សំណួរពីយុវវ័យ
តើខ្ញុំអាចធ្វើយ៉ាងណាដើម្បីឈប់ធ្វើជាមនុស្សមានមុខពីរ?
ជួនកាល អ្នកខ្លះដែលគោរពប្រណិប័តន៍ព្រះឆ្ងល់ថាការរស់នៅស្របតាមខ្នាតតម្រាក្នុងគម្ពីរគឺទាន់សម័យនិងមានប្រយោជន៍ឬយ៉ាងណា។ (ចម្រៀងសរសើរព្រះ ៧៣:២, ៣) ពួកគេប្រហែលជាចាប់ផ្ដើមធ្វើអ្វីដែលបំពានច្បាប់របស់ព្រះយេហូវ៉ា ហើយព្យាយាមបញ្ឆោតបងប្អូនរួមជំនឿដោយបិទបាំងការប្រព្រឹត្តអាក្រក់របស់ខ្លួន។
អត្ថបទនេះបានត្រូវរៀបចំឡើងដើម្បីជួយអស់អ្នកដែលកំពុងដើរតាមគន្លងនេះ តែចង់ឈប់ធ្វើដូច្នេះតទៅទៀត។
ក្នុងអត្ថបទនេះ យើងនឹងពិចារណា៖
តើការមានមុខពីរមានន័យយ៉ាងណា?
ការមានមុខពីរមានន័យថា ពេលនៅជាមួយមនុស្សស្រករប្អូន ដែលមិនស្ដាប់បង្គាប់ព្រះយេហូវ៉ា ប្អូនធ្វើអ្វីដែលប្អូនដឹងថាខុស តែពេលប្អូននៅជាមួយបងប្អូនរួមជំនឿ ប្អូនប្រព្រឹត្តហាក់ដូចជាប្អូនចង់បម្រើព្រះយេហូវ៉ាវិញ។ នេះប្រៀបដូចជាប្អូនមានរបៀបរស់នៅពីរបែប ហើយប្អូនព្យាយាមបិទបាំងមិនឲ្យគេដឹងទេ។
ប្អូនអ៊ែរិនបានរៀបរាប់ថា៖«ពេលយើងមានមុខពីរ យើងកំពុងបិទបាំងអ្វីម្យ៉ាងពីពួកគេទាំងសងខាង។ ដូច្នេះ គ្មាននរណាម្នាក់ដឹងថាយើងជាមនុស្សបែបណាឲ្យពិតប្រាកដទេ។ ការពិត ពេលយើងមានមុខពីរ យើងកំពុងបញ្ឆោតមនុស្សគ្រប់គ្នា»។
តើប្អូនដឹងទេ? ការមានមុខពីរអាចរួមបញ្ចូលការធ្វើអ្វីមួយដែលប្អូនដឹងថាព្រះយេហូវ៉ាមិនពេញចិត្ត ពេលប្អូននៅម្នាក់ឯង។
ប្អូនណូឡិនបានរៀបរាប់ថា៖«កាលខ្ញុំអាយុ១៤ឆ្នាំ ខ្ញុំបានមើលរូបអាសអាភាសតាមអ៊ីនធឺណិត។ ពេលនៅមុខអ្នកឯទៀត ខ្ញុំធ្វើដូចជាស្អប់ខ្ពើមរូបអាសអាភាសណាស់ តែតាមពិតក្នុងចិត្ត ខ្ញុំមិនបានស្អប់ទេ»។
គោលការណ៍គម្ពីរ៖ «គ្មានអ្នកណាអាចធ្វើជាខ្ញុំបម្រើរបស់ម្ចាស់ពីរបានឡើយ ព្រោះអ្នកនោះនឹងស្រឡាញ់ម្ចាស់មួយ ហើយស្អប់ម្ចាស់មួយ ឬក៏ស្មោះត្រង់នឹងម្ចាស់មួយ ហើយមើលងាយម្ចាស់មួយ»។—ម៉ាថាយ ៦:២៤
តើការដែលខ្ញុំមានមុខពីរបានន័យថាខ្ញុំជាមនុស្សអាក្រក់ឬ?
មិនបានន័យដូច្នោះទេ។ ពិតមែនមានអ្នកខ្លះបានសម្រេចចិត្តមិនចង់រស់នៅស្របតាមខ្នាតតម្រាក្នុងគម្ពីរ។ ប៉ុន្តែ ចុះប្អូនវិញ? តើប្អូនពិតជាមានបំណងចិត្តបែបនេះទេ? ឬមានមូលហេតុផ្សេងដែលនាំឲ្យប្អូនមានមុខពីរបែបនោះ ដូចជា៖
ប្អូនខ្លាចថាខ្លួនខុសគេខុសឯង ជាពិសេសខុសពីមនុស្សស្រករប្អូន។
ប្អូនមានអារម្មណ៍ថាប្អូនស៊ីខ្សែគ្នាជាមួយនឹងសិស្សរួមថ្នាក់ជាងបងប្អូនក្នុងក្រុមជំនុំ។
ប្អូនមានអារម្មណ៍ថាប្អូនគ្រាន់តែគ្មានកម្លាំងនិងសមត្ថភាពធ្វើតាមបង្គាប់ទាំងអស់របស់ព្រះ។
ប្អូនដាវីឌបានរៀបរាប់ថា៖«ខ្ញុំគិតថាយុវវ័យខ្លះដែលមានមុខពីរ មានអារម្មណ៍ស្រួលជាងពេលនៅជាមួយនឹងមនុស្សដែលមិនមានជំនឿដូចខ្លួន ដោយសារចង់ចូលចុះជាមួយគេគ្រប់រឿង»។
អ្វីដែលយើងទើបតែពិចារណាខាងលើ គ្មានអ្វីណាមួយក្នុងនោះជាចំណុចល្អឲ្យយើងធ្វើជាមនុស្សមុខពីរឡើយ។ ប៉ុន្តែ នេះជួយពន្យល់យើងអំពីរបៀបដែលមនុស្សអាចធ្លាក់ចូលទៅក្នុងអន្ទាក់នេះ។ បើនេះបានកើតឡើងចំពោះប្អូនមែន តើប្អូនអាចធ្វើអ្វីខ្លះ?
តើខ្ញុំអាចធ្វើយ៉ាងណាដើម្បីឈប់មានមុខពីរ?
១. គិតអំពីរបៀបរស់នៅរបស់ប្អូនឥឡូវនេះ។ សូមសួរខ្លួនថា៖‹តើខ្ញុំចង់ធ្វើជាមនុស្សមុខពីរមែនឬ? បើខ្ញុំបន្តធ្វើដូចនេះទៀត តើនឹងមានលទ្ធផលយ៉ាងណា?›។
គោលការណ៍គម្ពីរ៖ «មនុស្សឈ្លាសវៃឃើញអន្តរាយ . . . តែមនុស្សខ្វះបទពិសោធន៍បន្តដើរទៅទៀត ហើយរងផលពិបាក»។—សុភាសិត ២៧:១២
២. ទៀងត្រង់។ សូមប្រាប់រឿងនេះដល់ឪពុកម្ដាយឬមិត្តភក្តិដែលមានគំនិតចាស់ទុំនិងគោរពច្បាប់របស់ព្រះយេហូវ៉ា។ ពួកគាត់ច្បាស់ជារីករាយជួយប្អូន។ ពួកគាត់ពិតជាសប្បាយណាស់ដែលឃើញថាប្អូនចង់ធ្វើអ្វីដែលត្រឹមត្រូវ!
បើប្អូនជាមនុស្សមានមុខពីរ សូមស្វែងរកជំនួយ
ប្អូនណូឡិនបានរៀបរាប់ថា៖«ការសារភាពកំហុសរបស់ខ្លួនដល់អ្នកឯទៀតគឺជាអ្វីមួយដែលពិបាកបំផុត តែពេលខ្ញុំបានសារភាពហើយ ខ្ញុំមានអារម្មណ៍ធូរជាងឆ្ងាយណាស់»។
គោលការណ៍គម្ពីរ៖ «អ្នកដែលខំលាក់បាំងអំពើរំលងរបស់ខ្លួន នឹងមិនបានជោគជ័យទេ តែអ្នកណាដែលសារភាពកំហុស ហើយឈប់ធ្វើខុសទៀត អ្នកនោះនឹងទទួលបានសេចក្ដីមេត្តាករុណា»។—សុភាសិត ២៨:១៣
៣. ទទួលយកលទ្ធផល។ សូមចាំថា បើប្អូនបិទបាំងអ្វីមួយពីឪពុកម្ដាយនិងពីក្រុមជំនុំ ប្អូនធ្វើឲ្យពួកគេពិបាកទុកចិត្តប្អូនទៀត។ ជាលទ្ធផល ឪពុកម្ដាយនិងអ្នកចាស់ទុំក្នុងក្រុមជំនុំប្រហែលជាមិនអនុញ្ញាតឲ្យប្អូនធ្វើអ្វីមួយចំនួនអស់មួយរយៈ។ សូមទទួលយកលទ្ធផលនេះ ហើយតាំងចិត្ត«ធ្វើការទាំងអស់ដោយទៀងត្រង់»ចាប់ពីពេលនេះទៅ។—ហេប្រឺ ១៣:១៨
គោលការណ៍គម្ពីរ៖ «ចូរស្ដាប់ពាក្យទូន្មាន ហើយទទួលយកការប្រៀនប្រដៅចុះ ដើម្បីឲ្យអ្នកមានប្រាជ្ញានៅថ្ងៃមុខ»។—សុភាសិត ១៩:២០
៤. ជឿជាក់ថាព្រះស្រឡាញ់ប្អូន។ ព្រះយេហូវ៉ាដឹងច្បាស់នូវការប្រព្រឹត្តទាំងអស់របស់យើង ព្រោះលោកស្រឡាញ់យើង។ ដូច្នេះ បើប្អូនជាមនុស្សមានមុខពីរ លោកដឹងអំពីនោះ ហើយលោកពិតជាខកចិត្តនិងមិនសប្បាយទេ។ ប៉ុន្តែ ‹ពីព្រោះលោករមែងគិតអំពីប្អូន› នោះលោកពិតជាចង់ជួយប្អូនឲ្យធ្វើជាមនុស្សទៀងត្រង់វិញ។—ពេត្រុសទី១ ៥:៧
គោលការណ៍គម្ពីរ៖ «ព្រះយេហូវ៉ាមើលជុំវិញផែនដី ហើយប្រើកម្លាំងរបស់លោកដើម្បីជួយអស់អ្នកដែលបម្រើលោកដោយស្មោះអស់ពីចិត្ត»។—ប្រវត្តិហេតុទី២ ១៦:៩
លោកអ្នកក៏ប្រហែលជាចូលចិត្តដែរ
ចម្លើយចំពោះ១០សំណួរពីពួកយុវវ័យ
តើខ្ញុំជាអ្នកណា?
ដើម្បីប្អូនអាចសម្រេចចិត្តដោយប្រាជ្ញាពេលដែលមានការបង្ខិតបង្ខំ ប្អូនត្រូវមានគោលការណ៍ផ្ទាល់ខ្លួន ត្រូវស្គាល់ចំណុចខ្លាំង និងចំណុចខ្សោយរបស់ខ្លួន ថែមទាំងមានគោលដៅក្នុងជីវិតផងដែរ។
ទស្សនៈពីមនុស្សស្រករប្អូន
តើខ្ញុំអាចកែប្រែកំហុសរបស់ខ្ញុំតាមរបៀបណា?
ដំណោះស្រាយប្រហែលជាមិនពិបាកដូចដែលប្អូនគិតនោះទេ។
គំនូរជីវចលលើក្ដារខៀន
ចូរយកឈ្នះការបង្ខំពីមនុស្សស្រករគ្នា!
វិធីបួនយ៉ាងដែលអាចជួយអ្នកឲ្យមានចិត្តក្លាហានដើម្បីធ្វើតាមការសម្រេចចិត្តរបស់ខ្លួន។
