របៀបរស់នៅជាគ្រិស្ដសាសនិក
ចូរទៅរកជានឹងបងប្អូនអ្នកសិន តើតាមរបៀបណា?
សូមស្រមៃគិតថាអ្នកកំពុងរស់នៅស្រុកកាលីឡេនៅសម័យលោកយេស៊ូ។ អ្នកបានធ្វើដំណើរទៅក្រុងយេរូសាឡិមដើម្បីធ្វើបុណ្យខ្ទម។ ក្រុងនោះពោរពេញដោយអ្នកគោរពប្រណិប័តន៍ព្រះ ដែលមកពីកន្លែងឆ្ងាយៗ។ អ្នកចង់ជូនគ្រឿងបូជាដល់ព្រះយេហូវ៉ា។ ដូច្នេះ អ្នកខំដឹកពពែដើរចូលក្នុងចំណោមមនុស្សដ៏ច្រើនកុះករតាមផ្លូវតូចៗក្នុងក្រុងដើម្បីទៅវិហារ។ ពេលអ្នកទៅដល់ អ្នកឃើញថាក៏មានអ្នកឯទៀតជាច្រើនដែលចង់ជូនគ្រឿងបូជាដែរ។ ទីបំផុត គឺដល់វេនអ្នកដើម្បីជូនពពែរបស់អ្នកទៅពួកសង្ឃ។ ពេលនោះអ្នកស្រាប់តែនឹកឃើញថាអ្នកមានបញ្ហាជាមួយបងប្អូនម្នាក់ គាត់ប្រហែលជានៅក្នុងចំណោមមនុស្សច្រើនកុះករក្នុងក្រុងនេះដែរ។ លោកយេស៊ូពន្យល់អំពីអ្វីដែលអ្នកគួរធ្វើ។ (សូមអាន ម៉ាថាយ ៥:២៤) តើតាមរបៀបណាអ្នកនិងបងប្អូនដែលអ្នកមានបញ្ហាជាមួយ អាចមានសន្ដិភាពដូចលោកយេស៊ូបានណែនាំ? នៅបញ្ជីនីមួយៗខាងក្រោមនេះ សូមគូសសញ្ញាធីកនៅក្បែរចម្លើយដែលត្រឹមត្រូវ។
អ្នកគួរតែ . . .
-
និយាយជាមួយបងប្អូននោះលុះត្រាតែអ្នកគិតថាគាត់មានមូលហេតុត្រឹមត្រូវដែលឈឺចិត្ដ
-
ព្យាយាមកែតម្រង់របៀបគិតគូររបស់បងប្អូននោះ បើអ្នកយល់ថាគាត់ឆាប់ទើសចិត្ដពេក ឬចង់ឲ្យទទួលកំហុសដូចគ្នា
-
ស្តាប់ដោយចិត្ដអត់ធ្មត់ ពេលបងប្អូនប្រាប់អំពីអារម្មណ៍របស់គាត់ ហើយទោះជាអ្នកមិនយល់ទាំងស្រុងក្ដី សូមនិយាយសុំទោសដោយស្មោះចំពោះអារម្មណ៍ឈឺចិត្ដដែលគាត់មាន ឬចំពោះផលវិបាកដែលមិនបានរំពឹងទុកដោយសារអ្នកបានប្រព្រឹត្ដដូច្នេះ
បងប្អូននោះគួរតែ . . .
-
ស្វែងរកការគាំទ្រពីបងប្អូនឯទៀតក្នុងក្រុមជំនុំដោយប្រាប់ពួកគេថាអ្នកបានធ្វើខុសយ៉ាងណាចំពោះគាត់
-
ស្រែកគំហកដាក់អ្នក ខំនិយាយរកកំហុសអ្នក ហើយតម្រូវឲ្យអ្នកទទួលស្គាល់កំហុស
-
ទទួលស្គាល់ថាអ្នកច្បាស់ជាបង្ហាញចិត្ដរាបទាបនិងចិត្ដក្លាហានពេលអ្នកមកជួបគាត់ ហើយអភ័យទោសឲ្យអ្នកដោយអស់ពីចិត្ដ
ទោះជាការគោរពប្រណិប័តន៍របស់យើងសព្វថ្ងៃនេះមិនរួមបញ្ចូលការជូនសត្វជាគ្រឿងបូជាក្ដី តែតើលោកយេស៊ូចង់បង្រៀនយ៉ាងណាអំពីទំនាក់ទំនងរវាងការមានសន្ដិភាពជាមួយនឹងបងប្អូននិងការដែលព្រះព្រមទទួលការគោរពប្រណិប័តន៍?
