តើការជក់បារីគឺជាអំពើខុសឆ្គងឬទេ?
ចម្លើយពីគម្ពីរ
គម្ពីរមិនបានរៀបរាប់អំពីការជក់បារី a ឬការប្រើថ្នាំជក់ប្រភេទផ្សេងៗទេ។ ក៏ប៉ុន្តែ គម្ពីរមានគោលការណ៍ដែលបង្ហាញថាព្រះមិនពេញចិត្តចំពោះការប្រព្រឹត្តដ៏ស្មោកគ្រោក និងការមានទម្លាប់មិនស្អាតស្អំ។ ដូច្នេះ ព្រះចាត់ទុកថាការជក់បារីគឺជាអំពើខុសឆ្គង។
ការឲ្យតម្លៃចំពោះជីវិត។ ‹ព្រះផ្ដល់ជីវិត និងដង្ហើមដល់មនុស្សគ្រប់រូប›។ (សកម្មភាព ១៧:២៤, ២៥) ដោយសារជីវិតជាអំណោយពីព្រះ យើងមិនគួរធ្វើអ្វីដែលអាចកាត់បន្ថយអាយុជីវិតរបស់យើងទេ ដូចជាការជក់បារីជាដើម។ នៅទូទាំងពិភពលោក ការជក់បារីជាមូលហេតុចម្បងមួយដែលបណ្ដាលឲ្យមនុស្សស្លាប់។
ស្រឡាញ់អ្នកជិតខាង។ «អ្នកត្រូវស្រឡាញ់អ្នកជិតខាងដូចស្រឡាញ់ខ្លួនអ្នក»។ (ម៉ាថាយ ២២:៣៩) ការជក់បារីនៅក្នុងចំណោមអ្នកឯទៀត គឺមិនបង្ហាញសេចក្ដីស្រឡាញ់ឡើយ។ ពួកអ្នកដែលបានរងផលប៉ះពាល់ដោយសារហឺតផ្សែងបារីជាទៀងទាត់អាចកើតជំងឺផ្សេងៗដែលមកពីការជក់បារី ច្រើនជាងអ្នកជក់ទៅទៀត។
យើងត្រូវតែបរិសុទ្ធ។ ចូរ«ប្រគល់រូបកាយរបស់ខ្លួនជាគ្រឿងបូជាដែលមានជីវិត ក៏បរិសុទ្ធ ហើយគាប់ចិត្តព្រះ»។ (រ៉ូម ១២:១) «ចូរយើងសម្អាតចិត្តនិងកាយរបស់យើងឲ្យស្អាតពីអ្វីៗទាំងអស់ដែលនាំឲ្យស្មោកគ្រោក ហើយដោយកោតខ្លាចព្រះ ចូរយើងធ្វើឲ្យសេចក្ដីបរិសុទ្ធរបស់យើងឈានទៅរកភាពល្អឥតខ្ចោះ»។ ការជក់បារីគឺខុសពីធម្មជាតិ ហើយមិនបរិសុទ្ធឬមិនស្អាតស្អំទេ។ អ្នកជក់បារីប្រើថ្នាំជក់ដែលមានសារធាតុពុលដោយចេតនា នោះនាំឲ្យបង្ខូចរូបកាយរបស់ពួកគេ។
តើគម្ពីរចែងអំពីការជក់កញ្ឆាឬការប្រើថ្នាំដែលមានសារធាតុញៀនសម្រាប់ការកម្សាន្តឬទេ?
គម្ពីរមិនបានរៀបរាប់អំពីកញ្ឆា ឬថ្នាំផ្សេងទៀតដែលមានសារធាតុញៀនដូចកញ្ឆាទេ។ ប៉ុន្តែ គម្ពីរមានគោលការណ៍ផ្សេងៗដែលជួយយើងយល់ថា យើងមិនគួរប្រើប្រាស់ថ្នាំញៀនសម្រាប់ការកម្សាន្តទេ។ គម្ពីរក៏មានគោលការណ៍គម្ពីរផ្សេងទៀតដែរ ដូចរៀបរាប់ខាងក្រោមនេះ៖
យើងត្រូវគ្រប់គ្រងសមត្ថភាពរិះគិតរបស់ខ្លួន។ «អ្នកត្រូវស្រឡាញ់ព្រះយេហូវ៉ាជាព្រះរបស់អ្នក . . . អស់ពីសមត្ថភាពរិះគិត»។ (ម៉ាថាយ ២២:៣៧, ៣៨) «ចូរដឹងខ្លួនក្នុងគ្រប់ការទាំងអស់»។ (ពេត្រុសទី១ ១:១៣) បើបុគ្គលម្នាក់ប្រើថ្នាំដែលមានសារធាតុញៀន គាត់មិនអាចគ្រប់គ្រងសមត្ថភាពរិះគិតរបស់គាត់ទាំងស្រុងបានទេ ថែមទាំងអាចទៅជាញៀនទៀតផង។ ពួកគេគិតតែអំពីរបៀបដែលអាចមានថ្នាំញៀនទៀត និងអំពីការប្រើប្រាស់ថ្នាំញៀននោះ ជាជាងគិតអំពីអ្វីដែលលើកទឹកចិត្ត។—ភីលីព ៤:៨
ចូរគោរពច្បាប់របស់ពួកអាជ្ញាធរ។ ចូរ«ស្ដាប់បង្គាប់រដ្ឋាភិបាលនិងពួកអាជ្ញាធរជាអ្នកគ្រប់គ្រង»។ (ទីតុស ៣:១) នៅប្រទេសជាច្រើន មានច្បាប់តឹងរ៉ឹងក្នុងការប្រើប្រាស់ថ្នាំខ្លះដែលមានសារធាតុញៀន។ បើយើងចង់ធ្វើឲ្យព្រះពេញចិត្ត យើងគួរស្ដាប់បង្គាប់ពួកអាជ្ញាធរ។—រ៉ូម ១៣:១
a ក្នុងអត្ថបទនេះ ការជក់បារីសំដៅទៅលើការស្រូបផ្សែងពីបារី ស៊ីហ្គា ឬជក់ថ្នាំដោយប្រើខ្សៀរ។ ក៏ប៉ុន្តែគោលការណ៍ក្នុងអត្ថបទនេះ ក៏អាចសំដៅទៅលើការទំពាថ្នាំជក់ ចុកថ្នាំជក់ ឬការជក់បារីអេឡិចត្រូនិកដែលមានសារធាតុនីកូទីននិងផលិតផលស្រដៀងគ្នាដែរ។
លោកអ្នកក៏ប្រហែលជាចូលចិត្តដែរ
ទស្សនាវដ្ដី
តើព្រះមានទស្សនៈយ៉ាងណាចំពោះការជក់បារី?
គំនូរជីវចលលើក្ដារខៀន
កុំអនុញ្ញាតឲ្យបារីបំផ្លាញជីវិតអ្នក
ខណៈដែលមនុស្សជាច្រើនកំពុងជក់បារីឬប្រើឧបការណ៍ផ្សេងដើម្បីជក់បារី ក៏មានមនុស្សជាច្រើនទៀតកំពុងព្យាយាមផ្ដាច់បារីដែរ។ ហេតុអ្វី? តើការជក់បារីពិតជាអាក្រក់ខ្លាំងឬ?
ភ្ញាក់
ធ្វើឲ្យជីវិតប្រសើរជាង ដោយថែទាំសុខភាព
គោលការណ៍គម្ពីរលើកទឹកចិត្តយើងឲ្យខំថែរក្សាសុខភាពរបស់យើង។
ប្រធានបទឯទៀត
តើគម្ពីរអាចជួយផ្ដាច់គ្រឿងញៀនឬទេ?
ជំហានបួនយ៉ាងពីគម្ពីរដែលអាចជួយលោកអ្នកផ្ដាច់គ្រឿងញៀន។
