Ngakudila mu mbanza ya tululuka ya Tampere mu ixi ya Finlandya. Mwiji wami kawabhelele kyavulu ngeleja maji wabhanene valolo ku xikola ni kukala ni wendelu wambote. Mametu mukwa Alemanha, mu undenge wami, kithangana ni kithangana ngakexile muya ku Alemanha Ocidental, kwatungile o jikuku jami.

 Tunde ku undenge, ngawabhelele kyavulu kujokala. Mu mivu yami ya dyanga, ngakexile mu jokala joko yosoyoso maji kyoso kingatenesa 14, ngasolo kujokala ngo tenis. Mu kitala kya 16, ngakexile mu bhanga treinu luyadi mba lutatu ku kizuwa. Ngakexile ni treinu jiyadi phala kukala ni uhete wakatunda mu kujokala, o mu usuku ngakexile mubhanga treinu ku ubheka. Ngawabhelele kyavulu o idifwa ya joko; o kujokala tenis phal’eme wexile ukexilu wakulola o nguzu yami mu xitu ni kilunji kyami. Sumbala ngawabhelele kukala kumoxi ni makamba mami ni kunwa tusele, nuka ngaditele mu jinvunda mukonda dya jidroga mba uholwa kana. Ku mwenyu wami o yakexile dingi ku pholo o tenis ngo kwabhu.

 Ngamateka kujokala mu jijoko ja ATP kyoso kingakexile ni 17 ya mivu. a Kyoso kinganganyala jijoko javulu, ngafumanene kyavulu. Mu kitala kya 22, dijina dyami dyakexile we mu kaxi ka 50 a yó abeta kujokala o tenis mu ngongo yoso.

 Mu mivu yavulu, ngai mu jixi javulu kujokalamu tenis. Ngamono ididi yavulu yawabha, maji ngamono we maka avulu mu ngongo. Mu kifika o milonga, kunwa jidroga, ni kubola kwa jimbanza. Mu kifika, mu ixi ya Estados Unidos, sayi jimbanza atutangela phala kituyeku mukonda dya usweya wavulu wakexileku. Ima yoso yiyi yangiluwalesa. Maji sumbala ngakexile mubhanga o kima ki ngawabhelele kyavulu, maji kudisukilu dya kizuwa, kingikexile mu sanguluka.

 Sayi yami mana Sanna, wamatekene kudilonga o Bibidya ni Jimbangi ja Jihova. Ngolela bhofele mu kumumona wamudilonga o Bibidya maji kingimufidisa kana. Mu muvu wa 1990 twakazala, mu muvu wakayelamu amubatizala kala Mbangi ya Jihova. Eme kingiwabhelele ngeleja kana maji ngaxikinine kwila sayiku Nzambi. Ngadilembalala kwila kukwetu wa muhatu mu Alemanha wakexile mu tanga kyavulu o Bibidya, wangilongele we o kusamba.

 Kizuwa kyoso Sanna neme twakexile mu kunda dikaza Jimbangi ja Jihova, o diyala manu Kari, wangidikisa o polofesiya ya Bibidya yalungu ni “izuwa isukidilaku.” (2 Timote 3:1-5) Kiki kyangiwabhelele kyavulu, kyangikwatekesa kwijiya se mukonda dyahi o ima mu ngongo ya ibhile kyavulu. Mu kizuwa kyenyokyo, kituzwela ima yavulu yalungu ni ngeleja. Tundé o kithangana kyenyokyo, ngamateka kudikunda ni manu Kari yalungu ni Bibidya. Ima yoso ingakexile mu dilonga yakexile mungitula ku muxima. Kuma ngakexile ni ikalakalu yavulu ni ola joso ngakexile muya ku jixi jengi, kitwatenene kudisanga veji javulu maji manu Kari kabhwila kana. Mwene wakexile mungisonekena mikanda phala kutambwijila o ibhwidisu ingabhangele mu kithangana kya kudilonga. Ibhwidisu yoso ya makota akexile mu itambwijila kyambote mu Bibidya. Bhofele bhofele ngamateka kutendela o njimbu yoso ya kwila o Utuminu wa Nzambi wandabhangesa kwila o vondadi ya Nzambi idikumbidila mu yoso. O kwijiya o dijina dya Nzambi, Jihova ni kumona yoso yabhange mwene phaletu, kwangisangulukisa kyavulu. (Jisálamu 83:18) O yangitula dingi ku muxima, ó sata ya kukula. Ki yexile ngo kima kyosokyoso phala kubatula madimanda kana, o sata kilondekesu kya henda ya Nzambi. (Nzwá 3:16) Ngadilongo we kwila ngakexile ni kithangana kya kukituka dikamba dya Nzambi ni kukala ni mwenyu wakalelaku mu palayizu yatululuka. (Tiyaku 4:8) Ngamateka kudibhwidisa, “Kyebhi kingitena kulondekesa o kisakidilu kyami?”

 Ngaxinganeka kyambote kyebhi kyexile o mwenyu wami. Ngakexile mu dilonga mu Bibidya kwila o kusanguluka kwa kidi kwijila mu kubhana. Mukonda dya kiki ngakexile ni vondadi ya kutangela o athu o ima ingakexile mu dilonga. (Ikalakalu 20:35) Kuma ngexile mu jokala mu ukexilu wa katunda, muvu ni muvu ngakexile mu kala 200 ya izuwa, dikanga dya dibhata mukonda dya kuya mu jokala. Mwiji wami woso wakexile ngo mu ngibanza eme—o treinu yami, o ibhangelu yami ya kizuwa ni kizuwa ni ufunu wami. Ngamono kwila ngabhingile kulungulula o mwenyu wami.

 Ngejidile kwila o kudituna o ufunu wa kujokala mukonda ngo mwene dya ngeleja, mundu wavulu ki weji tendela. Maji o ujitu wa kwijiya kyambote Jihova ni kukala ni mwenyu wakalelaku watele dingi, kitadi kyosokyoso kyejibhana o tenis ndenge. Mukonda dya kiki kikyangibhonzele kusola. Kingimesenene kubhana matwi ku izwelu ya athu, éme ngatokalele kusola yoso ingamesenene o kubhanga. O velusu ya Bibidya yangikwatekesa dingi o kukolokota ó divulu dya Jisálamu 118:6: “Jihova wala bhu mbandu yami, ki ngi kala dingi ni wóma; hé kima, muthu u ngi bhanga-hi?”

 Mu kithangana kyenyokyo, kwexile jinvwama amesenene kungibhana kitadi kyavulu phala ngisuluke mu kujokala tenis mu ukexilu wakatunda, mu mivu yavulu kingejibhinga kuthandanganya ni kima. Maji ngasolele kya i ngejibhanga, mukonda dya kiki ngaditunu o kitadi, ku pholo dya kwenda ngaxisa o kujokala mu jijoko ja kisangela ATP. Ngasuluka ni kudilonga o Bibidya, o mu kizuwa kya 2 ya mbeji ya Kavwa ka 1994, angibatizala kala ngi Mbangi ya Jihova.

 Mudyami, kingibhiti mu kilwezu phala kuxikina kwila sayiku Nzambi. Kingikexile we musota o kidi kana. Ngakexile mudivwa kwila mwenyu wami wala kyambote, kingibhindamene dingi kima. Maji sé kukijiya, kyedile kala o kidi kya Bibidya kyakexile mu ngikingila, ngamono kwila mbe o mwenyu wala ni valolo ya dikota. Mwenyu wami wawabha dingi! O ukamba ku mwiji wetu wakolo dingi, twala dingi kumoxi mukulu ndenge. Ngasanguluka kyavulu kwila anami kitatu amukayela o makanda mami—kangikayela mu kujokala kana maji mu kukituka Jikidistá.

 Ngawabhela hanji kujokala tenis. Mu mivu yavulu mu kifika ngene mu didikila mu kukalakala mu ikalakalu yalungu ni tenis. Mu kifika ngene mu longa o ufunu wa tenis, ngamukwendesa we xikola ya tenis. Maji mwenyu wami kiwaswina ngo dingi mu jijoko kana. Mukulu ngakexile mubhanga treinu mu jiola javulu mu jisemana joso phala kukituka ngi hete ni kunganyala mu kujokala. Lelu, kuma ngi muboki wa thembu yoso, ngisanguluka kyavulu kungastala o kithangana kyami phala kukwatekesa o athu kudilonga ni kubelesela o itumu ya Bibidya yalungulula o mwenyu wami. Ngasange o kusanguluka kwa kidi mukonda dya kuta ku pholo o ukamba wami ni Jihova Nzambi ni kutangela o athu o kidyelelu kyami kya kukala ni mwenyu wambote ku hádya.—1 Timote 6:19.