ប្រអប់ការពន្យល់បន្ថែម ១០គ
ជំនួយដែលជួយយើងឲ្យក្រោកឈរ
យើងអាចទទួលកម្លាំងចិត្តដោយរំពឹងគិតអំពីមេរៀនក្នុងការបើកបង្ហាញដ៏អស្ចារ្យនៅអេសេគាល ៣៧:១-១៤ ហើយយើងអាចយកមេរៀននោះមកអនុវត្តក្នុងកាលៈទេសៈរបស់យើង។ តើមេរៀននោះជាអ្វី?
ពេលខ្លះយើងប្រហែលមានអារម្មណ៍ពិបាកខ្លាំងណាស់ ដោយសាររងសម្ពាធនិងមានទុក្ខលំបាកក្នុងជីវិត។ នេះធ្វើឲ្យយើងល្វើយ ពិបាកតស៊ូតទៅមុខទៀត។ ប៉ុន្តែ នៅគ្រាបែបនោះ យើងប្រហែលជាទទួលកម្លាំងចិត្តឡើងវិញ បើយើងរំពឹងគិតអំពីការពណ៌នាដ៏រស់រវើកក្នុងការបើកបង្ហាញដែលអេសេគាលឃើញក្នុងគំនិតស្ដីអំពីការរៀបចំឡើងវិញ។ ហេតុអ្វី? តាមរយៈទំនាយនោះ យើងរៀនថាព្រះយេហូវ៉ាមានឫទ្ធានុភាពផ្ដល់ដង្ហើមជីវិត និងធ្វើឲ្យឆ្អឹងស្ងួតហែងមានជីវិតឡើងវិញ។ ហេតុនេះ លោកច្បាស់ជាផ្ដល់កម្លាំងដែលយើងត្រូវការដើម្បីយកឈ្នះឧបសគ្គផ្សេងៗ ទោះជាឧបសគ្គនោះធំប៉ុនណាក៏ដោយ។—សូមអាន ចម្រៀងសរសើរព្រះ ១៨:២៩; ភី. ៤:១៣
យើងប្រហែលជាចាំថាអស់ជាច្រើនសតវត្សរ៍មុនសម័យអេសេគាល ម៉ូសេជាអ្នកប្រកាសទំនាយបានរៀបរាប់ថាព្រះយេហូវ៉ាមិនគ្រាន់តែមានឫទ្ធានុភាពប៉ុណ្ណោះទេ តែលោកក៏ពេញចិត្តប្រើឫទ្ធានុភាពនោះដើម្បីជួយរាស្ត្ររបស់លោកដែរ។ ម៉ូសេសរសេរថា៖ «តាំងពីបុរាណមក ព្រះជាទីពឹងជ្រក ហើយដៃលោកទ្រអ្នកជាដរាប»។ (បច. ៣៣:២៧) ពិតណាស់ យើងអាចជឿជាក់ថាបើយើងស្វែងរកជំនួយពីព្រះយេហូវ៉ាក្នុងគ្រាលំបាក លោកនឹងទ្រយើង ហើយលើកយើងឡើងយ៉ាងថ្នាក់ថ្នម ថែមទាំងជួយយើងឲ្យក្រោកឈរឡើងទៀតផង។—អេគ. ៣៧:១០