សំណួរពីយុវវ័យ
តើខ្ញុំគួរទទួលការជ្រមុជទឹកឬទេ? ភាគទី១: អត្ថន័យនៃការជ្រមុជទឹក
ជារៀងរាល់ឆ្នាំ យុវវ័យជាច្រើនដែលបានត្រូវចិញ្ចឹមអប់រំដោយឪពុកម្ដាយជាសាក្សីព្រះយេហូវ៉ាបានទទួលការជ្រមុជទឹក។ តើប្អូនកំពុងគិតអំពីរឿងនេះទេ? បើប្អូនកំពុងគិតមែន ដំបូងប្អូនត្រូវយល់អំពីអត្ថន័យនៃការប្រគល់ខ្លួនជូនព្រះនិងការជ្រមុជទឹក។
តើការជ្រមុជទឹកសំដៅទៅលើអ្វី?
ការជ្រមុជទឹកក្នុងគម្ពីរមិនសំដៅទៅលើការប្រោះទឹកទេ តែសំដៅទៅលើការពន្លិចខ្លួនទៅក្នុងទឹកដែលតំណាងឲ្យអ្វីមួយដ៏សំខាន់។
ការពន្លិចខ្លួនក្នុងទឹកពេលដែលទទួលការជ្រមុជទឹក គឺបង្ហាញជាសាធារណៈថា ប្អូននឹងលែងរស់នៅដើម្បីធ្វើតាមបំណងចិត្តរបស់ប្អូនទៀតហើយ។
ការងើបឡើងពីទឹក គឺបង្ហាញថាប្អូនចាប់ផ្ដើមជីវិតថ្មីដែលផ្ដោតទៅលើការធ្វើតាមបំណងប្រាថ្នារបស់ព្រះវិញ។
ពេលប្អូនទទួលការជ្រមុជទឹក ប្អូនទទួលស្គាល់ថាព្រះយេហូវ៉ាមានសិទ្ធិកំណត់ខ្នាតតម្រាអំពីអ្វីខុសនិងអ្វីត្រូវ ហើយប្អូនសន្យានៅខាងមុខអ្នកឯទៀតថាប្អូនស្ម័គ្រចិត្តធ្វើអ្វីដែលលោកចង់ឲ្យប្អូនធ្វើ។
សូមពិចារណា៖ ហេតុអ្វីប្អូនចង់បង្ហាញជាសាធារណៈថាប្អូនប្រើជីវិតរបស់ប្អូនដើម្បីស្ដាប់បង្គាប់ព្រះយេហូវ៉ា? សូមមើលយ៉ូហានទី១ ៤:១៩; ការបើកបង្ហាញ ៤:១១។
តើការប្រគល់ខ្លួនជូនព្រះមានន័យដូចម្ដេច?
មុនប្អូនទទួលការជ្រមុជទឹក ប្អូនគួរប្រគល់ខ្លួនជូនព្រះយេហូវ៉ាសិន។ តើតាមរបៀបណា?
ក្នុងសេចក្ដីអធិដ្ឋានពិសេសមួយ ប្អូនប្រាប់ព្រះយេហូវ៉ាថាប្អូនសន្យាបម្រើលោកជារៀងរហូត ហើយថាប្អូននឹងធ្វើអ្វីណាក៏ដោយដែលលោកចង់ឲ្យប្អូនធ្វើ មិនថាមានរឿងអ្វីកើតឡើងឬអ្នកឯទៀតសម្រេចចិត្តធ្វើបែបណាក៏ដោយ។
ការជ្រមុជទឹកគឺជាការបង្ហាញជាសាធារណៈថាប្អូនបានប្រគល់ខ្លួនជូនព្រះរួចហើយ។ ការជ្រមុជទឹកក៏បង្ហាញឲ្យអ្នកឯទៀតឃើញថាប្អូនលែងរស់នៅដើម្បីខ្លួនទៀត ហើយចាប់ពីថ្ងៃនេះទៅប្អូនគឺជារបស់ព្រះយេហូវ៉ា។—ម៉ាថាយ ១៦:២៤
សូមពិចារណា៖ ហេតុអ្វីជីវិតរបស់ប្អូនប្រសើរឡើងពេលដែលប្អូនក្លាយជារបស់ព្រះយេហូវ៉ា? សូមមើលអេសាយ ៤៨:១៧, ១៨ និងហេប្រឺ ១១:៦។
ហេតុអ្វីការជ្រមុជទឹកគឺសំខាន់ចាំបាច់?
លោកយេស៊ូបានប្រាប់ថា ការជ្រមុជទឹកគឺជាអ្វីដែលចាំបាច់សម្រាប់អ្នកកាន់តាមលោក។ (ម៉ាថាយ ២៨:១៩, ២០) ហេតុនេះហើយ ការជ្រមុជទឹកក៏នៅតែជាអ្វីដែលសំខាន់ចាំបាច់សម្រាប់គ្រិស្តសាសនិកដែរ។ តាមពិត គម្ពីរបានប្រាប់ថានោះគឺជាអ្វីដ៏សំខាន់ចាំបាច់ដើម្បីសង្គ្រោះជីវិត។—ពេត្រុសទី១ ៣:២១
ទោះជាយ៉ាងនោះក្ដី ការជ្រមុជទឹកគួរតែផុសចេញពីសេចក្ដីស្រឡាញ់ដែលប្អូនមានចំពោះព្រះយេហូវ៉ានិងអំណរគុណដែលប្អូនមានចំពោះលោក។ ប្អូនត្រូវមានចិត្តគំនិតដូចអ្នកតែងចម្រៀងសរសើរព្រះ ដែលថា៖«តើខ្ញុំនឹងយកអ្វីដើម្បីតបស្នងព្រះយេហូវ៉ា ចំពោះអ្វីល្អទាំងអស់ដែលលោកបានធ្វើសម្រាប់ខ្ញុំ? . . . ខ្ញុំនឹងហៅរកនាមព្រះយេហូវ៉ា។ ខ្ញុំនឹងធ្វើតាមសម្បថរបស់ខ្ញុំចំពោះព្រះយេហូវ៉ា នៅមុខរាស្ត្រទាំងអស់របស់លោក»។—ចម្រៀងសរសើរព្រះ ១១៦:១២-១៤
សូមពិចារណា៖ តើព្រះយេហូវ៉ាបានធ្វើល្អអ្វីខ្លះសម្រាប់ប្អូន? តើប្អូនអាចសងលោកវិញយ៉ាងដូចម្ដេច? សូមមើលការបំភ្លឺច្បាប់ ១០:១២, ១៣ និងរ៉ូម ១២:១។
លោកអ្នកក៏ប្រហែលជាចូលចិត្តដែរ
សំណួរពីយុវវ័យ
តើខ្ញុំគួរទទួលការជ្រមុជទឹកឬទេ? ភាគទី២: ត្រៀមខ្លួនដើម្បីជ្រមុជទឹក
សូមសួរខ្លួនឯងនូវសំណួរទាំងនេះ ដើម្បីដឹងថាប្អូនបានត្រៀមខ្លួនហើយឬនៅ។
សំណួរពីយុវវ័យ
តើខ្ញុំគួរទទួលការជ្រមុជទឹកឬទេ? ភាគទី៣: តើអ្វីធ្វើឲ្យខ្ញុំស្ទាក់ស្ទើរមិនទទួលការជ្រមុជទឹក?
ពេលគិតដល់ការប្រគល់ខ្លួនជូនព្រះយេហូវ៉ានិងទទួលការជ្រមុជទឹក តើប្អូនភ័យខ្លាចឬទេ? បើមែន អត្ថបទនេះនឹងជួយប្អូនយកឈ្នះការភ័យខ្លាចនោះ។
សំណួរនិងចម្លើយពីគម្ពីរ
តើការជ្រមុជទឹកគឺជាអ្វី?
ក្នុងគម្ពីរមានកំណត់ហេតុជាច្រើនអំពីការជ្រមុជទឹក ហើយក៏បញ្ជាក់អំពីអត្ថន័យនិងសារៈសំខាន់នៃការជ្រមុជទឹកដែរ។
