O maxilu a sangulukile kiavulu, kioso kia bhana o ngolokela íii: “Mua-nda sanguluka mu kuijiia kuma o Bibidia ia Hebalaiku [o Kikutu Kiobhe] io lungulule kiá. O [vidiu] ia mu ngalavala o divulu dia Dimatekenu a zubha kiá o ku i ngalavala!”

O ngolokela íii a i bhange mu diskursu dia sukina dio bhange mu kiônge kia dikota kia Jimbangi ja Jihova mu Dimi dia Ijimbuete ia América.

Ku muvu ua 2005, o Jimbangi ja Jihova a mateka o ku lungulula o Tradução do Novo Mundo Das Escrituras Sagradas mu Dimi dia Ijimbuete ia América, a mateka ni divulu dia Matesu. Ku muvu ua 2010, o 27 a madivulu a tokala ku mbandu ia Bibidia ene mu i xana kuila Kikutu Kiokulu o zubhe o kua lungulula mu Dimi dia Ijimbuete ienii.

O Jimbangi ja Jihova a mu lungulula ué mbandu ja ji Bibidia mu madimi a mukuá atanu a ijimbuete.

Mukonda diahi a mu bhanga o kikalakalu kioso kiki? Mukonda o Jimbangi ja Jihova ejiia kuila maxilu avulu nuka a di longele o Bibidia. O ku lungulula ni kidi kioso o Bibidia kála kiene mu zuela o maxilu, ku kuatekesa athu avulu maxilu ku tendela o mak’â Nzambi ni ku kala ni ukamba uambote ni muéne. Kiebhi kiene mu divua o athu mu ku mona o Bibidia íii?

Saí munzangala, muxilu, uambe kiki: “Kioso kia lungulula o divulu dia Matesu mivu ku dima, nga mono kuila Jihova Nzambi ua kexile mu ngi londekesa kuila ua ngi zolo kiavulu, o ku sanguluka kuami kua di bandekesa dingi kioso kia lungulula ué o divulu dia Dimatekenu. Nzambi ua mesena kuila ngi tendela kiambote o Maka mê.”

Saí muhatu, muxilu, uambe ué kiki: “Ki i bhonzo ku tendela o ijimbuete, i ngi tula muene ku muxima! Eme nga uabhela kiavulu o Bibidia. Ngi mona kuila Jihova ua mesena kuila ngi tanga o Maka mê oso, velusu mu velusu phala ngi tene ku muijiia kiambote. O Bibidia íii i ngi tula ku muxima, i ngi kuatekesa kuzuela ioso ia ngi kala ku muxima kua muéne kioso ki ngi samba.”