Mivu yoso, jimidi ni jimidi ja athu ene mwabatizala, mukonda dyakiki kwabhindamena dingi ididi phala kubhezelamu Jihova. Phala kubhanga o ikalakalu yiyi, o Ibuka ya Kutunga ya Jixi ni Kibuka kya Kutunga kumundu woso, axinganeka kutunga ni kuyudika 2.700 a ididi ya ubhezelu kumuvu wa sidivisu wa 2020. a

 Maji o ima yalunguluka mukonda dya uhaxi wa COVID-19. Phala kulanga ojiphange jetu ni kubelesela o itendelesu ya jinguvulu yalungu ni kudilanga, o Kibuka kya Edika kya Kibuka kya Utuminu kyemanesa o ikalakalu yoso yakutunga kumundu woso. Maji kumuvu wa sidivisu wa 2020, ojiphange atungu ni kuyudika 1.700 ndenge a ididi ya ubhezelu ande dya uhaxi wa coronavirus. Kumbandu yamukwa, azubha okutunga 100 ajisabhalalu ndenge a jifiliyale. Tumone kyebhi ididi iyadi yatungu, yene mukwatekesa kyavulu ojiphange jetu.

 Filiyale ya ixi ya Camarões. O filiyale yokulu mumbanza ya Douala yatolele, yabhingile kuyudika ima yavulu. O kibuka kya Edika kyaxinganeka kuyudika ofiliyale maji okitadi phala kubhanga okikalakalu kiki kyeji vula dingi, okitadi kyangastala mukutunga ofiliyale ndenge. Axinganeka we kusumba kibhela ni kutungamu betele ya ubhe, mba kusumba sabhalalu ni ku iyudika. Maji jindunge joso jiji, kajikayela.

 Maji kupholo dyakwenda, ojiphange eza mukwijiya kwila ojinguvulu mumbanza ya thunda ya Douala, ejibhanga kikoka kyeji bhita mumbandu ya Kididi kya Yônge Yamakota. Okikoka kiki kyejikwatekesa kubhixila ku filiyale, kyeji kwatekesa we o ikalakalu yalungu ni mukengeji, menya ni ikalakalu yengi. O ima yiyi yeji kwatekesa kyavulu ofiliyale. Mukikiphe, o Kibuka kya Utuminu kyaxikina kutunga betele ya ubhe, mumbandu yakibhela kyatokala mu Kididi kya Yônge Yamakota.

 Mukutunga, ojiphange akalakala kumoxi ni athu atokala kumatenda a asolo. O ndunge yiyi yakwatekesa kuphophala kitadi ni kithangana. Mukidi, okikalakalu kiki kikite kyavulu, kala kyexile muxinganeka ojiphange. A phopheka mazunda ayadi ajidolale (1.330.000.000 kz)! O mwiji wa Betele wayi mutunga mujisabhalalu jiji ja ubhe ande dya kumateka o uhaxi wa COVID-19.

 O Betele ya ubhe yalungulula omwenyu ni ukexilu wakukalakala wa akwa Betele ku Camarões. Phala ene, yú ujitu wa Jihova. Sayi dikaza dyazwela, “Twamesena kukalakala dingi, phala kusuluka mukubhana valolo mu ujitu yú utwa tambula.”

 Kididi Kya Kulungulula (RTO), ya Dimi Tojolabal, ku Mexico. Mumivu yavulu, okibuka kya alunguludi kya dimi dya Tojolabal, kyakalakala mu filiyale ya America Central, yazukama ku Mbanza ya Mexico. Maji odimi dya Tojolabal adizwela dingi mujimbanza ja Altamirano ni Las Margaritas—phala kutunda ku betele kate mujimbanza jiji kubhinga kwenda 1.000 ajikilometulu! Mukonda dyakiki, kwexile mubhonza phala o alunguludi kudilonga, ni kwijiya dingi izwelu ya ubhe mba o ukexilu wakuzwela odimi didi mukizuwa ni kizuwa. Kwabhonzele we kusanga jiphange azukama ku Betele, phala kukwatekesa mukikalakalu kya kulungulula ni kungalavala o ji awudyu mudimi didi.

 Mukonda dya kiki, o Kibuka kya Kusoneka kya Kibuka kya Utuminu kyamesenene kwila okibuka kya alunguludi kyadimi dya Tojolabal, kikala mumbanza muzwela odimi didi. Mukiki ojiphange kufiliyale asolo kusumba sabhalalu ni ku iyudika. Kubhanga kiki kikwejita kitadi kyavulu, kala okutunga mba kulukala kididi.

 Sayi mulunguludi wazwela ombote yene mukatula ku kididi kya ubhe kya kulungulula mba RTO: “Mudikwinyi dyamivu dingakalakala kala mulunguludi mu filiyale, kingejidile mwiji wexile muzwela odimi dyami mumbanza. Kindala oxikitodyu yetu yala mukididi muzwela odimi dya Tojolabal. Ngene mudizwelesa ni athu azwela odimi dya Tojolabal izuwa yoso. Ngadilongo izwelu ya ubhe, kiki kyangikwatekesa kubhanga dingi kyambote okikalakalu.”

 Ojiphange ala ni ndunge yakutunga 75 kya ididi yakulungulula mba ji RTO ni ididi mwandabhita jixikola, kumuvu wa 2021, se okithangana kilunguluka. Andasuluka ni kubhanga dinake dya ikalakalu yamakota yakutunga, yalungu we ni kutunga ombonge ya ubhe ku Ramapo, Nova York, ni filiyale ya ubhe ya Argentina ni Italia. Kumbandu yamukwa twabhingi kutunga 1.000 a Ididi ya Ubhezelu ndenge. Kulungulula 6.000 ja ididi ene mubhangamu yônge, maji ki yafwama. Ni kuyudika 4.000 ja Ididi ya Ubhezelu.

 Kwebhi kutunda okitadi phala kutunga ni kuyudika o ima yoso yiyi? O phange Lázaro González, watokala ku Kibuka kya Filiyale ya America Central, watambwijila okibhwidisu kiki kyoso kyexile muzwela yalungu ni RTO yadimi dya Tojolabal. “Mumbanza mwala ofiliyale yetu, athu kala ni kitadi kyavulu. Mu kiki se ko kikwatekesu kya jiphange jetu kumundu woso, kitweji kala ni kitadi kya kutunga o ididi ya kulungulula, phala ojiphange ala mu ididi muzwela omadimi. Mukonda dya kitadi kyasangela ojiphange jetu, lelu o alunguludi atena kukala mumbanza ni bhukaxi ka athu azwela odimi dyâ. Tusakidila ni muxima woso ojiphange kumundu woso mu ukexilu wâ wakubhana.” Sé phata, okikalakalu kyakutunga ene mukibhanga ngó mukonda dya kitadi kyene musangela ojiphange phala okikalakalu kumundu woso, kyene musangela bhukaxi ka sayite donate.pr418.com.