ការពន្យល់ខគម្ពីរ
សុភាសិត ៣:៥, ៦ «កុំពឹងផ្អែកលើការយល់ដឹងរបស់ខ្លួនឡើយ»
«ចូរទុកចិត្តព្រះយេហូវ៉ាឲ្យអស់ពីដួងចិត្ត កុំពឹងផ្អែកលើការយល់ដឹងរបស់ខ្លួនឡើយ។ ទោះជាកូនធ្វើអ្វីក៏ដោយ ចូរគិតដល់លោក នោះលោកនឹងធ្វើឲ្យផ្លូវជីវិតរបស់កូនបានរលូន»។—សុភាសិត ៣:៥, ៦, សេចក្ដីបកប្រែពិភពលោកថ្មី
«កុំពឹងលើការចេះដឹងរបស់ខ្លួនឡើយ តែត្រូវទុកចិត្តលើព្រះអម្ចាស់ទាំងស្រុង។ ចូរនឹកដល់ព្រះអម្ចាស់ក្នុងគ្រប់កិច្ចការដែលកូនធ្វើ នោះព្រះអង្គនឹងត្រួសត្រាយផ្លូវរបស់កូន»។—សុភាសិត ៣:៥, ៦, សមាគមព្រះគម្ពីរខ្មែរកម្ពុជា
អត្ថន័យនៃសុភាសិត ៣:៥, ៦
ពេលធ្វើការសម្រេចចិត្តសំខាន់ៗ យើងគួរសុំការណែនាំពីព្រះយេហូវ៉ា a ជាជាងពឹងផ្អែកលើការយល់ដឹងរបស់ខ្លួន។
«ចូរទុកចិត្តព្រះយេហូវ៉ាឲ្យអស់ពីដួងចិត្ត»។ យើងបង្ហាញថាយើងទុកចិត្តព្រះ ពេលយើងធ្វើអ្វីតាមវិធីរបស់លោក។ យើងត្រូវទុកចិត្តលោកទាំងស្រុង គឺអស់ពីដួងចិត្តរបស់យើង។ ក្នុងគម្ពីរ ពាក្យចិត្តសំដៅទៅលើអ្វីដែលនៅក្នុងបុគ្គលម្នាក់ នេះរួមបញ្ចូល បំណងចិត្ត សម្ទុះចិត្ត គំនិត និងរបៀបគិតគូរ។ ដូច្នេះ ការទុកចិត្តព្រះអស់ពីដួងចិត្ត នេះមិនគ្រាន់តែទាក់ទងនឹងអារម្មណ៍ប៉ុណ្ណោះទេ តែនេះជាការសម្រេចចិត្តមួយដែលយើងធ្វើ ដោយសារយើងជឿជាក់ទាំងស្រុងថាព្រះដែលជាអ្នកបង្កើតយើងដឹងថាអ្វីល្អបំផុតសម្រាប់យើង។—រ៉ូម ១២:១
«កុំពឹងផ្អែកលើការយល់ដឹងរបស់ខ្លួនឡើយ»។ យើងត្រូវទុកចិត្តព្រះ ព្រោះយើងមិនអាចពឹងផ្អែកលើការវែកញែកដែលមិនល្អឥតខ្ចោះរបស់យើងបានទេ។ បើយើងពឹងផ្អែកទៅលើខ្លួននិងឲ្យអារម្មណ៍យើងដឹកនាំជីវិតខ្លួន នោះយើងប្រហែលជាធ្វើការសម្រេចដែលដំបូងមើលទៅដូចជាល្អ តែទីបំផុតបែរជានាំឲ្យមានលទ្ធផលអាក្រក់ទៅវិញ។ (សុភាសិត ១៤:១២; យេរេមា ១៧:៩) ព្រះមានប្រាជ្ញាជាងមនុស្សយើងឆ្ងាយណាស់។ (អេសាយ ៥៥:៨, ៩) ពេលយើងឲ្យព្រះដឹកនាំយើង នោះជីវិតរបស់យើងនឹងបានជោគជ័យ។—ចម្រៀងសរសើរព្រះ ១:១-៣; សុភាសិត ២:៦-៩; ១៦:២០
«ទោះជាកូនធ្វើអ្វីក៏ដោយ ចូរគិតដល់លោក»។ យើងគួរមានទស្សនៈដូចព្រះក្នុងជីវិតប្រចាំថ្ងៃ និងពេលធ្វើការសម្រេចចិត្តសំខាន់ៗ។ យើងធ្វើដូច្នេះ ដោយអធិដ្ឋានសុំការណែនាំពីលោក និងធ្វើតាមប្រសាសន៍របស់លោកដែលមានក្នុងគម្ពីរ។—ចម្រៀងសរសើរព្រះ ២៥:៤; ធីម៉ូថេទី២ ៣:១៦, ១៧
«លោកនឹងធ្វើឲ្យផ្លូវជីវិតរបស់កូនបានរលូន»។ ព្រះធ្វើឲ្យផ្លូវរបស់យើងរលូន ដោយជួយយើងឲ្យរស់នៅស្របតាមខ្នាតតម្រាដ៏សុចរិតរបស់លោក។ (សុភាសិត ១១:៥) យ៉ាងនេះ យើងអាចជៀសវាងពីបញ្ហា ហើយជីវិតយើងមានសុភមង្គលជាង។—ចម្រៀងសរសើរព្រះ ១៩:៧, ៨; អេសាយ ៤៨:១៧, ១៨
ព័ត៌មានថែមទៀតអំពីសុភាសិត ៣:៥, ៦
សៀវភៅសុភាសិតមានគោលការណ៍មួយចំនួនដែលអាចជួយយើងមានសុភមង្គលនិងជោគជ័យក្នុងជីវិតតាមទស្សនៈព្រះ។ ចាប់ពីជំពូកទី១ដល់ទី៩ បានត្រូវសរសេរជាដំបូន្មានរបស់ឪពុកទៅកាន់កូនប្រុសជាទីស្រឡាញ់។ ក្នុងជំពូកទី៣ លើកបញ្ជាក់អំពីប្រយោជន៍ដែលមកពីការធ្វើតាមប្រាជ្ញារបស់ព្រះដែលជាអ្នកបង្កើត។—សុភាសិត ៣:១៣-២៦
a យេហូវ៉ាគឺជានាមរបស់ព្រះ។—ចម្រៀងសរសើរព្រះ ៨៣:១៨