“Se mu kidi wandala mwene kwijiya Nzambi, dikwatenene ku Jimbangi ja Jihova.” Nga diwana kyavulu kwivwa o izwelu yoyo. Mu kithangana kyenyokyo, ngakexile kya mudilonga o Bibidya ni Jimbangi ja Jihova maji kikwabhitile luwa thembu yavulu. Maji phala kutendela kyambote, za ngimitangele hanji bhofele o musoso wami.

 Angivwala mu mbanza ya Quezaltepeque, mu ixi ya El Salvador. Twexile tu 15 kya ana, eme ngi mona wa kasamanu. Jitata jetu mu kutusasa a soto kutulonga kukala tu athu ambote, athu abelesela o ijila ya ixi. Mano Leonardo ni Jimbangi ja Jihova ja kamukwa akexile mu tulonga o Bibidya. Maji kingikexile mu xila o ilongesu ya Bibidya, ngasolo kubhanga ima ya ibha. Kyoso kingatenesa 14, ngamateka kunwa uholwa ni jidroga kumoxi ni makamba mami mu xikola. Ene oso a xisa o xikola phala kukala mu kibuka kya jibandi, lelu yú mungu yó, ngakayela o phangu yâ ya ibha. Izuwa yoso twakexile mu nanga mu ikoka, kubhinga kitadi ni kunyana phala kusumba o jidroga jetu.

 O jibandi ni akwetu akituka o mwiji wami. Mudyami ngatokalele kukala fiyele kwa ene. Mu kifika, kizuwa umoxi mu kibuka kyetu wanwine droga yavulu wendele mu nyana vizinyu yami. Kyoso kyexile mu zoka, vizinyu yami wakexile mu beta kamba dyami, yu wexana axiku dya ngoji. Ni njinda yoso, ngamateka kubula o dikalu dya vizinyu yami phala mwene kweha kamba dyami. Vizinyu yami wadyondo phala kingibhange kyokyo. Mukonda ngakexile mu bula o mabhitu a dikalu, ngazange o dikalu dyê, kingimubhana matwi.

 Kyoso kingatenesa 18, akwetu mu kibuka adikwata ni axiku dya ngoji. Kyoso kingamesenene kutakula bomba i ngabhangele kubhata, yene yabaze bhu lukwaku lwami. Kingejiya se kyabhitile kyebhi. Ngilembalala ngo kwila lukwaku lwami lwa bukukile, bhenyobho nga kumbama. Kyoso ki ngaphaphumuka mu inzo ya kusaka, ngamono kwila lukwaku lwami lwa kadilu lwa bukuka, o ditwi dyami dya kadilu we dyafu, kingitenene we kumona kyambote ni dyesu dya kadilu.

 Maji sumbala ni unema, kyoso kingatundu monzo ya kusaka, ngavutuka ku kibuka kyami kya jibandi. Maji mu kubhita tu ithangana, axiku dya ngoji angikutu ya angite mu kaleya. Mwenyomo o ukamba wami ni jibandi ni akwetu wadibandekesa dingi. Mu kizuwa kyoso twakexile mubhanga kumoxi o ima, tundé mu kithangana kya kumatala kyoso kitwabwakula o lyamba lyetu lya dyanga katé mu kithangana kya kuzeka, twakexile kumoxi.

 Kyoso kingakexile mu kaleya, Leonardo wai mu ngimenekena. Kyoso kitwakexile mu zwela, mwene wedikisa o jipondo ja tatuwagem jakexile bhu lukwaku lwami lwa kadilu yu wangibhula: “Eye wejiya se o jipondo jitatu jiji mu tatuwagem jilombolola kima kyahi?” Ngamutambwijila kiki: “Xe ngejiya. Jilombolola undumbu, jidroga ni rock and roll.” Maji manu Leonardo wangivutwila: “Mudyami jilombolola inzo ya kusaka, kaleya ni kufwa. Wakexile kya mu inzo ya kusaka, kindala wala mu kaleya. Wejiya kyá yandakayelaku.”

 Yoso yazwela Leonardo yangikwatesa woma. Mwene wazwela kidi. O wendelu wami walondekesa kwila ngakexile mu kanda o mbila yami. Leonardo wangibhingi phala kudilonga ne o Bibidya éme nga xikina. Yoso ingakexile mu dilonga mu Bibidya yangibhangesa kulungulula o mwenyu wami. Mu kifika, o Bibidya yamba kwila “o kudilunga ni athu ayibha, kuzanga o wendelu wambote.” (1 Kolindu 15:33, kulwiji) Mu kiki, kima kya dyanga kingatokalele o kubhanga, ó kubhanga makamba engi. Phala ngitene kubhanga kiki, ngamateka kufonga ku yônge ya kibuka, éme ngamateka kuya mu yônge ya Jimbangi ja Jihova yakexile mubhanga mu kaleya. Mu yônge ya Jimbangi ja Jihova, ngejiya mukwetu wakexile we mu kaleya, dijina dyê André, amubatizalele kala Mbangi ya Jihova mu kaleya mwenyomo. Mwene wangixana phala kumatala kumoxi. Bhenyobho mu imene kingexile dingi muxibha lyamba kana. Anddrés neme twakexile mutanga velusu ya Bibidya mu imene yoso.

 O jibandi ni akwetu amono kwila ngakexile mulungulula o ukexilu wami. Mukonda dya kiki, xefe imoxi ya kibuka wixi wamesenene kuzwela neme. Woma wangikwata. Kingikijidile se weji ngibhanga ihi kyoso kyevu yoso ingakexile mubhanga, mukonda kifwa kima kyabhonzo muthu kuxisa o kibuka kya jibandi. Mwene wambe: “Twamono kwila izuwa yiyi eye kwene muya dingi ku yônge yetu maji wene muya ku yônge ya Jimbangi ja Jihova. Ihi iwamuxinganeka o kubhanga?” Ngamutangela kwila ngamesenene kusuluka kudilonga o Bibidya ni kulungulula o mwenyu wami. Ngadiwana, mwene wangitangela kwila wejixikina ngo se ngilondekesa kwila ngandala mwene kukituka Mbangi ya Jihova. Bhenyobho mwene wambe wixi: “Se mu kidi wandala mwene kwijiya Nzambi, dikwatenene ku Jimbangi ja Jihova. Twandala kwila eye weha kubhanga ima ya ibha. Sakisaki. Wasolo njila yambote. O Jimbangi ja Jihova andatena kukukwatekesa. Ngadilongo kya ni ene mu Estados Unidos. Ngala we ni jindandu ala Jimbangi ja Jihova. Kana kukala ni woma. Suluka.” Ngakexile hanji ni woma, maji ngasangulukile we kyavulu. Ngasakidila Jihova Nzambi ku muxima wami. Ngadivu kala njila yakexile mu kikalanga i yamutubhula, ngatendela o izwelu ya Jezú, kwila: “Mwanda kwijiya o kidi, o kidi anga ki mibhana ufôlo.”—Nzwá 8:32.

 Maji amoxi exile makamba mami mukulu, angilola, angibhana jidroga. Ngizwela o kidi, sayi ithangana kingatenene kudituna. Maji ku pholo dya kwenda, ni kikwatekesu kya misambu, ngatena kutula o ifwa yami yabolo.—Jisálamu 51:10, 11.

 Kyoso kyangikatula mu kaleya, avulu afikile kwila ngeji vutuka dingi ku ubandi maji kikyene kyabhiti. Maji mu veji javulu ngavutuka mu kaleya phala kutangela yó akexile mu kaleya o ima ingadilongele mu Bibidya. Kyene ngo makamba mami okulu kyatena kumona kwila mbe ngalungulwile mwene o mwenyu wami. Maji kikyene kya banze yó exile jinguma jami mukulu.

 Kizuwa kyoso kitwai mu boka, eme ni mukwetu ngakexile mu boka ne kumoxi atute mu kaxi kwalo jibandi exile jinguma jami mukulu. Akexile ni mauta, amesenene kungijibha. Ni kilendu kyoso maji ni kuswina, mukwetu ngakexile muboka nê wa atangela kwila eme kingexile dingi mu kibuka kya jibandi kana. Mu kithangana kyenyokyo ngasoto kubatamesa o muxima wami. Ene angibeta ya angitangela kwila kingibokone dingi mu dyembu dyâ, ene abhake o mauta mâ ya atwehela. Sé phata o Bibidya yalungulwile o mwenyu wami. Mukulu hinu ngeji ku avutwila phonzo. Maji kindala ngibelesela o milongi yala mu 1 Tesalonika 5:15: “Dilangyenu, phala ki bhukale muthu uvutula phulu mu phulu, maji sulukenu jinga mu kubhanga o mbote ku akwenu ni ku athu oso.”

 Tunde kingakituka Mbangi ya Jihova, ngene mubhanga nguzu phala ngi kale ngi muthu wa kidi maji kyene mubhonza kyavulu. Maji ni kikwatekesu kya Jihova Nzambi, ni milongi ya Bibidya ni kikwatekesu kya makamba mami a ubhe, ngene muditunda kyambote. Kingimesena kuvutuka dingi mu njila yami yokulu.—2 Phetele 2:22.

 Mukulu ngexile ngi kifumbe, mukwa njnda. Se ngaswinine mu njila yoyo lelu hinu ngafwami kya. O milongi ya Bibidya yalungulula o mwenyu wami. Ngaxisa o ifwa yami yabolo. Ngadilongo kudibhana kyambote ni yó exile jinguma jami. (Luka 6:27) Lelu ngasanguluka ngala ni makamba angikwatekesa kukala ni idifwa yambote. (Jisabhu 13:20) Lelu ngasanguluka ku mwenyu, mwenyu wami wala ni valolo, ngamusidivila Nzambi wangiloloka o ikuma yami yoso.—Izaya 1:18.

 Mu muvu wa 2006, ngadilongo o xikola phala o akunji Jikidistá ala hanji makudi. Mu kubhita mivu, ngakazala ni muhatu wami, kiyadi kyetu twamusasa monetu wa muhatu. Lelu ngingastala thembu yavulu mu kulonga o athu o itumu ya Bibidya yangikwatekesa kyavulu. Ngamusidivila kala ngi kafunga mu kilunga, ngisota kukwatekesa o minzangala phala kadite mu njila ya ibha mu ngendele kyoso kingexile mu kitala kyâ. Mu veji dya kukanda o mbila yami, lelu ngamutunga phala ngi kale ni mwenyu wakalelaku kala kyakanena Nzambi mu Bibidya.