តើគ្រិស្តសាសនិកអាចទទួលការព្យាបាលខាងពេទ្យទេ?

លេង

ចម្លើយពីគម្ពីរ

អាច។ ព្រោះពេលលោកយេស៊ូមានប្រសាសន៍ថា៖«មនុស្សដែលមានសុខភាពល្អមិនត្រូវការគ្រូពេទ្យទេ តែអ្នកដែលឈឺទើបត្រូវការគ្រូពេទ្យ» លោកចង់បង្កប់ន័យថា អ្នកកាន់តាមលោកអាចទទួលការព្យាបាលខាងពេទ្យបាន។ (ម៉ាថាយ ៩:១២) ទោះជាគម្ពីរមិនមែនជាសៀវភៅខាងវេជ្ជសាស្ត្រក្ដី តែគម្ពីរផ្ដល់ការណែនាំដល់ពួកអ្នកដែលធ្វើឲ្យព្រះពេញចិត្ត។

សូមសួរខ្លួនឯងថា៖

១. តើខ្ញុំយល់អំពីការព្យាបាលដែលគេស្នើឲ្យទេ? គម្ពីរបានឲ្យយោបល់ថាយើងត្រូវស្វែងរកការព្យាបាលដែលគួរឲ្យទុកចិត្ត មិនមែនចេះតែ«ជឿគ្រប់ពាក្យទាំងអស់»ទេ។—សុភាសិត ១៤:១៥

២. តើខ្ញុំគួរសុំយោបល់ពីគ្រូពេទ្យផ្សេងទៀតទេ? ការមាន«ការប្រឹក្សាច្រើន»អាចមានប្រយោជន៍ណាស់ ជាពិសេសពេលដែលអ្នកមានបញ្ហាសុខភាពធ្ងន់ធ្ងរ។—សុភាសិត ១៥:២២

៣. តើការព្យាបាលនោះបំពានបង្គាប់ក្នុងគម្ពីរដែលឲ្យ«ជៀសវាង . . . ពីឈាម»ឬទេ?—សកម្មភាព ១៥:២០

៤. តើការព្យាបាលនោះទាក់ទងនឹងមន្តអាគមទេ? គម្ពីរផ្ដន្ទាទោសអ្វីដែល«ទាក់ទងនឹងពួកវិញ្ញាណអាក្រក់»។ (កាឡាទី ៥:១៩-២១) ដើម្បីដឹងថាការព្យាបាលនោះទាក់ទងនឹងមន្តអាគមឬយ៉ាងណា សូមពិចារណាសំណួរដូចតទៅ៖

តើបុគ្គលដែលព្យាបាលជំងឺនោះទាក់ទងនឹងមន្តអាគមទេ?
តើការព្យាបាលនោះផ្អែកទៅលើជំនឿដែលថាអ្នកជំងឺឈឺដោយសារព្រះខឹងគាត់ឬដោយសារមានអ្នកដាក់អំពើ?
តើការព្យាបាលនោះមានការសែនព្រេន សូត្រមន្ត ឬប្រើវត្ថុស័ក្តិសិទ្ធិណាមួយទេ?

៥. តើខ្ញុំខ្វល់ហួសហេតុអំពីសុខភាពរបស់ខ្ញុំទេ? គម្ពីរឲ្យយោបល់ថា៖«ចូរឲ្យមនុស្សទាំងអស់ឃើញថាអ្នករាល់គ្នាជាមនុស្សសមហេតុសមផល»។ (ភីលីព ៤:៥) ការមានគំនិតសមហេតុសមផល នឹងជួយឲ្យអ្នកផ្ដោតអារម្មណ៍ទៅលើ«អ្វីដែលសំខាន់ជាង» ដូចជាការបម្រើព្រះយេហូវ៉ាជាដើម។—ភីលីព ១:១០; ម៉ាថាយ ៥:៣