60 a jipursentu ja alunguludi jetu a thembu yoso, ka kalakala mu jixikitodyu ja betele, kana, maji akalakala mu ididi ya kulungulula (RTO). Mbote yahi ijila mukukalakala mu ukexilu yú? Jifalamenda jebhi jabhingi o alunguludi phala kukalakala kyambote mu RTO? Kyebhi o kididi mu kala o kibuka kya kulungulula, kikwatekesa o ukexilu wâ wa kulungulula?

 O RTO ikwatekesa o alunguludi kutunga mu kidid mwala o athu azwela o dimi dyâ. Karin, mulunguludi wa dimi dya Baixo-Alemão, wambe: “Tundé ki twayi ku RTO ku mbanza ya Cuauhtémoc, Chihuahua, ku Mexico, twene mu zwela kya ngó o dima dya Baixo-Alemão, kumoxi ni alunguludi ni akwetu, kyoso ki tuya muboka ni kyoso kituya mu itanda. Etu atukondoloka ku athu azwela o dimi dyetu. Twene mu kwivwa jisabhu javulu, m’ukulu nuka twa jivwile, twadilongo we ima yalungulula mu uzwelelu wa athu wa kizuwa ni kizuwa.”

 James, ukalakala ni kibuka kya kulungulula mu dimi dya Frafra ku Ghana, wambe kwila, sayi bhabha mwene katena kudibunda ni mwiji wa Betele ku filiyale. Wambe dingi: “Nga wabhela kyavulu kukalakala ku RTO. Kuboka mu dimi dya dyembu didi ni kumona kyebhi o athu kyaxikina o njimbu yambote, kingisangulukisa kyavulu.”

 Kyebhi o jiphange kyene musola kwebhi kwanda tunga o RTO? Phange Joseph, ukalakala ku Departamento Mundial de Projeto/Construção ku Warwick, Nova York, wambe: “O ibhidi itudibhana nayu yakwila, sayi ididi ki mwala ni mukengeji wambote, menya, ni internete yambote, yabhingi phala kutambula o madukumendu phala kulungulula.” “Mu kyenyki, phala kusola kididi phala kutunga o RTO, kitwatokala kusola ngó kididi kimoxi mu zwela o dimi.”

 Mu kidi, phala kuphophala kitadi, ni kulenguluka mu kubhanga o RTO, kota se a ibhanga mu Kididi kya Yônge ya Makota, Kididi kya Ubhezelu, mba mu jinzo ja kuzalela o akunji a jixi jengi; kwenyoko o alunguludi atena kuya mu kalakala ni kuvutuka ku mabhata mâ. Se o ididi yiyi ki ibhana, o jiphange atena kwa tendelesa kusumba jinzo ni jixikitodyo, phala o jiphange kutungamu ni kukalakalamu. Se o kibhindamu ya kibuka kya kulungulula kilunguluka, o ididi yiyi atena kujisumbisa, o kitadi atena ku kingasta mu ima yengi yandabhindamenga dingi.

 Ku muvu wa sidivisu wa 2020 twangastala 13 milhões ajidolale mba (8,359,000,000 a jikwanza) phala o ikalakalau ku ji RTO isuluke kupholo. O ibuka ku ji RTO jetu, abhindamena jikomputadolo, ji software jafwama, iselekete yakungalavala, internete ni ima yamukwa dingi. Mu kifika, aplikativu imoxi ya komputadolo itena kuta 750 ajidolale mba (482.250 a jikwanza) phala muthu umoxi ngó. O jikomputadolo ajisokejeka ni ji software ni Watchtower Translation System (Sistema de Tradução da Torre de Vigia), yiyi yene o falamenda Ikwatekesa o alunguludi kusokejeka o ikalakalu yâ, ki ibhonzo phala ene kusanga o madukumendu a kulungulula.

 O alunguludi atambula we iselekete ya kungalavala, i akwatekesa kungalavala mu xikitodyu yâ. Twamono o valolo ya iselekete yiyi kyoso kya mateka o uhaxi wa COVID-19, mukonda alunguludi avulu ambata o iselekete yiyi ku jinzo jâ, anga asuluka ni kungalavala o madukumendu ni jividyu.

 Jiphange javulu adibhakula phala kukwatesa, akwatekesa mu kutonginina o madivulu alungulula ni kuyudika o ji RTO. Cirstin ukalakala mu RTO ya dimi dya Afrikaans, mu mbanza ya Cape Town, África do Sul, wambe: “Aboki avulu ni aboki athembu yoso, ala ni ujitu wakulondekesa o mauhete mâ bhabha.”

 O jiphange jiji ja dibhakula, ala ni ujitu wadikota. Sayi phange yamuhatu wene mu kwatekesa ku ikalakalu ku RTO wambe kwila o kukalakala kwenyóko “ku muswinisa kyavulu.” Jiphange ja mala ni ja ahatu ja dyembu dyetu, adibhakula we phala kukwatekesa mu kaxi ka kungalavala. Juana, mulunguludi wadimi dya Totonaca ku kibatu kya Veracruz, ku Mexico, wambe: “Kindala kuma twatungu mu mbanza mwa zwela o dimi dyetu, kyabhebhuluka dingi phala o jiphange jamala ni ja ahatu kutukwatekesa mu kungalavala ji audyu ni jividyu.”

 Maji o kwila o ji RTO jene mukwatekesa mwene kufwamesa o kikalakalu kya kulungulula? Mazunda a atangi etu atambwijila, kyene. Cédric, ukalakala ni kibuka kya Congo, ku República Democratica do Congo, wambe: “Sayi jiphange ene mu kwixana o ukexilu wetu wakulungulula o madivulu mu dimi dya Congo kala ‘Congo ya Publicações da Torre de Vigia,’ mukonda ki wene o ukexilu uzwela o athu mu kizuwa ni kizuwa. Maji kindala, ene amba kwila o madivulu twa mwalungulula kya mu uzwelelu wa lelu, kifwa, kala kizwela o athu mu kizuwa ni kizuwa.”

 Andile, ukalakala ni kibuka kya Xhosa, ku África do Sul, kyene we kyamono o athu kuzwela, mu dyembu dyê. Mwene wambe: “Athu avulu atwambela kwila, a mono kuma o kikalakalu kya kulunguluka kya lunguluka. “O anandenge m’ukulu awabhelele kutanga O Mulangidi mu Kingileji, maji kindala amutanga mu dimi dya Xhosa. Ene awabhela dingi o ukexilu wabhebhuluka wa Tradução do Novo Mundo revisada.”

 O jingastu joso jalungu ni kutunga, kuyudika, ni kwendesa o ikalakalu ku ji RTO a jifuta bhukaxi ka kitadi kisangela o athu phala o kikalakalu ku mundu woso, ni kitadi kisangela bhukaxi ka donate.pr418.com.