ប្រអប់ការពន្យល់បន្ថែម ១៤ក
មេរៀនពីវិហារដែលអេសេគាលបានឃើញក្នុងគំនិត
ការគោរពប្រណិប័តន៍ពិត បានត្រូវលើកតម្កើងនិងការពារ
វិហារដែលអេសេគាលបានឃើញក្នុងគំនិតបានត្រូវលើកតម្កើងនៅលើ«ភ្នំដ៏ខ្ពស់មួយ» (១)។ តើយើងបានលើកតម្កើងការគោរពប្រណិប័តន៍ពិត ហើយចាត់ទុកការគោរពប្រណិប័តន៍នោះថាសំខាន់បំផុតក្នុងជីវិតរបស់យើងឬទេ?
កំពែង (២) ហ៊ុមព័ទ្ធសំណង់វិហារដែលនៅកណ្ដាលបរិវេណដ៏ធំទូលាយ (៣)។ នេះរំលឹកយើងថាយើងមិនត្រូវឲ្យអ្វីក៏ដោយ មកបង្ខូចការគោរពប្រណិប័តន៍របស់យើងចំពោះព្រះយេហូវ៉ាឡើយ។ បើសូម្បីតែ«ទឹកដីមិនបរិសុទ្ធ»ត្រូវនៅឆ្ងាយពីការគោរពប្រណិប័តន៍ពិតទៅហើយ ទម្រាំតែការប្រព្រឹត្តមិនស្អាតស្អំឬប្រាសចាកសីលធម៌ច្បាស់ជាត្រូវនៅឲ្យឆ្ងាយពីអ្នកគោរពប្រណិប័តន៍ព្រះយេហូវ៉ាទៅទៀត!—អេគ. ៤២:២០
ពរជារៀងរហូត
អូរហូរចេញពីទីបរិសុទ្ធនៃវិហារ ហើយធំឡើងទៅជាទន្លេ នាំឲ្យមានការរស់រានមានជីវិត និងនាំឲ្យដីមានជីជាតិ (៤)។ យើងនឹងរៀនអំពីពរទាំងនេះនៅជំពូកទី១៩។
ខ្នាតតម្រាដូចគ្នាសម្រាប់អ្នកបម្រើទាំងអស់
ខ្លោងទ្វារខ្ពស់នៅខាងក្រៅ (៥) និងខ្លោងទ្វារខាងក្នុង (៩) រំលឹកយើងថាព្រះយេហូវ៉ាមានខ្នាតតម្រាខ្ពង់ខ្ពស់ ស្ដីអំពីការប្រព្រឹត្តសម្រាប់មនុស្សទាំងអស់ដែលចូលរួមក្នុងការគោរពប្រណិប័តន៍ពិត។ សូមកត់សម្គាល់ថាខ្លោងទ្វារខាងក្រៅនិងខាងក្នុងមានប្រវែងនិងទំហំដូចគ្នា។ នេះគឺត្រឹមត្រូវមែន ព្រោះតម្រូវការដ៏សុចរិតរបស់ព្រះយេហូវ៉ាគឺសម្រាប់អ្នកបម្រើទាំងអស់របស់លោក ទោះជាពួកគេមានឯកសិទ្ធិឬតួនាទីអ្វីក៏ដោយ។
ការបរិភោគអាហារនៅតុរបស់ព្រះយេហូវ៉ា
បន្ទប់សម្រាប់បរិភោគអាហារ (៨) រំលឹកយើងថានៅសម័យបុរាណ បណ្ដាជនអាចបរិភោគគ្រឿងបូជាដែលពួកគេយកមកជូននៅឯវិហារ គឺប្រៀបដូចជាពួកគេបរិភោគអាហារជាមួយព្រះយេហូវ៉ា។ នេះខុសពីវិហារដ៏រុងរឿងដែលគ្រិស្តសាសនិកគោរពប្រណិប័តន៍ព្រះនៅសព្វថ្ងៃ ព្រោះ«គ្រឿងបូជា»បានត្រូវជូន«មួយដង»ជាការស្រេច។ (ហេ. ១០:១២) ទោះជាយ៉ាងនោះក្ដី យើងនៅតែជូនព្រះនូវសេចក្ដីសរសើរជាគ្រឿងបូជា។—ហេ. ១៣:១៥
ការធានាពីព្រះ
អ្នកប្រហែលជាគិតថាការវាស់វែងវិហារនៅក្នុងការបើកបង្ហាញដែលអេសេគាលឃើញក្នុងគំនិត មានព័ត៌មានល្អិតល្អន់ច្រើនពេក។ ប៉ុន្តែ ចំណុចទាំងនេះបង្រៀនយើងនូវមេរៀនសំខាន់មួយ គឺជាការធានាថាគោលបំណងរបស់ព្រះក្នុងការរៀបចំការគោរពប្រណិប័តន៍ពិតឡើងវិញ នឹងកើតឡើងយ៉ាងជាក់លាក់និងជាប្រាកដ ដូចការវាស់វែងយ៉ាងហ្មត់ចត់ទាំងនោះដែរ។ ទោះជាអេសេគាលមិនបានឃើញមនុស្សណាម្នាក់ក្នុងការបើកបង្ហាញនោះក៏ដោយ គាត់បានកត់ទុកដំបូន្មានយ៉ាងចំៗពីព្រះយេហូវ៉ាសម្រាប់ពួកសង្ឃ ពួកមេដឹកនាំ និងបណ្ដាជន។ អ្នកបម្រើទាំងអស់របស់ព្រះត្រូវកាន់តាមខ្នាតតម្រាដ៏សុចរិតរបស់លោក។