Kuma tu Jimbangi ja Jihova, tubhanga nguzu phala kwongeka o miji, kikale o miji yetu kikale ya akwetu. Etu tuxila Nzambi o Mubhangi wa miji. (Dimatekenu 2:21-24; Efezu 3:14, 15) Mwene walongo itumu mu Bibidya ya kwatekesa kya athu ku mundu woso kukala ni ukaza wa zediwa.

 Etu tubhanga yoso ni yoso phala kukayela o itendelesulu ya Bibidya mukonda itukwatekesa kukala tu anumi, ahatu ni jitata jambote. (Jisabhu 31:10-31; Efezu 5:22–6:4; 1 Timote 5:8) O unjimu utusanga mu Bibidya utena kukwatekesa katé mwene ni miji mwala athu katokala mu ngeleja imoxi. (1 Phetele 3:1, 2) Ivwa yazwela o athu yalungu ni makaza mâ a kituka Jimbangi ja Jihova:

•   “Mu mivu isamanu ya dyanga ya ukaza wetu, twexile mu zoka kyavulu. Kyoso muhatu wami Ivete kyakituka Mbangi ya Jihova, o mwanyu wê wa dibandekesa dingi. Wamateka kungizola dingi mu ukulu ndenge. Kulungulula o ukexilu wê, kwabhulula o ukaza wetu.”—Clauir mukwa Brazil.

•   “Kyoso mwadi wami Chansa, kyamateka kudilonga o Bibidya ni Jimbangi ja Jihova, eme ngexile mu muzukutisa, mukonda ngexile mubanza kwila ene awanuna o miji. Maji kindala ngimona kwila, o Bibidya ya kwatekesa o ukaza wetu.”—Agness mukwa Zambia.

 Mu ukunji wetu tulondekesa ku athu oso kwila, kubelesela o itumu ya Bibidya kutena ku akwatekesa:

•   Kusola muthu watokala phala kukazalanê

•   Kukolokota ku muvu wa dyanga wa ukaza

•   Kudibhana ni ukowakime

•   Kulanga kyambote o kitadi

•   Kweha o kuzoka

•   Kudilonga o kuloloka

•   Kulonga o twana

 Sayi ithangana kubhekela maka. Mu kifika, ku muvu wa 1998 o instituto de investigação Sofres ya tokwesa maukaza mwala ngó dikaza dimoxi dya kituka Mbangi ya Jihova. O kikalakalu kiki kyalondekesa kwila, mu makwinyi ayadi a makaza sayi dikaza dimoxi dyexile ni ibhidi yavulu.

 Jezú wa kanena kwila o yo abelesela o ilongesu yê, sayi ithangana eji dibhana ni ibhidi ku mwiji. (Matesu 10:32-36) O mukwa musoso Will Durant wa mono kwila, o athu exile mutatela “o milongi ya lungu ni Kidistu” kwila, yexile mu mwanga o miji ku Utuminu wa akwa Loma. a Lelu, sayi Jimbangi ja Jihova ene mu atatela we kiki. Maji o kwila o dikaza ukituka Mbangi ya Jihova mwéne ubhekela o maka mu ukaza?

 Mu kudibhana ni kitatelu kya kwila o Jimbangi ja Jihova ene muwana o miji, o Tribunal Europeu dos Direitos Humanos yambe kwila, o athu ku mwiji ki Jimbangi ja Jihova mu ithangana yavulu ene mu bhanga kavwanza mukonda dya “kukamba kuxila ni kuxikina kwila kala muthu ku mwiji wala ni ufolo wa kusola o ngeleja yê.” O inzo yiyi ya kufundisa yambe dingi.” b O maka yá kene mubhita ngo ni Jimbangi ja Jihova, maji ene mubhita we kyavulu ni makaza ka tokala mu ngeleja imoxi. Né mwene se a azukutisa ku jingeleja ja makutu o Jimbangi ja Jihova adikwatenena ku ilongesu ya Bibidya. “Kanenu kuvutwila athu oso phulu mu phulu. . . . Bhangenu yoso i mwa tena, phala mu kale ku paze ni athu oso.”—Loma 12:17, 18.

 O Jimbangi ja Jihova akayela o kitendelesu kya Bibidya kya kukazala “ngó mwa Ngana,” mba kuzala ni Mbangi ya Jihova ni mukwa. (1 Kolindu 7:39) O kitendelesu kiki kya Bibidya, kyatokala mwene. Mu kifika, mu Journal of Marriage and Family yosoneke ku muvu wa 2010, yambe kwila o “makaza atokala mu ngeleja imoxi, ala ni kixikanu kimoxi, o ukaza wa unangenena dingi.” c

 Ku mbandu ya mukwa, o Jimbangi ja Jihova kasuwinisa o jiphange jâ mu nzumbi kudisenga ni anumi mba ahatuwâ ki Jimbangi ja Jihova. O Bibidya yamba: “Se phange wala ni muhatu kaxikana Ngana, anga o muhatu wandala kutunga nê, o diyala katokala ku muxisa. Se muhatu wala ni diyala kaxikana Ngana, maji o diyala wandala kutunga-nê, o muhatu katokala ku muxisa.” (1 Kolindu 7:12, 13) O Jimbangi ja Jihova abelesela o kitumu kiki.