JWបណ្ណាល័យគឺជាកម្មវិធីឥតគិតថ្លៃ។ ក្នុងកម្មវិធីនេះ អ្នកអាចថតចម្លងគម្ពីរ សៀវភៅផ្សេងៗ វីដេអូ និងឯកសារជាសំឡេង បញ្ចូលទៅក្នុងទូរស័ព្ទដៃ កុំព្យូទ័រ ឬកុំព្យូទ័របន្ទះស្ដើង។

ដើម្បីមានកម្មវិធីនេះ: សូមចូលអ៊ីនធឺណិត រួចថតចម្លងJWបណ្ណាល័យពីក្នុងapp storeណាមួយ។ កម្មវិធីJWបណ្ណាល័យអាចថតចម្លងទៅក្នុងគ្រឿងអេឡិចត្រូនិកប្រភេទផ្សេងៗ។ ពេលភ្ជាប់អ៊ីនធឺណិតហើយ សូមបើកកម្មវិធីនេះ រួចជ្រើសរើសអ្វីផ្សេងៗដែលអ្នកចង់ថតចម្លងចូលទៅក្នុងគ្រឿងអេឡិចត្រូនិករបស់អ្នក។ បើគ្មានអ៊ីនធឺណិតនៅផ្ទះ ប្រហែលអ្នកអាចទៅហាងណាមួយដែលមានWiFi។ បន្ទាប់ពីបានថតចម្លងសៀវភៅផ្សេងៗចូលទៅក្នុងគ្រឿងអេឡិចត្រូនិករបស់អ្នករួចហើយ អ្នកអាចបើកសៀវភៅទាំងនោះពេលណាក៏បាន ទោះជាមិនភ្ជាប់អ៊ីនធឺណិតក៏ដោយ។ ដោយសារកម្មវិធីJWបណ្ណាល័យតែងតែបន្ថែមលក្ខណៈពិសេសថ្មីៗ ជាការល្អឲ្យអ្នកចូលអ៊ីនធឺណិតជារឿយៗ ដើម្បីមានកម្មវិធីថ្មីបំផុត។

ហេតុអ្វីយើងគួរមានកម្មវិធីនេះ? កម្មវិធីJWបណ្ណាល័យជួយឲ្យយើងងាយស្រួលសិក្សាផ្ទាល់ខ្លួន និងផ្ទៀងតាមព័ត៌មានក្នុងកិច្ចប្រជុំ ហើយក៏មានប្រយោជន៍សម្រាប់កិច្ចបម្រើផ្សាយដែរ ជាពិសេសពេលផ្សព្វផ្សាយក្រៅផ្លូវការ។