ប្រអប់ការពន្យល់បន្ថែម ១៩ក
ទន្លេដែលផ្ដល់ពរពីព្រះយេហូវ៉ា
សូមគិតពិចារណាអំពីបទគម្ពីរមួយចំនួនដែលប្រើពាក្យ«ទន្លេ»និង«ទឹក»ដើម្បីរៀបរាប់អំពីពរពីព្រះយេហូវ៉ា។ ពេលយើងអានបទគម្ពីរទាំងនោះ យើងទទួលការលើកទឹកចិត្តខ្លាំងណាស់ដែលបានរៀនអំពីរបៀបដែលព្រះយេហូវ៉ាផ្ដល់ពរដល់យើង។ តើតាមរបៀបណា?
យ៉ូអែល ៣:១៨ ទំនាយនេះបង្ហាញអំពីប្រភពទឹកមួយដែលហូរចេញពីទីបរិសុទ្ធនៃវិហាររបស់ព្រះ ហើយហូរទៅស្រោចស្រព«ជ្រលងដើមអាកាស្យា»ដែលស្ងួតហែង។ ដូច្នេះ យ៉ូអែលនិងអេសេគាលបានឃើញទន្លេមួយដែលនាំឲ្យកន្លែងដែលគ្មានជីវិតទៅជាមានជីវិតឡើងវិញ។ ក្នុងទំនាយទាំងពីរ ទឹកទន្លេនោះមានប្រភពមកពីវិហារព្រះយេហូវ៉ា។
សាការី ១៤:៨ សាការីជាអ្នកប្រកាសទំនាយឃើញ«ទឹកដែលផ្ដល់ជីវិត»ហូរចេញពីក្រុងយេរូសាឡិម។ ទឹកនោះពាក់កណ្ដាលហូរទៅសមុទ្រខាងកើតឬសមុទ្រស្លាប់ ហើយពាក់កណ្ដាលទៀតហូរទៅសមុទ្រខាងលិចឬសមុទ្រមេឌីទែរ៉ានេ។ ក្រុងយេរូសាឡិមជា«ក្រុងរបស់ស្ដេចដ៏ឧត្ដុង្គឧត្ដម»គឺព្រះយេហូវ៉ា។ (ម៉ាថ. ៥:៣៥) ការរៀបរាប់របស់សាការីអំពីក្រុងនោះរំលឹកយើងថាព្រះយេហូវ៉ានឹងគ្រប់គ្រងទូទាំងផែនដីនៅគ្រាខាងមុខ។ តាំងពីយូរមកហើយ យើងយល់ថាទឹកក្នុងទំនាយសាការីបញ្ជាក់ថាព្រះយេហូវ៉ានឹងផ្ដល់ពរដល់មនុស្សស្មោះត្រង់ពីរក្រុមក្នុងសួនឧទ្យាន។ ក្រុមមួយគឺអស់អ្នកដែលរួចជីវិតពីគ្រាទុក្ខវេទនាជាខ្លាំង និងក្រុមមួយទៀតគឺអស់អ្នកដែលបានត្រូវប្រោសឲ្យរស់ឡើងវិញក្រោយមក។
ការបើកបង្ហាញ ២២:១, ២ សាវ័កយ៉ូហានបានឃើញទន្លេមួយដែលស្រដៀងនឹងទន្លេដែលអេសេគាលបានឃើញ។ ប៉ុន្តែ ទន្លេនោះមិនហូរចេញពីវិហាររបស់ព្រះយេហូវ៉ាទេ តែហូរចេញពីបល្ល័ង្ករបស់លោកវិញ។ ដូច្នេះ ដូចការបើកបង្ហាញដែលសាការីបានឃើញដែរ តាមមើលទៅនោះបញ្ជាក់អំពីពរដែលមកពីការគ្រប់គ្រងរបស់ព្រះក្នុងអំឡុង១.០០០ឆ្នាំ។
តាមពិត មានភាពខុសគ្នាតែបន្តិចប៉ុណ្ណោះរវាងពរដែលមកពីការគ្រប់គ្រងរបស់ព្រះយេហូវ៉ា និងពរដែលបានត្រូវតំណាងដោយទន្លេដែលអេសេគាលបានឃើញក្នុងគំនិត។ ពរទាំងអស់នោះសុទ្ធតែមកពីព្រះយេហូវ៉ា ហើយលោកផ្ដល់ឲ្យមនុស្សស្មោះត្រង់ទាំងអស់។
ចម្រៀងសរសើរព្រះ ៤៦:៤ សូមកត់សម្គាល់អំពីរបៀបដែលខនេះទំនងជាបញ្ជាក់អំពីចំណុចពីរយ៉ាង គឺការគោរពប្រណិប័តន៍និងការគ្រប់គ្រង។ ក្នុងខនេះ យើងឃើញទន្លេមួយដែលនាំសេចក្ដីរីករាយទៅដល់«ក្រុងរបស់ព្រះ»ដែលតាមមើលទៅសំដៅទៅលើរាជាណាចក្រនិងការគ្រប់គ្រង។ ទន្លេនោះក៏នាំសេចក្ដីរីករាយទៅដល់«ត្រសាលឧត្ដមបរិសុទ្ធនៃព្រះដ៏ខ្ពង់ខ្ពស់បំផុត»ដែរ ដែលតាមមើលទៅសំដៅទៅលើការគោរពប្រណិប័តន៍ពិត។
បទគម្ពីរទាំងនេះជួយឲ្យយើងមានទំនុកចិត្តថាព្រះយេហូវ៉ានឹងផ្ដល់ពរដល់មនុស្សស្មោះត្រង់តាមរបៀបពីរយ៉ាង។ ទី១ យើងនឹងទទួលប្រយោជន៍ជារៀងរហូតពីការគ្រប់គ្រងរបស់លោក។ ទី២ យើងនឹងទទួលប្រយោជន៍ជានិរន្តរ៍ពីការរៀបចំរបស់លោកសម្រាប់ការគោរពប្រណិប័តន៍ពិត។ ដូច្នេះ នៅឥឡូវនេះសូមឲ្យយើងតាំងចិត្តបន្តទទួល«ទឹកដែលផ្ដល់ជីវិត»ពីព្រះយេហូវ៉ានិងបុត្ររបស់លោក។ ទឹកនោះជាការរៀបចំដែលប្រកបដោយសេចក្ដីស្រឡាញ់ដើម្បីឲ្យយើងទទួលជីវិតដែលគ្មានទីបញ្ចប់!—យេ. ២:១៣; យ៉ូន. ៤:១០
