ជំពូកទី១៥
«ខ្ញុំនឹងបញ្ឈប់អំពើពេស្យាចាររបស់អ្នក»
គោលចំណុច: អ្វីដែលយើងអាចរៀនពីការពណ៌នាអំពីស្ត្រីពេស្យាក្នុងសៀវភៅអេសេគាលនិងសៀវភៅការបើកបង្ហាញ
១, ២. តើស្រីពេស្យាបែបណាជាស្រីពេស្យាដ៏គួរឲ្យស្អប់ខ្ពើមបំផុត?
ពេលឮថាស្ត្រីម្នាក់បានក្លាយទៅជាស្រីពេស្យា គឺគួរឲ្យស្ដាយណាស់! យើងប្រហែលជាឆ្ងល់ថា តើមានកាលៈទេសៈអ្វីខ្លះដែលបានជំរុញនាងឲ្យមានគន្លងជីវិតដ៏ស្មោកគ្រោកបែបនេះ? តើដោយសារអំពើហិង្សាឬការធ្វើបាបពីសមាជិកណាម្នាក់ក្នុងគ្រួសាររបស់នាង ជំរុញនាងឲ្យធ្វើជាស្រីពេស្យាតាំងពីក្មេងឬ? ឬតើភាពក្រីក្រតោកយ៉ាកបានជំរុញនាងឲ្យធ្វើជាស្រីបម្រើខាងផ្លូវភេទឬ? តើនាងកំពុងគេចខ្លួនពីប្ដីដ៏សាហាវព្រៃផ្សៃឬ? ជាញឹកញយ រឿងដ៏ខ្លោចផ្សាដូចនេះកើតឡើងក្នុងពិភពលោកដ៏ទុច្ចរិតនេះ។ ហេតុនេះហើយបានជាលោកយេស៊ូប្រព្រឹត្តយ៉ាងសប្បុរសចំពោះស្ត្រីដូចនោះ។ លោកយេស៊ូបានបញ្ជាក់ថា អស់អ្នកដែលប្រែចិត្ត ហើយផ្លាស់ប្ដូរគន្លងជីវិតរបស់ខ្លួន អាចទទួលបានជីវិតប្រសើរជាង។—ម៉ាថ. ២១:២៨-៣២; លូក. ៧:៣៦-៥០
២ ប៉ុន្តែ សូមឲ្យយើងពិចារណាអំពីស្ត្រីពេស្យាមួយប្រភេទទៀត។ សូមស្រមៃគិតស្ត្រីម្នាក់ជ្រើសរើសគន្លងជីវិតនោះដោយចេតនា។ នាងមិនគិតថាជីវិតជាស្រីពេស្យាជាអ្វីដ៏គួរឲ្យស្អប់ខ្ពើមទេ! តែនាងមានមោទនភាពចំពោះជីវិតបែបនោះទៅវិញ។ នាងស្រឡាញ់ប្រាក់ និងមុខមាត់ដែលមកពីអាជីពនោះ។ អាក្រក់ជាងនោះទៅទៀត បើនាងមានប្ដីដ៏ល្អនិងស្មោះត្រង់ តែនាងបែរជាក្បត់គាត់ដើម្បីធ្វើជាស្រីពេស្យា យើងច្បាស់ជាមានអារម្មណ៍ខ្ពើមរអើមចំពោះស្ត្រីដូចនោះនិងគន្លងជីវិតដែលនាងបានជ្រើសរើស មែនទេ? ព្រះយេហូវ៉ាក៏មានអារម្មណ៍ដូចនោះដែរ។ នេះជាមូលហេតុមួយដែលលោកប្រើការពណ៌នាអំពីស្រីពេស្យាម្ដងហើយម្ដងទៀត ដើម្បីបញ្ជាក់នូវអារម្មណ៍របស់លោកចំពោះសាសនាមិនពិត។
៣. ក្នុងជំពូកនេះ តើយើងនឹងពិចារណាអំពីអ្វីខ្លះ?
៣ ក្នុងសៀវភៅអេសេគាលមានពីរជំពូកដែលរៀបរាប់អំពីអំពើពេស្យាចារ ហើយនេះបញ្ជាក់អំពីភាពមិនស្មោះត្រង់របស់រាស្ត្រព្រះនៅស្រុកអ៊ីស្រាអែលនិងស្រុកយូដា។ (អេគ. ជំ.១៦ និង២៣) ប៉ុន្តែ មុនយើងពិចារណានៅជំពូកទាំងពីរនោះ ជាការល្អឲ្យយើងគិតអំពីស្ត្រីពេស្យាមួយដែលជានិមិត្តរូប។ ស្ត្រីពេស្យានេះបានប្រព្រឹត្តអំពើពេស្យាចារតាំងពីយូរមុនសម័យអេសេគាល ថែមទាំងមុនប្រជាជាតិអ៊ីស្រាអែលកើតឡើងទៅទៀត។ រហូតមកដល់សព្វថ្ងៃ ក៏នៅតែមានអំពើពេស្យាចារនេះដែរ។ សៀវភៅការបើកបង្ហាញដែលជាសៀវភៅចុងក្រោយក្នុងគម្ពីរប្រាប់អំពីអត្តសញ្ញាណរបស់ស្ត្រីពេស្យានេះ។
«ម្ដាយនៃស្រីពេស្យាទាំងឡាយ»
៤, ៥. តើ«បាប៊ីឡូនដ៏ខ្លាំងក្លា»ជាអ្វី? ហើយហេតុអ្វីយើងសន្និដ្ឋានដូច្នេះ? (សូមមើលរូបភាពនៅដើមអត្ថបទ)
៤ នៅចុងសតវត្សរ៍ទី១ ក្នុងការបើកបង្ហាញដែលលោកយេស៊ូផ្ដល់ឲ្យសាវ័កយ៉ូហាន មានបុគ្គលដែលគួរឲ្យកត់សម្គាល់មួយរូប។ នាងបានត្រូវហៅថា៖ «មេស្ត្រីពេស្យា»និង«បាប៊ីឡូនដ៏ខ្លាំងក្លា ដែលជាម្ដាយនៃស្រីពេស្យាទាំងឡាយ»។ (បប. ១៧:១, ៥) អស់ជាច្រើនសតវត្សរ៍ អត្តសញ្ញាណពិតរបស់នាងបានត្រូវលាក់កំបាំងពីពួកអ្នកដឹកនាំសាសនានិងបណ្ឌិតគម្ពីរ។ ពួកគេនិយាយខុសៗគ្នាថា នាងតំណាងឲ្យបាប៊ីឡូន រ៉ូម ឬវិហារកាតូលិក។ ប៉ុន្តែ អស់ជាច្រើនទសវត្សរ៍សាក្សីព្រះយេហូវ៉ាស្គាល់អត្តសញ្ញាណពិតរបស់«មេស្ត្រីពេស្យា»នេះ គឺនាងតំណាងឲ្យចក្រភពសាសនាមិនពិត។ ហេតុអ្វីក៏យើងសន្និដ្ឋានដូច្នេះ?
៥ ស្រីពេស្យានេះបានត្រូវវិនិច្ឆ័យទោស ដោយសារបានប្រព្រឹត្តអំពើពេស្យាចារជាមួយនឹង«ស្ដេចនានានៅផែនដី» ពោលគឺអំណាចខាងយោបាយ។ ដូច្នេះ នាងច្បាស់ជាមិនតំណាងឲ្យអំណាចខាងនយោបាយទេ។ បន្ថែមទៅទៀត សៀវភៅការបើកបង្ហាញបញ្ជាក់ថា«ពួកអ្នកជួញដូរនៅផែនដី»ឬប្រព័ន្ធពាណិជ្ជកម្មក្នុងពិភពលោក កើតទុក្ខដោយសារបាប៊ីឡូនដ៏ខ្លាំងក្លាបានត្រូវបំផ្លាញ។ ហេតុនេះ បាប៊ីឡូនដ៏ខ្លាំងក្លាមិនអាចតំណាងឲ្យប្រព័ន្ធពាណិជ្ជកម្មបានទេ។ ចុះនាងតំណាងអ្វី? ការប្រព្រឹត្តរបស់នាងជាប់ទាក់ទងនឹង«ពួកវិញ្ញាណអាក្រក់» គឺការគោរពបូជារូបព្រះនិងការបោកបញ្ឆោត។ អ្វីទាំងនេះច្បាស់ជាសំដៅទៅលើអង្គការសាសនានានាដ៏ខូចអាក្រក់ក្នុងពិភពលោកនេះ មែនទេ? សូមកត់សម្គាល់ដែរថា ស្រីពេស្យានេះបានត្រូវរៀបរាប់ថានាងអង្គុយលើឬមានឥទ្ធិពលមួយកម្រិតទៅលើប្រព័ន្ធនយោបាយនៅទូទាំងផែនដី។ នាងក៏បៀតបៀនអ្នកបម្រើស្មោះត្រង់របស់ព្រះយេហូវ៉ាផងដែរ។ (បប. ១៧:២, ៣; ១៨:១១, ២៣, ២៤) នេះហើយជាអ្វីដែលសាសនាមិនពិតបានធ្វើរហូតមកដល់សព្វថ្ងៃនេះ មែនទេ?
ប៉មបាបិលនៅសម័យបុរាណដែលក្រោយមកបានត្រូវហៅថាបាប៊ីឡូន ជាដើមកំណើតនៃលទ្ធិនិងទំនៀមទម្លាប់សាសនាមិនពិត ព្រមទាំងអង្គការសាសនាមិនពិតផងដែរ (សូមមើលវគ្គ៦)
៦. តើបាប៊ីឡូនដ៏ខ្លាំងក្លាជា«ម្ដាយនៃស្រីពេស្យាទាំងឡាយ»ក្នុងន័យអ្វី?
៦ បាប៊ីឡូនដ៏ខ្លាំងក្លាមិនគ្រាន់តែបានត្រូវហៅថា«មេស្ត្រីពេស្យា»ប៉ុណ្ណោះទេ តែក៏បានត្រូវហៅថា«ម្ដាយនៃស្រីពេស្យាទាំងឡាយ»ដែរ។ ហេតុអ្វី? សាសនាមិនពិតមានច្រើនរាប់មិនអស់។ បន្ថែមទៅទៀត សាសនាមិនពិតបានត្រូវបែងចែកជាក្រុមនិងនិកាយផ្សេងៗជាច្រើនឥតគណនា។ ចាប់តាំងពីគ្រាដែលភាសាបានត្រូវបំភាន់នៅប៉មបាបិលឬបាប៊ីឡូនសម័យបុរាណ លទ្ធិសាសនាមិនពិតសព្វបែបយ៉ាងបានរីករាលដាលទៅកន្លែងផ្សេងៗពេញផែនដី។ នេះបណ្ដាលឲ្យមានសាសនាខុសៗគ្នាជាច្រើនក្រៃលែង។ ដូច្នេះ ជាការត្រឹមត្រូវដែល«បាប៊ីឡូនដ៏ខ្លាំងក្លា» បានត្រូវដាក់ឈ្មោះតាមក្រុងបាប៊ីឡូនជាដើមកំណើតនៃសាសនាមិនពិតទាំងឡាយ! (ដក. ១១:១-៩) ហេតុនេះ សាសនាទាំងឡាយអាចត្រូវចាត់ទុកជា«កូនស្រីៗ»របស់អង្គការមួយឬមេស្ត្រីពេស្យា។ ជាញឹកញយ សាថានប្រើសាសនាដូចនោះដើម្បីទាក់ទាញមនុស្សឲ្យទាក់ទងនឹងពួកវិញ្ញាណកំណាច និងគោរពបូជារូបព្រះ ព្រមទាំងមានជំនឿនិងទំនៀមទម្លាប់ដែលមិនលើកកិត្តិយសព្រះ។ ហេតុនេះហើយរាស្ត្ររបស់ព្រះបានត្រូវព្រមានស្ដីអំពីអង្គការដ៏ខូចអាក្រក់នៅទូទាំងផែនដីនោះថា៖ «រាស្ដ្រខ្ញុំអើយ ចូរចេញពីក្រុងនោះមក ប្រសិនបើអ្នករាល់គ្នាមិនចង់មានចំណែកក្នុងអំពើខុសឆ្គងរបស់នាង»!—សូមអាន ការបើកបង្ហាញ ១៨:៤, ៥
៧. ហេតុអ្វីយើងត្រូវធ្វើតាមការព្រមានឲ្យ«ចេញ»ពីបាប៊ីឡូនដ៏ខ្លាំងក្លា?
៧ តើអ្នកបានធ្វើតាមការព្រមាននោះទេ? សូមចាំថា គឺជាព្រះយេហូវ៉ាផ្ទាល់ដែលបង្កើតមនុស្សជាតិឲ្យចេះ«ស្រេកឃ្លានចំពោះការណែនាំពីព្រះ»។ (ម៉ាថ. ៥:៣) មានវិធីតែមួយប៉ុណ្ណោះដែលមនុស្សអាចបំពេញការស្រេកឃ្លាននោះ គឺតាមរយៈការគោរពប្រណិប័តន៍ពិតដល់ព្រះយេហូវ៉ា។ តាមធម្មតា អ្នកបម្រើព្រះយេហូវ៉ាចង់នៅឲ្យឆ្ងាយបំផុតពីការគោរពប្រណិប័តន៍មិនពិត។ ប៉ុន្តែ មេកំណាចសាថានមានគោលដៅផ្ទុយពីនេះ គឺវាចូលចិត្តទាក់ទាញរាស្ត្ររបស់ព្រះឲ្យចូលអន្ទាក់នៃសាសនាមិនពិត ហើយជាញឹកញយវាបានជោគជ័យ។ រហូតមកដល់សម័យអេសេគាល រាស្ត្ររបស់ព្រះមានប្រវត្តិជាប់ទាក់ទងនឹងការគោរពប្រណិប័តន៍មិនពិតរួចទៅហើយ។ យើងគួរពិនិត្យមើលប្រវត្តិសាស្ត្រនោះ ព្រោះនោះអាចបង្រៀនយើងជាច្រើនអំពីខ្នាតតម្រា យុត្តិធម៌ និងសេចក្ដីមេត្តាករុណារបស់ព្រះយេហូវ៉ា។
«អ្នកក៏តាំងប្រព្រឹត្តអំពើពេស្យាចារ»
៨-១០. តើការគោរពប្រណិប័តន៍ពិតមានតម្រូវការដ៏សំខាន់អ្វីដែលជួយយើងឲ្យយល់អារម្មណ៍របស់ព្រះយេហូវ៉ាចំពោះការទាក់ទងនឹងសាសនាមិនពិត? សូមលើកឧទាហរណ៍។
៨ ក្នុងសៀវភៅអេសេគាល ព្រះយេហូវ៉ាបានប្រើឧទាហរណ៍អំពីស្រីពេស្យាដើម្បីបញ្ជាក់អារម្មណ៍របស់លោក។ អេសេគាលបានត្រូវដឹកនាំឲ្យកត់កំណត់ហេតុដ៏រស់រវើកពីរ ដែលរៀបរាប់អំពីការឈឺចាប់របស់ព្រះយេហូវ៉ា ដោយសាររាស្ត្ររបស់លោកបានក្បត់លោក ហើយប្រព្រឹត្តអំពើពេស្យាចារ។ ហេតុអ្វីលោកប្រៀបប្រដូចពួកគេទៅនឹងស្រីពេស្យា?
៩ ដើម្បីដឹងចម្លើយ ដំបូងយើងត្រូវរំលឹកអំពីតម្រូវការសំខាន់មួយនៃការគោរពប្រណិប័តន៍ពិត ដែលយើងបានពិចារណានៅជំពូកទី៥ក្នុងសៀវភៅនេះ។ ក្នុងក្រឹត្យវិន័យដែលព្រះយេហូវ៉ាបានឲ្យជនជាតិអ៊ីស្រាអែល លោកបានប្រាប់ថា៖ «អ្នករាល់គ្នាមិនត្រូវគោរពប្រណិប័តន៍ព្រះផ្សេងទៀតក្រៅពីខ្ញុំទេ។ . . . ខ្ញុំជាយេហូវ៉ាជាព្រះនៃអ្នករាល់គ្នា ខ្ញុំតម្រូវឲ្យមានភក្ដីភាពផ្ដាច់មុខ»។ (ដច. ២០:៣, ៥) ក្រោយមក លោកបានបញ្ជាក់ម្ដងទៀតថា៖ «អ្នករាល់គ្នាមិនត្រូវក្រាបគោរពព្រះណាទៀតឡើយ ព្រោះព្រះយេហូវ៉ាតម្រូវឲ្យគោរពប្រណិប័តន៍លោកតែមួយប៉ុណ្ណោះ។ អ្នកណាក៏ដឹងដែរថាលោកជាព្រះដែលតម្រូវឲ្យមានភក្ដីភាពផ្ដាច់មុខ»។ (ដច. ៣៤:១៤) ដូច្នេះ ព្រះយេហូវ៉ាបានបញ្ជាក់យ៉ាងច្បាស់អំពីរឿងនេះ។ យើងមិនអាចគោរពប្រណិប័តន៍ព្រះយេហូវ៉ាតាមរបៀបដែលលោកពេញចិត្តបានទេ លុះត្រាតែយើងគោរពប្រណិប័តន៍លោកផ្ដាច់មុខ។
១០ ជាឧទាហរណ៍ សូមស្រមៃគិតអំពីប្ដីប្រពន្ធមួយគូ។ ទាំងប្ដីទាំងប្រពន្ធមានសិទ្ធិតម្រូវឲ្យគូរបស់ខ្លួនស្មោះត្រង់ជានិច្ច។ បើប្ដីឬប្រពន្ធមានអារម្មណ៍ស្នេហាឬមានចំណង់ផ្លូវភេទជាមួយបុគ្គលផ្សេងទៀត នោះជាការត្រឹមត្រូវដែលគូរបស់ខ្លួនមានចិត្តប្រច័ណ្ឌនិងឈឺចាប់ជាខ្លាំង។ (សូមអាន ហេប្រឺ ១៣:៤) ស្រដៀងគ្នាដែរ ស្ដីអំពីការគោរពប្រណិប័តន៍ គឺជាការត្រឹមត្រូវដែលព្រះយេហូវ៉ាមានអារម្មណ៍ឈឺចិត្ត ពេលរាស្ត្រដែលប្រគល់ខ្លួនផ្ដាច់មុខជូនលោក បែរជាគោរពប្រណិប័តន៍ព្រះមិនពិតទៅវិញ។ លោកបញ្ជាក់អំពីអារម្មណ៍ឈឺចាប់ដែលមកពីការក្បត់នៅអេសេគាលជំពូកទី១៦។
១១. តើព្រះយេហូវ៉ារៀបរាប់យ៉ាងណាអំពីយេរូសាឡិមនិងដើមកំណើតរបស់នាង?
១១ ក្នុងសៀវភៅអេសេគាលទាំងមូល ព្រះយេហូវ៉ាមានប្រសាសន៍វែងជាងគេនៅជំពូកទី១៦ ហើយប្រសាសន៍នេះជាការប្រកាសទុកជាមុនដ៏វែងមួយក្នុងបទគម្ពីរភាសាហេប្រឺ។ ព្រះយេហូវ៉ាផ្ដោតទៅលើក្រុងយេរូសាឡិម ដែលតំណាងឲ្យពួកយូដាដែលមិនស្មោះត្រង់។ លោករៀបរាប់អំពីប្រវត្តិកម្សត់របស់នាង និងរឿងរ៉ាវដ៏គួរឲ្យតក់ស្លុតស្ដីអំពីការក្បត់របស់នាង។ ពេលនាងកើតមក នាងបានត្រូវគេបោះបង់ចោល ហើយគ្មានអ្នកណាមើលថែទេ។ ឪពុកម្ដាយនាងជាជនជាតិកាណានដែលរស់នៅក្នុងស្រុកនោះ ពួកគេគោរពបូជាព្រះមិនពិត (តាំងពីយូរមកហើយ ក្រុងយេរូសាឡិមបាននៅក្រោមការគ្រប់គ្រងរបស់កុលសម្ព័ន្ធយេប៊ូសដែលជាជនជាតិកាណាន តែក្រោយមកដាវីឌបានចាប់យកក្រុងនោះ)។ ពេលព្រះយេហូវ៉ាឃើញទារកនោះ លោកមានចិត្តអាណិតអាសូរជាខ្លាំង។ លោកក៏យកនាងមកសម្អាត ហើយចិញ្ចឹមបីបាច់ថែរក្សានាង។ ក្រោយមក ពេលនាងពេញវ័យ នាងក៏បានក្លាយទៅជាប្រពន្ធរបស់លោក។ តាមពិត ជនជាតិអ៊ីស្រាអែលដែលក្រោយមករស់នៅក្នុងក្រុងយេរូសាឡិម ពួកគេមានចំណងមិត្តភាពជាមួយនឹងព្រះយេហូវ៉ាតាំងពីពួកគេស្ម័គ្រចិត្តចុះកិច្ចព្រមព្រៀងជាមួយលោកនៅសម័យម៉ូសេ។ (ដច. ២៤:៧, ៨) ក្រោយពីក្រុងយេរូសាឡិមក្លាយជារាជធានី ព្រះយេហូវ៉ាបានឲ្យពរនាងមានភាពចម្រុងចម្រើន និងសោភ័ណភាពស្រស់ស្អាត ដូចជាប្ដីដែលមានស្ដុកស្ដម្ភនិងមានអំណាច ស្រឡាញ់ប្រពន្ធខ្លួន ហើយផ្ដល់គ្រឿងលម្អប្រណីតៗដល់នាង។—អេគ. ១៦:១-១៤
សាឡូម៉ូនបានទទួលឥទ្ធិពលពីប្រពន្ធជាច្រើនរបស់គាត់ដែលជាជនជាតិដទៃ ហើយបានបណ្ដាលឲ្យក្រុងយេរូសាឡិមពេញទៅដោយការគោរពបូជារូបព្រះ (សូមមើលវគ្គ១២)
១២. តើតាមរបៀបណាអ្នកក្រុងយេរូសាឡិមចាប់ផ្ដើមមិនស្មោះត្រង់?
១២ សូមកត់សម្គាល់អំពីអ្វីដែលបានកើតឡើងបន្ទាប់មក។ ព្រះយេហូវ៉ាមានប្រសាសន៍ថា៖ «ដោយអាងថាខ្លួនស្រស់ស្អាតនិងមានកេរ្តិ៍ឈ្មោះល្បីល្បាញ អ្នកក៏តាំងប្រព្រឹត្តអំពើពេស្យាចារ។ អ្នកបានប្រព្រឹត្តអំពើនោះដោយឥតអៀនខ្មាសជាមួយនឹងពួកអ្នកដែលដើរឆ្លងកាត់។ ទីបំផុត ភាពស្រស់ស្អាតរបស់អ្នកបានទៅជារបស់គេវិញ»។ (អេគ. ១៦:១៥) នៅគ្រាសាឡូម៉ូន ព្រះយេហូវ៉ាបានឲ្យពរនិងធ្វើឲ្យអ្នកក្រុងយេរូសាឡិម មានភាពចម្រុងចម្រើនខ្លាំងដល់ម្ល៉េះបានជាក្រុងនោះទៅជាក្រុងដ៏ល្បីល្បាញមួយ ហើយមានកេរ្តិ៍ឈ្មោះរន្ទឺសុសសាយនៅសម័យនោះ។ (១បស. ១០:២៣, ២៧) ប៉ុន្តែ បន្តិចម្ដងៗអ្នកក្រុងនោះលែងស្មោះត្រង់នឹងលោក។ ជាឧទាហរណ៍ សាឡូម៉ូនមានប្រពន្ធជាច្រើនជាជនជាតិដទៃ ហើយដោយសារគាត់ចង់បំពេញចិត្តប្រពន្ធទាំងនោះ គាត់បានធ្វើឲ្យក្រុងយេរូសាឡិមពេញទៅដោយការគោរពបូជារូបព្រះ។ (១បស. ១១:១-៨) ស្ដេចខ្លះបន្ទាប់ពីគាត់បានធ្វើអាក្រក់ជាងនោះទៅទៀត ដោយនាំឲ្យមានការគោរពប្រណិប័តន៍មិនពិតនៅពេញទូទាំងស្រុក។ តើព្រះយេហូវ៉ាមានអារម្មណ៍យ៉ាងណាចំពោះអំពើក្បត់និងអំពើពេស្យាចារដូចនោះ? លោកមានប្រសាសន៍ថា៖ «រឿងនោះមិនគួរមានឬកើតឡើងទាល់តែសោះ»។ (អេគ. ១៦:១៦) ប៉ុន្តែ រាស្ត្រមិនស្មោះត្រង់របស់លោកបានធ្លាក់កាន់តែជ្រៅទៅក្នុងអំពើស្មោកគ្រោកទាំងនោះ!
ជនជាតិអ៊ីស្រាអែលខ្លះដុតកូនរបស់ពួកគេជូនព្រះមិនពិត ដូចជាដល់ព្រះម៉ូឡេកជាដើម
១៣. តើរាស្ត្ររបស់ព្រះនៅក្រុងយេរូសាឡិមមានទោសចំពោះអំពើដ៏អាក្រក់អ្វី?
១៣ សូមស្រមៃថាព្រះយេហូវ៉ាឈឺចាប់និងខ្ពើមរអើមយ៉ាងណាពេលដែលលោកបកអាក្រាតអំពើទុច្ចរិតរបស់រាស្ត្រដែលលោកបានជ្រើសរើសថា៖ «អ្នកបានយកកូនប្រុសកូនស្រីដែលអ្នកបានបង្កើតឲ្យខ្ញុំ ទៅដុតជូនជាគ្រឿងបូជាដល់រូបព្រះទាំងនោះ។ អ្នកបានប្រព្រឹត្តអំពើពេស្យាចារប៉ុណ្ណឹងហើយ តើនៅមិនល្មមគ្រប់គ្រាន់ឬ? អ្នកបានសម្លាប់កូនប្រុសៗរបស់ខ្ញុំ ហើយដុតពួកគេជាគ្រឿងបូជា»។ (អេគ. ១៦:២០, ២១) អំពើអាក្រក់ជួជាតិដែលអ្នកក្រុងយេរូសាឡិមបានធ្វើ បញ្ជាក់ថាសាថានគឺអាក្រក់យ៉ាងណា។ សាថានសប្បាយចិត្តខ្លាំងណាស់ក្នុងការទាក់ទាញរាស្ត្ររបស់ព្រះយេហូវ៉ាឲ្យប្រព្រឹត្តអំពើដ៏អាក្រក់ដូចនោះ! ប៉ុន្តែ ព្រះយេហូវ៉ាមើលឃើញអ្វីៗទាំងអស់ លោកអាចធ្វើឲ្យស្ថានភាពដ៏សាហាវព្រៃផ្សៃដែលមកពីសាថានទៅជាស្ថានភាពល្អប្រសើរឡើងវិញ ហើយលោកនឹងវិនិច្ឆ័យដោយយុត្តិធម៌។—សូមអាន យ៉ូប ៣៤:២៤
១៤. ក្នុងឧទាហរណ៍របស់ព្រះយេហូវ៉ា តើអ្នកណាជាបងប្អូនស្រីពីរនាក់របស់យេរូសាឡិម? ហើយក្នុងចំណោមបីនាក់នោះ តើអ្នកណាអាក្រក់ជាងគេ?
១៤ ប៉ុន្តែ យេរូសាឡិមមិនស្អប់ខ្ពើមចំពោះការប្រព្រឹត្តដ៏ទុច្ចរិតរបស់ខ្លួនទេ ហើយនាងនៅតែបន្តប្រព្រឹត្តអំពើពេស្យាចារនោះតទៅទៀត។ ព្រះយេហូវ៉ាបានមានប្រសាសន៍ថា នាងប្រព្រឹត្តដោយឥតអៀនខ្មាសខ្លាំងជាងស្ត្រីពេស្យាឯទៀត ព្រោះនាងបង់ប្រាក់ឲ្យគេមកប្រព្រឹត្តអំពើប្រាសចាកសីលធម៌ខាងផ្លូវភេទជាមួយនាង! (អេគ. ១៦:៣៤) ព្រះបានប្រាប់ថាយេរូសាឡិមបានប្រព្រឹត្តដូច«ម្ដាយ»នាង ជាកុលសម្ព័ន្ធដែលគោរពបូជាព្រះមិនពិតនិងដែលធ្លាប់កាន់កាប់ទឹកដីនោះ។ (អេគ. ១៦:៤៤, ៤៥) ក្នុងឧទាហរណ៍ដដែលនោះ ព្រះបានបញ្ជាក់ថាបងស្រីរបស់យេរូសាឡិមគឺសាម៉ារី ដែលបានគោរពបូជាព្រះមិនពិតមុននាងទៅទៀត។ បន្ថែមទៅទៀត ព្រះបានរៀបរាប់ថាយេរូសាឡិមមានប្អូនស្រី គឺសូដុម។ ឈ្មោះសូដុមរំលឹកមនុស្សទាំងអស់ថា ក្រុងនេះនៅសម័យបុរាណបានត្រូវបំផ្លាញ ដោយសារការមានអំណួតនិងអំពើដ៏អាក្រក់ជួជាតិរបស់ក្រុងនេះ។ ព្រះយេហូវ៉ាបានបញ្ជាក់ថា យេរូសាឡិមបានប្រព្រឹត្តអាក្រក់ជាងបងប្អូនស្រីរបស់នាង គឺសាម៉ារីនិងសូដុមទៅទៀត! (អេគ. ១៦:៤៦-៥០) រាស្ត្ររបស់ព្រះមិនអើពើនឹងការព្រមានច្រើនរាប់មិនអស់ពីលោក ហើយបន្តដើរតាមគន្លងជីវិតដ៏គួរឲ្យស្អប់ខ្ពើម។
១៥. តើព្រះយេហូវ៉ាវិនិច្ឆ័យទោសយេរូសាឡិមក្នុងគោលបំណងអ្វី? ហើយនេះផ្ដល់សេចក្ដីសង្ឃឹមអ្វី?
១៥ តើព្រះយេហូវ៉ានឹងធ្វើអ្វី? ព្រះយេហូវ៉ាប្រាប់យេរូសាឡិមថា៖ «ខ្ញុំនឹងប្រមូលគូស្នេហ៍ទាំងអស់ដែលអ្នកធ្លាប់រួមដំណេកជាមួយ» ហើយ«ខ្ញុំនឹងប្រគល់អ្នកទៅក្នុងកណ្ដាប់ដៃគូស្នេហ៍របស់អ្នក»។ អតីតសម្ព័ន្ធមិត្តរបស់រាស្ត្រលោកដែលគោរពបូជាព្រះមិនពិត នឹងបំផ្លាញយេរូសាឡិម គឺបំផ្លាញសម្រស់របស់នាងនិងដកហូតទ្រព្យសម្បត្តិពីនាង។ ព្រះមានប្រសាសន៍ថា៖ «ពួកគេនឹងគប់ដុំថ្មទៅលើអ្នក រួចនឹងសម្លាប់អ្នកដោយដាវ»។ តើព្រះយេហូវ៉ាធ្វើការវិនិច្ឆ័យនេះក្នុងបំណងអ្វី? ការវិនិច្ឆ័យនេះមិនមែនក្នុងបំណងបំផ្លាញរាស្ត្រលោកឲ្យសាបសូន្យទេ។ ផ្ទុយទៅវិញ ព្រះប្រាប់អំពីបំណងរបស់លោកថា៖ «ខ្ញុំនឹងបញ្ឈប់អំពើពេស្យាចាររបស់អ្នក»។ ព្រះមានប្រសាសន៍បន្ថែមថា៖ «ខ្ញុំនឹងអន់ខឹងនឹងអ្នក ហើយកំហឹងរបស់ខ្ញុំនឹងរសាយទៅ ហើយខ្ញុំនឹងស្ងប់ចិត្តលែងខឹងនឹងអ្នកទៀត»។ ដូចយើងបានរៀននៅជំពូកទី៩ គោលបំណងរបស់ព្រះយេហូវ៉ាសម្រាប់ថ្ងៃអនាគត គឺសង្គ្រោះរាស្ត្ររបស់លោកឲ្យរួចពីការជាប់ជាឈ្លើយ ហើយនាំពួកគេត្រឡប់មកស្រុកកំណើតវិញ។ ហេតុអ្វី? លោកមានប្រសាសន៍ថា៖ «រូបខ្ញុំផ្ទាល់នឹងចងចាំនូវកិច្ចព្រមព្រៀងដែលខ្ញុំបានធ្វើជាមួយនឹងអ្នកនៅគ្រាដែលអ្នកនៅក្មេង»។ (អេគ. ១៦:៣៧-៤២, ៦០) ខុសពីរាស្ត្ររបស់លោក ព្រះយេហូវ៉ានឹងបង្ហាញភក្ដីភាពយ៉ាងល្អឥតខ្ចោះ!—សូមអាន ការបើកបង្ហាញ ១៥:៤
១៦, ១៧. (ក) ហេតុអ្វីយើងលែងនិយាយថាអូហូឡានិងអូហូលីបាតំណាងឲ្យពិភពគ្រិស្តសាសនាទៀត? (សូមមើលប្រអប់«ស្ត្រីពេស្យាពីរនាក់បងប្អូន») (ខ) តើយើងអាចទាញមេរៀនអ្វីខ្លះពីអេសេគាលជំពូកទី១៦និង២៣?
១៦ ប្រសាសន៍ចំៗនិងដ៏វែងរបស់ព្រះយេហូវ៉ាដែលបានត្រូវកត់ទុកនៅអេសេគាលជំពូកទី១៦ បង្រៀនយើងយ៉ាងច្រើនអំពីខ្នាតតម្រាសុចរិត យុត្តិធម៌ និងសេចក្ដីមេត្តាករុណាដ៏លើសលប់របស់លោក។ ប្រសាសន៍របស់លោកនៅអេសេគាលជំពូកទី២៣ ក៏បង្រៀនចំណុចដូចគ្នាដែរ។ គ្រិស្តសាសនិកពិតនៅសម័យនេះចាំមិនភ្លេចនូវប្រសាសន៍ត្រង់ៗរបស់ព្រះយេហូវ៉ា អំពីអំពើពេស្យាចាររបស់រាស្ត្រលោក។ យើងពិតជាមិនចង់ធ្វើឲ្យព្រះយេហូវ៉ាឈឺចិត្តដូចពួកយូដានិងអ្នកក្រុងយេរូសាឡិមដែលបានធ្វើឲ្យលោកឈឺចិត្តនោះទេ! ដូច្នេះ យើងចង់ជៀសឲ្យឆ្ងាយពីការគោរពបូជារូបព្រះគ្រប់បែបយ៉ាង។ ការគោរពបូជារូបព្រះក៏រួមបញ្ចូលចិត្តលោភលន់និងការស្រឡាញ់ទ្រព្យសម្បត្តិផងដែរ។ (ម៉ាថ. ៦:២៤; កូឡ. ៣:៥) យើងបន្តដឹងគុណព្រះយេហូវ៉ាដែលបានបង្ហាញសេចក្ដីមេត្តាករុណា ហើយរៀបចំការគោរពប្រណិប័តន៍ពិតឡើងវិញនៅគ្រាចុងក្រោយបង្អស់នេះ។ បន្ថែមទៅទៀត យើងដឹងគុណលោក ព្រោះលោកនឹងមិនអនុញ្ញាតឲ្យការគោរពប្រណិប័តន៍ពិតទៅជាស្មោកគ្រោកម្ដងទៀតឡើយ! លោកបានធ្វើ«កិច្ចព្រមព្រៀងដ៏ស្ថិតស្ថេរ»ជាមួយនឹងអ៊ីស្រាអែលនៃព្រះ ជាកិច្ចព្រមព្រៀងដែលមិនត្រូវលុបចោល ដោយការប្រព្រឹត្តមិនស្មោះត្រង់ឬអំពើពេស្យាចារឡើយ។ (អេគ. ១៦:៦០) ហេតុនេះ សូមយើងឲ្យតម្លៃចំពោះឯកសិទ្ធិដែលយើងមាន ក្នុងការរួមចំណែកជាមួយនឹងរាស្ត្រដ៏ស្អាតស្អំរបស់ព្រះយេហូវ៉ានៅសព្វថ្ងៃនេះ។
១៧ តើប្រសាសន៍ព្រះយេហូវ៉ាប្រឆាំងនឹងស្ត្រីពេស្យាដែលបានរៀបរាប់នៅអេសេគាលបង្រៀនយើងអ្វីខ្លះអំពី«មេស្ត្រីពេស្យា»ដែលជាបាប៊ីឡូនដ៏ខ្លាំងក្លា? សូមឲ្យយើងពិចារណា។
‹គ្មានអ្នកណានឹងប្រទះឃើញនាងម្ដងទៀតទេ›
១៨, ១៩. តើស្ត្រីពេស្យាក្នុងសៀវភៅអេសេគាលនិងស្ត្រីពេស្យានៅក្នុងសៀវភៅការបើកបង្ហាញទទួលលទ្ធផលស្រដៀងគ្នាយ៉ាងណា?
១៨ ព្រះយេហូវ៉ាមិនប្រែប្រួលឡើយ។ (យ៉ា. ១:១៧) តាំងពីមានមេស្ត្រីពេស្យានោះមក អារម្មណ៍របស់ព្រះយេហូវ៉ាចំពោះសាសនាមិនពិតនៅតែដដែល។ ដូច្នេះ យើងមិនភ្ញាក់ផ្អើលទេ ពេលដឹងថាព្រះយេហូវ៉ាវិនិច្ឆ័យស្ត្រីពេស្យាដែលបានត្រូវរៀបរាប់ក្នុងសៀវភៅអេសេគាល ដូចដែលលោកវិនិច្ឆ័យ«មេស្ត្រីពេស្យា»ដែលបានត្រូវរៀបរាប់នៅក្នុងសៀវភៅការបើកបង្ហាញដែរ។
១៩ ជាឧទាហរណ៍ សូមកត់សម្គាល់ថាព្រះយេហូវ៉ាមិនបានវិនិច្ឆ័យស្ត្រីពេស្យាក្នុងទំនាយអេសេគាលដោយផ្ទាល់ទេ តែលោកប្រើប្រជាជាតិនានាដែលរាស្ត្រមិនស្មោះត្រង់របស់លោកបានប្រព្រឹត្តអំពើពេស្យាចារជាមួយ ឲ្យវិនិច្ឆ័យពួកគេវិញ។ ស្រដៀងគ្នាដែរ ចក្រភពសាសនាមិនពិតទូទាំងផែនដីបានត្រូវវិនិច្ឆ័យ ដោយសារការប្រព្រឹត្តអំពើពេស្យាចារជាមួយនឹង«ស្ដេចនានានៅផែនដី»។ ដូច្នេះ តើអ្នកណាវិនិច្ឆ័យទោសនាង? យើងបានរៀនថាស្ថាប័ននយោបាយ«នឹងស្អប់ស្ត្រីពេស្យានោះ ហើយនឹងបំផ្លាញនាង ព្រមទាំងធ្វើឲ្យនាងនៅអាក្រាត ក៏នឹងស៊ីសាច់នាង ហើយដុតនាងចោលក្នុងភ្លើង»។ ហេតុអ្វីរដ្ឋាភិបាលមនុស្សនឹងធ្វើអ្វីដែលហួសពីការនឹកស្មានដូច្នេះ? ព្រោះព្រះនឹងបណ្ដាល«ចិត្តពួកគេឲ្យធ្វើតាមគំនិតរបស់លោក»។—បប. ១៧:១-៣, ១៥-១៧
២០. តើអ្វីបង្ហាញថាការវិនិច្ឆ័យទៅលើបាប៊ីឡូនដ៏ខ្លាំងក្លានឹងធ្វើឡើងម្ដងជាការស្រេច?
២០ ដូច្នេះ ព្រះយេហូវ៉ានឹងប្រើប្រជាជាតិនានា ដើម្បីវិនិច្ឆ័យសាសនាមិនពិតទាំងអស់ រួមទាំងពិភពគ្រិស្តសាសនាផងដែរ។ ការវិនិច្ឆ័យនេះនឹងធ្វើឡើងម្ដងជាការស្រេច នឹងគ្មានការលើកលែងទោស នឹងគ្មានឱកាសទុកឲ្យនាងកែប្រែតទៅទៀតឡើយ។ សៀវភៅការបើកបង្ហាញបញ្ជាក់ថា៖ «គ្មានអ្នកណានឹងប្រទះឃើញ[បាប៊ីឡូន]ម្ដងទៀតទេ»។ (បប. ១៨:២១) ទេវតារបស់ព្រះនឹងអរសប្បាយចំពោះការបំផ្លាញនាង ដោយស្រែកឡើងថា៖ «ចូរសរសើរយ៉ា! ចូរឲ្យផ្សែងពីការដុតនាងហុយឡើងជារៀងរហូត»។ (បប. ១៩:៣) ការវិនិច្ឆ័យនេះនឹងត្រូវធ្វើឡើងម្ដងជាការស្រេច។ ដូច្នេះ នឹងលែងមានសាសនាមិនពិតលេចឡើងមកបង្ខូចការគោរពប្រណិប័តន៍ពិតទៀតហើយ។ ក្នុងន័យធៀប ផ្សែងដែលមកពីការវិនិច្ឆ័យនិងការបំផ្លាញបាប៊ីឡូនដ៏ខ្លាំងក្លា នឹងហុយឡើងជារៀងរហូត។
ប្រជាជាតិនានាដែលបាប៊ីឡូនដ៏ខ្លាំងក្លាបានល្បួងលួងលោមនិងមានឥទ្ធិពលមកលើជាយូរមកហើយ បន្តិចទៀតប្រជាជាតិទាំងនោះនឹងក្បត់នាង ហើយបំផ្លាញនាង (សូមមើលវគ្គ១៩, ២០)
២១. តើការបំផ្លាញសាសនាមិនពិតជាទីចាប់ផ្ដើមនៃគ្រាអ្វី? ហើយតើតាមរបៀបណាគ្រានោះនឹងដល់ទីបញ្ចប់?
២១ ពេលរដ្ឋាភិបាលនៃពិភពលោកនេះបំផ្លាញបាប៊ីឡូនដ៏ខ្លាំងក្លា ពួកគេនឹងកាត់ទោសស្របតាមការវិនិច្ឆ័យរបស់ព្រះ។ នោះជាព្រឹត្តិការណ៍ដ៏ធំសម្បើមក្នុងការសម្រេចគោលបំណងរបស់ព្រះយេហូវ៉ា។ នេះជាសញ្ញាសម្គាល់នៃទីចាប់ផ្ដើមគ្រាទុក្ខវេទនាជាខ្លាំង គឺជាគ្រាច្របូកច្របល់បំផុត។ (ម៉ាថ. ២៤:២១) នៅចុងបញ្ចប់នៃគ្រាទុក្ខវេទនាជាខ្លាំងនឹងមានសង្គ្រាមអាម៉ាគេដូន គឺជាសង្គ្រាមរបស់ព្រះយេហូវ៉ាទាស់នឹងរបៀបរបបពិភពលោកដ៏ទុច្ចរិតនេះ។ (បប. ១៦:១៤, ១៦) នៅជំពូកបន្តបន្ទាប់ នឹងរៀបរាប់ថែមទៀតពីសៀវភៅអេសេគាល ហើយជួយយើងឲ្យយល់ថាគ្រាទុក្ខវេទនាជាខ្លាំងនឹងមានស្ថានភាពយ៉ាងណា។ ប៉ុន្តែ តើមានមេរៀនអ្វីខ្លះពីសៀវភៅអេសេគាលជំពូកទី១៦និង២៣ ដែលយើងចង់ចាំទុក ហើយយកមកអនុវត្ត?
រដ្ឋាភិបាលរបស់ពិភពលោកនេះនឹងបំផ្លាញបាប៊ីឡូនដ៏ខ្លាំងក្លាស្របតាមការវិនិច្ឆ័យរបស់ព្រះ (សូមមើលវគ្គ២១)
២២, ២៣. តើការសិក្សាអំពីស្ត្រីពេស្យានៅក្នុងសៀវភៅអេសេគាលនិងសៀវភៅការបើកបង្ហាញ ប្រហែលជាមានឥទ្ធិពលយ៉ាងណាមកលើយើង កាលដែលយើងបំពេញកិច្ចបម្រើពិសិដ្ឋ?
២២ សាថានចូលចិត្តធ្វើឲ្យអស់អ្នកដែលគោរពប្រណិប័តន៍ពិតទៅជាខូចអាក្រក់។ គ្មានអ្វីធ្វើឲ្យវាសប្បាយជាងការមានឱកាសបង្វែរយើងចេញពីការគោរពប្រណិប័តន៍ពិត ហើយមានគន្លងជីវិតដូចស្ត្រីពេស្យាដែលបានត្រូវរៀបរាប់ក្នុងសៀវភៅអេសេគាលនោះទេ។ យើងត្រូវចាំថាព្រះយេហូវ៉ាតម្រូវឲ្យរាស្ត្រលោកបង្ហាញភក្ដីភាពចំពោះលោក និងគោរពប្រណិប័តន៍លោកតែមួយប៉ុណ្ណោះ។ (ជប. ២៥:១១) យើងត្រូវប្រយ័ត្ន ហើយជៀសឲ្យឆ្ងាយពីសាសនាមិនពិត ព្រមទាំងមិន«ប៉ះពាល់របស់របរ»ដែលព្រះចាត់ទុកថា«មិនស្អាតបរិសុទ្ធ»។ (អេ. ៥២:១១) បន្ថែមទៅទៀត យើងកាន់ជំហរអព្យាក្រឹតដោយមិនរួមចំណែក ក្នុងជម្លោះនិងការឈ្លោះប្រកែកខាងនយោបាយក្នុងពិភពលោកដ៏បាក់បែកគ្នានេះ។ (យ៉ូន. ១៥:១៩) យើងចាត់ទុកជាតិនិយមជាសាសនាមិនពិតមួយដែលសាថានលើកស្ទួយ។ ហេតុនេះ យើងមិនចង់មានចិត្តគំនិតជាតិនិយមទាល់តែសោះ។
២៣ សំខាន់បំផុត សូមឲ្យយើងចាំថាគឺជាឯកសិទ្ធិណាស់ ដែលយើងអាចគោរពប្រណិប័តន៍ព្រះយេហូវ៉ាក្នុងវិហារដ៏រុងរឿងនិងស្អាតបរិសុទ្ធរបស់លោក។ យើងពិតជាឲ្យតម្លៃការរៀបចំរបស់ព្រះយេហូវ៉ា។ ដូច្នេះ សូមឲ្យយើងតាំងចិត្តកាន់តែមុតមាំ ជៀសចេញពីអ្វីក៏ដោយដែលទាក់ទងនឹងសាសនាមិនពិត ព្រមទាំងជៀសចេញពីអំពើពេស្យាចាររបស់នាង!
