ប្រអប់ការពន្យល់បន្ថែម ២ក
ការពន្យល់ទំនាយអេសេគាល
អត្ថន័យនៃពាក្យទំនាយ
ក្នុងគម្ពីរ ពាក្យភាសាហេប្រឺណាវ៉ាបានត្រូវបកប្រែថា«ទំនាយ» ជាចម្បងពាក្យនេះសំដៅទៅលើការប្រកាសដំណឹង ការវិនិច្ឆ័យ សេចក្ដីបង្រៀន ឬបង្គាប់ពីព្រះ។ បន្ថែមទៅទៀត ពាក្យនេះក៏អាចសំដៅទៅលើការប្រកាសទុកជាមុនអំពីអ្វីដែលនឹងកើតឡើងនៅថ្ងៃអនាគត។ ទំនាយអេសេគាលរួមបញ្ចូលអ្វីទាំងអស់នោះ។—អេគ. ៣:១០, ១១; ១១:៤-៨; ១៤:៦, ៧; ៣៧:៩, ១០; ៣៨:១-៤
របៀបផ្ដល់ទំនាយ
-
ការបើកបង្ហាញឲ្យឃើញក្នុងគំនិត
-
ឧទាហរណ៍
-
ការសម្ដែង
ទំនាយក្នុងសៀវភៅអេសេគាលរួមបញ្ចូលការបើកបង្ហាញឲ្យឃើញក្នុងគំនិត ឧទាហរណ៍ រឿងប្រៀបប្រដូច និងការសម្ដែង។
ការសម្រេចទំនាយ
ពេលខ្លះ ទំនាយក្នុងសៀវភៅអេសេគាលមិនគ្រាន់តែកើតឡើងម្ដងទេ តែក៏កើតឡើងនៅពេលក្រោយដែរ។ ជាឧទាហរណ៍ ទំនាយអំពីការរៀបចំឡើងវិញបានកើតឡើងលើកដំបូង ពេលដែលរាស្ត្ររបស់ព្រះត្រឡប់ទៅស្រុកសន្យាវិញ។ ប៉ុន្តែ ដូចបានរៀបរាប់ក្នុងជំពូកទី៩នៃសៀវភៅនេះ ទំនាយនៃការរៀបចំឡើងវិញភាគច្រើនកំពុងកើតឡើងនៅសព្វថ្ងៃនេះ ហើយនឹងកើតឡើងម្ដងទៀតនៅថ្ងៃអនាគត។
ពេលមុន យើងចាត់ទុកចំណុចមួយចំនួនក្នុងទំនាយអេសេគាលជាមូលដ្ឋានសម្រាប់អ្វីដែលជានិមិត្តរូប និងអ្វីដែលពិតប្រាកដ។ ប៉ុន្តែ ក្នុងសៀវភៅនេះមិនរៀបរាប់ថាបុគ្គលណាមួយ វត្ថុណាមួយ ទីកន្លែង ឬហេតុការណ៍ណាមួយជានិមិត្តរូបដែលតំណាងអ្វីដែលពិតប្រាកដនៅសព្វថ្ងៃនេះទេ លើកលែងតែមានមូលដ្ឋានច្បាស់លាស់ក្នុងបទគម្ពីរ។ * ផ្ទុយទៅវិញ សៀវភៅនេះលើកឡើងនូវការសម្រេចធំជាងនៃទំនាយជាច្រើនក្នុងសៀវភៅអេសេគាល។ បន្ថែមទៅទៀត សៀវភៅនេះរៀបរាប់អំពីមេរៀនដែលយើងអាចរៀនពីដំណឹងដែលអេសេគាលប្រកាស ព្រមទាំងរៀនពីមនុស្ស ទីកន្លែង និងព្រឹត្តិការណ៍ដែលគាត់បានរៀបរាប់។
^ វគ្គ 12 ដើម្បីដឹងថែមទៀតអំពីអ្វីដែលជានិមិត្តរូបនិងអ្វីដែលពិតប្រាកដ សូមមើលទស្សនាវដ្ដីប៉មយាម ថ្ងៃទី១៥ ខែមីនា ឆ្នាំ២០១៥ ទំ.៥-៧ វ.៧-១២; និង«សំណួរពីអ្នកអាន» ទំ.១៥-១៦ ក្នុងទស្សនាវដ្ដីដូចគ្នា។
