេ។ ប៉ុន្តែ នៅដំណាច់នៃការជាប់ជាឈ្លើយ រាស្ត្ររបស់ព្រះបានជូនលោកនូវសេចក្ដីសរសើរជាគ្រឿងបូជា។ ពួកគេជាប់រវល់ក្នុងកិច្ចការផ្សព្វផ្សាយ និងសរសើរព្រះដោយអំណរនៅកិច្ចប្រជុំ។ ចាប់ពីឆ្នាំ១៩១៩ «ខ្ញុំបម្រើដ៏ស្មោះត្រង់ហើយចេះពិចារណា»បានផ្ដោតអារម្មណ៍កាន់តែខ្លាំងទៅលើកិច្ចផ្សព្វផ្សាយ ហើយបានរៀបចំកិច្ចការនោះឲ្យដំណើរការយ៉ាងរលូន។ (ម៉ាថ. ២៤:៤៥-៤៧) ម្ល៉ោះហើយ ទីបូជារបស់ព្រះយេហូវ៉ាពោរពេញទៅដោយគ្រឿងបូជារបស់ពួកអ្នកដែលសរសើរតម្កើងនាមបរិសុទ្ធរបស់លោក។ ពួកអ្នកទាំងនោះមានចំនួនកើនឡើងជានិច្ច។
៣០. តើលោកយេស៊ូបានធ្វើអ្វីដើម្បីផ្ដល់គង្វាលល្អដែលចៀមរបស់លោកត្រូវការ?
៣០ សេចក្ដីសន្យាទី៤: ការដកគង្វាលអាក្រក់ចេញ។ គ្រិស្តបានរំដោះរាស្ត្រព្រះចេញពីកណ្ដាប់ដៃគង្វាលក្លែងក្លាយនៃពិភពគ្រិស្តសាសនាដែលលាក់ពុតនិងគិតតែពីប្រយោជន៍ផ្ទាល់ខ្លួន។ ក្រោមការដឹកនាំរបស់គ្រិស្ត អ្នកនាំមុខដែលប្រព្រឹត្តដូចគង្វាលក្លែងក្លាយទាំងនោះបានត្រូវដកចេញពីមុខងាររបស់ខ្លួន។ (អេគ. ២០:៣៨) ក្នុងនាមជាគង្វាលដ៏ល្អប្រសើរ លោកយេស៊ូធ្វើឲ្យប្រាកដថាចៀមរបស់លោកបានទទួលការថែទាំយ៉ាងល្អ។ នៅឆ្នាំ១៩១៩ លោកបានតែងតាំងខ្ញុំបម្រើដ៏ស្មោះត្រង់ហើយចេះពិចារណា។ ក្រុមតូចនេះគឺជាគ្រិស្តសាសនិកស្មោះភក្ដីដែលព្រះបានរើសតាំង។ ពួកគេនាំមុខក្នុងការផ្ដល់សេចក្ដីបង្រៀនពីព្រះដែលប្រៀបដូចជាអាហារ។ ដូច្នេះ រាស្ត្ររបស់ព្រះបានទទួលការមើលថែទាំយ៉ាងល្អ។ ក្រោយមក ពួកអ្នកចាស់ទុំបានទទួលការបង្ហាត់បង្រៀនដើម្បីជួយថែរក្សា«ហ្វូងចៀមរបស់ព្រះ»។ (១ពេ. ៥:១, ២) ពាក្យដែលព្រះយេហូវ៉ាបានឲ្យអេសេគាលកត់ទុកនៅអេសេគាល ៣៤:១៥, ១៦ ជាញឹកញយបានត្រូវប្រើដើម្បីរំលឹកគង្វាលជាគ្រិស្តសាសនិកពីខ្នាតតម្រាដែលព្រះយេហូវ៉ានិងលោកយេស៊ូគ្រិស្តតម្រូវពីពួកគង្វាល។
៣១. តើតាមរបៀបណាព្រះយេហូវ៉ាធ្វើឲ្យទំនាយនៅអេសេគាល ១១:១៩ កើតឡើង?
៣១ សេចក្ដីសន្យាទី៥: សាមគ្គីភាពក្នុងចំណោមអ្នកគោរពប្រណិប័តន៍ព្រះយេហូវ៉ា។ ប៉ុន្មានសតវត្សរ៍កន្លងទៅនេះ ពិភពគ្រិស្តសាសនាបានបែងចែកទៅជារាប់ម៉ឺនក្រុម ថែមទាំងនិកាយច្រើនរាប់មិនអស់ដែលតែងតែខ្វែងគំនិតគ្នា។ ផ្ទុយទៅវិញ ព្រះយេហូវ៉ាបានធ្វើអ្វីមួយដ៏អស្ចារ្យចំពោះរាស្ត្រលោកដែលបានត្រូវរៀបចំឡើងវិញ។ ពាក្យសន្យារបស់លោកតាមរយៈអេសេគាល ដែលថា៖ «ខ្ញុំនឹងឲ្យពួកគេមានចិត្តតែមួយ» បានកើតឡើងយ៉ាងអស្ចារ្យ។ (អេគ. ១១:១៩) នៅទូទាំងពិភពលោក គ្រិស្តមានអ្នកកាន់តាមពិតរាប់លាននាក់ដែលមកពីគ្រប់កុលសម្ព័ន្ធ គ្រប់សាសនា គ្រប់ឋានៈ និងគ្រប់មជ្ឈដ្ឋាន។ ទោះជាយ៉ាងនោះក៏ដោយ ពួកគេបានរៀនសេចក្ដីពិតដូចគ្នា និងបំពេញកិច្ចការសំខាន់ដូចគ្នាដោយមានសាមគ្គីភាព។ នៅយប់ចុងក្រោយដែលលោកយេស៊ូរស់នៅផែនដី លោកបានអធិដ្ឋានយ៉ាងអស់ពីចិត្តសូមឲ្យអ្នកកាន់តាមលោកមានសាមគ្គីភាព។ (សូមអាន យ៉ូហាន ១៧:១១, ២០-២៣) នៅសម័យយើង ព្រះយេហូវ៉ាបានធ្វើតាមសំណូមពររបស់លោកយេស៊ូតាមរបៀបដ៏អស្ចារ្យបំផុត។
៣២. ស្ដីអំពីការសម្រេចនៃទំនាយអំពីការរៀបចំឡើងវិញ តើអ្នកមានអារម្មណ៍យ៉ាងណា? (សូមមើលប្រអប់«ទំនាយអំពីការជាប់ជាឈ្លើយនិងការរៀបចំឡើងវិញ»)
៣២ អ្នកពិតជារីករាយរស់នៅក្នុងអំឡុងគ្រារៀបចំឡើងវិញដ៏គួរឲ្យរំភើបនេះ មែនទេ? នៅសព្វថ្ងៃនេះ យើងឃើញទំនាយអេសេគាលបានកើតឡើងក្នុងគ្រប់ផ្នែកនៃការគោរពប្រណិប័តន៍របស់យើង។ យើងអាចមានទំនុកចិត្តថាព្រះយេហូវ៉ាពេញចិត្តរាស្ត្ររបស់លោក ដូចដែលលោកបានប្រាប់ទុកជាមុនតាមរយៈអេសេគាលថា៖ «ខ្ញុំនឹងពេញចិត្តអ្នករាល់គ្នា»។ (អេគ. ២០:៤១) អ្នកអាចរួមចំណែកជាមួយក្រុមមនុស្សដែលមានសាមគ្គីភាពនិងបានត្រូវបំពាក់បំប៉នយ៉ាងល្អ ដែលកំពុងសរសើរព្រះយេហូវ៉ានៅទូទាំងផែនដី។ នេះពិតជាឯកសិទ្ធិពិសេសណាស់ មែនទេ? ពួកគេបានត្រូវដោះលែងពីបាប៊ីឡូនដ៏ខ្លាំងក្លា ក្រោយពីបានជាប់ជាឈ្លើយអស់ជាច្រើនសតវត្សរ៍។ ប៉ុន្តែ ទំនាយខ្លះអំពីការរៀបចំឡើងវិញនឹងកើតឡើងយ៉ាងអស្ចារ្យជាងនៅពេលខាងមុខ។
«ដូចជាសួនអេដែន»
៣៣-៣៥. (ក) តើទំនាយនៅអេសេគាល ៣៦:៣៥ មានន័យយ៉ាងណាចំពោះជនជាតិយូដាដែលជាប់ជាឈ្លើយ? (ខ) តើទំនាយនោះមានន័យយ៉ាងណាចំពោះរាស្ត្រព្រះនៅសព្វថ្ងៃនេះ? (សូមមើលប្រអប់«គ្រាដែលលោកធ្វើអ្វីៗទាំងអស់ជាថ្មីឡើងវិញ»)
៣៣ ដូចយើងបានឃើញរួចហើយ ‹គ្រាធ្វើអ្វីៗទាំងអស់ជាថ្មី›បានចាប់ផ្ដើមពេលដែលវង្សត្រកូលដាវីឌបានត្រូវស្ថាបនាឡើងវិញ គឺពេលដែលលោកយេស៊ូបានត្រូវតែងតាំងជាស្ដេចនៅឆ្នាំ១៩១៤។ (អេគ. ៣៧:២៤) បន្ទាប់មក ព្រះយេហូវ៉ាបានផ្ដល់អំណាចឲ្យគ្រិស្តរៀបចំការគោរពប្រណិប័តន៍ពិតឡើងវិញក្នុងចំណោមរាស្ត្ររបស់លោក ក្រោយពីបានជាប់ជាឈ្លើយក្រោមបាប៊ីឡូនដ៏ខ្លាំងក្លាអស់ជាច្រើនសតវត្សរ៍។ ប៉ុន្តែ តើការរៀបចំរបស់គ្រិស្តបានចប់នៅពេលនោះឬ? មិនមែនទេ! កិច្ចការនោះនឹងបន្តតាមរបៀបដ៏អស្ចារ្យនៅថ្ងៃអនាគត ហើយទំនាយអេសេគាលផ្ដល់ព័ត៌មានល្អិតល្អន់ដ៏គួរឲ្យរំភើបចិត្ត។
៣៤ ជាឧទាហរណ៍ សូមពិចារណាពាក្យដែលព្រះបានបណ្ដាលឲ្យកត់ទុកដូចតទៅ៖ «បណ្ដាជននឹងនិយាយថា៖ ‹មើលហ្ន៎! ស្រុកសូន្យស្ងាត់នោះ ឥឡូវស្អាតដូចជាសួនអេដែន›»។ (អេគ. ៣៦:៣៥) តើសេចក្ដីសន្យានោះមានន័យយ៉ាងណាចំពោះអេសេគាលនិងជនរួមជាតិរបស់គាត់ដែលជាជននិរទេស? ពួកគេច្បាស់ជាមិនរំពឹងថាទំនាយនឹងកើតឡើងយ៉ាងពេញលេញក្នុងន័យត្រង់នោះទេ គឺពួកគេមិនបានយល់ច្រឡំថាស្រុករបស់ពួកគេនឹងប្រែក្លាយទៅជាសួនអេដែនជាសួនដែលព្រះយេហូវ៉ាបានរៀបចំដោយផ្ទាល់នោះឡើយ។ (ដក. ២:៨) ផ្ទុយទៅវិញ ពួកគេប្រាកដជាយល់ថាព្រះយេហូវ៉ាកំពុងពង្រឹងទំនុកចិត្តពួកគេថាទឹកដីដែលពួកគេត្រឡប់ទៅវិញនោះនឹងមានភាពស្រស់ស្អាត ហើយមានភោគផលជាច្រើន។
៣៥ តើសេចក្ដីសន្យានោះមានន័យយ៉ាងណាចំពោះយើងនៅសព្វថ្ងៃនេះ? យើងមិនរំពឹងថាទំនាយនោះនឹងកើតឡើងក្នុងន័យត្រង់នៅឥឡូវនេះទេ ព្រោះពិភពលោកដ៏ទុច្ចរិតនេះនៅក្រោមការគ្រប់គ្រងរបស់មេកំណាចសាថាន។ ប៉ុន្តែ យើងយល់ថាពាក្យទាំងនោះកើតឡើងនៅសព្វថ្ងៃក្នុងន័យធៀប។ ក្នុងនាមជាអ្នកបម្រើព្រះយេហូវ៉ា យើងរស់នៅលើទឹកដីដែលបានត្រូវរៀបចំឡើងវិញក្នុងន័យធៀប គឺក្នុងស្ថានភាពមួយដែលយើងអាចបម្រើព្រះយ៉ាងខ្នះខ្នែង ហើយចាត់ទុកកិច្ចបម្រើពិសិដ្ឋជាអ្វីដ៏សំខាន់បំផុតក្នុងជីវិតរបស់យើង។ បន្តិចម្ដងៗ ទឹកដីនេះនឹងកាន់តែមានបរិយាកាសដូចជាសួនឧទ្យាន។ ប៉ុន្តែ ចុះយ៉ាងណានៅថ្ងៃអនាគត?
៣៦, ៣៧. នៅក្នុងសួនឧទ្យាននាថ្ងៃអនាគត តើសេចក្ដីសន្យាអ្វីខ្លះនឹងកើតឡើង?
៣៦ ក្រោយសង្គ្រាមអាម៉ាគេដូន លោកយេស៊ូនឹងពង្រីកកិច្ចការរៀបចំឡើងវិញក្នុងកម្រិតធំជាង ហើយការរៀបចំនោះក៏រួមបញ្ចូលផែនដីផងដែរ។ ក្នុងអំឡុងការគ្រប់គ្រង១.០០០ឆ្នាំ លោកនឹងណែនាំមនុស្សជាតិឲ្យរៀបចំផែនដីទាំងមូលទៅជាសួនអេដែន ដូចគោលបំណងដើមរបស់ព្រះយេហូវ៉ា។ (លូក. ២៣:៤៣) នៅពេលនោះ មនុស្សទាំងអស់នឹងមានសាមគ្គីភាព ហើយចេះថែរក្សាផែនដី និងស្រឡាញ់ធម្មជាតិ។ នៅគ្រប់ទីកន្លែង គ្មានគ្រោះថ្នាក់និងការភ័យខ្លាចទាល់តែសោះ។ សូមស្រមៃគិតអំពីពេលដែលសេចក្ដីសន្យានេះនឹងកើតឡើង ដែលថា៖ «ខ្ញុំនឹងធ្វើកិច្ចព្រមព្រៀងសន្តិភាពជាមួយនឹងពួកគេ ហើយខ្ញុំនឹងបណ្ដេញសត្វសាហាវទាំងប៉ុន្មានឲ្យអស់ពីស្រុកនោះ ដើម្បីឲ្យពួកគេអាចរស់នៅដោយសុខសាន្តនៅតំបន់ស្ងាត់ជ្រងំ ហើយដេកដោយសុខស្រួលនៅក្នុងព្រៃ»។—អេគ. ៣៤:២៥
៣៧ តើអ្នកអាចស្រមៃឃើញទិដ្ឋភាពដូចតទៅនេះទេ? អ្នកអាចធ្វើដំណើរទៅលេងកន្លែងផ្សេងៗនៅផែនដីដ៏ធំទូលាយនេះដោយគ្មានការភ័យខ្លាច។ គ្មានសត្វណាមួយមកពាធាអ្នកឡើយ។ គ្មានអ្វីមករំខានសេចក្ដីសុខសាន្តរបស់អ្នកទេ។ អ្នកអាចដើរទៅក្នុងព្រៃតែម្នាក់ឯង ហើយគយគន់ទេសភាពដ៏ស្រស់បំព្រងនិងអស្ចារ្យ ថែមទាំងអាចគេងស្កប់ស្កល់នៅទីនោះដោយគ្មានគ្រោះថ្នាក់ទៀតផង!
សូមស្រមៃគិតគ្រាដែលអ្នកអាច«ដេកដោយសុខស្រួលនៅក្នុងព្រៃ»ដោយគ្មានគ្រោះថ្នាក់ (សូមមើលវគ្គ៣៦, ៣៧)
៣៨. ស្ដីអំពីសេចក្ដីសន្យាដែលបានត្រូវកត់ទុកនៅក្នុងអេសេគាល ២៨:២៦ តើអ្នកមានអារម្មណ៍យ៉ាងណាពេលដែលសេចក្ដីសន្យានោះបានកើតឡើង?
៣៨ យើងនឹងឃើញសេចក្ដីសន្យានេះកើតឡើងផងដែរ គឺ«ពួកគេនឹងអាស្រ័យនៅក្នុងស្រុកនោះដោយសុវត្ថិភាព ហើយសង់ផ្ទះ និងដាំចម្ការទំពាំងបាយជូរ។ ពួកគេនឹងរស់នៅដោយសុខសាន្ត ពេលខ្ញុំកាត់ទោសប្រជាជាតិនៅជុំវិញដែលមាក់ងាយពួកគេ។ ពេលនោះ ពួកគេនឹងដឹងថាខ្ញុំនេះហើយជាយេហូវ៉ាជាព្រះរបស់ពួកគេ»។ (អេគ. ២៨:២៦) ក្រោយពីសត្រូវរបស់ព្រះយេហូវ៉ាលែងមានទៀត យើងនឹងមានសេចក្ដីសុខសាន្តនិងសន្តិភាពនៅទូទាំងផែនដី។ យើងមិនគ្រាន់តែថែរក្សាផែនដីប៉ុណ្ណោះទេ យើងក៏នឹងថែរក្សាខ្លួនយើងផ្ទាល់ និងអ្នកជាទីស្រឡាញ់របស់យើងផងដែរ។ យើងអាចសង់ផ្ទះដែលស្រួលរស់នៅ ព្រមទាំងដាំចម្ការផ្សេងៗ ហើយបរិភោគផលពីចម្ការទាំងនោះ។
៣៩. ហេតុអ្វីអ្នកអាចជឿជាក់ថាទំនាយក្នុងសៀវភៅអេសេគាលអំពីសួនឧទ្យាននឹងក្លាយជាការពិត?
៣៩ ចំពោះអ្នក តើសេចក្ដីសន្យាទាំងនោះជាការស្រមើស្រមៃឬ? សូមចាំអំពីអ្វីដែលអ្នកបានឃើញរួចហើយក្នុងអំឡុង‹គ្រាធ្វើអ្វីៗទាំងអស់ជាថ្មី›។ ទោះជាមានការប្រឆាំងយ៉ាងខ្លាំងពីសាថានក៏ដោយ លោកយេស៊ូបានទទួលអំណាចដើម្បីរៀបចំការគោរពប្រណិប័តន៍ពិតឡើងវិញ ក្នុងអំឡុងគ្រាដ៏ងងឹតបំផុតនៃពិភពលោកនេះ។ នោះជាភ័ស្តុតាងយ៉ាងជាក់លាក់ដែលថាសេចក្ដីសន្យាទាំងអស់របស់ព្រះតាមរយៈអេសេគាលនឹងក្លាយជាការពិត!
^ វគ្គ 2 ជនជាតិយូដាភាគច្រើនដែលជាប់ជាឈ្លើយ រស់នៅតាមភូមិឆ្ងាយពីក្រុងបាប៊ីឡូន។ ជាឧទាហរណ៍ អេសេគាលរស់នៅក្នុងចំណោមជនជាតិយូដាក្បែរទន្លេកេបា។ (អេគ. ៣:១៥) ប៉ុន្តែ មានជនជាតិយូដាមួយចំនួនតូចរស់នៅក្នុងក្រុងបាប៊ីឡូន។ ពួកគេទាំងនោះរួមមាន«ពួកអ្នកដែលមកពីវង្សត្រកូលស្ដេចនិងពួកអ្នកដែលមានត្រកូលខ្ពស់»។—ដាន. ១:៣, ៦; ២បស. ២៤:១៥
^ វគ្គ 25 ជាឧទាហរណ៍ យើងមិនអាចសន្មតយ៉ាងច្បាស់ថាគ្រិស្តសាសនិកណាម្នាក់ដែលរស់នៅសតវត្សរ៍ទី១៦ ជាគ្រិស្តសាសនិកដែលព្រះបានរើសតាំងនោះទេ។
