របៀបរស់នៅជាគ្រិស្តសាសនិក
«ចូរចោលព្រះដទៃទាំងប៉ុន្មាន»
យ៉ាកុបដឹងថា ព្រះយេហូវ៉ាសមនឹងទទួលសិទ្ធិផ្ដាច់មុខក្នុងការគោរពប្រណិប័តន៍ ទោះជានៅពេលនោះ មិនទាន់មានច្បាប់ហាមមិនឲ្យគោរពបូជារូបព្រះក៏ដោយ។ (និក្ខ. ២០:៣-៥) ដូច្នេះ ក្រោយពីព្រះយេហូវ៉ាបានប្រាប់យ៉ាកុបឲ្យត្រឡប់ទៅក្រុងបេតអែលនោះ យ៉ាកុបបានប្រាប់អស់អ្នកដែលនៅជាមួយគាត់ឲ្យបំបាត់ចោលរូបព្រះណាក៏ដោយដែលពួកគេមាន។ រួចយ៉ាកុបបានបោះចោលរូបព្រះផ្សេងៗ មានទាំងក្រវិលដែលមនុស្សចាត់ទុកថាជាខ្សែកថាសម្រាប់ការពារខ្លួន។ (លោ. ៣៥:១-៤) យើងដឹងច្បាស់ថា ព្រះយេហូវ៉ាពិតជាពេញចិត្តចំពោះការប្រព្រឹត្តរបស់យ៉ាកុប។
នៅសព្វថ្ងៃនេះ តើយើងអាចឲ្យព្រះយេហូវ៉ានូវសិទ្ធិផ្ដាច់មុខក្នុងការគោរពប្រណិប័តន៍លោកយ៉ាងដូចម្ដេច? រឿងសំខាន់ដែលយើងត្រូវធ្វើនោះ គឺជៀសចេញពីអ្វីណាក៏ដោយដែលទាក់ទងនឹងរូបព្រះឬមន្តអាគម។ នេះរួមបញ្ចូលការបោះចោលនូវរបស់ណាដែលទាក់ទងនឹងមន្តអាគម ហើយយើងត្រូវពិនិត្យនិងជ្រើសរើសការកម្សាន្តដោយប្រុងប្រយ័ត្ន។ ជាឧទាហរណ៍ សូមសួរខ្លួនអ្នកថា: ‹តើខ្ញុំកំពុងមើលសៀវភៅឬភាពយន្តដែលទាក់ទងនឹងរឿងខ្មោចព្រាយបិសាចឬទេ? តើការកម្សាន្តរបស់ខ្ញុំទាក់ទងនឹងអំពើមន្តអាគមនិងវេទមន្តឬទេ?› យើងត្រូវជៀសចេញឲ្យឆ្ងាយពីអ្វីៗដែលព្រះយេហូវ៉ាស្អប់។—ទំនុក. ៩៧:១០
សូមទស្សនាវីដេអូឈុតសម្ដែង«ចូរតស៊ូនឹងមេកំណាច» ហើយក្រោយមកឆ្លើយសំណួរដូចតទៅនេះ៖
-
តើមានបញ្ហាអ្វីកើតឡើងនៅក្នុងជីវិតរបស់សិស្សគម្ពីរឈ្មោះផាលេសា?
-
ពេលមានបញ្ហាដែលទាក់ទងរឿងមន្តអាគម ហេតុអ្វីការរកជំនួយពីពួកអ្នកចាស់ទុំគឺជាការឈ្លាសវៃ?
-
បើយើងចង់ទទួលការការពារពីព្រះយេហូវ៉ា តើអ្វីដែលយើងត្រូវបំបាត់ចោល?
-
តើផាលេសាបានសម្រេចចិត្តធ្វើអ្វី?
-
ក្នុងតំបន់ដែលអ្នករស់នៅ តើមានវិធីអ្វីខ្លះដើម្បីជៀសវាងពីឥទ្ធិពលរបស់វិញ្ញាណកំណាច?