ហេតុអ្វីសាក្សីព្រះយេហូវ៉ាផ្សព្វផ្សាយដល់មនុស្សដែលមានសាសនារួចហើយ?

លេង

យើងឃើញថាមនុស្សជាច្រើនដែលមានសាសនារួចហើយ ចូលចិត្តពិភាក្សាអំពីប្រធានបទផ្សេងៗក្នុងគម្ពីរបរិសុទ្ធ។ ក៏ប៉ុន្តែយើងគោរពសិទ្ធិរបស់អ្នកឯទៀតដែលចង់មានជំនឿសាសនាផ្សេងពីយើង ហើយមិនបង្ខំអ្នកណាឲ្យស្ដាប់យើងទេ។

ពេលដែលយើងពិភាក្សាជាមួយមនុស្សអំពីសាសនា យើងខំធ្វើតាមការណែនាំក្នុងគម្ពីរដែលឲ្យនិយាយ«ដោយចិត្តស្លូតបូត» ហើយយើងតែងព្យាយាមបង្ហាញ«ការគោរពដ៏ជ្រាលជ្រៅ»ចំពោះអ្នកឯទៀត។ (ពេត្រុសទី១ ៣:១៥) យើងរំពឹងថាមនុស្សខ្លះនឹងមិនព្រមស្ដាប់យើងទេ។ (ម៉ាថាយ ១០:១៤) ក៏ប៉ុន្តែទាល់តែយើងនិយាយជាមួយមនុស្ស ទើបអាចដឹងថាអ្នកណាចង់ស្ដាប់ អ្នកណាមិនចង់ស្ដាប់។ យើងក៏ទទួលស្គាល់ដែរថា ស្ថានភាពរបស់មនុស្សម្នាក់ៗតែងផ្លាស់ប្ដូរ។

ជាឧទាហរណ៍ នៅថ្ងៃមួយ មនុស្សម្នាក់ដែលរវល់ពេកមិនអាចនិយាយជាមួយយើង ប្រហែលជានឹងសប្បាយចិត្តនិយាយជាមួយយើងនៅថ្ងៃផ្សេងវិញ។ ម្យ៉ាងទៀត ប្រហែលជាមនុស្សប្រឈមមុខបញ្ហាឬស្ថានភាពថ្មីដែលធ្វើឲ្យពួកគេចាប់អារម្មណ៍ទៅលើព័ត៌មានក្នុងគម្ពីរ។ ដូច្នេះយើងព្យាយាមនិយាយជាមួយមនុស្សច្រើនលើកច្រើនសា។