•  Kyebhi o Jimbangi ja Jihova kyene mutena kwijiya se sayi fesa atokala kwibhanga mba kana?

•  O kwila o Jimbangi ja Jihova azolo o jindandu jâ ene mubhanga o jifesa joso?

•  O kwila kwene jifesa, Jimbangi ja Jihova ajijidika akwa phala ka jibhange?

 Ande dya kubhanga fesa yosoyoso, o Jimbangi ja Jihova asota kwijiya se ihi ilonga o Bibidya. Sayi jifesa ni izuwa ya kunyoha a ifidisa mu Bibidya. Kyoso kiki kibhita, o Jimbangi ja Jihova adituna kwibhanga. Maji yalungu ni jifesa jengi, kala muthu mudye mwene usola, ene atokala kubhanga nguzu “phala kukala ni kitongolwelu kyazele, bhu pholo ya Nzambi ni ku athu.”—Ikalakalu 24:16.

 Ande dya kuxikina mba kudituna kubhanga fesa, o Jimbangi ja Jihova ene mudibhanga o ibhwidisu ya kayela. a

•   O kwila o fesa yiyi yalungu ni milongi ki yatundu mu Bibidya?

   Ihi izwela o Bibidya: “Jihova wambe, wixi: ‘Tundenu mwaxaxi kâ, mu disandule. Kanenu kukwata mu ima yaxidi.’”—2 Kolindu 6:15-17.

   Phala kudituna kukwata mu milongi yamakutu kifwa milongi kiyalungu ni milongi ya Bibidya, o Jimbangi ja Jihova kene mubhanga o jifesa jalungu ni ima ya kayela.

   Jifesa jalungu ni ubhezelu wa jinzambi jengi. Jezú wambe: “Mu kubheza, kikale ubheza ngó Jihova Nzambi yé, mwéne ngó u mu sidivila.” (Matesu 4:10) Mu kukayela o kitumu kiki, o Jimbangi ja Jihova kene mubhanga o jifesa ja Natale, Phasu ni ya Kizuwa Kya Akalakadi mukonda o jifesa jiji jalungu ni ubhezelu wa jinzambi jengi muveji dya Jihova. Kumbandu yamukwa kene mubhanga we o jifesa ja kayela.

  •  Kwanzaa. Kala kizwela o Enciclopédia de Estudos Negros, o kizwelu kwanza “kyatundu mu matunda ya kwanza mudimi dya suaíli kilombolola ‘o jimbutu ja dyanga,’ [kiki kilombolola kwila] o jifesa jiji jalungu ni jifesa ja dyanga ja kubhongolola o jimbutu jexile mu bhanga ku Afrika.” Sumbala athu avulu amona o fesa ya kwanza kala ki yalungu ni ubhezelu, o divulu Enciclopédia de Religião Africana disokesa o fesa yiyi ni fesa yengi ku Afrika, kwene “musatela o jimbuto ja dyanga ku jinzambi ja makutu ni kujindandu jafu phala kwa sakidila,” dizwela we dingi: “O ima isakidila yene imoxi mukonda dya mabesa a mwenyu atambula kwa axahulu mâ mukonda dya kubhanga o fesa ya afro-americano Kwanzaa.”

  •  O fesa ya Lua mba Festival do Meio do Outono. Mu fesa yiyi “o athu abhana kijingu kwa nzambi ya mbeji.” Mu fesa yiyi “o ahatu a fukama mu kubheza o nzambi yiyi, ya muhatu, mu dimi dya Chineji o kubhanga kiki a kixana kowtow.”—Kyene kya zwela o divulu Religiões do Mundo—Enciclopédia Abrangente de Crenças e Práticas.

  •  Noruz (Nowruz). “O ukexilu wokulu wakubhanga o fesa yiyi watundu mu mbanza ya zoroastrismo, kiki kyene o kizuwa kyabetakota mu Calendario Zoroastriano. . . . Bhengebhenge, mu ngoloxi, akijiya kala Rapithwin amwambata koxi a mavu mu nzumbi ya mbambi, mukuvutuka amutambula ni fesa mu ngoloxi mu kizuwa kya Norux, kala kizwela a tradição zoroastriana.”—Unesco.

  •  O fesa ya Shab-e Yalda. Kala kizwela o divulu Sufismo na História Secreta da Pérsia o fesa yiyi ya solstício ya inverno “yalungu ni ubhezelu wa Mitra o nzambi ya mukengeji.” O athu axikina we kwila o fesa yiyi yalungu ni ubhezelu wa jinzambi akwa Loma ni jinzambi ja mwanya akwa Ngeleku. b

  •  O Fesa Yakusakidila (Dia de Ação de Graças). Kala o fesa ya Kwanzaa, o fesa yiyi yalungu ni fesa ya kubhongolola ibhana kijingu ku jinzambi javulu. Mukubhita thembu, “o jifesa jiji exile mujibhanga ku athu avulu, jamateka kumoneka we mungeleja ya jikidistá.”—Uma Grande e Divina Aventura—Os Peregrinos e a Lenda do Primeiro Dia de Ação de Graças.

   Jifesa jalungu ni ijila yawanga ni kuta jisolote. O Bibidya izwela kwila yo akwa ‘kuzala o meza phala o nzambi ya jisolote’ ala bhwaxaxi ka yo a “mu batuka kwa Jihova.” (Izaya 65:11) Mukonda dya kiki, o Jimbangi ja Jihova kene mukabhanga o jifesa ja kayela:

  •  Ivan Kupala. “O athu adyelela kwila, mu kithangana kya fesa yiyi [Ivan Kupala] o athu atena kutambula kutena bhukaxi ka ibhangelu se aswina ni kukala ni solote,” kyene kyazwela o divulu O A a Z de Belarus. Kudimatekenu, o fesa yiyi yalungile ni jipagão akexile mwibhanga mukonda dya solstice ya kixibhu. Maji kala kilondekesa o Enciclopédia da Cultura Russa Contemporânea, “o fesa yiyi ya jipagão ene mwibhanga kala fesa ya Ngele [o “kizuwa kikola” kya Nzwá dya Batizu] kyoso o jipagão kyaxikina o Ukidista.”

  •  O muvu wa ubhe wa Lunar (Muvu wa ubhe wa akwa China mba Corea). “O kithangana kiki kya muvu kyene kyabeta dingi kota mu kubhangesa o miji, o makamba ni jindandu kubhanga yoso phala kukala ni solote, kujingisa o jinzambi ni jinzumbi ni kumesana kwila o muvu wakayela ubhekela jisolote, o ithangana yengi kumuvu ndenge.” Kiki kibhita we ku fesa ya Muvu Wa ubhe wa akwa Corea “ne mwene a bheza o jindandu jafu, a bhanga ijila phala kukaya jinzumbi jayibha ni kubhangesa kwila o muvu wa ubhe ubhekela jisolote, ni kuzambula phala kwijiya ihi yanda bheka o Muvu Wa ubhe.”—Enciclopédia das Comemorações de Ano-Novo ao Redor do Mundo.

   O fesa yalungu ni kidyelelu kya kwila nemwene se o muthu wafu, sayi hanji kima moxi dye kikala kumwenyu. O Bibidya yamba kwila se o muthu wafu seku kima kikala dingi kumwenyu. (Izekiyele 18:4) Mukonda dya kima kiki o Jimbangi ja Jihova kene mubhanga o jifesa jakayela, jixikinisa kwila se muthu wafu sayi hanji kima moxi dye kikala kumwenyu:

  •  Kizuwa kya madifundu. Kala kizwela o Nova Enciclopédia Católica, o kizuwa kiki, kizuwa kya “kulembalala o madifundu oso”.O divulu didi dizwela we kwila “Tunde kumuvu wa 500 A.K.K. ndu 1500 K.K. o athu a dyelele kwila, mu kizuwa kiki o madifundu eji tena kumoneka kala: Madimonyu, aloji, dizote ni ima yakamukwa, kwa yo a atalatala kyayibha kyoso kya kexile ku mwenyu.”

  •  Fesa ya Qingming (Ching Ming) ni Fesa ya Madimonyu Ala ni Nzala. O jifesa jiyadi jiji ene mu jibhanga phala kubhana kijingu ku jindandu jafu. O divulu Celebrando os Costumes da Vida ao Redor do Mundo — De Chás de Bebê a Funerais, dizwela kwila mu kithangana kya fesa ya Ching Ming, “ ene mu kwoha o makudya, makunwa, ni kitadi phala o athu afu ka divwe dinyota, nzala ni kukamba kithadi.” O divulu dizwela we kwila “mu kithangana kya Mbeji ya Madimonyu Ala ni Nzala bhengebhenge mu kithangana kya lua cheia, [o yo a bhanga mbandu mu fesa yiyi a dyelela kwila] o athu ala kumwenyu a beta dingi kota kudizukama ni madimonyu, o mawusuku wengi ku muvu ndenge, mu kiki o athu atokala kubhanga yoso phala kukala kupaze ni yo afu ni kubhana kijingu ku jindandu jafu.”

  •  O fesa ya Chuseok. O divulu A Tradição Coreana de Religião, Sociedade e Ética dizwela kwila, o kubhanga o fesa yiyi kwalungu ni “kusatela makudya ni vinyu kwa yo afu kya.” O kusatela o ima yiyi kulombolola kwila o muthu wa dyelela kwila “sayi kima moxi dya muthu kikala hanji kumwenyu ne mwene kyoso kyafu.”

   Jifesa jalungu ni wanga. O Bibidya yamba: “[Woso] mukwa kuzambula mizambu, mba mukwa kusuma, mba mukwa kulandula isuma, mba u kala muloji mba mukwa kubhuwíka, mba mukwa kutaha ngombo ya jinzambi, mba mukwa kubhanga jiphata; ki mu kale we mukwa kwibhula phangu ku ma-difundu afwa kyá . . . kwa Jihova mwenyu mukwa-phulu.” (Matendelelu 18:10-12) Phala ka bhange mbandu mu ima yalungu ni wanga ni kuzambula, o Jimbangi ja Jihova kene mu bhanga o fesa ya Halloween mba o jifesa jakayela:

  •  O fesa ya Muvu wa ubhe wa Tamil ni Cingalês. “O ijila yalungu ni kubhanga o jifesa jiji . . .yalungu ni kwijiya ima bhukaxi ka kuzambula phala kubheka jisolote.”—Enciclopédia do Sri Lanka.

  •  Fesa ya Songkra (Muvu Wa ubhe wa Akwa Tailandia). Kala kizwela o divulu Comida, Banquetes e Fé Enciclopédia de Cultura Alimentar nas Religiões do Mundo o dijina dya fesa yiyi ya jixi ja Asia “dyatundu mu kizwelu Sanskrit . . . Kilombolola ‘kwenda’ mba ‘kubhiluka ku mbandu yengi,’ [o fesa yiyi] ilondekesa o dimatekenu dya njila i bhanga o mwanya ku kibuka kya jithethembwa akixana zodiacal de Áries.”

   Fesa yalungu ni kitumu kya Mozé, kya suku kyoso Jezu kyabhana o mwenyu we kala sata. O Bibidya yamba: “Mukonda Kidistu mwéne o dizubhilu dya Kijila.” (Loma 10:4) Kate lelu o Jikidista ene mukatula mbote mu itumu ya Kitumu Kya Mozé a kibhana ku kifuxi kya Izalayele mukulu. Maji, ene kene mubhanga o jiifesa jalungu ni Kitumu Kya Mozé, bhengebhenge yo yalungu ni wijilu wa Mexya, mukonda kala Jikidistá tudyelela kwila mwene weza kya. O Bibidya yamba: “O ima yiyi izuzumbya ngó ya ima yeji kwiza kupholo, maji o Kidistu mwéne o kidi.” (Kolose 2:17) Mukonda dya ima yiyi ni mukonda we kwila sayi jifesa jiji jalungu ni ima ki yalungu ni Bibidya, o Jimbangi ja Jihova kene mubhanga o jifesa jakayela:

  •  Hanuká. O fesa yiyi a ibhanga mukonda dya kubhakula o tembulu wa Jijudé ku Jeluzaleme mu veji yakayadi. Maji o Bibidya itutangela kwila, Jezú wakituka Mukunji Wadikota mu kubokona “mubalaka [mba tembulu] ya beta dingi kota, yayuka dingi, ka ibhange ku athu, ki yatokala mu ngongo mumu.” (Jihebelewu 9:11) Phala o Jikidistá o tembulu yiyi mu nzumbi yabhingana o tembulu mu Jeluzaleme.

  •  Rosh Hashaná (Muvu wa ubhe wa Jijudé). O fesa yiyi yalungu ni kizuwa kyadyanda ku muvu wa Jijudé. Mukulu o fesa yiyi yalungile ni kusatela ima kwa Nzambi. (Dyalwilu 29:1-6) Maji Jezú Kidistu kala Mexiya, wabhwisa o “jisata . . . ni mibhaku ya musa,” mu kiki Nzambi kaxikina dingi o jisata jiji.—Daniyele 9:26, 27.

•   O kwila o fesa yiyi yalungu ni Isangela ya Jingeleja?

   Ihi izwela o Bibidya: “O muthu waxikana Ngana, utena kudilunga ni yó kaxikana Ngana? O iteka ki itokala kukala mu tembulu ya Nzambi.”—2 Kolindu 6:15-17.

   O Jimbangi ja Jihova asota kudibhana kyambote ni athu oso, axila we o ufolo wa athu kusola se anda tokala mu ngeleja yebhi, maji ene kene mubhanga mbandu mu jifesa jalungu ni isangela ya jingeleja, kala o jifesa ja kayela.

   Fesa ibhana kijingu ku mutwameni wa ngeleja mba ilondekesa kwila o isangela ya jingele atena kubheza kumoxi. Mu ukulu kyoso Nzambi kyendesa o mundu wê mu ixi mwexile athu exile mubheza jinzambi jengi, mwene wa atendelesa: “Kimute nawu kikutu, kimute we kikutu ni jinzambi jâ. . . . . [Se musidivila] o jinzambi jâ, sé phata kiki kyeji kala mubhetu phala enu.” (Makatukilu 23:32, 33) Mukonda dya ima yiyi, o Jimbangi ja Jihova kene mubhanga mbandu mu jifesa jakayela.

  •  Loi Krathong. Mu kithangana kya fesa yiyi ya akwa Tailandia, “O athu abhanga matijela ni mafwe, atamu jivela mba wasu wa dizumba mu kusuka ata o matijela mu menya. O athu axikina kwila kubhanga kiki kibhangesa kukaya o jinzumbi jayibha. O fesa yiyi ene mwibhanga phala kukayela o makanda bhwabhiti Buda.”—Enciclopédia do Budismo.

  •  Fesa ya kizuwa kya kudyela o ituxi. Kala kya zwela muthu wabhange mbandu ku unguvulu amutumbula mu jurnale ya ixi ya Papua-Nova Guiné, o athu abhanga mbandu ya fesa yiyi “axikina mu ima ibhangesa o Jikidistá kukala ni kixikanu.” Mwene wambe kwila o fesa ya kizuwa ya kudyela ikwatekesa “o milongi ya ukidistá mu ixi yâ.”

  •  Vesak. “O kizuwa kiki, kizuwa kikola kya Budismu, ene mubhanga o fesa yiyi mukonda dya uvwalukilu wa Buda, o kimwikinu kyê o kufwa kwê mba o kusanzumuna kwa Nirvana.”—Dicionário de Feriados, Festivais e Celebrações do Mundo.

   O fesa yalungu ni ijila ya jingeleja ki yatundu mu Bibidya. Jezú wambe ku atwameni ajingeleja: “Enu mwa ditunu o mak’â Nzambi, mukonda dya ijila yenu.” Mwene wazwela we kwila o ubhezelu wâ ki wexile ni valolo mukonda exile mulonga “o ijila ya athu kala itumu.” (Matesu 15:6, 9) Mukonda dya kulunga o milongi yiyi ku muxima o Jimbangi ja Jihova ene mudituna kudita mujifesa javulu ja jingeleja.

  •  Epifania (Timkat, kizuwa kya jisobha jitatu mba akwa kuzambula bhukaxi ka jithethembwa.) O fesa yiyi ene mu ibhanga mukonda dya yo akwa kuzambula kukunda Jezú mu kithangana kya uvwalukilu wê ni mukonda dya batizu ya mwene. O fesa yiyi “yabhangesa kwila o jifesa ya kixibhu ya jipagão ibhana kijingu ku jinzambi ya menya a kunduluka, ni jingiji ikale kala jifesa ya Jikidistá.” (Enciclopédia do Natal) O fesa ya mukwa yalungu we ni fesa yiyi a ixana Timkat, “yalungu ni ijila yokulu.”—Enciclopédia da Sociedade e da Cultura do Mundo Antigo.

  •  Fesa ya Assunção de Nossa Senhora. O athu abhanga o fesa yiyi, axikina kwila Madiya wavwala Jezú wabande kudyulu ni mukutu waxitu. “O Jikidistá ja dyanga kexile ni kidyelelulu kiki, o Bibidya ki izwela we yalungu ni maka enya.” Kala kizwela o divulu Religião e Sociedade—Enciclopédia do Fundamentalismo.

  •  Fesa ya Imaculada Conceição. “O Bibidya ki izwela yalungu ni Imaculada Conceição . . . [kiki] kitumu kya ngeleja.”—Nova Enciclopédia Católica.

  •  Quaresma. O Nova Enciclopédia Católica izwela kwila o kithangana kiki kya jejum yamateka “ku hama ya kawana,” mu kubhita 200 a mivu kupholo kyoso kyazubha kusoneka o Bibidya. O yalungu ni kizuwa kyadyanga kya Quaresma o Enciclopédia yamba: “O ukexilu wa athu atokala mu ngeleja yiyi kutambula o uthokwa mu kizuwa kya kwalata ya thokwa, ene mu kibhanga ku mundu woso tunde mu izuwa ya Sínodo de Benevento, ku muvu wa 1091.”

  •  Meskel. Fesa ibhita ku Itiyopya “ene mwibhanga mu kwila asange o dikulusu dya kidi (o dikulusu kwafwila Jezú), mu kubhanga o fesa yiyi o athu awika túbhya ni kukina akondoloka o túbhya,” kyene kya zwela o Enciclopédia da Sociedade e da Cultura do Mundo Medieval. Maji o Jimbangi ja Jihova kene mubheza Nzambi ni dikulusu.

•   O kwila o fesa yiyi ibhana kijingu ku muthu, kisangela, mba ku ijimbwete ya ixi?

   Ihi izwela o Bibidya: “Jihova wambe kiki: Wa xixima o muthu u dyelela ku muthu, hé o xitu yene mu kufwa ku ikita lwêne o lukwaku lwe, anga o muxima we u u katula kwa Jihova.”—Jelemiya 17:5.

   Né mwene o Jimbangi ja Jihova asuwa athu oso ni asamba phala o mbote ya, ene kene mubhanga mbandu ya jifesa kala o jifesa jakayela:

   Fesa ibhana kijingu kwa nguvulu mba muthu wengi wakatunda. O Bibidya yamba: “Kala kiki-phe, o muthu wala ngoho ni mulenge wa kubhwimina mu dizulu dyê, musondolokyenu. Mukonda mwene we a mu ximana ni kima kyahi?” (Izaya 2:22) Mu kiki, o Jimbangi ja Jihova mu kifika kene mu bhanga mbandu ya fesa ya uvwalukilu ya sobha kikale se muhatu mba diyala.

   Fesa ibhana kijingu ku dibandela dya ixi. O Jimbangi ja Jihova kene mubhanga mbandu ya fesa ya kizuwa kya Dibandela. Mukonda dyahi? Mukonda o Bibidya yamba: “Twana twami, lengenu o iteka.” (1 Nzwá 5:21) Sayi athu lelu kene mu tala o dibandela kala kiteka—kima kya ubhezelu—maji o mukwa kutangela misoso a mwixana Carlton J. H. Hayes wasoneka: “O kidimbu kyabetakota mu ku kibheza ni kukilondekesa kixikanu o dibandela.”

   Jifesa jibhana kijingu ku jisantu. Ihi yabhiti kyoso muthu wafukama kwa poxolo Phetele? O Bibidya yamba: “Phetele wa mu balumuna, yu wa mwambela, wixi: ‘Imana! Eme wami ngi muthu kala eye.’” (Ikalakalu 10:25, 26) Kikale Phetele ni jipoxolo jamukwa kaxikina kwabhana kijingu mba kwabheza, mu kiki o Jimbangi ja Jihova kene mubhanga mbandu mu jifesa jibhana kijingu ku jisantu kala o jifesa jakayela:

  •  Kizuwa Kya Jisantu Joso. “Fesa ijingisa o jisantu joso . . . Ki twejiya kyambote o kizuwa kyamateka kubhanga o fesa yiyi.”—Nova Enciclopédia Católica.

  •  Fesa ya Nossa Senhora de Guadalupe. O fesa yiyi ibhana kijingu kwa “santa padroeira do México,” athu avulu axikina kwila mwene Madiya wavwala Jezú. Athu avulu axikina kwila mwene watulukila ku kidimakaji ku muvu wa 1531.—Enciclopédia Greenwood da Literatura Latina.

  •  Kizuwa kya dijina. “O fesa yiyi a ibhanga ku santu utambula o dijina kyoso kya mu batizala mba kyoso kya mu krismala,” kala kyamba o divulu Celebrando os Costumes da Vida pelo Mundo—De Chás de Bebê a Funerais. Dizwela we kwila “mu kizuwa kiki sayi kima kyadikota kyalungu ni jingeleja.”

   Jifesa jalungu ni maka a jinguvulu ni ya ibhindamu ya athu. O Bibidya yamba: “Kota kudyelela kwa Jihova, kana kudyelela ku muthu.” (Jisálamu 118:8, 9) Phala kalondekese kwila adyelela ku jinguvulu mu veji dya kudyelela kwa Nzambi phala kuzubha o hadi mu ngongo, o Jimbangi ja Jihova kene mubhanga mbandu mu jifesa ja Dia da Mulher e do Dia da Juventude, o jifesa jiji jikwatekesa yo azokela maka alungu ni jinguvulu mba maka alungu ni ibhindamu ya athu. Kyene we o kima kyabhangesa kwila ka bhange mbandu mu fesa ya Dia da Abolição da Escravidão ni jifesa jengi jalungu ni maka enya. Mu veji dya kiki, ene adyelela kwila o Utuminu wa Nzambi wene ngó wandatena kuzubha o maka oso mu ngongo kala o katombo ni kukamba kuyuka.—Loma 2:11; 8:21.

•   O kwila o fesa yiyi ibhana dingi valolo mu kikonda ni kifuxi kimoxi ngo yamukwa ndenge?

   Ihi izwela o Bibidya: “Nzambi ki mukwa katombo, maji mu jixi joso mwene uxikina woso u mukala ni wôma, anga ubhanga o ima yayuka.”—Ikalakalu 10:34, 35.

   Ne mwene o Jimbangi ja Jihova azolo o ixi yâ ya uvwalukilu, maji kene mubhanga mbandu mu jifesa jilondekesa kwila kikonda mba kifuxi kimoxi kyabeta dingi kota yakamukwa ndenge, kala o jifesa ja kayela.

   Jifesa jibhana kijingu ku masoladi. Mu veji dya kubhangesa o athu kulwa ita, Jezú wazwela ku maxibulu mê: “Zolenu o jinguma jenu, ni kusambela yó a mi zukutisa.” (Matesu 5:44) Mukonda dya kiki, o Jimbangi ja Jihova kene mubhanga o jifesa jibhana kijingu ku masoladi kala o jifesa jakayela:

  •  Dia de Anzac. “O kizwelu Anzac kilombolola kifuxi kya masoladi a ixi ya Austrália ni ya Nova Zelândia,” mu kubhita thembu o fesa ya “Dia de Anzac ya kituka kizuwa phala kulembalala yo afu mu ita.”—Dicionário Histórico da Austrália.

  •  Dia dos Veteranos de Guerra (kizuwa phala kulembalala yo afu mu kulwa ita). O kizuwa kiki kibhana “kijingu kwa yo afu mu usoladi, yo afu mukulwa ita mu ixi yâ.”—Enciclopédia Britânica.

   Fesa ya kizuwa kya dipanda mba ubhulukilu wa ixi. Mukuzwela yalungu ni maxibulu me Jezú wixi: “Kala eme ki ngatokala ku mundu, ene we katokala ku mundu.” (Nzwá 17:16) Ne mwene awabhela mu kudilonga o musoso wa ixi yâ, maji o Jimbangi ja Jihova kene mudita mu maka amundu mukudituna o jifesa jakayela:

  •  Dia da Austrália. Kala kizwela a Enciclopédia Worldmark de Culturas e Cotidiano “o athu ene mubhanga o fesa yiyi mukonda dya ima yabhiti ku muvu wa 1788, kyoso o masoladi akwa Inglaterra ambatele o dibandela dya ixi ya ku Austrália ni kubhana o ngolokela ya kwila o Austrália yedi kala ixi yâ.”

  •  Dia de Guy Fawkes. O athu ene mubhanga o fesa yiyi mukulembalala o kizuwa kyoso Guy Fawkes ni athu amukwa awabhelele o ngeleja ya católica alembwa kujibha o sobha Jaime I, ni athu amukwa atokalele mu inzo ya itumu ya Inglaterra kumuvu wa 1605.”—Dicionário do Folclore Inglês.

  •  Kizuwa kya dipanda. Mu jixi “javulu ene mubhanga o fesa yiyi mukonda, o kizuwa kiki kyene o kizuwa kyatambula o ufolo mu kwa tumina ku jixi jengi.”—Dicionário Merriam-Webster’s Unabridged.

•   O kwila o fesa yiyi ibhangesa o athu kulondekesa kavwanza ni undumbu?

   Ihi izwela o Bibidya: “O thembu yabhiti-ku ya kubhanga o vondadi ya athu kejiya Nzambi yamisoko kyá, kyoso ki mwaditele mu uhabhu, mu jihânji jayibha, mu uhôlwa, mu jifesa jayibha, mu kunwa kyavulu ni kubheza o iteka.”—1 Phetele 4:3.

   Kala kilondekesa o milongi yiyi, o Jimbangi ja Jihova kene mudita mu jifesa jalungu ni uholwa ni kavwanza. O Jimbangi ja Jihova asanguluka mu kukala kumoxi ni makamba, mu ithangana yiyi kala muthu usola se wanda nwa mba kana, se asola kunwa anwa mu ukexilu watokala. Ene abhanga yoso yatena phala kukayela o itendelesu ya Bibidya: “Kikale mu kudya, mba mu kunwa, mba mu kubhanga kima kyoso-kyoso, ima yoso mu ibhanga phala kuximanesa Nzambi.”—1 Kolindu 10:31.

   Mukonda dya kiki, o Jimbangi ja Jihova kene mudita mu jifesa kala yiyi mba Carnaval, jiluwalesa Nzambi, jilondekesa ukexilu wayibha wa mwenyu. Kiki kyalungu we ni fesa ya Jijudé a ixana Purim. Kala kizwela o divulu Judaísmo Essencial, mukulu o Purim yexile o fesa ya ubhulukilu wa Jijudé ku hama ya katanu A.K.K., maji lelu, o Purim yalungu ni “ukexilu wa ubhe wa fesa ya Jijudé ya Mardi Gras mba Carnaval.” O fesa yiyi, “yalungu ni kuta izwatelu (o mayala ata o izwatu ya ahatu) yalungu ni uholwa kavwanza ni jibuya javulu.”

 Kyene. O Bibidya ilonga kwila o athu atokala kuzola o jindandu ne mwene se katokala mu ngeleja ya. (1 Phetele 3:1, 2, 7) Maji mu kidi kyoso o mbangi ya Jihova weha kudita mu jifesa ja mukwa, sayi ndandu utena kudivwa kyayibha kala amubhana dikunda. Mukonda dya kiki, avulu Jimbangi ja Jihova adyanga kujimbulula ku jindandu kwila a azolo, ni kuxila kwoso ajimbulula se mukonda dyahi kene mukala ni jindandu mu kithangana kya jifesa jiji ni asola kwa kunda mu kithangana kyengi.

 Kana. Ene adyelela kwila kala muthu watokala kusola. (Josuwé 24:15) O Jimbangi ja Jihova a xila “athu oso,” nemwene se atokala ngeleja yengi.—1 Phetele 2:17.