ចុះបើខ្ញុំញៀនមើលរូបអាសអាភាស?
អ្វីដែលប្អូនអាចធ្វើ
យល់អំពីវា។ ការរួមភេទជាអ្វីថ្លៃថ្នូរដែលព្រះបានរៀបចំឡើង តែមនុស្សខ្លះបានធ្វើឲ្យទៅជាអ្វីដ៏ស្មោកគ្រោកនិងថោកទាបវិញ ដោយផលិតឡើងទៅជារូបអាសអាភាស។ ការយល់ច្បាស់អំពីរូបអាសអាភាស នឹងជួយប្អូនឲ្យ«ស្អប់អ្វីដែលអាក្រក់»។—ចម្រៀងសរសើរព្រះ ៩៧:១០
គិតអំពីផលវិបាក។ រូបអាសអាភាសមិនគ្រាន់តែបន្ថោកតម្លៃអ្នកសម្ដែងប៉ុណ្ណោះទេ តែក៏ធ្វើឲ្យអ្នកទស្សនាស្មោកគ្រោកដែរ។ ហេតុនេះហើយបានជាគម្ពីរចែងថា៖«មនុស្សឈ្លាសវៃឃើញអន្តរាយមកក៏ពួនខ្លួន តែមនុស្សខ្វះបទពិសោធន៍បន្តដើរទៅទៀត ហើយរងផលពិបាក»។—សុភាសិត ២២:៣
តាំងចិត្ត។ បុរសស្មោះត្រង់ម្នាក់ឈ្មោះយ៉ូបបាននិយាយថា៖«ខ្ញុំប្ដេជ្ញាចិត្តរួចហើយថា ខ្ញុំនឹងមិនសម្លឹងមើលស្ត្រីឯទៀតដោយបំណងចិត្តមិនត្រឹមត្រូវឡើយ»។ (យ៉ូប ៣១:១) ប្អូនអាចតាំងចិត្តដូចខាងក្រោមនេះ៖
ខ្ញុំនឹងមិនលេងអ៊ីនធឺណិតពេលខ្ញុំនៅម្នាក់ឯងទេ។
ខ្ញុំនឹងបិទភ្លាមៗ ពេលរូបភាពមិនល្អលោតចេញមក។
ខ្ញុំនឹងនិយាយជាមួយមិត្តភក្ដិដែលមានភាពចាស់ទុំ បើខ្ញុំភ្លាត់មើលម្ដងទៀត។
រៀងរាល់ដងដែលប្អូនមើលរូបអាសអាភាស ប្អូនទទួលឥទ្ធិពលរបស់វាកាន់តែខ្លាំងឡើងៗ ហើយកាន់តែពិបាកផ្ដាច់ជាង។
អធិដ្ឋាន។ អ្នកតែងចម្រៀងសរសើរព្រះបានសុំព្រះយេហូវ៉ាថា៖«សូមបង្វែរភ្នែកខ្ញុំចេញពីអ្វីដែលឥតបានការ»។ (ចម្រៀងសរសើរព្រះ ១១៩:៣៧) ព្រះចង់ឲ្យប្អូនយកឈ្នះការមើលរូបអាសអាភាស ហើយបើប្អូនអធិដ្ឋានសុំជំនួយពីលោកដើម្បីធ្វើអ្វីដែលត្រឹមត្រូវ នោះលោកនឹងផ្ដល់កម្លាំងឲ្យប្អូនធ្វើដូច្នោះបាន។—ភីលីព ៤:១៣
និយាយជាមួយនរណាម្នាក់។ ការប្រាប់បញ្ហានោះដល់មិត្តភក្ដិដែលគួរឲ្យទុកចិត្ត គឺជាជំហានសំខាន់ដើម្បីផ្ដាច់ទម្លាប់អាក្រក់នោះ។—សុភាសិត ១៧:១៧
សូមចាំចំណុចនេះ៖ រៀងរាល់ដងដែលប្អូនជៀសចេញពីរូបអាសអាភាស នោះប្អូនកំពុងយកឈ្នះមួយកម្រិតធំហើយ។ សូមប្រាប់ព្រះយេហូវ៉ាអំពីការយកឈ្នះនោះ ហើយអរគុណលោកដែលបានផ្ដល់កម្លាំងដល់ប្អូន។ ពេលប្អូនជៀសចេញពីការមើលរូបអាសអាភាស ប្អូនធ្វើឲ្យលោករីករាយក្រៃលែង!—សុភាសិត ២៧:១១
លោកអ្នកក៏ប្រហែលជាចូលចិត្តដែរ
សេចក្ដីបង្រៀនសំខាន់ៗពីគម្ពីរ
តើរូបអាសអាភាសជាអំពើខុសឆ្គងនឹងព្រះឬ?
ទោះជាគម្ពីរមិនចែងចំៗអំពី«រូបអាសអាភាស»ក្ដី តើតាមរបៀបណាយើងអាចដឹងអំពីទស្សនៈរបស់ព្រះចំពោះរូបអាសអាភាស?
សំណួរពីយុវវ័យ
តើខ្ញុំគួរដឹងអ្វីខ្លះអំពីការផ្ញើសារក្នុងទម្រង់អាសអាភាស?
តើមានគេកំពុងបង្ខំប្អូនឲ្យផ្ញើសារក្នុងទម្រង់អាសអាភាសឬ? តើការផ្ញើសារក្នុងទម្រង់អាសអាភាសនាំមកនូវផលវិបាកអ្វីខ្លះ? តើនេះគ្រាន់តែជាការចែចង់ប៉ុណ្ណោះឬទេ?
រូបអាសអាភាស តើមានគ្រោះថ្នាក់ឬគ្មានគ្រោះថ្នាក់?
តើការមើលរូបអាសអាភាសធ្វើឲ្យប៉ះពាល់ដល់មនុស្សម្នាក់ៗនិងក្រុមគ្រួសារយ៉ាងដូចម្ដេច?
