ហេតុអ្វីសាក្សីព្រះយេហូវ៉ាមិនធ្វើបុណ្យខួបកំណើត?
សាក្សីព្រះយេហូវ៉ាមិនធ្វើបុណ្យខួបកំណើត ដោយសារយើងជឿថាព្រះមិនពេញចិត្តនឹងបុណ្យនេះឡើយ។ ទោះជាគម្ពីរមិនបានចែងចំៗថាមិនត្រូវធ្វើបុណ្យខួបកំណើតក៏ដោយ តែគម្ពីរបានជួយយើងឲ្យចេះវែកញែកអំពីលក្ខណៈសំខាន់ៗនៃបុណ្យនេះ ហើយនេះជួយយើងឲ្យយល់អំពីទស្សនៈរបស់ព្រះ។ សូមពិចារណាលក្ខណៈបួនយ៉ាងនៃបុណ្យខួបកំណើត និងគោលការណ៍គម្ពីរដែលពាក់ព័ន្ធនឹងលក្ខណៈទាំងនោះ។
១. ការធ្វើបុណ្យខួបកំណើតមានដើមកំណើតមកពីមនុស្សដែលមិនគោរពព្រះពិត។ ឯកសារយោងមួយបានសរសេរអំពី អ្វីដែលមនុស្សធ្វើនៅបុណ្យខួបកំណើតថា នោះមកពីជំនឿថា នៅថ្ងៃដែលមនុស្សម្នាក់កើតមក«ពួកវិញ្ញាណកំណាចមានឱកាសធ្វើបាបបុគ្គលនោះ» ហើយថា«អំណោយរបស់ មិត្តភក្ដិនិងពាក្យជូនពររបស់ពួកគេអាចការពារបុគ្គលនោះ» (Funk & Wagnalls Standard Dictionary of Folklore, Mythology, and Legend)។ សៀវភៅមួយទៀតបានសរសេរថា នៅសម័យបុរាណ ព័ត៌មានអំពីខួបកំណើតរបស់មនុស្សម្នាក់គឺ«សំខាន់ចាំបាច់ដើម្បីទស្សន៍ទាយដោយប្រើក្បួនហោរាសាស្ត្រ» (The Lore of Birthdays)។ សៀវភៅនេះបន្ថែមថា៖«មនុស្សខ្លះជឿថា ទៀនដែលប្រើនៅពេលខួបកំណើត គឺបង្កើតវេទមន្តពិសេសដែលធ្វើឲ្យបំណងប្រាថ្នារបស់គេបានសម្រេច»។
ក៏ប៉ុន្តែ គម្ពីរបរិសុទ្ធផ្ដន្ទាទោសការប្រើវេទមន្ត មន្តអាគម ការទាក់ទងនឹងពួកវិញ្ញាណអាក្រក់ ឬ«អ្វីៗដែលស្រដៀងនឹងការទាំងនេះ»។ (ចោទិយកថា ១៨:១៤; កាឡាទី ៥:១៩-២១) តាមពិត មូលហេតុមួយដែលព្រះបានផ្ដន្ទាទោសមនុស្សនៅក្រុងបាប៊ីឡូនសម័យបុរាណ គឺដោយសារពួកគេប្រព្រឹត្តហោរាសាស្ត្រ ដែលជាផ្នែកមួយនៃអំពើមន្តអាគម។ (អេសាយ ៤៧:១១-១៥) គោលជំហររបស់សាក្សីព្រះយេហូវ៉ា មិនមានន័យថាយើងខំស្វែងយល់អំពីឫសគល់នៃទំនៀមទម្លាប់ទាំងអស់យ៉ាងល្អិតល្អន់នោះទេ។ ប៉ុន្តែពេលបទគម្ពីរផ្ដល់ការណែនាំដ៏ជាក់លាក់បែបនេះ យើងមិនមើលរំលងឡើយ។
២. គ្រិស្តសាសនិកជំនាន់ដើមមិនបានធ្វើបុណ្យខួបកំណើតទេ។ សៀវភៅស្រាវជ្រាវមួយបានសរសេរថា៖«[គ្រិស្តសាសនិក]ចាត់ទុកការធ្វើបុណ្យខួបកំណើតរបស់អ្នកណាម្នាក់ថាជាទំនៀមទម្លាប់របស់អ្នកដែលមិនគោរពព្រះ»។ គម្ពីរបង្ហាញថាពួកសាវ័កនិងអ្នកឯទៀតដែលបានរៀនផ្ទាល់ពីលោកយេស៊ូបានទុកគំរូដែលគ្រិស្តសាសនិកទាំងអស់គួរយកតម្រាប់។—ថែស្សាឡូនិចទី២ ៣:៦
៣. មានតែពិធីមួយប៉ុណ្ណោះដែលគ្រិស្តសាសនិកគួរចូលរួម មិនមែនពិធីខួបកំណើតទេ តែគឺពិធីរំលឹកមរណៈភាពរបស់លោកយេស៊ូ។ (លូកា ២២:១៧-២០) នេះមិនមែនជាអ្វីដែលគួរឲ្យភ្ញាក់ផ្អើលទេ ពីព្រោះគម្ពីរចែងថា៖«ថ្ងៃមរណៈក៏វិសេសជាងថ្ងៃកើតដែរ»។ (សាស្ដា ៧:១) រហូតដល់ទីបញ្ចប់នៃជីវិតរបស់លោកយេស៊ូនៅផែនដី លោកបានបង្កើតនាមឈ្មោះល្អនៅចំពោះព្រះ ដែលធ្វើឲ្យថ្ងៃមរណៈរបស់លោកគឺសំខាន់ជាងថ្ងៃដែលលោកបានកើត។—ហេប្រឺ ១:៤
៤. គម្ពីរមិនដែលរៀបរាប់ថាអ្នកគោរពប្រណិប័តន៍ព្រះធ្លាប់ធ្វើបុណ្យខួបកំណើតឡើយ។ នេះមិនមែនដោយសារអ្នកសរសេរគម្ពីរភ្លេចរៀបរាប់អំពីបុណ្យនោះទេ។ ហេតុអ្វីនិយាយដូច្នេះ? គឺពីព្រោះគម្ពីររៀបរាប់អំពីពិធីខួបកំណើតពីរ តែពិធីទាំងពីរនោះបានត្រូវធ្វើឡើងដោយអ្នកដែលមិនគោរពប្រណិប័តន៍ព្រះពិត។ ម្យ៉ាងទៀត របៀបដែលគម្ពីររៀបរាប់ពិធីទាំងពីរនោះ ឲ្យយើងដឹងថានោះមិនមែនជាអ្វីដ៏ល្អទេ។—លោកុប្បត្តិ ៤០:២០-២២; ម៉ាកុស ៦:២១-២៩
តើកូនរបស់សាក្សីព្រះយេហូវ៉ាមិនសប្បាយដោយសារមិនបានធ្វើបុណ្យខួបកំណើតឬ?
ដូចឪពុកម្ដាយដ៏ល្អទាំងអស់ សាក្សីព្រះយេហូវ៉ាបង្ហាញសេចក្ដីស្រឡាញ់ចំពោះកូនពេញមួយឆ្នាំ រួមទាំងឲ្យអំណោយនិងរៀបចំពិធីជប់លៀងដ៏សប្បាយរីករាយ។ ពួកគេព្យាយាមធ្វើតាមគំរូដ៏ល្អឥតខ្ចោះរបស់ព្រះ ដែលឲ្យរបស់ល្អដល់កូនៗរបស់លោកដោយស្ម័គ្រពីចិត្ត។ (ម៉ាថាយ ៧:១១) កូនរបស់សាក្សីព្រះយេហូវ៉ាមានអារម្មណ៍សប្បាយ។ សូមមើលពាក្យសម្ដីរបស់កូនខ្លះដូចតទៅនេះថា៖
«គឺសប្បាយនិងរំភើបចិត្តជាង ពេលយើងបានទទួលអំណោយដោយមិនបានដឹងទុកជាមុន» (ថាមមី អាយុ១២ឆ្នាំ)។
«ទោះជាខ្ញុំមិនបានទទួលអំណោយនៅថ្ងៃខួបកំណើតរបស់ខ្ញុំក្ដី ឪពុកម្ដាយរបស់ខ្ញុំនៅតែទិញអំណោយឲ្យខ្ញុំក្នុងឱកាសផ្សេងទៀត។ ខ្ញុំចូលចិត្តបែបនេះ ព្រោះនេះធ្វើឲ្យខ្ញុំភ្ញាក់ផ្អើល» (ហ្គ្រេហ្គោរី អាយុ១១ឆ្នាំ)។
«តើអ្នកគិតថា ការជួបជុំ១០នាទី ញ៉ាំនំបន្ដិចបន្តួច និងច្រៀងចម្រៀងមួយបទ ជាជប់លៀងដ៏សប្បាយទេ? អ្នកគួរមកផ្ទះរបស់ខ្ញុំដើម្បីមើលថាបែបណាទើបគេហៅថាជប់លៀងសប្បាយ!» (អេរិក អាយុ៦ឆ្នាំ)។
លោកអ្នកក៏ប្រហែលជាចូលចិត្តដែរ
សំណួរដែលមនុស្សជាច្រើនសួរអំពីសាក្សីព្រះយេហូវ៉ា
តើសាក្សីព្រះយេហូវ៉ាជឿទៅលើអ្វី?
ការសង្ខេប១៥ផ្នែកនៃជំនឿជាមូលដ្ឋានរបស់យើង។
សូមស្តាប់គ្រូដ៏ល្អប្រសើរ
តើព្រះពេញចិត្តពិធីជប់លៀងទាំងអស់ឬ?
តើអ្នកដឹងទេ ក្នុងគម្ពីររៀបរាប់អំពីពិធីជប់លៀងខ្លះៗ? យើងអាចដឹងថាតើព្រះគិតយ៉ាងណាអំពីពិធីជប់លៀងទាំងនោះ?
សេចក្ដីបង្រៀនសំខាន់ៗក្នុងគម្ពីរ
តើព្រះពេញចិត្តនឹងការគោរពប្រណិប័តន៍ទាំងអស់ឬទេ?
មនុស្សជាច្រើនគិតថាសាសនាណាក៏ដូចសាសនាណាដែរ។
សំណួរដែលមនុស្សជាច្រើនសួរអំពីសាក្សីព្រះយេហូវ៉ា
ហេតុអ្វីសាក្សីព្រះយេហូវ៉ាមិនធ្វើពិធីបុណ្យផ្សេងៗ?
សូមពិចារណាសំណួរសំខាន់បី អំពីសាក្សីព្រះយេហូវ៉ានិងពិធីបុណ្យ។
