សំណួរពីយុវវ័យ
ហេតុអ្វីឪពុកម្ដាយខ្ញុំមិនឲ្យខ្ញុំមានពេលសប្បាយសោះអ៊ីចឹង?
មិត្តភក្តិប្អូនបបួលប្អូនទៅជប់លៀងនៅចុងសប្ដាហ៍នេះ។ ប្អូនបានសុំការអនុញ្ញាតពីឪពុកម្ដាយ តែពួកគាត់ឆ្លើយយ៉ាងម៉ឺងម៉ាត់ថា«អត់ឲ្យទៅទេ»។ ប្អូនមិនចម្លែកចិត្តទេ ព្រោះរាល់លើកគាត់តែងតែប្រាប់អ៊ីចឹង។
ក្នុងអត្ថបទនេះ យើងនឹងពិចារណា៖
ហេតុអ្វីឪពុកម្ដាយខ្ញុំតែងតែថាទេ?
តាមមើលទៅឪពុកម្ដាយប្អូនតែងតែថាទេ ពេលដែលប្អូនសុំធ្វើអ្វីមួយ។ ប្អូនប្រហែលជាសន្និដ្ឋានថាគាត់មិនចង់ឲ្យប្អូនមានឱកាសសប្បាយសោះ។
យុវតីម្នាក់ឈ្មោះម៉ារៀ ក៏មានអារម្មណ៍ដូច្នេះដែរពេលដែលនាងទើបតែមានទូរស័ព្ទ។ នាងនិយាយថា៖«ឪពុកខ្ញុំដាក់កម្រិតច្រើនណាស់ ដូចជាកម្មវិធីណាខ្ញុំអាចថតចម្លងបាន ហើយកម្មវិធីណាខ្ញុំមិនអាចថតចម្លងបាន។ គាត់ចង់ដឹងថាខ្ញុំនិយាយជាមួយអ្នកណាខ្លះ ហើយខ្ញុំអាចនិយាយយូរប៉ុណ្ណាជាមួយពួកគេ។ ប៉ុន្តែដំណាលគ្នានោះ ពួកម៉ាករបស់ខ្ញុំអាចធ្វើអ្វីក៏បានតាមតែចិត្តពួកគេ»។
សូមពិចារណា៖ តើឪពុកម៉ារៀពិតជាមិនចង់ឲ្យនាងមានឱកាសសប្បាយឬ? តើគាត់ប្រហែលជាបារម្ភអំពីអ្វីខ្លះ?
ការមានល្បឿនកំណត់ក្នុងការបើកបរដាក់កម្រិតលើសេរីភាពរបស់ប្អូន តែនោះការពារប្អូនពីគ្រោះថ្នាក់ នេះដូចគ្នានឹងវិន័យដែលឪពុកម្ដាយបានដាក់ឲ្យប្អូនដែរ
សូមសាកធ្វើតាមយោបល់នេះ៖ សូមស្រមៃគិតថាប្អូនជាឪពុកឬម្ដាយម្នាក់ ហើយប្អូនមានកូនជំទង់ម្នាក់ដែលទើបតែមានទូរស័ព្ទប្រើ។ តើប្អូននឹងបារម្ភអំពីអ្វីខ្លះ? តើប្អូននឹងដាក់កម្រិតអ្វីខ្លះទៅលើការប្រើប្រាស់របស់កូន? តើប្អូននឹងនិយាយយ៉ាងណាបើកូនរបស់ប្អូនប្រាប់ថា ប្អូនមិនចង់ឲ្យគាត់សប្បាយទាល់តែសោះ?
ប្អូនថានយ៉ាបានរៀបរាប់ថា៖«ឪពុកខ្ញុំតែងនិយាយថា៖‹ចាំកូនឯងធ្វើជាឪពុកម្ដាយគេទើបកូនឯងដឹង›។ ពាក្យសម្ដីនេះធ្វើឲ្យខ្ញុំឲ្យតម្លៃចំពោះវិន័យដែលគាត់ដាក់ឲ្យ និងគិតអំពីមូលហេតុដែលគាត់ដាក់វិន័យទាំងនោះ។ បើខ្ញុំមានកូន ខ្ញុំគិតថាខ្ញុំក៏ចង់ឲ្យកូនខ្ញុំធ្វើតាមវិន័យដែលខ្ញុំបានដាក់ឲ្យពួកគេដែរ»។
តើខ្ញុំអាចធ្វើយ៉ាងណាដើម្បីឲ្យឪពុកម្ដាយខ្ញុំអនុញ្ញាត?
ប្អូនរីឆឺដបានរៀបរាប់ថា៖«គ្មានប្រយោជន៍ទេបើយើងស្រែកដាក់គាត់ ហើយវាធ្វើឲ្យអ្នកនិងឪពុកម្ដាយមើលមុខគ្នាមិនចំ។ បើអ្នកឈ្លោះប្រកែកជាមួយគាត់ គាត់នឹងគិតថាអ្នកមិនទាន់មានគំនិតចាស់ទុំល្មម ដើម្បីទទួលសេរីភាពច្រើនជាងទេ»។
ប្អូនអ៊ីវីបានរៀបរាប់ថា៖«តាមធម្មតា វិន័យបង្កើតឡើងក្នុងបំណងល្អ។ ឪពុកម្ដាយខ្ញុំមិនមែនមិនចង់ឲ្យខ្ញុំសប្បាយនោះទេ ការពិតពួកគាត់ចង់ឲ្យខ្ញុំសប្បាយច្រើនបំផុត តែជាការសប្បាយដែលមិននាំឲ្យខ្ញុំមានបញ្ហា»។
គោលការណ៍គម្ពីរ៖«មនុស្សល្ងីល្ងើបញ្ចេញកំហឹងរបស់ខ្លួនមកទាំងអស់ ប៉ុន្តែ អ្នកដែលមានប្រាជ្ញាចេះទប់អារម្មណ៍របស់ខ្លួនជានិច្ច»។—សុភាសិត ២៩:១១
ប្អូនម៉ារៀបានរៀបរាប់ថា៖«ខ្ញុំបានធ្វើអ្វីដែលខុសពីកម្រិតដែលឪពុកខ្ញុំបានដាក់ឲ្យ គឺខ្ញុំលួចផ្ញើសារទៅពួកម៉ាកខ្ញុំដល់យប់ជ្រៅឬថតចម្លងកម្មវិធីខ្លះដែលឪពុកខ្ញុំបានហាម។ ទីបំផុត គាត់ចាប់បាន ហើយគាត់ដាក់កម្រិតថែមទៀតទៅលើការប្រើប្រាស់ទូរស័ព្ទ ដោយសារគាត់លែងទុកចិត្តខ្ញុំទៀត។ ដូច្នេះ ការលួចធ្វើអ្វីពីក្រោយខ្នងឪពុកម្ដាយ មិនមែនជាវិធីល្អទេ»។
ប្អូនម៉ាឡេនដាបានរៀបរាប់ថា៖«សូមអត់ធ្មត់។ ប្រហែលត្រូវការពេលបន្តិចមុននឹងឪពុកម្ដាយបន្ធូរវិន័យរបស់គាត់ តែបើគាត់ឃើញថាអ្នកគោរពវិន័យដែលគាត់ដាក់ឲ្យ គាត់ប្រហែលជាឲ្យសេរីភាពអ្នកច្រើនជាង»។
គោលការណ៍គម្ពីរ៖«កូនទាំងឡាយអើយ ចូរស្ដាប់បង្គាប់ឪពុកម្ដាយក្នុងគ្រប់ការទាំងអស់»។—កូឡុស ៣:២០
ប្អូនណាថាលីបានរៀបរាប់ថា៖«ការទទូចទាមទារធ្វើអ្វីដែលអ្នកចង់ធ្វើ មិននាំឲ្យជីវិតអ្នកប្រសើរឬជួយអ្នកឲ្យបានអ្វីដែលអ្នកចង់បាននោះទេ»។
ប្អូនចូសេហ្វបានរៀបរាប់ថា៖«ឪពុកម្ដាយចង់ឃើញថាយើងជាមនុស្សចេះគិត។ ដូច្នេះ ពេលនិយាយជាមួយពួកគាត់ ខ្ញុំព្យាយាមពន្យល់ហេតុផលដល់គាត់ មិនមែននិយាយតាមតែអារម្មណ៍ទេ។ ដោយធ្វើដូច្នោះ ឪពុកម្ដាយខ្ញុំទំនងជាអនុញ្ញាត ពេលខ្ញុំសុំគាត់ធ្វើអ្វីមួយ»។
គោលការណ៍គម្ពីរ៖«ចូរគោរពឪពុកនិងម្ដាយរបស់អ្នក»។—អេភេសូរ ៦:២
លោកអ្នកក៏ប្រហែលជាចូលចិត្តដែរ
គំនូរជីវចលលើក្ដារខៀន
តើខ្ញុំអាចមានសេរីភាពច្រើនជាងយ៉ាងដូចម្ដេច?
ប្អូនគិតថាប្អូនធំពេញវ័យហើយ ប៉ុន្តែឪពុកម្ដាយប្អូនមិនគិតបែបនោះទេ។ ដូច្នេះតើប្អូនត្រូវធ្វើអ្វីខ្លះដើម្បីបានការទុកចិត្តពីពួកគាត់ច្រើនជាង?
ទស្សនៈពីមនុស្សស្រករប្អូន
តើតាមរបៀបណាខ្ញុំអាចនិយាយជាមួយប៉ាម៉ាក់របស់ខ្ញុំ?
ប្អូនប្រហែលជានឹងទទួលប្រយោជន៍លើសពីការរំពឹងទុករបស់បងប្អូនទៅទៀត។
សំណួរពីយុវវ័យ
តើខ្ញុំអាចធ្វើយ៉ាងណាដើម្បីឲ្យឪពុកម្ដាយទុកចិត្តខ្ញុំ?
របៀបអនុវត្តបីយ៉ាងដែលអាចជួយប្អូនឲ្យមានសេរីភាពច្រើនជាង។
