ប្រអប់ការពន្យល់បន្ថែម ១៦ក
តើពិភពគ្រិស្តសាសនាតំណាងដោយយេរូសាឡិមឬ?
ពេលមុនសៀវភៅរបស់យើងបានរៀបរាប់ថា ពិភពគ្រិស្តសាសនាបានត្រូវតំណាងដោយយេរូសាឡិមដែលក្បត់ជំនឿ។ ក្នុងក្រុងយេរូសាឡិមមិនស្មោះត្រង់ មានការគោរពបូជារូបព្រះ និងពេញទៅដោយការខូចអាក្រក់។ នេះច្បាស់ជារំលឹកយើងអំពីអ្វីដែលកំពុងកើតឡើងនៅក្នុងពិភពគ្រិស្តសាសនា។ ប៉ុន្តែ ប៉ុន្មានឆ្នាំកន្លងទៅនេះ ពេលរៀបរាប់អំពីទំនាយ សៀវភៅផ្សេងៗរបស់យើង រួមទាំងសៀវភៅដែលអ្នកកំពុងអានមិនរៀបរាប់អំពីអ្វីជានិមិត្តរូបនិងអ្វីពិតប្រាកដទេ លើកលែងតែគម្ពីរបញ្ជាក់យ៉ាងច្បាស់អំពីរឿងនេះ។ តើមានមូលដ្ឋានច្បាស់លាស់ក្នុងគម្ពីរឲ្យយើងសន្និដ្ឋានថាពិភពគ្រិស្តសាសនាបានត្រូវតំណាងដោយក្រុងយេរូសាឡិមឬទេ? មិនមានទេ។
សូមគិតអំពីចំណុចដូចតទៅ៖ នៅពេលមួយ ក្រុងយេរូសាឡិមជាទីតាំងដ៏សំខាន់នៃការគោរពប្រណិប័តន៍ពិត តែក្រោយមកអ្នកក្រុងនោះបានក្បត់ជំនឿ។ ផ្ទុយទៅវិញ ពិភពគ្រិស្តសាសនាមិនដែលកាន់តាមការគោរពប្រណិប័តន៍ពិតទាល់តែសោះ។ ចាប់តាំងពីពិភពគ្រិស្តសាសនាចាប់ផ្ដើមមានឡើងនៅសតវត្សរ៍ទី៤ គ.ស. ពិភពគ្រិស្តសាសនាតែងតែបង្រៀនលទ្ធិមិនពិតជានិច្ច។
បន្ថែមទៅទៀត ក្រោយពីក្រុងយេរូសាឡិមបានត្រូវបំផ្លាញដោយពួកបាប៊ីឡូន ព្រះយេហូវ៉ាបានស្ថាបនាក្រុងនោះឡើងវិញ ហើយក្លាយជាមណ្ឌលនៃការគោរពប្រណិប័តន៍ពិត ព្រមទាំងទទួលការពេញចិត្តពីលោកម្ដងទៀត។ ផ្ទុយទៅវិញ ពិភពគ្រិស្តសាសនាមិនដែលទទួលការពេញចិត្តពីព្រះទេ ហើយពេលពិភពគ្រិស្តសាសនាត្រូវបំផ្លាញចោលនៅគ្រាទុក្ខវេទនាជាខ្លាំង នោះនឹងមិនលេចឡើងម្ដងទៀតឡើយ។
ដោយគិតអំពីចំណុចទាំងនោះ តើយើងអាចសន្និដ្ឋានយ៉ាងណា? ពេលយើងពិនិត្យមើលទំនាយផ្សេងៗក្នុងគម្ពីរដែលបានកើតឡើងទៅលើក្រុងយេរូសាឡិមមិនស្មោះត្រង់ យើងប្រហែលជានិយាយថា‹ចំណុចនេះឬចំណុចនោះរំលឹកយើងអំពីអ្វីដែលយើងឃើញក្នុងពិភពគ្រិស្តសាសនាសព្វថ្ងៃ›។ ប៉ុន្តែ តាមមើលទៅគ្មានមូលដ្ឋានក្នុងគម្ពីរឲ្យយើងសន្និដ្ឋានថាពិភពគ្រិស្តសាសនាបានត្រូវតំណាងដោយយេរូសាឡិមទេ។
