តើសាក្សីព្រះយេហូវ៉ាជាអ្នកបំបែកបំបាក់ក្រុមគ្រួសារឬជាអ្នកពង្រឹងក្រុមគ្រួសារ?
ជាសាក្សីព្រះយេហូវ៉ា យើងព្យាយាមធ្វើឲ្យក្រុមគ្រួសារមានសុភមង្គល មិនគ្រាន់តែក្រុមគ្រួសាររបស់យើងប៉ុណ្ណោះទេ តែក៏ព្យាយាមជួយក្រុមគ្រួសារឯទៀតដែរ។ យើងគោរពព្រះដែលជាអ្នកបង្កើតឲ្យមានក្រុមគ្រួសារ។ (លោកុប្បត្តិ ២:២១-២៤; អេភេសូរ ៣:១៤, ១៥) តាមរយៈគម្ពីរ លោកផ្ដល់នូវគោលការណ៍ផ្សេងៗដែលជួយក្រុមគ្រួសារទូទាំងពិភពលោកឲ្យមានសុភមង្គលនិងកាន់តែជិតស្និទ្ធនឹងគ្នា។
របៀបដែលសាក្សីព្រះយេហូវ៉ាធ្វើឲ្យក្រុមគ្រួសារកាន់តែជិតស្និទ្ធនឹងគ្នា
យើងព្យាយាមយ៉ាងខ្លាំងក្នុងការធ្វើតាមការណែនាំពីគម្ពីរ ដើម្បីជួយយើងឲ្យក្លាយទៅជាប្ដី ប្រពន្ធ និងឪពុកម្ដាយដ៏ល្អប្រសើរ។ (សុភាសិត ៣១:១០-៣១; អេភេសូរ ៥:២២–៦:៤; ធីម៉ូថេទី១ ៥:៨) ប្រាជ្ញាពីគម្ពីរអាចជួយក្រុមគ្រួសារឲ្យមានសុភមង្គលបាន ទោះជាពួកគេមានសាសនាខុសគ្នាក្ដី។ (ពេត្រុសទី១ ៣:១, ២) សូមពិចារណាពាក្យខ្លះៗពីអ្នកដែលមិនមែនជាសាក្សីព្រះយេហូវ៉ា ដែលមានគូក្លាយទៅជាសាក្សីព្រះយេហូវ៉ា៖
«ក្នុង៦ឆ្នាំដំបូងដែលយើងបានរៀបការជាមួយគ្នា យើងតែងតែឈ្លោះប្រកែក និងខកចិត្តចំពោះគ្នា។ ប៉ុន្តែ ក្រោយពេលដែលអ៊ីវេតក្លាយទៅជាសាក្សីព្រះយេហូវ៉ាម្នាក់ នោះធ្វើឲ្យនាងមានសេចក្ដីស្រឡាញ់ និងចិត្តអត់ធ្មត់ជាង។ ការផ្លាស់ប្ដូររបស់នាងបានជួយក្រុមគ្រួសាររបស់យើងឲ្យមានសុភមង្គល»។—ក្លូវអឺ ពីប្រទេសប្រេស៊ីល
«ខ្ញុំបានជំទាស់ពេលដែលប្ដីរបស់ខ្ញុំឆេនសាបានចាប់ផ្ដើមរៀនគម្ពីរជាមួយសាក្សីព្រះយេហូវ៉ា ដោយសារខ្ញុំគិតថាពួកគេនឹងធ្វើឲ្យក្រុមគ្រួសាររបស់យើងបែកបាក់គ្នា។ ប៉ុន្តែ ក្រោយមកខ្ញុំចាប់ផ្ដើមឃើញថា គម្ពីរពិតជាបានជួយក្រុមគ្រួសាររបស់យើងមែន»។—អេកនេស ពីប្រទេសសំប៊ី
នៅក្នុងកិច្ចបម្រើផ្សាយរបស់យើង យើងបង្ហាញអ្នកឯទៀតឲ្យឃើញរបៀបដែលការធ្វើតាមប្រាជ្ញាពីគម្ពីរអាចជួយពួកគេឲ្យ
តើការផ្លាស់ប្ដូរសាសនាអាចនាំឲ្យមានបញ្ហាក្នុងចំណងអាពាហ៍ពិពាហ៍ទេ?
មែនហើយ ពេលខ្លះនេះអាចកើតឡើងមែន។ ជាឧទាហរណ៍ នៅឆ្នាំ១៩៩៨ មានសេចក្ដីរាយការណ៍មួយរបស់ក្រុមហ៊ុនស្រាវជ្រាវសូហ្វ្រេសបានរកឃើញថា មួយគូក្នុងចំណោម២០គូមានបញ្ហាធ្ងន់ធ្ងរពេលគូរបស់ខ្លួនបានក្លាយទៅជាសាក្សី។
លោកយេស៊ូបានប្រាប់ទុកជាមុនថា អ្នកដែលធ្វើតាមការបង្រៀនរបស់លោក ជួនកាលនឹងត្រូវរងការបៀតបៀនពីក្រុមគ្រួសារ។ (ម៉ាថាយ ១០:៣២-៣៦) អ្នកប្រវត្ដិសាស្ត្រដ៏ល្បីម្នាក់ឈ្មោះវិល ដូរេន បានសរសេរថា ក្រោមអំណាចរបស់ចក្រភពរ៉ូម«គ្រិស្តសាសនាត្រូវបានគេចោទប្រកាន់ថា ជាអ្នកដែលនាំឲ្យក្រុមគ្រួសារបែកបាក់គ្នា» ហើយសាក្សីព្រះយេហូវ៉ាខ្លះនៅសព្វថ្ងៃនេះក៏បានរងការចោទប្រកាន់បែបនោះដែរ។ ប៉ុន្តែ តើនេះមានន័យថាសាក្សីព្រះយេហូវ៉ាជាអ្នកដែលនាំឲ្យមានការទាស់ទែងគ្នាក្នុងក្រុមគ្រួសារឬ?
តុលាការសិទ្ធិមនុស្សនៅទ្វីបអឺរ៉ុប
នៅពេលដែលមនុស្សចោទប្រកាន់សាក្សីព្រះយេហូវ៉ាដោយនិយាយថា ពួកគេគឺជាអ្នកដែលនាំឲ្យក្រុមគ្រួសារបែកបាក់គ្នា នោះតុលាការសិទ្ធិមនុស្សនៅទ្វីបអឺរ៉ុបបាននិយាយថា មូលហេតុដែលនាំឲ្យមានទំនាស់នោះគឺ«ដោយសារសមាជិកក្រុមគ្រួសារដែលមិនមែនជាសាក្សីព្រះយេហូវ៉ា បានជំទាស់មិនព្រមទទួលស្គាល់ និងគោរពតាមសេរីភាពរបស់សាច់ញាតិពួកគេក្នុងការជ្រើសរើសសាសនា»។ តុលាការនោះបានបន្ថែមថា៖«ស្ថានភាពនេះមិនគ្រាន់តែមានក្នុងអាពាហ៍ពិពាហ៍ដែលមានគូក្លាយជាសាក្សីព្រះយេហូវ៉ាប៉ុណ្ណោះទេ ប៉ុន្តែនេះក៏កើតឡើងចំពោះគូអាពាហ៍ពិពាហ៍ទាំងអស់ដែលមានសាសនាខុសគ្នាដែរ»។ ប៉ុន្តែ ទោះជាជួបប្រទះនឹងការប្រឆាំងក្ដី សាក្សីព្រះយេហូវ៉ាខំប្រឹងធ្វើតាមការណែនាំក្នុងគម្ពីរដែលចែងថា៖«កុំតបស្នងការអាក្រក់ដល់អ្នកណាដែលធ្វើអាក្រក់ចំពោះអ្នកឲ្យសោះ . . . ចូរខំអស់ពីសមត្ថភាពដើម្បីធ្វើឲ្យមានសន្តិភាពជាមួយនឹងមនុស្សទាំងអស់ ប្រសិនបើអាចធ្វើទៅបាន»។—រ៉ូម ១២:១៧, ១៨
មូលហេតុដែលសាក្សីព្រះយេហូវ៉ាជឿថាពួកគេគួររៀបការជាមួយនឹងអ្នកដែលមានជំនឿដូចគ្នាប៉ុណ្ណោះ
សាក្សីព្រះយេហូវ៉ាធ្វើតាមការណែនាំក្នុងគម្ពីរដែលឲ្យរៀបការជាមួយនឹង«អ្នកកាន់តាមលោកម្ចាស់»ប៉ុណ្ណោះ។ (កូរិនថូសទី១ ៧:៣៩) នេះមានន័យថាពួកគេអាចរៀបការជាមួយនឹងបុគ្គលណាដែលមានជំនឿដូចពួកគេ។ សេចក្ដីបង្គាប់នេះគឺមកពីគម្ពីរហើយមានប្រយោជន៍។ ជាឧទាហរណ៍ ក្នុងអត្ថបទមួយនៅឆ្នាំ២០១០អំពីអាពាហ៍ពិពាហ៍និងក្រុមគ្រួសារនិយាយថា៖«គូដែលមានសាសនា និងជំនឿដូចគ្នា»មានចំណងអាពាហ៍ពិពាហ៍រឹងមាំជាង (Journal of Marriage and Family)។
ប៉ុន្តែ សាក្សីព្រះយេហូវ៉ាមិនលើកទឹកចិត្តបងប្អូនរួមជំនឿដែលមានគូដែលមិនមែនជាអ្នកជឿឲ្យចាកចេញពីគូរបស់ខ្លួនទេ។ គម្ពីរចែងថា៖«ប្រសិនបើបងប្រុសណាម្នាក់មានប្រពន្ធដែលមិនមែនជាអ្នកជឿ ហើយនាងយល់ព្រមរួមរស់ជាមួយនឹងគាត់ បងប្រុសនោះមិនត្រូវចុះចោលនាងឡើយ ហើយស្ត្រីណាមានប្ដី ដែលមិនមែនជាអ្នកជឿ តែគាត់យល់ព្រមរួមរស់ជាមួយនឹងនាង នោះនាងមិនត្រូវចុះចោលប្ដីឡើយ»។ (កូរិនថូសទី១ ៧:១២, ១៣) សាក្សីព្រះយេហូវ៉ាធ្វើតាមបង្គាប់នេះ។
លោកអ្នកក៏ប្រហែលជាចូលចិត្តដែរ
អាពាហ៍ពិពាហ៍និងក្រុមគ្រួសារ
ដើម្បីមានសុភមង្គលក្នុងជីវិតអាពាហ៍ពិពាហ៍៖ សូមបង្ហាញសេចក្ដីស្រឡាញ់
សម្ពាធដែលយើងមានក្នុងជីវិតប្រចាំថ្ងៃ រួមទាំងការងារ និងការតានតឹងចិត្ត អាចធ្វើឲ្យគូប្ដីប្រពន្ធមិនសូវបង្ហាញសេចក្ដីស្រឡាញ់ចំពោះគ្នា។ តើអាចមានសេចក្ដីស្រឡាញ់ពិតចំពោះគ្នាឡើងវិញបានទេ?
