របៀបរស់នៅជាគ្រិស្តសាសនិក
តើអ្នកកំពុងរៀបចំសម្រាប់ពិធីរំលឹកឬទេ?
បុណ្យរំលងជាលើកចុងក្រោយរបស់លោកយេស៊ូគឺពិតជាសំខាន់ណាស់។ ដោយសារការស្លាប់របស់លោកនឹងកើតឡើងក្នុងពេលឆាប់ៗ លោកបានរៀបចំពិសាអាហារបុណ្យរំលងជាមួយនឹងសាវ័ករបស់លោក ហើយចាប់ផ្ដើមពិធីប្រចាំឆ្នាំថ្មីមួយដែលបានត្រូវហៅថាពិធីអាហារល្ងាចរបស់លោកម្ចាស់។ ដូច្នេះ លោកបានចាត់ពេត្រុសនិងយ៉ូហានឲ្យទៅរៀបចំបន្ទប់។ (លូក. ២២:៧-១៣; សូមមើលរូបភាពនៅក្រប។) នេះរំលឹកយើងថាយើងក៏ត្រូវតែរៀបចំសម្រាប់ពិធីរំលឹកនៅថ្ងៃទី២៧ ខែមីនាដែរ។ ក្រុមជំនុំនីមួយៗទំនងជាបានរៀបចំអ្នកថ្លែងសុន្ទរកថា វត្ថុតំណាងនិងអ្វីផ្សេងៗទៀតរួចទៅហើយ។ ទោះជាយ៉ាងនេះក៏ដោយ តើយើងម្នាក់ៗអាចធ្វើអ្វីដើម្បីត្រៀមខ្លួនសម្រាប់ពិធីរំលឹក?
បង្កើនចិត្តកតញ្ញូចំពោះថ្លៃលោះរបស់លោកយេស៊ូ។ ចូរអានអំណានគម្ពីរសម្រាប់ពិធីរំលឹកហើយរំពឹងគិត។ កាលវិភាគអំណានគម្ពីរសម្រាប់ពិធីរំលឹកគឺមាននៅក្នុងការពិនិត្យមើលបទគម្ពីរប្រចាំថ្ងៃ។ សៀវភៅស្ដើងជំនួយសិក្សាបណ្ដាំរបស់ព្រះ ជំពូក១៦ផ្នែកកនិងខ ក៏មានកាលវិភាគល្អិតល្អន់ថែមទៀត។ (សូមពិនិត្យមើលកិច្ចបម្រើនិងជីវិត កំណត់សម្រាប់កិច្ចប្រជុំ ខែមេសា ឆ្នាំ២០២០។) ក្រុមគ្រួសារក៏អាចរកព័ត៌មានបន្ថែមអំពីសារៈសំខាន់នៃថ្លៃលោះ ដើម្បីយកមកពិចារណាក្នុងអំឡុងការគោរពប្រណិប័តន៍ជាក្រុមគ្រួសារ ដោយពិនិត្យមើលជំនួយស្រាវជ្រាវសម្រាប់សាក្សីព្រះយេហូវ៉ា។
អញ្ជើញអ្នកឯទៀតឲ្យចូលរួម។ ចូររួមចំណែកយ៉ាងពេញលេញក្នុងការចែកចាយលិខិតអញ្ជើញសម្រាប់ពិធីរំលឹក។ សូមគិតអំពីមនុស្សដែលអ្នកអាចអញ្ជើញដូចជាការត្រឡប់ទៅជួប អ្នកដែលធ្លាប់រៀនគម្ពីរ មនុស្សដែលអ្នកស្គាល់និងញាតិសន្ដាន។ អ្នកចាស់ទុំក៏ត្រូវតែអញ្ជើញបងប្អូនដែលអសកម្មដែរ។ សូមចាំថា បើបុគ្គលដែលអ្នកអញ្ជើញមិនរស់នៅក្នុងតំបន់របស់អ្នក អ្នកអាចរកទីកន្លែងនិងពេលវេលាដែលពិធីរំលឹកនឹងត្រូវធ្វើឡើងក្នុងតំបន់របស់គាត់ដោយចុច អំពីយើង ដែលនៅដើមទំព័រនៃjw.org ហើយចុច«ពិធីរំលឹក»។
តើយើងអាចធ្វើអ្វីទៀតដើម្បីរៀបចំ?
