តើអ្វីជាសមាគមប៉មយាមខាងគម្ពីរនិងខិត្តប័ណ្ណ?

លេង

សមាគមប៉មយាមខាងគម្ពីរនិងខិត្តប័ណ្ណនៃរដ្ឋប៉ិនស៊ីវ៉ានី គឺជាសាជីវកម្មដែលមិនរកប្រាក់ចំណេញ ហើយបានត្រូវបង្កើតឡើងនៅឆ្នាំ១៨៨៤ ដែលនៅក្រោមច្បាប់របស់រដ្ឋប៉ិនស៊ីវ៉ានី សហរដ្ឋអាម៉េរិក។ សាក្សីព្រះយេហូវ៉ាប្រើសាជីវកម្មនេះដើម្បីគាំទ្រកិច្ចការទូទាំងពិភពលោក ដែលរួមបញ្ចូលការបោះពុម្ពគម្ពីរបរិសុទ្ធ និងសៀវភៅដែលមានមូលដ្ឋានលើគម្ពីរ។

តាមធម្មនុញ្ញ សាជីវកម្មនេះមានគោលដៅខាង«សាសនា ការអប់រំ និងសប្បុរសធម៌» ជាពិសេសគឺដើម្បី«ផ្សព្វផ្សាយនិងបង្រៀនអំពីដំណឹងល្អនៃរាជាណាចក្ររបស់ព្រះ ក្រោមការគ្រប់គ្រងរបស់លោកយេស៊ូគ្រិស្ត»។ ទាល់តែមានការអញ្ជើញពីសាជីវកម្ម ទើបបុគ្គលម្នាក់អាចធ្វើជាសមាជិកនៃសាជីវកម្មបាន ហើយនេះមិនអាស្រ័យលើចំនួនវិភាគទានដែលបុគ្គលនោះបានធ្វើទេ។ អ្នកចាត់ចែងនិងសមាជិកសាជីវកម្មនេះជួយគណៈអភិបាលនៃសាក្សីព្រះយេហូវ៉ា។

សាជីវកម្មផ្សេងៗដែលច្បាប់ទទួលស្គាល់

ក្រៅពីសមាគមប៉មយាមខាងគម្ពីរនិងខិត្តប័ណ្ណនៃរដ្ឋប៉ិនស៊ីវ៉ានី សាក្សីព្រះយេហូវ៉ាក៏ប្រើសាជីវកម្មខ្លះទៀតនៅប្រទេសផ្សេងៗដែលស្របច្បាប់របស់ប្រទេសទាំងនោះដែរ។ សាជីវកម្មខ្លះបានដាក់ឈ្មោះដូចជា«Watch Tower» «Watchtower» ឬឈ្មោះនេះបានត្រូវបកប្រែជាភាសានៃប្រទេសនោះ។ ជាឧទាហរណ៍ នៅប្រទេសកម្ពុជា ឈ្មោះនេះបានត្រូវបកប្រែថា«ប៉មយាម»។

តាំងពីសាជីវកម្មទាំងនេះបានត្រូវបង្កើតឡើង នោះបានជួយយើងឲ្យសម្រេចកិច្ចការច្រើនណាស់ ដូចជា:

ការសរសេរនិងការបោះពុម្ព។ យើងបានបោះពុម្ពគម្ពីរប្រហែលជា២២០លានក្បាល ហើយបោះពុម្ពសៀវភៅដែលមានមូលដ្ឋានលើគម្ពីរប្រមាណជា៤០ពាន់លានក្បាល។ សៀវភៅទាំងនោះបានត្រូវបកប្រែជាង៧០០ភាសា។ ម្យ៉ាងទៀត មនុស្សជាច្រើនអាចអានគម្ពីរដោយឥតគិតថ្លៃ ជាង១២០ភាសា ក្នុងគេហទំព័រ jw.org ។ បន្ថែមទៀត ក្នុងគេហទំព័រនោះ ពួកគេអាចរកចម្លើយចំពោះសំណួរអំពីគម្ពីរដូចជា«តើព្រះមានរដ្ឋាភិបាលឬទេ?»។
ការអប់រំ។ យើងមានសាលាផ្សេងៗដើម្បីបង្ហាត់បង្រៀនពីគម្ពីរ។ ជាឧទាហរណ៍ តាំងពីឆ្នាំ១៩៤៣ សាក្សីព្រះយេហូវ៉ាជាង៨.០០០នាក់បានទទួលប្រយោជន៍ពីការបង្ហាត់បង្រៀនយ៉ាងស៊ីជម្រៅក្នុងរយៈពេលខ្លីពីសាលាគម្ពីរគីលាតនៃសមាគមប៉មយាម។ សាលានេះបានជួយពួកគេឲ្យបម្រើជាសាសនទូត ឬដើម្បីពង្រឹងកិច្ចការទូទាំងពិភពលោករបស់យើង។ ជារៀងរាល់សប្ដាហ៍ មនុស្សរាប់លាននាក់ រួមទាំងអ្នកដែលមិនមែនជាសាក្សីព្រះយេហូវ៉ា ទទួលការអប់រំនៅឯកិច្ចប្រជុំដែលបានត្រូវរៀបចំឡើង ដោយអង្គការរបស់យើង។ ម្យ៉ាងទៀត យើងមានបើកថ្នាក់បង្រៀនសម្រាប់អ្នកដែលមិនចេះអក្សរ ហើយបានបោះពុម្ពសៀវភៅសិក្សាក្នុង១១០ភាសា ដែលបង្រៀនមនុស្សឲ្យចេះអាននិងចេះសរសេរ។
កិច្ចការសប្បុរសធម៌។ យើងបានផ្ដល់ជំនួយដល់ពួកអ្នកដែលរងទុក្ខដោយសាររឿងខ្លោចផ្សាផ្សេងៗ ដែលកើតឡើងដោយសារមនុស្ស ឬដោយសារមហន្តរាយធម្មជាតិ។ ជាឧទាហរណ៍ នៅឆ្នាំ១៩៩៤ មានការប្រល័យពូជសាសន៍នៅប្រទេសរវ៉ាន់ដា ហើយនៅឆ្នាំ២០១០ មានការរញ្ជួយដីនៅប្រទេសហៃទី។

ទោះជាយើងបានសម្រេចកិច្ចការជាច្រើនតាមរយៈសាជីវកម្មផ្សេងៗដែលច្បាប់ទទួលស្គាល់ក៏ដោយ តែកិច្ចការរបស់យើងមិនពឹងផ្អែកលើសាជីវកម្មទាំងនោះទេ។ គ្រិស្តសាសនិកម្នាក់ៗត្រូវទទួលខុសត្រូវដោយខ្លួនគាត់ក្នុងការបំពេញភារកិច្ចដែលព្រះប្រគល់ឲ្យ ពោលគឺពួកគាត់ត្រូវផ្សព្វផ្សាយនិងបង្រៀនអំពីដំណឹងល្អ។ (ម៉ាថាយ ២៤:១៤; ២៨:១៩, ២០) យើងជឿជាក់ថាព្រះកំពុងគាំទ្រកិច្ចការរបស់យើង ហើយថាលោកនឹងបន្ត«ធ្វើឲ្យដុះឡើង»ជានិច្ច។—កូរិនថូសទី១ ៣:៦, ៧