តើការជ្រមុជទឹកគឺជាអ្វី?
ចម្លើយពីគម្ពីរ
ការជ្រមុជទឹកគឺជាការពន្លិចខ្លួនទៅក្នុងទឹក។ a គម្ពីរបានរៀបរាប់អំពីការជ្រមុជទឹកជាច្រើន។ (សកម្មភាព ២:៤១) ក្នុងនោះក៏មានការជ្រមុជទឹករបស់លោកយេស៊ូដែរ ដែលបានធ្វើឡើងនៅក្នុងទន្លេយ៉ូដាន់។ (ម៉ាថាយ ៣:១៣, ១៦) អស់ជាច្រើនឆ្នាំក្រោយមក ពេលបុរសជនជាតិអេត្យូពីម្នាក់កំពុងធ្វើដំណើរតាមផ្លូវ គាត់បានទទួលការជ្រមុជទឹកនៅកន្លែងមួយដែលមាន«ទឹកច្រើន»។—សកម្មភាព ៨:៣៦-៤០
លោកយេស៊ូបានបង្រៀនថាអ្នកកាន់តាមលោកត្រូវទទួលការជ្រមុជទឹក។ (ម៉ាថាយ ២៨:១៩, ២០) សាវ័កពេត្រុសក៏បានលើកបញ្ជាក់អំពីសេចក្ដីបង្រៀននេះដែរ។—ពេត្រុសទី១ ៣:២១
ក្នុងអត្ថបទនេះ យើងនឹងពិចារណា
តើការជ្រមុជទឹកមានន័យអ្វី?
ការជ្រមុជទឹកគឺជាការបង្ហាញជាសាធារណៈថាបុគ្គលម្នាក់ដែលទទួលការជ្រមុជទឹកបានប្រែចិត្តពីអំពើខុសឆ្គងរបស់ខ្លួន ហើយសន្យាថាគាត់នឹងធ្វើតាមបំណងប្រាថ្នារបស់ព្រះដោយគ្មានល័ក្ខខ័ណ្ឌ។ នេះរួមបញ្ចូលការមានរបៀបរស់នៅដែលស្ដាប់បង្គាប់ព្រះនិងលោកយេស៊ូ។ អ្នកដែលទទួលការជ្រមុជទឹកកំពុងចាប់ផ្ដើមរស់នៅស្របតាមតម្រូវការរបស់ព្រះ ដើម្បីឲ្យពួកគេអាចរស់ជារៀងរហូត។
ការពន្លិចទៅក្នុងទឹកគឺជាការតំណាងការកែប្រែជីវិតរបស់បុគ្គលម្នាក់។ តើតាមរបៀបណា? គម្ពីរប្រៀបធៀបការជ្រមុជទឹកទៅនឹងការកប់។ (រ៉ូម ៦:៤; កូឡុស ២:១២) ពេលបុគ្គលម្នាក់ត្រូវពន្លិចទៅក្នុងទឹក គឺប្រៀបដូចជាគាត់បានស្លាប់ពីរបៀបរស់នៅពីមុន។ ពេលគាត់បានត្រូវលើកឡើងពីទឹក នេះប្រៀបដូចជាគាត់ចាប់ផ្ដើមជីវិតថ្មីក្នុងនាមជាគ្រិស្តសាសនិកដែលបានប្រគល់ខ្លួនជូនព្រះ។
តើគម្ពីរចែងយ៉ាងណាអំពីការជ្រមុជទឹកឲ្យទារក?
គម្ពីរមិនបង្រៀនថាទារកគួរទទួលការជ្រមុជទឹកទេ។ គម្ពីរបង្រៀនថាអ្នកដែលទទួលការជ្រមុជទឹកត្រូវបំពេញតាមតម្រូវការមួយចំនួន។ ជាឧទាហរណ៍ គាត់គួរយល់សេចក្ដីបង្រៀនបឋមក្នុងគម្ពីរ និងរស់នៅស្របតាមសេចក្ដីបង្រៀនទាំងនោះ។ ម្យ៉ាងទៀត គាត់ក៏បានប្រែចិត្តពីអំពើខុសឆ្គងដែរ។ ហើយតាមរយៈសេចក្ដីអធិដ្ឋាន គាត់បានប្រគល់ខ្លួនជូនព្រះ។ (សកម្មភាព ២:៣៨, ៤១; ៨:១២) ទារកមិនអាចធ្វើដូច្នោះបានទេ។
តើការជ្រមុជទឹកក្នុងនាមបិតាដែលនៅស្ថានសួគ៌ ក្នុងនាមបុត្ររបស់លោក និងក្នុងនាមឫទ្ធានុភាពបរិសុទ្ធរបស់លោកមានន័យយ៉ាងណា?
លោកយេស៊ូបានបង្រៀនពួកអ្នកកាន់តាមលោកឲ្យ«បង្រៀនមនុស្ស . . . ឲ្យក្លាយជាអ្នកកាន់តាមខ្ញុំ ហើយជ្រមុជទឹកឲ្យពួកគេ ក្នុងនាមបិតាដែលស្ថិតនៅស្ថានសួគ៌ ក្នុងនាមបុត្ររបស់លោក និងក្នុងនាមឫទ្ធានុភាពបរិសុទ្ធរបស់លោក ព្រមទាំងបង្រៀនពួកគេឲ្យកាន់តាមអ្វីៗទាំងអស់ដែលខ្ញុំបានបង្គាប់អ្នករាល់គ្នា»។ (ម៉ាថាយ ២៨:១៩, ២០) ពាក្យ«ក្នុងនាម» មានន័យថាបុគ្គលដែលទទួលការជ្រមុជទឹកទទួលស្គាល់សិទ្ធិអំណាចនិងឋានៈបិតាដែលនៅស្ថានសួគ៌ និងបុត្ររបស់លោក ព្រមទាំងតួនាទីនៃឫទ្ធានុភាពព្រះដែរ។ ជាឧទាហរណ៍ សាវ័កពេត្រុសបាននិយាយទៅកាន់បុរសម្នាក់ដែលខ្វិនពីកំណើតថា៖«ដោយនូវនាមលោកយេស៊ូគ្រិស្តពីក្រុងណាសារ៉ែត ចូរដើរទៅចុះ!»។ (សកម្មភាព ៣:៦) តាមរយៈកំណត់ហេតុនេះ យើងយល់អត្ថន័យកាន់តែច្បាស់ គឺថាពេត្រុសបានទទួលស្គាល់សិទ្ធិអំណាចរបស់គ្រិស្តនិងការធ្វើឲ្យបុរសខ្វិននោះជាសះស្បើយដោយអព្ភូតហេតុ។
«បិតាដែលស្ថិតនៅស្ថានសួគ៌»សំដៅទៅលើព្រះយេហូវ៉ា។ b ក្នុងនាមជាអ្នកបង្កើត អ្នកផ្ដល់ជីវិត និងជាព្រះដែលមានឫទ្ធានុភាពខ្លាំងក្លាបំផុត លោកមានសិទ្ធិអំណាចដ៏ខ្ពង់ខ្ពស់។—ដើមកំណើត ១៧:១; ការបើកបង្ហាញ ៤:១១
«បុត្ររបស់លោក» គឺជាលោកយេស៊ូគ្រិស្តដែលបានឲ្យជីវិតលោកដល់យើង។ (រ៉ូម ៦:២៣) យើងមិនអាចទទួលសេចក្ដីសង្គ្រោះទេ បើយើងមិនទទួលស្គាល់និងឲ្យតម្លៃតួនាទីសំខាន់របស់លោកយេស៊ូក្នុងគោលបំណងរបស់ព្រះសម្រាប់មនុស្សជាតិ។—យ៉ូហាន ១៤:៦; ២០:៣១; សកម្មភាព ៤:៨-១២
«ឫទ្ធានុភាពបរិសុទ្ធរបស់លោក» គឺជាកម្លាំងរបស់ព្រះ។ c លោកបានប្រើឫទ្ធានុភាពបរិសុទ្ធដើម្បីបង្កើតជីវិត ដើម្បីប្រាប់ព័ត៌មានដល់ពួកអ្នកប្រកាសទំនាយនិងអ្នកឯទៀត ព្រមទាំងដើម្បីឲ្យកម្លាំងដល់ពួកគេក្នុងការធ្វើតាមបំណងប្រាថ្នារបស់លោក។ (ដើមកំណើត ១:២; យ៉ូប ៣៣:៤; រ៉ូម ១៥:១៨, ១៩) ព្រះក៏ប្រើឫទ្ធានុភាពបរិសុទ្ធដើម្បីដឹកនាំមនុស្សឲ្យសរសេរគម្ពីរតាមគំនិតរបស់លោកដែរ។—ពេត្រុសទី២ ១:២១
តើជាអំពើខុសឆ្គងទេដែលទទួលការជ្រមុជទឹកម្ដងទៀត?
មនុស្សជាច្រើនសម្រេចចិត្តដូរសាសនា។ ប៉ុន្តែ ចុះបើពួកគេបានជ្រមុជទឹករួចហើយនៅវិហាររបស់ពួកគេ? តើជាអំពើខុសឆ្គងទេ បើពួកគេទទួលការជ្រមុជទឹកម្ដងទៀត? អ្នកខ្លះថាមែន។ ទស្សនៈរបស់ពួកគេប្រហែលជាមានមូលដ្ឋានពីអេភេសូរ ៤:៥ ដែលចែងថា៖«មានលោកម្ចាស់តែមួយ ជំនឿតែមួយ ការជ្រមុជទឹកតែមួយ»។ ទោះជាយ៉ាងណាក្ដី ខគម្ពីរនេះមិនបានន័យថាបុគ្គលនោះមិនអាចជ្រមុជទឹកម្ដងទៀតទេ។ ហេតុអ្វីយើងនិយាយដូច្នេះ?
បរិបទ។ ខមុននិងខក្រោយនៃអេភេសូរ ៤:៥ បង្ហាញថាសាវ័កប៉ូលកំពុងលើកឡើងអំពីតម្រូវការដែលគ្រិស្តសាសនិកពិតត្រូវមានដើម្បីមានសាមគ្គីភាពខាងជំនឿ។ (អេភេសូរ ៤:១-៣, ១៦) សាមគ្គីនេះអាចមានបាន លុះត្រាតែពួកគេធ្វើតាមលោកម្ចាស់យេស៊ូគ្រិស្តដូចគ្នា មានជំនឿដូចគ្នា ឬយល់ដឹងពីសេចក្ដីបង្រៀនគម្ពីរដូចគ្នា និងបំពេញតាមតម្រូវការពីបទគម្ពីរស្ដីអំពីការជ្រមុជទឹកដូចគ្នា។
សាវ័កប៉ូលបានលើកទឹកចិត្តអ្នកខ្លះដែលបានទទួលការជ្រមុជទឹករួចហើយ ឲ្យជ្រមុជទឹកម្ដងទៀត។ នេះដោយសារពួកគេបានទទួលការជ្រមុជទឹកដោយមិនបានយល់ពេញលេញអំពីសេចក្ដីបង្រៀន ដើម្បីធ្វើជាគ្រិស្តសាសនិក។—សកម្មភាព ១៩:១-៥
មានមូលដ្ឋានត្រឹមត្រូវក្នុងការជ្រមុជទឹក។ ដើម្បីទទួលការពេញចិត្តពីព្រះ ការជ្រមុជទឹកត្រូវមានមូលដ្ឋានទៅលើចំណេះត្រឹមត្រូវពីសេចក្ដីពិតក្នុងគម្ពីរ។ (ធីម៉ូថេទី១ ២:៣, ៤) បើបុគ្គលម្នាក់ទទួលការជ្រមុជទឹកដោយផ្អែកលើសេចក្ដីបង្រៀនបឋមខាងសាសនាដែលផ្ទុយពីគម្ពីរ ការជ្រមុជទឹកនោះមិនបានទទួលស្គាល់ពីព្រះទេ។ (យ៉ូហាន ៤:២៣, ២៤) ទោះជាបុគ្គលនោះប្រហែលជាមានចិត្តស្មោះក្ដី តែគាត់មិនប្រព្រឹត្តស្របតាម«ចំណេះត្រឹមត្រូវ»ឡើយ។ (រ៉ូម ១០:២) ដើម្បីទទួលការពេញចិត្តពីព្រះ គាត់ត្រូវរៀនសេចក្ដីពិតក្នុងគម្ពីរ ធ្វើតាមអ្វីដែលគាត់បានរៀន ប្រគល់ខ្លួនជូនព្រះ និងទទួលការជ្រមុជទឹកម្ដងទៀត។ ក្នុងកាលៈទេសៈនេះ ការជ្រមុជទឹកម្ដងទៀតមិនមែនជាអំពើខុសឆ្គងទេ។ ការពិត នោះជាអ្វីត្រឹមត្រូវដែលគួរធ្វើ។
ការជ្រមុជផ្សេងទៀតដែលបានរៀបរាប់ក្នុងគម្ពីរ
គម្ពីរបានរៀបរាប់អំពីការជ្រមុជផ្សេងទៀតដែលមានអត្ថន័យផ្សេងគ្នាពីការជ្រមុជទឹកក្លាយជាអ្នកកាន់តាមគ្រិស្ត។ សូមពិចារណាឧទាហរណ៍ខ្លះ។
ការជ្រមុជទឹកដែលបានធ្វើឡើងដោយយ៉ូហានដែលជាអ្នកជ្រមុជទឹកឲ្យគេ។ d ជនជាតិយូដានិងជនជាតិដទៃដែលកាន់សាសនាយូដាបានទទួលការជ្រមុជទឹកពីយ៉ូហាន។ ការជ្រមុជទឹកនេះតំណាងឲ្យការប្រែចិត្តពីអំពើខុសឆ្គងដែលពួកគេបានបំពានក្រឹត្យវិន័យម៉ូសេ។ ក្រឹត្យវិន័យនេះព្រះបានឲ្យដល់អ៊ីស្រាអែលតាមរយៈម៉ូសេ។ ដូច្នេះ ការជ្រមុជទឹកដែលយ៉ូហានបានធ្វើឲ្យពួកគេ គឺដើម្បីត្រៀមចិត្តបណ្ដាជនឲ្យទទួលស្គាល់មេស្ស៊ីជាលោកយេស៊ូពីណាសារ៉ែត។—លូកា ១:១៣-១៧; ៣:២, ៣; សកម្មភាព ១៩:៤
ការជ្រមុជទឹកដែលលោកយេស៊ូបានទទួល។ លោកយេស៊ូបានទទួលការជ្រមុជទឹកពីយ៉ូហានដែលជាអ្នកជ្រមុជទឹក ហើយការជ្រមុជទឹកនេះខុសពីការជ្រមុជទឹកឯទៀត។ លោកយេស៊ូជាបុគ្គលល្អឥតខ្ចោះ ហើយលោកមិនដែលធ្វើខុសឡើយ។ (ពេត្រុសទី១ ២:២១, ២២) ដូច្នេះ ការជ្រមុជនោះមិនមែនទាក់ទងនឹងការប្រែចិត្តឬ«ការសុំព្រះផ្ដល់នូវសមត្ថភាពវិនិច្ឆ័យដែលមិនផ្ដន្ទាទោស»នោះទេ។ (ពេត្រុសទី១ ៣:២១) ប៉ុន្តែ ការជ្រមុជទឹកនោះបានបង្ហាញថា លោកប្រគល់ខ្លួនជូនព្រះដើម្បីធ្វើតាមបំណងប្រាថ្នារបស់ព្រះដូចបានប្រកាសទុកជាមុនអំពីមេស្ស៊ីឬគ្រិស្ត។ នេះរួមបញ្ចូលការឲ្យជីវិតលោកដើម្បីយើងទាំងអស់គ្នា។—ហេប្រឺ ១០:៧-១០
ការជ្រមុជដោយឫទ្ធានុភាពបរិសុទ្ធ។ យ៉ូហានដែលជាអ្នកជ្រមុជទឹកនិងលោកយេស៊ូគ្រិស្ត បាននិយាយអំពីការជ្រមុជដោយឫទ្ធានុភាពបរិសុទ្ធ។ (ម៉ាថាយ ៣:១១; លូកា ៣:១៦; សកម្មភាព ១:១-៥) ការជ្រមុជនេះមិនដូចគ្នានឹងការជ្រមុជទឹកក្នុងនាមឫទ្ធានុភាពបរិសុទ្ធទេ។ (ម៉ាថាយ ២៨:១៩) ហេតុអ្វី?
ព្រោះមានតែអ្នកកាន់តាមលោកមួយចំនួនតូចប៉ុណ្ណោះដែលបានត្រូវជ្រមុជដោយឫទ្ធានុភាពបរិសុទ្ធ។ អ្នកទាំងអស់នោះជាពួកអ្នកដែលព្រះបានរើសតាំងដោយឫទ្ធានុភាពបរិសុទ្ធ ដោយសារពួកគេបានត្រូវជ្រើសរើសឲ្យបម្រើជាមួយនឹងគ្រិស្តនៅស្ថានសួគ៌ជាស្ដេចនិងជាសង្ឃដែលគ្រប់គ្រងមកលើផែនដី។ e (ពេត្រុសទី១ ១:៣, ៤; ការបើកបង្ហាញ ៥:៩, ១០) រាស្ត្រដែលនៅក្រោមការគ្រប់គ្រងរបស់ពួកគាត់ គឺជាមនុស្សរាប់លាននាក់ដែលជាអ្នកកាន់តាមលោកយេស៊ូ។ មនុស្សទាំងនោះមានសេចក្ដីសង្ឃឹមរស់ជារៀងរហូតនៅក្នុងសួនឧទ្យានលើផែនដី។—ម៉ាថាយ ៥:៥; លូកា ២៣:៤៣
ការជ្រមុជក្នុងគ្រិស្តយេស៊ូនិងការជ្រមុជក្នុងសេចក្ដីស្លាប់របស់លោក។ បុគ្គលដែលបានទទួលការជ្រមុជដោយឫទ្ធានុភាពបរិសុទ្ធ ក៏«ជ្រមុជក្នុងគ្រិស្តយេស៊ូ»ផងដែរ។ (រ៉ូម ៦:៣) ដូច្នេះ ការជ្រមុជនេះទាក់ទងនឹងពួកអ្នកកាន់តាមលោកយេស៊ូដែលបានត្រូវរើសតាំង។ ពួកគាត់នឹងគ្រប់គ្រងជាមួយលោកយេស៊ូនៅស្ថានសួគ៌។ ដោយទទួលការជ្រមុជក្នុងលោកយេស៊ូ ពួកគាត់បានក្លាយទៅជាសមាជិកនៃក្រុមជំនុំដែលព្រះបានរើសតាំង ដែលមានលោកយេស៊ូជាប្រមុខ ហើយពួកគាត់ជាអវយវៈ។—កូរិនថូសទី១ ១២:១២, ១៣, ២៧; កូឡុស ១:១៨
គ្រិស្តសាសនិកដែលព្រះបានរើសតាំងក៏ត្រូវ«ជ្រមុជក្នុងសេចក្ដីស្លាប់របស់[លោកយេស៊ូ]»ដែរ។ (រ៉ូម ៦:៣, ៤) ពួកគាត់យកតម្រាប់លោកយេស៊ូ ដោយប្រើជីវិតរបស់ពួកគាត់ដើម្បីធ្វើអ្វីដែលព្រះពេញចិត្ត មិនមែនដើម្បីបំពេញចិត្តខ្លួនឡើយ។ ហើយដូចលោកយេស៊ូ ពួកគាត់ដឹងថាពួកគាត់នឹងមិនរស់រហូតនៅផែនដីទេ។ ក្នុងន័យធៀប ពួកគាត់បញ្ចប់ការជ្រមុជក្នុងសេចក្ដីស្លាប់របស់លោកយេស៊ូ កាលណាពួកគាត់ស្លាប់និងត្រូវប្រោសឲ្យរស់ឡើងវិញជាបុគ្គលវិញ្ញាណនៅស្ថានសួគ៌។—រ៉ូម ៦:៥; កូរិនថូសទី១ ១៥:៤២-៤៤
ការជ្រមុជដោយភ្លើង។ យ៉ូហានដែលជាអ្នកជ្រមុជទឹកបាននិយាយទៅកាន់ក្រុមមនុស្សដែលស្ដាប់គាត់ថា៖«លោក[យេស៊ូ]នឹងជ្រមុជអ្នករាល់គ្នាក្នុងឫទ្ធានុភាពបរិសុទ្ធនិងក្នុងភ្លើង។ លោកកំពុងកាន់ប្រដាប់រោយស្រូវ ក៏នឹងសម្អាតលានបញ្ជាន់ស្រូវរបស់លោកឲ្យស្អាតធេង។ លោកនឹងប្រមូលស្រូវសាលីដាក់ក្នុងជង្រុក តែអង្កាមវិញ លោកនឹងដុតក្នុងភ្លើងដែលមិនអាចត្រូវពន្លត់បានឡើយ»។ (ម៉ាថាយ ៣:១១, ១២) សូមកត់សម្គាល់ភាពខុសគ្នារវាងការជ្រមុជក្នុងឫទ្ធានុភាពនិងការជ្រមុជក្នុងភ្លើង។ តើយ៉ូហានចង់មានន័យយ៉ាងណា?
ស្រូវសាលីតំណាងឲ្យពួកអ្នកដែលស្ដាប់បង្គាប់លោកយេស៊ូ។ ពួកគាត់អាចទទួលការជ្រមុជក្នុងឫទ្ធានុភាពបរិសុទ្ធ។ អង្កាមតំណាងឲ្យពួកអ្នកដែលមិនស្ដាប់បង្គាប់លោកយេស៊ូ។ ទីបញ្ចប់របស់ពួកគេគឺការជ្រមុជក្នុងភ្លើងដែលតំណាងឲ្យការបំផ្លាញជារៀងរហូត។—ម៉ាថាយ ៣:៧-១២; លូកា ៣:១៦, ១៧
a ពាក្យភាសាក្រិចដែលបកប្រែថា«ការជ្រមុជទឹក» សំដៅទៅលើ«ការពន្លិចខ្លួនទៅក្នុងទឹក» យោងទៅតាមVine’s Complete Expository Dictionary of Old and New Testament Words។
b យេហូវ៉ាគឺជានាមរបស់ព្រះ។ (ចម្រៀងសរសើរព្រះ ៨៣:១៨) សូមមើលអត្ថបទដែលមានចំណងជើងថា«តើព្រះយេហូវ៉ាជានរណា?»។
c សូមមើលអត្ថបទដែលមានចំណងជើងថា«តើវិញ្ញាណបរិសុទ្ធជាអ្វី?»។
d សូមមើលអត្ថបទដែលមានចំណងជើងថា«តើយ៉ូហានដែលជាអ្នកជ្រមុជទឹកជាអ្នកណា?»។
e សូមមើលអត្ថបទដែលមានចំណងជើងថា«តើអ្នកណានឹងទៅស្ថានសួគ៌?»។
f គម្ពីរក៏ប្រើពាក្យ«ការជ្រមុជ»ដើម្បីរៀបរាប់អំពីពិធីជម្រះសម្អាតដែរ ដូចជាការពន្លិចគ្រឿងប្រដាប់ប្រដាទៅក្នុងទឹកជាដើម។ (ម៉ាកុស ៧:៤; ហេប្រឺ ៩:១០) តែនេះផ្សេងគ្នាពីការជ្រមុជទឹករបស់លោកយេស៊ូនិងពួកអ្នកកាន់តាមលោក។
លោកអ្នកក៏ប្រហែលជាចូលចិត្តដែរ
សំណួរនិងចម្លើយពីគម្ពីរ
តើសាសនាទាំងអស់គឺដូចគ្នា ហើយនាំឲ្យស្គាល់ព្រះឬទេ?
កត្ដាពីរយ៉ាងដែលបានលើកឡើងក្នុងគម្ពីរផ្ដល់ចម្លើយ។
សេចក្ដីបង្រៀនសំខាន់ៗក្នុងគម្ពីរ
តើព្រះពេញចិត្តនឹងការគោរពប្រណិប័តន៍ទាំងអស់ឬទេ?
មនុស្សជាច្រើនគិតថាសាសនាណាក៏ដូចសាសនាណាដែរ។
សំណួរពីយុវវ័យ
តើខ្ញុំគួរទទួលការជ្រមុជទឹកឬទេ? អត្ថន័យនៃការជ្រមុជទឹក
បើប្អូនកំពុងគិតចង់ទទួលការជ្រមុជទឹក ដំបូងប្អូនគួរយល់អំពីអត្ថន័យនៃការជ្រមុជទឹកជាមុនសិន។
