O Jimbangi ja Jihova a xikina kuila, o ijila ni itendelesu i tu sanga mu Bibidia, i tena ku tu kuatekesa kusola o ima i sangulukisa Nzambi, ni ima i tu kuatekesa. (Izaia 48:17, 18) O ijila íii ni itendelesu ia tokala kua Nzambi, mukonda dia kiki, tuene mu bhanga ioso phala ku i kumbidila ku muenhu uetu. Tu mone se kiebhi o itendelesu íii ia lungu ni maka a lungu ni kutangesa. a

•   O ukaza ua tokala ku nangenena. (Matesu 19:6) O Jimbangi ja Jihova, a mona o kutangesa kala kima kia dikota, mukonda kiene o kima ki dianga kubhanga o athu a mesena kukazala.

•   O athu a tokala ku di tangesa, ió ala kiá mu kitala kia kukazala. O athu enhá, a tokala kubhita hanji o ‘kitala kia kikumbi,’ mba o kithangana kioso o jihanji ja unzangala ji vula.—1 Kolindu 7:36.

•   O athu a di tangesa, a tokala kukala polondo phala kukazala. Saí athu nange a di xisa ni makaza mâ, maji bhu pholo ia Nzambi ene ka tokala kukazala ni muthu uéngi, mukonda phala Nzambi, o muthu ua tokala ngó ku di xisa ni kaza diê, se kaza diê u ta phánda ni muthu uéngi.—Matesu 19:9.

•   O Bibidia i longa kuila, o Jikidistá a mesena kukazala, a tokala kusola muthu u bheza Nzambi. (1 Kolindu 7:39) O Jimbangi ja Jihova a belesela o kitumu kiki. Ene ka mona kuila o kitumu kiki, kia lungu ni kukazala ni muthu u xila o ubhezelu uetu kana, maji ia lungu ni muthu u kumbidila o milongi ia Bibidia, mba muthu a mu batizala kala Mbangi ia Jihova. (2 Kolindu 6:14) Tundé ukulu, Nzambi uene mu tendelesa o jiselevende jê kukazala ngó mudiâ. (Dimatekenu 24:3; Malakiia 2:11) Saí akua kutokuesa, a mono kuila o kitumu kiki, kitumu kiambote. b

•   O tuana a tokala kubelesela o jitata jâ. (Jisabhu 1:8; Kolose 3:20) Kuma o tuana a tungu bhu bhata dia jitata jâ, o kitumu kiki kia lungu ni kubelesela o jitata jâ mu maka a lungu ni kutangesa. O ima íii, nange ia lungu ni kitala phala o mona kumateka kutangesa, ni ihi ia tokala o kubhanga mu kithangana kiki.

•   O Jimbangi ja Jihova ala ni ufolo ua kusola, se a-nda tangesa mba kana, ni ua kusola o muthu a-nda mu tangesa. Maji a bhanga kiki, mu kubelesela o itumu ia Bibidia. O maka enhá a lungu ni milongi ia Bibidia izuela: “Kuma muthu ua bhingi uambata o kimbamba kiê, muthu uambata o kimbamba kiê.” (Ngalásia 6:5) Maji né kiki, o athu a mesena kutangesa, a sota o jindunge ja Jimbangi ja Jihova a kulu kiá, ala ni kilunji kia soko phala ku a kuatekesa.—Jisabhu 1:5.

•   Saí ima iavulu i bhanga o athu mu kithangana kia ku di tangesa, a i mona kala ki kituxi, maji mu kidi, kituxi. Mu kifika, o Bibidia i tu tangela kuila, tua tokala kulenga o undumbu. Kiki, ki kia lungu ngó ni kuzeka ni muthu, maji kia lungu ué ni maukexilu oso a kubhanga o ima ia mukuá ia xidi, ia lungu ni undumbu, kala o ku di xaxata o mukutu, ni ima ia ka mukuá dingi. (1 Kolindu 6:9-11) Né muene se muthu ka bhange undumbu, maji nange ande dia kukazala, muéne u bhanga ima ia zembe Nzambi, kala o “ufusa.” (Ngalásia 5:19-21) O Bibidia ilondekesa kuila, o “jindaka jabolo,” kituxi ué.—Kolose 3:8.

•   O muxima u tena ku tu nganala. (Jelemiia 17:9) O muxima u tena ku tu suínisa kubhanga kima ki tuejiia kuila kituxi. Phala kulanga o muxima mu ima íii, o athu a mu di tangesa a tokala kubhanga ioso, phala ka kale ubheka uâ mu ididi ieji ku a bhangesa ku ta kituxi. Ene a tena kubhanga kiki, mu ku di bunda kumoxi ni athu amukuá, mba ni muthu a mu dielela. (Jisabhu 28:26) O Jikidistá ala hanji akudi, a mesena kukazala, ejiia kuila, kiluezu kia dikota kusota ku di tangesa ni muthu bhu kaxi ka internete, mukonda muéne u tena kumateka ku di tangesa ni muthu ka muijiia kiambote.—Jisálamu 26:4.