សំណួរពីយុវវ័យ
ហេតុអ្វីខ្ញុំគួរជួយអ្នកឯទៀត?
មូលហេតុពីរយ៉ាងដែលយើងគួរជួយអ្នកឯទៀត
មូលហេតុទី១: ពេលប្អូនឲ្យ ប្អូនទំនងជានឹងទទួលមកវិញ!
អ្នកឯទៀតនឹងឃើញថាប្អូនមានចិត្តទូលាយ។ ពួកគេទំនងជាបង្ហាញចិត្តទូលាយមកប្អូនវិញ។ គម្ពីររៀបរាប់អំពីនេះថា៖
«ចូរទម្លាប់ឲ្យគេ ហើយគេនឹងឲ្យអ្នកវិញ។ . . . អ្នកវាល់ឲ្យគេប៉ុនណា គេក៏នឹងវាល់ឲ្យអ្នកប៉ុណ្ណឹងដែរ»។—លូកា ៦:៣៨
«អ្នកប្រព្រឹត្តទៅលើគេយ៉ាងណា គេក៏នឹងប្រព្រឹត្តមកអ្នកយ៉ាងនោះដែរ»។—លូកា ៦:៣៨, Contemporary English Version
មូលហេតុទី២: ពេលប្អូនជួយអ្នកឯទៀត ប្អូនកំពុងជួយខ្លួនឯង!
ការធ្វើល្អចំពោះអ្នកឯទៀត ធ្វើឲ្យប្អូនមានការគោរពចំពោះខ្លួនឯង សប្បាយរីករាយនិងស្កប់ចិត្តដែលមកពីការឲ្យគេ។ គម្ពីររៀបរាប់អំពីនេះថា៖
«ការឲ្យគេ នោះមានសុភមង្គលច្រើនជាងការទទួល»។—សកម្មភាព ២០:៣៥
«ពេលដែលអ្នករៀបចំភោជនាហារ ចូរអញ្ជើញអ្នកក្រ អ្នកខ្វិន អ្នកពិការ អ្នកងងឹតភ្នែក នោះអ្នកនឹងមានសុភមង្គល ពីព្រោះពួកគេមិនអាចតបស្នងអ្នកបានឡើយ»។—លូកា ១៤:១៣, ១៤
យុវវ័យដែលចេះជួយអ្នកឯទៀត
មានយុវវ័យជាច្រើនដែលចេះជួយអ្នកឯទៀត។ សូមពិចារណាឧទាហរណ៍ខ្លះ។
ប្អូនខេស៊ីបានរៀបរាប់ថា៖«ជួនកាល ខ្ញុំគ្រាន់តែចង់អង្គុយលើកៅអី ហើយមើលទូរទស្សន៍ប៉ុណ្ណោះ តែពេលនោះ ខ្ញុំបានគិតអំពីប៉ាម៉ាក់ខ្ញុំដែលកំពុងធ្វើការ ហើយគិតថាពួកគាត់នឿយហត់ប៉ុណ្ណាពេលត្រឡប់មកវិញ។ ដូច្នេះ ខ្ញុំក្រោកឡើងលាងចាន និងបោសសម្អាតផ្ទះ។ ខ្ញុំក៏ឆុងកាហ្វេទុកឲ្យពួកគាត់ដែរ ព្រោះពួកគាត់ចូលចិត្តពិសាកាហ្វេ។ ពេលម៉ាក់ខ្ញុំមកដល់ផ្ទះ គាត់និយាយថា‹អូ! ផ្ទះស្អាតណាស់! ហើយក្លិនក្រអូបទៀត។ អរគុណកូនសម្លាញ់!›។ ខ្ញុំសប្បាយណាស់ រាល់ដងដែលខ្ញុំធ្វើអ្វីមួយដើម្បីប៉ាម៉ាក់ខ្ញុំ»។
ប្អូនហូលីបានរៀបរាប់ថា៖«ឪពុកម្ដាយខ្ញុំតែងតែជួយគាំទ្រខ្ញុំ និងផ្ដល់អ្វីដែលខ្ញុំត្រូវការ។ ដូច្នេះ ពេលឡានពួកគាត់ខូចខ្លាំងនៅឆ្នាំមុន ខ្ញុំបានឲ្យប្រាក់មួយចំនួនដល់ពួកគាត់ដើម្បីជួសជុលឡាន។ នោះជាប្រាក់ដែលខ្ញុំបានសន្សំ។ ទោះជាពួកគាត់មិនព្រមទទួលក្ដី ខ្ញុំបង្ខំឲ្យគាត់ទទួល។ តាមពិត ពួកគាត់សមទទួលច្រើនជាងនេះឆ្ងាយណាស់។ ការបង្ហាញចិត្តទូលាយនិងធ្វើអ្វីមួយដើម្បីពួកគាត់ ពិតជាធ្វើឲ្យខ្ញុំសប្បាយខ្លាំងណាស់»។
តើប្អូនដឹងទេ? យុវវ័យជាច្រើនដែលជាសាក្សីព្រះយេហូវ៉ា ពិតជាសប្បាយណាស់ដែលបានជួយអ្នកឯទៀតតាមរយៈកិច្ចការអប់រំខាងគម្ពីរ។ អ្នកខ្លះថែមទាំងរើទៅប្រទេសដែលត្រូវការអ្នកបង្រៀនគម្ពីរទៀតផង។
ប្អូនអេវិនបានរៀបរាប់ថា៖«ខ្ញុំបានរើពីសហរដ្ឋអាម៉េរិកទៅប្រទេសម៉ិកស៊ិកដើម្បីជួយបង្រៀនគម្ពីរ។ ជួនកាល ការបង្ហាញចិត្តទូលាយដោយឲ្យលុយនិងរបស់របរពិបាកបន្តិចសម្រាប់ខ្ញុំ ដោយសារខ្ញុំមិនសូវមានលុយច្រើនទេ។ ប៉ុន្តែ ខ្ញុំឃើញថាការបង្ហាញចិត្តទូលាយដោយចំណាយពេលនិងកម្លាំងក្នុងកិច្ចបម្រើផ្សាយធ្វើឲ្យខ្ញុំសប្បាយ ហើយនោះមានតម្លៃជាងការឲ្យជាវត្ថុទ្រព្យទៅទៀត»។
តើខ្ញុំអាចជួយអ្នកឯទៀតយ៉ាងដូចម្ដេច?
តើប្អូនចង់មានអំណរដែលមកពីការជួយអ្នកឯទៀតឬទេ? នៅខាងក្រោមនេះមានយោបល់ខ្លះៗ។
ជួយក្រុមគ្រួសារ៖
ប្អូនអាចជួយបោសសម្អាតផ្ទះ លាងចាន ឬសម្អាតបន្ទប់ជាដើម
ចម្អិនអាហារ
សូមសរសេរសំបុត្រខ្លីមួយដែលប្រាប់ពីអំណរគុណរបស់ប្អូនចំពោះឪពុកម្ដាយ
ជួយបង្រៀនប្អូនធ្វើលំហាត់សាលា
ជួយអ្នកឯទៀតក្រៅពីសមាជិកគ្រួសារ៖
ផ្ញើសំបុត្រខ្លីមួយដល់អ្នកណាម្នាក់ដែលកំពុងឈឺ
ជួយសម្អាតសួនច្បារអ្នកជិតខាងដែលមានវ័យចាស់
ទៅសួរសុខទុក្ខអ្នកណាម្នាក់ដែលរស់នៅដាច់ដោយឡែកពីគេ
ទិញអំណោយឲ្យអ្នកណាម្នាក់ដែលកំពុងជួបទុក្ខលំបាក
យោបល់៖ សាកគិតអំពីអ្វីដែលប្អូនអាចធ្វើ។ រួចយកអ្វីនោះជាគោលដៅដើម្បីជួយបុគ្គលម្នាក់ក្នុងសប្ដាហ៍នេះ។ ប្អូនច្បាស់ជាភ្ញាក់ផ្អើលពេលដែលប្អូនឃើញថា ប្អូនសប្បាយចិត្តយ៉ាងណាក្រោយពីប្អូនធ្វើដូច្នោះ។
ប្អូនអេឡាណឺបានរៀបរាប់ថា៖«ពេលយើងជួយអ្នកឯទៀត យើងមានអារម្មណ៍សប្បាយ។ យើងមានអារម្មណ៍ថាយើងបានសម្រេចកិច្ចការណាមួយ ហើយយើងអាចឃើញថាអ្នកឯទៀតក៏សប្បាយដែរ។ ការជួយគេប្រហែលជាធ្វើឲ្យយើងសប្បាយ ទោះជាដំបូងយើងមិនគិតអ៊ីចឹងក៏ដោយ។ អ្នកប្រហែលជាមិនគិតថាការនោះជាការលះបង់ឡើយ ព្រោះការពិតគឺជាខ្លួនអ្នកផ្ទាល់ទេដែលបានទទួលប្រយោជន៍ជាច្រើន»។
លោកអ្នកក៏ប្រហែលជាចូលចិត្តដែរ
ភ្ញាក់
របៀបរកផ្លូវដែលនាំឲ្យមានសុភមង្គល ការស្កប់ចិត្ដនិងចិត្ដទូលាយ
មនុស្សជាច្រើនគិតថាសុភមង្គលនិងភាពជោគជ័យមកពីទ្រព្យសម្បត្ដិ។ ប៉ុន្ដែ តើលុយនិងវត្ថុទ្រព្យពិតជានាំឲ្យមានសុភមង្គលស្ថិតស្ថេរទេ? តើមានទីសំអាងណាខ្លះ?
សំណួរពីយុវវ័យ
តើខ្ញុំមានទំនួលខុសត្រូវប៉ុនណា?
យុវវ័យខ្លះមានសេរីភាពច្រើនជាងយុវវ័យឯទៀត។ តើអ្វីនាំឲ្យមានភាពខុសគ្នាបែបនេះ?
ទស្សនៈពីមនុស្សស្រករប្អូន
ខេមរិនបានរកឃើញជីវិតដ៏មានន័យខ្លឹមសារបំផុត
តើប្អូនចង់មានជីវិតដែលមានន័យខ្លឹមសារឬទេ? សូមស្ដាប់ប្អូនស្រីខេមរិនរៀបរាប់នូវរបៀបដែលនាងបានរកឃើញជីវិតដ៏គាប់ចិត្តនៅកន្លែងដែលនាងមិននឹកស្មាន។
