ហេតុអ្វីពិបាកមានសន្តិភាពពេញពិភពលោកម្ល៉េះ?

លេង

ចម្លើយពីគម្ពីរ

ទោះជាមនុស្សខំព្យាយាមធ្វើឲ្យពិភពលោកមានសន្តិភាពតាំងពីយូរមកហើយក្ដី ការព្យាយាមនោះមិនបានសម្រេចទេ ហើយនៅថ្ងៃមុខក៏មិនបានសម្រេចដែរ។ ហេតុអ្វី? គឺដោយសារមូលហេតុមួយចំនួន៖

«[មនុស្ស]គ្មានសមត្ថភាពតម្រង់ជំហានរបស់ខ្លួន»។ (យេរេមា ១០:២៣) មនុស្សមិនបានត្រូវបង្កើតមកឲ្យមានសមត្ថភាពឬសិទ្ធិគ្រប់គ្រងខ្លួនឯងទេ ហេតុនេះពួកគេនឹងមិនអាចធ្វើឲ្យមានសន្តិភាពដ៏ស្ថិតស្ថេរបានឡើយ។
«កុំទុកចិត្តពួកមានឋានៈខ្ពស់ កុំទុកចិត្តមនុស្ស ព្រោះពួកគេមិនអាចជួយសង្គ្រោះបានឡើយ។ ពេលគេផុតដង្ហើម គេត្រឡប់ទៅជាដីវិញ។ នៅថ្ងៃនោះឯង ការគិតគូររបស់គេក៏រលាយសាបសូន្យទៅ»។ (ចម្រៀងសរសើរព្រះ ១៤៦:៣, ៤) សូម្បីតែពួកអ្នកនយោបាយដែលមានបំណងចិត្តល្អបំផុត ក៏មិនអាចដោះស្រាយទាំងស្រុងនូវវិបត្តិដែលបណ្ដាលឲ្យមានសង្គ្រាមបានទេ។
«នៅគ្រាចុងក្រោយបង្អស់នឹងលំបាកខ្លាំងណាស់ ព្រោះមនុស្សនឹង . . . កាចសាហាវ មិនស្រឡាញ់គុណធម៌ ជាអ្នកក្បត់ ធ្វើតាមទំនើងចិត្ត មានមោទនភាពហួសហេតុពេក»។ (ធីម៉ូថេទី២ ៣:១-៤) យើងកំពុងរស់នៅ«គ្រាចុងក្រោយបង្អស់»នៃរបៀបរបបពិភពលោកដ៏អាក្រក់នេះ គឺជាគ្រាមួយដែលចិត្តគំនិតរបស់មនុស្សពិបាកធ្វើឲ្យមានសន្តិភាព។
«វេទនាដល់ផែនដីនិងសមុទ្រវិញ ពីព្រោះមេកំណាចបានចុះទៅឯអ្នករាល់គ្នាទាំងមានកំហឹងយ៉ាងខ្លាំង ដោយដឹងថាវាមានពេលតែបន្តិចបន្តួចទេ»។ (ការបើកបង្ហាញ ១២:១២) មេកំណាចដែលជាសត្រូវរបស់ព្រះបានត្រូវដាក់កម្រិតឲ្យនៅក្បែរៗផែនដី ហើយវាបានជំរុញមនុស្សឲ្យមានចិត្តគំនិតកាចសាហាវដូចជាវាដែរ។ ដរាបណាវាជា«អ្នកគ្រប់គ្រងពិភពលោកនេះ» ដរាបនោះយើងមិនអាចមានសន្តិភាពបានឡើយ។—យ៉ូហាន ១២:៣១
«រាជាណាចក្រ[ព្រះ]នឹងបំបាក់បំបែក ថែមទាំងកម្ទេចរាជាណាចក្រ[ដែលប្រឆាំងព្រះ]ឲ្យសាបសូន្យទៅ ហើយមានតែរាជាណាចក្រនេះប៉ុណ្ណោះនឹងស្ថិតស្ថេរជារៀងរហូត»។ (ដានីយ៉ែល ២:៤៤) មានតែរាជាណាចក្រព្រះប៉ុណ្ណោះនឹងបំពេញសេចក្ដីប៉ងប្រាថ្នារបស់យើងដែលចង់មានសន្តិភាពជារៀងរហូត មិនមែនរដ្ឋាភិបាលមនុស្សណាឡើយ។—ចម្រៀងសរសើរព្រះ ១៤៥:១៦