សំបុត្រពីគណៈអភិបាល
ជូនចំពោះបងប្អូនដែលស្រឡាញ់ព្រះយេហូវ៉ា:
នៅឆ្នាំ១៩៧១ បងប្អូនបានចូលរួមសន្និបាតតាមតំបន់ ដែលមានប្រធានថា«នាមរបស់ព្រះ» ពួកគាត់រំភើបចិត្តយ៉ាងខ្លាំងពេលទទួលបានសៀវភៅថ្មីៗ។ ពួកគាត់រៀបរាប់ពីសៀវភៅទាំងនោះថា«គឺហួសពីការនឹកស្មាន»។ ស្ដីអំពីសៀវភៅមួយ បងប្រុសម្នាក់បាននិយាយថា៖ «នេះគឺជាសៀភៅដ៏គួរឲ្យរំភើបចិត្តបំផុត ដែលរៀបរាប់អំពីព្រឹត្តិការណ៍នៅថ្ងៃខាងមុខ»។ តើគាត់ចង់សំដៅទៅលើសៀវភៅមួយណា? គឺជាសៀវភៅដែលមានចំណងជើងថាតើតាមរបៀបណា«គ្រប់ទាំងសាសន៍នឹងដឹងថាខ្ញុំជាយេហូវ៉ា»? ប៉ុន្តែ ហេតុអ្វីបានជាសៀវភៅនោះធ្វើឲ្យរំភើបចិត្ត? ពីព្រោះសៀវភៅនោះមានការពន្យល់ថ្មីបំផុតអំពីទំនាយផ្សេងៗក្នុងសៀវភៅអេសេគាល ពោលគឺទំនាយដែលទាក់ទងនឹងអនាគតរបស់មនុស្សជាតិទាំងអស់។
ជាច្រើនឆ្នាំក្រោយពីចេញសៀវភៅ‹ដឹងថាយេហូវ៉ា› រាស្ត្ររបស់ព្រះបានកើនឡើងយ៉ាងឆាប់រហ័ស គឺចាប់ពីប្រមាណ១.៥០០.០០០នាក់ រហូតដល់ជាង៨.០០០.០០០នាក់។ (អេ. ៦០:២២) អ្នកបម្រើព្រះយេហូវ៉ារាប់លាននាក់ទាំងនេះ និយាយភាសាផ្សេងៗពីគ្នាជាង៩០០ភាសា។ (សាក. ៨:២៣) អ្នកបម្រើព្រះជាច្រើននាក់មិនដែលមានឱកាសសិក្សាសៀវភៅដែលពន្យល់យ៉ាងល្អិតល្អន់អំពីទំនាយអេសេគាល ដែលព្រះបានបណ្ដាលឲ្យកត់ទុកទេ។
បន្ថែមទៅទៀត អស់ច្រើនទសវត្សរ៍តាំងពីឆ្នាំ១៩៧១ យើងយល់ដឹងកាន់តែច្បាស់នូវសេចក្ដីពិតជាច្រើនក្នុងគម្ពីរ កាលដែលពន្លឺនៃសេចក្ដីពិតកាន់តែភ្លឺឡើងៗ។ (សុភ. ៤:១៨) នៅឆ្នាំ១៩៨៥ យើងចាប់ផ្ដើមឃើញច្បាស់អំពីរបៀបដែលចៀមឯទៀត បានត្រូវចាត់ទុកថាជាមនុស្សសុចរិតនិងជាសម្លាញ់របស់ព្រះ។ (យ៉ូន. ១០:១៦; រ៉ូម ៥:១៨; យ៉ា. ២:២៣) ក្រោយមកនៅឆ្នាំ១៩៩៥ ជាលើកទី១យើងបានយល់ថាការវិនិច្ឆ័យចុងក្រោយទៅលើ«ចៀម»និង«ពពែ» នឹងត្រូវធ្វើឡើងនៅអំឡុងគ្រា«ទុក្ខវេទនាជាខ្លាំង»នាពេលខាងមុខ។ (ម៉ាថ. ២៤:២១; ២៥:៣១, ៣២) ការយល់ដឹងថ្មីនេះ ក៏បានជួយយើងឲ្យកែតម្រូវការយល់ដឹងរបស់យើងក្នុងសៀវភៅអេសេគាលដែរ។
«កូនមនុស្សអើយ! ចូរមើលឲ្យហ្មត់ចត់ ហើយផ្ទៀងស្ដាប់ ព្រមទាំងយកចិត្តទុកដាក់ចំពោះអ្វីដែលខ្ញុំបង្ហាញអ្នក ព្រោះនេះជាមូលហេតុដែលអ្នកបានត្រូវនាំមកទីនេះ»។—អេសេគាល ៤០:៤
ថ្មីៗនេះ ពន្លឺនៃសេចក្ដីពិតបន្តភ្លឺឡើងៗ។ សូមពិចារណាមេរៀនពីឧទាហរណ៍របស់លោកយេស៊ូ។ ឥឡូវយើងយល់កាន់តែច្បាស់អំពីមេរៀនជាច្រើនទាំងនោះ ហើយមេរៀននោះបានដក់ជាប់ក្នុងចិត្តនិងគំនិតរបស់យើង។ ឧទាហរណ៍មួយចំនួនរបស់លោកយេស៊ូ សំដៅទៅលើព្រឹត្តិការណ៍ដែលនឹងកើតឡើងក្នុងអំឡុងគ្រាទុក្ខវេទនាជាខ្លាំង ដែលនឹងមកដល់នាពេលឆាប់ៗខាងមុខនេះ។ ស្រដៀងគ្នាដែរ ការយល់ដឹងអំពីទំនាយមួយចំនួនក្នុងសៀវភៅអេសេគាលបានត្រូវកែតម្រូវ។ ក្នុងចំណោមនោះមានទំនាយអំពីកូកនៃស្រុកម៉ាកូក (ជំពូកទី៣៨និង៣៩) កិច្ចការរបស់បុរសដែលមានប្រដាប់ប្រដាសរសេររបស់លេខាធិការ (ជំពូកទី៩) និងជ្រលងដែលពេញទៅដោយឆ្អឹងស្ងួត ព្រមទាំងការភ្ជាប់ឈើពីរចូលគ្នា (ជំពូកទី៣៧)។ ការកែតម្រូវទាំងនេះ នាំឲ្យយើងកែជាថ្មីនូវអ្វីដែលបានត្រូវសរសេរជាច្រើនឆ្នាំមុនក្នុងសៀវភៅ‹ដឹងថាយេហូវ៉ា›។
ហេតុនេះ អ្នកបម្រើជាច្រើនរបស់ព្រះយេហូវ៉ាសួរថា«តើពេលណាយើងនឹងទទួលសៀវភៅដែលមានការពន្យល់ថ្មីអំពីទំនាយក្នុងសៀវភៅអេសេគាល?»។ ចម្លើយចំពោះសំណួរនេះគឺសៀវភៅការគោរពប្រណិប័តន៍ពិតដល់ព្រះយេហូវ៉ាបានត្រូវរៀបចំឡើងវិញហើយ! កាលដែលអ្នកអានពីជំពូកទី១ដល់ជំពូកទី២២ និងរំពឹងគិតអំពីរូបភាពស្អាតៗនៅក្នុងសៀវភៅនេះ អ្នកនឹងកោតស្ងើចចំពោះការស្រាវជ្រាវយ៉ាងយកចិត្តទុកដាក់ដើម្បីរៀបចំសៀវភៅនេះឡើង។ យើងបានអធិដ្ឋាននិងរំពឹងគិតយ៉ាងច្រើន ដើម្បីស្វែងយល់មូលហេតុដែលព្រះយេហូវ៉ាផ្ដល់សៀវភៅអេសេគាលដ៏គួរឲ្យរំភើបចិត្តនេះ។ យើងពិចារណាយ៉ាងយកចិត្តទុកដាក់នូវសំណួរដូចតទៅ៖ តើសៀវភៅអេសេគាលផ្ដល់មេរៀនអ្វីខ្លះដល់អ្នកដែលរស់នៅសម័យអេសេគាល និងដល់យើងនៅសព្វថ្ងៃនេះ? តើទំនាយមួយណារៀបរាប់អំពីព្រឹត្តិការណ៍ដែលនឹងកើតឡើងនៅថ្ងៃអនាគត? តើយើងគួរស្វែងរកនិមិត្តរូបនិងអ្វីដែលពិតប្រាកដក្នុងទំនាយអេសេគាលដែរឬទេ? ចម្លើយនៃសំណួរទាំងនេះផ្ដល់ការយល់ដឹងយ៉ាងច្បាស់ថែមទៀតក្នុងសៀវភៅអេសេគាលដែលយើងទាំងអស់គ្នាចូលចិត្តអាន។
កាលដែលអ្នកអានសៀវភៅអេសេគាលពីដើមដល់ចប់ អ្នកច្បាស់ជាកោតស្ងើចយ៉ាងខ្លាំងចំពោះអង្គការព្រះយេហូវ៉ាផ្នែកនៅស្ថានសួគ៌។ អ្នកក៏នឹងនឹកអស្ចារ្យក្នុងចិត្តចំពោះខ្នាតតម្រាដ៏ខ្ពង់ខ្ពស់របស់ព្រះយេហូវ៉ា ដែលលោកតម្រូវពីបុគ្គលវិញ្ញាណនៅស្ថានសួគ៌និងមនុស្សនៅផែនដីដែលចង់គោរពប្រណិប័តន៍លោកតាមរបៀបដែលលោកពេញចិត្ត។ សៀវភៅការគោរពប្រណិប័តន៍ពិត នឹងជួយអ្នកឲ្យកាន់តែមានអំណរគុណថែមទៀតចំពោះអ្វីដែលព្រះយេហូវ៉ាបានធ្វើសម្រាប់រាស្ត្រលោក និងអ្វីដែលលោកនឹងធ្វើនៅថ្ងៃអនាគតឆាប់ៗខាងមុខនេះ។ អ្នកនឹងកត់សម្គាល់ឃើញថាសៀវភៅនេះលើកបញ្ជាក់គោលចំណុចពីរម្ដងហើយម្ដងទៀត។ ទី១ ដើម្បីធ្វើឲ្យព្រះយេហូវ៉ាពេញចិត្តយើងត្រូវស្គាល់លោក ហើយទទួលស្គាល់ថាលោកជាមហាក្សត្រសកលលោកទាំងមូល។ ទី២ យើងត្រូវគោរពប្រណិប័តន៍ព្រះយេហូវ៉ាតាមរបៀបដែលលោកពេញចិត្ត ហើយមានរបៀបរស់នៅស្របតាមខ្នាតតម្រាដ៏ខ្ពង់ខ្ពស់របស់លោក។
យើងសង្ឃឹមយ៉ាងអស់ពីចិត្តថាសៀវភៅនេះនឹងជួយអ្នកឲ្យតាំងចិត្តយ៉ាងខ្លាំង ដើម្បីគោរពប្រណិប័តន៍ព្រះយេហូវ៉ាតាមរបៀបដែលលើកកិត្តិយសដល់នាមដ៏ឧត្តុង្គឧត្តមនិងបរិសុទ្ធរបស់លោក។ នៅដំណាលគ្នានោះ សូមឲ្យសៀវភៅនេះលើកទឹកចិត្តអ្នកបន្តរង់ចាំគ្រាដែលប្រជាជាតិទាំងអស់នឹងដឹងច្បាស់ថាគឺលោកហើយជាយេហូវ៉ា។—អេគ. ៣៦:២៣; ៣៨:២៣
សូមឲ្យព្រះយេហូវ៉ាជាបិតាដែលប្រកបដោយសេចក្ដីស្រឡាញ់ ឲ្យពរអ្នកយ៉ាងបរិបូរ កាលដែលអ្នកខំស្វែងយល់អំពីសៀវភៅដែលលោកដឹកនាំអេសេគាលជាអ្នកប្រកាសទំនាយឲ្យសរសេរ។
ពីបងប្អូនរបស់អ្នក
Governing Body of Jehovah’s Witnesses
(គណៈអភិបាលនៃសាក្សីព្រះយេហូវ៉ា)
