សំណួរពីយុវវ័យ
មិត្តភាពឬស្នេហា? ភាគទី១៖ តើគាត់ធ្វើបែបនេះមានន័យយ៉ាងណា?
ប្អូនពិតជាចូលចិត្តគាត់ខ្លាំងណាស់ ហើយប្អូនទទួលអារម្មណ៍ថាគាត់ក៏ចូលចិត្តប្អូនវិញដែរ។ ហេតុអ្វី? ព្រោះប្អូននិងគាត់តែងតែផ្ញើសារគ្នា ឧស្សាហ៍ទៅណាមកណាជាមួយគ្នា ជាពិសេសពេលមានជប់លៀង . . . ហើយជួនកាលប្អូនទទួលសារចែចង់ឬឡែបខាយពីគាត់។
ដូច្នេះ ប្អូនក៏សម្រេចចិត្តសួរគាត់ថាយើងត្រូវជាអ្វីនឹងគ្នា ព្រោះប្អូនចង់ដឹងប្រាកដថាគាត់មានអារម្មណ៍ដូចប្អូនឬអត់។ ប៉ុន្តែ គាត់ឆ្លើយថា៖«យើងទាំងពីរគ្រាន់តែជាមិត្តភក្តិប៉ុណ្ណោះ គ្មានអ្វីលើសពីនេះទេ»។
អារម្មណ៍ដែលប្អូនអាចមាន
ប្អូនចាស្មីនបានរៀបរាប់ថា៖«ខ្ញុំខឹងគាត់ខ្លាំងណាស់ ហើយក៏ខឹងនឹងខ្លួនឯងដែរ! ព្រោះរាល់ថ្ងៃយើងផ្ញើសារដល់គ្នា ហើយគាត់ក៏បង្ហាញចំណាប់អារម្មណ៍មកលើខ្ញុំដែរ។ អ៊ីចឹងហើយបានជាខ្ញុំមានចិត្តទៅលើគាត់»។
ប្អូនរីឆឺដបានរៀបរាប់ថា៖«ពេលមិត្តខ្ញុំដើរលេងជាមួយសង្សារគាត់ គាត់តែងហៅខ្ញុំទៅជាមួយ ហើយសង្សារគាត់ក៏ហៅមិត្តភក្ដិទៅជាមួយដែរ។ ដូច្នេះ ខ្ញុំនិងនារីនោះមើលទៅហាក់ដូចជាគូសង្សារដែរ។ ខ្ញុំនិងនាងឧស្សាហ៍និយាយគ្នាលេង ហើយផ្ញើសារគ្នាជារឿយៗ។ ប៉ុន្តែ ពេលនាងប្រាប់ខ្ញុំថានាងចាត់ទុកខ្ញុំជាមិត្តប៉ុណ្ណោះ ខ្ញុំពិបាកទទួលយកណាស់។ ហើយខ្ញុំកាន់តែឈឺចិត្តពេលដែលដឹងថាតាមពិតនាងមានសង្សាររួចទៅហើយ»។
ប្អូនថាម៉ារ៉ាបានរៀបរាប់ថា៖«ប្រុសម្នាក់បានផ្ញើសារខ្ញុំរាល់ថ្ងៃ ហើយជួនកាលយើងក៏និយាយសាសងគ្នាដែរ។ ប៉ុន្តែ ពេលខ្ញុំប្រាប់គាត់ថាខ្ញុំមានចិត្តលើគាត់ គាត់បែរជាសើច ហើយនិយាយថា៖‹ខ្ញុំមិនទាន់ចង់បានសង្សារទេ!›។ ក្រោយពីឮដូច្នោះ ខ្ញុំឈឺចាប់ណាស់ ហើយបានយំអស់ច្រើនថ្ងៃ»។
សរុបសេចក្ដី៖ ពេលប្អូនគិតថាប្អូនមានទំនាក់ទំនងពិសេសជាមួយនរណាម្នាក់ តែក្រោយមកទើបដឹងថាប្អូនស្រឡាញ់គេតែម្នាក់ឯង គឺជារឿងធម្មតាទេដែលប្អូនមានអារម្មណ៍ខឹង ខ្មាសគេ ហើយគិតថាគេលលេងអារម្មណ៍ប្អូន។ ប្អូនស្ទីវើនបានរៀបរាប់ថា៖«ពេលជួបរឿងនេះ ខ្ញុំខូចចិត្ត ហើយឈឺពើតផ្សាខ្លាំងណាស់។ ដោយសាររឿងនោះ ខ្ញុំពិបាកទុកចិត្តអ្នកឯទៀតអស់មួយរយៈ»។
មូលហេតុដែលនេះកើតឡើង
បណ្ដាញសង្គមនិងការផ្ញើសារងាយស្រួលឲ្យប្អូនឆាប់មានចិត្តលើបុគ្គលណាម្នាក់ ទាំងដែលគេមិនចាប់អារម្មណ៍លើប្អូនទាល់តែសោះ។ សូមពិចារណាអ្វីដែលប្អូនៗវ័យក្មេងខ្លះបានរៀបរាប់។
ប្អូនជេននីហ្វើបានរៀបរាប់ថា៖«បុគ្គលម្នាក់អាចផ្ញើសារមកអ្នកដើម្បីកំដរអារម្មណ៍អផ្សុករបស់គាត់ប៉ុណ្ណោះ តែអ្នកអាចគិតថានោះជាការបង្ហាញចំណាប់អារម្មណ៍លើអ្នកទៅវិញ។ បើគាត់ផ្ញើសារមកអ្នករាល់ថ្ងៃ អ្នកអាចច្រឡំថាអ្នកជាមនុស្សពិសេសសម្រាប់គាត់»។
ប្អូនជេមបានរៀបរាប់ថា៖«បុគ្គលម្នាក់ប្រហែលជាមានចិត្តទៅលើបុគ្គលម្នាក់ទៀតដោយស្មោះ តែបុគ្គលនោះវិញគ្មានអារម្មណ៍អ្វីទេ គាត់គ្រាន់តែត្រូវការអ្នកនិយាយជាមួយ ឬក៏ត្រូវការអ្នកដែលធ្វើឲ្យគាត់មានអារម្មណ៍ថាគាត់មានអ្នកស្រឡាញ់ចូលចិត្តច្រើនប៉ុណ្ណោះ»។
ប្អូនហេលីបានរៀបរាប់ថា៖«ការផ្ញើសារសាមញ្ញដូចជា‹សូមគេងលក់ស្រួល› អ្នកអានអាចទទួលអារម្មណ៍បែបផ្អែមល្ហែម តែតាមពិតអ្នកផ្ញើពាក្យនោះ បានផ្ញើទៅក្នុងអារម្មណ៍ធម្មតាប៉ុណ្ណោះ»។
ប្អូនអាលីស្យាបានរៀបរាប់ថា៖«រូបមុខញញឹមអឹមអៀន អាចមានន័យពីរ គឺចង់មានន័យថា‹ខ្ញុំអត់អីទេ› ឬ‹ខ្ញុំកំពុងញ៉ែ›។ ជួនកាល បុគ្គលដែលបានទទួលសារ សន្និដ្ឋានថាអ្នកដែលផ្ញើកំពុងចែចង់គាត់»។
សរុបសេចក្ដី៖ សូមកុំច្រឡំថាទង្វើនោះជាស្នេហាឡើយ។
ស្រួលនិយាយតែពិបាកធ្វើ មែនទេ? មែន! គម្ពីរចែងថា៖«ឯចិត្ត គឺពូកែបញ្ឆោតលើសអ្វីៗទាំងអស់ ហើយក៏អាក្រក់ក្រៃលែង»។ (យេរេមា ១៧:៩) ចិត្តប្អូនអាចធ្វើឲ្យប្អូនស្រមើស្រមៃថានោះជាស្នេហា តែតាមពិតនោះប្រៀបដូចជាប្អូនសង់វិមានស្នេហ៍ពីដីខ្សាច់ដែលងាយរលាយខូចអស់។
អ្វីដែលប្អូនអាចធ្វើ
សូមចេះថ្លឹងថ្លែង។ សូមផ្អាកសិនហើយគិតពិចារណាអំពីទំនាក់ទំនងនោះ។ សូមសួរខ្លួនថា‹តើមានមូលហេតុអ្វីខ្លះឲ្យខ្ញុំគិតថាបុគ្គលនេះប្រព្រឹត្តមកលើខ្ញុំខុសពីអ្នកឯទៀត?›។ សូមកុំឲ្យចិត្តប្អូនមានឥទ្ធិពលខ្លាំងពេកមកលើ«សមត្ថភាពរិះគិត»របស់ប្អូន។—រ៉ូម ១២:១
សូមគិតពិចារណា។ ជាជាងគិតពីទង្វើផ្សេងៗដែលប្អូនគិតថាគាត់មានចិត្តលើប្អូន សូមគិតអំពីទង្វើឯទៀតដែលធ្វើឲ្យប្អូនសង្ស័យថាគាត់មិនមានចិត្តលើប្អូនវិញ។ កុំសន្និដ្ឋានថាគាត់មានចិត្តមកលើប្អូន ដោយសារតែប្អូនមានចិត្តទៅលើគាត់ឡើយ។
សូមអត់ធ្មត់។ សូមរង់ចាំរហូតដល់គាត់សារភាពត្រង់ៗថាគាត់មានចិត្តលើប្អូន។ សូមកុំធ្វើអ្វីដែលនាំឲ្យខកចិត្ត បើគាត់គ្មានចិត្តលើប្អូនទេ។
សូមស្មោះត្រង់។ គម្ពីរប្រាប់ថា«មានពេលនិយាយ»។ (អ្នកទូន្មាន ៣:៧) បើប្អូនចង់ដឹងថាបុគ្គលនោះចាត់ទុកប្អូនលើសពីមិត្តឬយ៉ាងណា សូមនិយាយជាមួយគាត់។ ប្អូនស្រីវ៉ាឡឺរីបានរៀបរាប់ថា៖«បើគាត់មិនមានចិត្តលើយើងទេ ស៊ូឈឺចិត្តនៅឥឡូវនេះ ជាជាងបន្តមានចិត្តលើគាត់អស់រាប់ខែ ក្រោយមកឈឺចិត្តខ្លាំងជាងពេលដឹងថាគាត់មិនបានចាប់អារម្មណ៍យើងទេ»។
សរុបសេចក្ដី៖ សុភាសិត ៤:២៣ប្រាប់ថា៖«ចូរការពារចិត្តរបស់កូន»។ បើប្អូនមានចិត្តលើនរណាម្នាក់ សូមស្វែងយល់ថាតើគាត់មានចិត្តលើប្អូនវិញឬអត់។ ការបណ្ដោយឲ្យអារម្មណ៍ស្រឡាញ់មានកាន់តែខ្លាំងឡើងមុនដឹងការពិត គឺប្រៀបដូចជាការព្យាយាមដាំដើមឈើលើផ្ទាំងថ្ម។
បើប្អូនដឹងថាបុគ្គលនោះមានចិត្តលើប្អូនដែរ ហើយបើប្អូនពេញវ័យល្មមដើម្បីទាក់ទងគ្នា នោះប្អូនអាចសម្រេចថាប្អូនចង់បន្តទំនាក់ទំនងនោះឬយ៉ាងណា។ សូមចាំថា អាពាហ៍ពិពាហ៍ដ៏រឹងមាំគឺប្ដីនិងប្រពន្ធមានគោលដៅដូចគ្នាក្នុងកិច្ចបម្រើព្រះ ហើយទៀងត្រង់និងស្មោះត្រង់ចំពោះគ្នា។ (កូរិនថូសទី១ ៧:៣៩) តាមពិត ពួកគេផ្ដើមចេញពីមិត្តភក្ដិល្អ ហើយពួកគេបន្តធ្វើជាមិត្តភក្តិល្អរហូតតទៅ។—សុភាសិត ៥:១៨
លោកអ្នកក៏ប្រហែលជាចូលចិត្តដែរ
សំណួរពីយុវវ័យ
មិត្តភាពឬស្នេហា? ភាគទី២: ពេលខ្ញុំធ្វើដូចនេះ តើគាត់នឹងគិតបែបណា?
តើមិត្តប្អូនសន្និដ្ឋានថាប្អូនរាប់អានគាត់លើសពីមិត្តឬទេ? សូមមើលយោបល់ទាំងនេះ។
គំនូរជីវចលលើក្ដារខៀន
តើជាស្នេហ៍ពិតឬជាការឈ្លក់វង្វេង?
សូមស្វែងយល់ថាតើអ្វីជាការឈ្លក់វង្វេងនិងអ្វីជាស្នេហ៍ពិត?
សំណួរពីយុវវ័យ
តើខ្ញុំត្រៀមខ្លួនហើយឬនៅក្នុងការស្វែងយល់ចិត្តគ្នា?
ចំណុចប្រាំយ៉ាងដែលជួយអ្នកឲ្យដឹងថាអ្នកត្រៀមខ្លួនហើយឬនៅក្នុងការស្វែងយល់ចិត្តគ្នានិងរៀបការ។
