“Nange atangi etu avulu ejiya athu ala ifofo,” kyene kyambe o A Torre de Vigia (kindala A Sentinela) mukizuwa 1 ya mbeji ya Kanake, 1912. “Ene atena kukala ni milongi phala kutanga sé kufuta kima . . . . O madivulu yá phala o ifofo a abhanga mu ukexilu utena kwa akwatekesa kutanga.” O Torre de Vigia ya bandekesaku dingi: “Ifofo yavulu asakidila ni muxima woso mu njimbu yambote yalungu ni mabesá andakwiza kuhádya phala oso andatunga mu ixi.”

 Kyoso kyasoneka o izwelu yiyi, kumundu woso kala ixi yexile hanji ni ukexilu wé wakusoneka o madivulu phala o athu ala ifofo. Maji katé o kithangana kyokyo, o Jimbangi ja Jihova exile kyá mulungulula madivulu alungu ni kidi kya Bibidya “exile ni jipondo jikwatekesa o ifofo kutanga”—mu braille. Katé kiki twamusuluka hanji ni kubhanga madivulu yá! Kindala etu twala kyá ni madivulu mu braille mu 50 amadimi ndenge. Kyebhi kitubhanga o madivulu yá?

 O kima kyadyanga kitubhanga, o kulungulula o milongi phala o ukexilu wa braille. Phange Michael Millen ukalakala mu kibuka kya Serviços de Processamento de Texto mu Patterson, Nova York wambe: “Mu ukulu twexile mukalakala ni programa itwexile musumba phala kulungulula o dimi dya braille, maji kiyexile mukwatekesa phala kulungulula mu madimidi oso utwabhindamene. Kindala twamukalakala ni programa yetu (Sistema de Tradução da Torre de Vigia). Kyenyiki, tutena kulungulula mu madimi oso utwamesena mu braille. Mudyami, seku programa yasoko ni yiyi.”

 Kikwabhingi ngó kulungulula o milongi mu braille, maji kubhinga we o kilombolwelu kya jifoto. Mukifika, o foto ya kapa mukadivulu ketu Sanguluka Katé Kuhádya ni Hádya! mu braille, yala mu ukexilu yú: “Diyala dyamukwenda mu kikoka mwala jihonda javulu; mu jihonda joso mwene umona mixi yafwama kyavulu, itulu ni milundu.” Jamshed, kafofo wamusidivila kala muboki wathembu yoso ni mukwatekexi watufunga, mwene wambe: “O kilombolwelu kya foto yiyi kingikwatekesa kutendela kyambote o disá.”

 Kyoso kya lungulula, o milongi a itumikisa ku jifiliyale jamubhanga o madivulu mu braille. Mu jifiliyale jiji, o divulu adibhanga mu papela yakomo ni yakolo, ki itanduka, ki idibundabunda kyoso o athu kyaya ni kutanga. Mukusuluka, o jipapela ajibunda mu ukexilu wa madivulu, anga ajitumikisa kumoxi ni madivulu abhinga mu ilunga. Se o matenda akwatekesa mu kutumikisa o ima abhana o ufolo wakutumikisa o madivulu a braille, o madivulu ya tutena kwatumikisa “sé kufuta kitadi.” Se kibhana o filiyale atumikisa o madivulu ni lusolo lwoso phala o jiphange jetu ala ifofo, mba yó katena kumona kyambote atene kutambula o madivulu phala o yônge ya ilunga.

 O kikalakalu kyoso kiki kibhinga kithangana kyasoko ni kitadi. Kyenyiki, o kithangana kibhanga o gráfika yetu ku Wallkill, Nova York, mukubhanga 50.000 a Jibibidya jene jimoxi jibhinga phala kubhanga ngó Jibibidya 2 mu braille. O Bibidya ya braille mu Kingileji yala mu 25 a jimbandu. O jipapela ni imbamba ibhanga nayu o Jibibidya jiji jate dingi mukusokelesa ni Jibibidya ja yó kala ifofo. Jene jate 123 ajiveji ndenge. a O jikapha ngó hanji ja 25 a jimbandu ya Bibidya mu braille jate 150 a jidólares (88.381,5 a jikwanza)!

 O yó akwatekesa kubhanga o madivulu ya mu braille adivwa kyebhi mu kikalakalu kyâ? Phange ya muhatu Nadia, wamusidivila mu filiyale ya África do Sul, wambe: “O jiphange jetu ala ifofo ala ni mwenyu wabhonzo, kyenyiki ngimona kala dibesá kubhanga kima phala kukwatekesa o jiphage jiji. Kiki kilondekesa kwila Jihova wa azolo kyavulu.”

 Abha se muthu kifofo maji kejiya kutanga madivulu mu braille? Tumivu kudima twabhange kadivulu ni dyambu Aprenda a Ler Braille, o kadivulu kaka kala mu maukexilu ayadi. Mbandu phala yó ala ifofo mbandu phala yó kala ifofo. A kabhange phala o muthu wala kafofo amukwatekese ku muthu umona kyambote. O kadivulu kaka kala ni jifalamenda jikwatekesa o kafofo kusoneka mu braille. O muthu ukalakala ni jifalamenda jiji ufikisa kusoneka o jiletala mu braille phala kwijiya mba kudilonga. O kikalakalu kiki kimukwatekesa kubhaka mu kilunji ni kwijiya o jiletala mu ola ya kubabata.

 Kyebhi o jiphange jetu ala ifofo ni yó kamumona kyambote kyamukatula mbote mu madivulu yá? Phange Ernst, watungu ku Haiti, wakexile muya muyônge maji kexile ni divulu dyoso dyoso mu braille. Kyenyiki mwene wabhingile kudyelela mu kilunji phala kubhanga mbandu yê ni kubhana o itambwijilu mu yônge. Maji o kindala kiki? Mwene wambe: “Maji kindala ngitena kuleka o lukwaku lwami ni kutambwijila mu veji javulu. Kindala kiki ngimona kuma twala ni muxima umoxi ni jiphange jami. O kudya kutwamutambula etwenyoso kwene kumoxi!”

 Jan kafunga ku Áustria kamona kyambote wene mukwendesa o Mulangidi ni milongi ya Bibidya mu kilunga, wambe: “O madivulu metu mu braille o muthu ubeta kutendela dingi kyambote o madivulu akamukwa a braille u ngatange kyá ndenge. Mukifika, o mafwe ala ni jinumelu, o jinota kijibhonzo kujisanga, o dilombolwelu dya jifoto kijibhonzo kujitendela.”

 Phange Seon-ok, muboki wathembu yoso mu ixi ya Coreia do Sul, dibubu ni kafofo. Mu ukulu mwene phala kutendela o kyônge wabhingile kikwatekesu kya phange mu kumukwata bhu maku ni kubhanga ne ijimbwete, maji kindala mwene wamutena kyá kutanga ni kudilonga o Bibidya mu braille ubheka wê. Wambe: “O madivulu akamukwa mu braille abhonzo kwa atanga mukonda kwakambe jipondo, o jipapela kijakomo, o mixinda yá jabhengalala.” Mwene wabandekesaku dingi: “Maji o Jimbangi ja Jihova abhanga o madivulu ni jipapela jakomo, janeme, o jipondo jakomo jatenena, kijibhonzo phala eme kujitanga. “Mu ukulu ngejitena ngó kudilonga o madivulu ni kikwatekesu kya athu. Maji kindala, ngitena kya kudilonga ubheka wami. Kiki kingisangulukisa kyavulu kupelepalala o yônge ya kaxi ka semana ni kutambwijila. Ngitanga o madivulu metu moso a braille. Eye nange utena kuzwela kwila eme ‘ngazolo kyavulu o madivulu,’ kyenyiki, kingitena dingi kukala kizuwa kimoxi se kwa atanga.”

 Kala o madivulu metu akamukwa o madivulu mu braille ala we ni izwelu yiyi: “O kadivulu kaka, ka ka bhange phala ku ka sumbisa. Ka tokala ku kikalakalu kya kulonga o Bibidya ku mundu woso, a ka bhange ni kitadi ki bhana athu mu vondadi yâ.” Twamisakidila kyavulu mu ukexilu wenu wakusangela kitadi bhukaxi ka sayite yetu donate.pr418.com. O ukexilu wenu wakubhana ukwatekesa o kubhana kudya mu nzumbi ku ifofo ni yó kamona kyambote.