Ku muvu wa 2020, kwabhiti mavuwa avulu ku mundu woso, kwamateka we o uhaxi wa COVID-19. Kyebhi o Jimbangi ja Jihova kya kwatekesa yó adibhana ni ibhidi yiyi?

 Ku muvu wa sidivisu wa 2020, a o Kibuka Kyala Kupholo Dya Ibuka ya Tufunga kya Kibuka Kya Utuminu waxikina kungastala 28 milhões ajidolale b mba (18,004,000,000 a jikwanza) phala kukwatekesa yó abhita mu mavuwa. O kitadi kiki kyasidivila phala kukwateksa 200 a mavuwa abhiti—kwalungu we ni uhaxi wa COVID-19, ni jiciclone, o kuboba mu África, o kukamba o kudya mu Venezuela ni kyangala ku Zimbabwe. O kitadi kyasidivila phala o makudya, menya, jinzo, izwatu, kusaka o athu, ni ima yakamukwa dingi ya kuzelesa, kuyudika ni kutunga. Tala kyebhi kyende o kikalakalu kiki.

 COVID-19. O ukaxi yú wabhekela ibhidi yavulu ku jiphange jetu ku mundu woso, kikale mu xitu, mu ibanzelu ni mu maka alungu ni kitadi. Phala kukwatekesa o jiphange jetu, abhange 800 a Ibuka ya Kukwatekesa ku mundu woso. O ibuka yiyi exile mumona o mwenyu ni ibhindamu ya jiphange, mu kusuluka akexile mu bhana o lelatódyu yiyi ku Kibuka Kyala Kupholo Dya Ibuka ya Tufunga, ni lelatódyu yiyi, o kibuka kiki kyexile musola kyebhi kyatokalele kuwanena o ima, phala kukwateksa.

 Ku muvu woso, o Ibuka ya Kukwateksa, yakwatekesa o athu kukala ni makudya, menya, milongo, ni ima ya kuxixila ni kuzelesa. Mu ididi yamukwa, o ibuka yiyi kumoxi ni tufunga, akwatekesa o jiphange kutambula o kikwaekesu kya jinguvulu.

 Athu ki Jimbangi ja Jihova, azwela yalungu ni kikalakalu kyetu kya kukwatekesa. Mu kifika, Field Simwinga, nguvulu wa distrito wa Nakonde, ku ixi ya Zambia, wambe ku jiphange jetu: “Twala ni dikongo ni enu. O kikwatekesu ki mwabhana phala o miji yabhindamene, yabhixila mwene mu kithangana kya tokala.”

 O Kukamba o Kudya Mwa’Angola. O uhaxi wa COVID-19 wabhekela ibhidi mu ididi ya kubhakelamu o makudya mu ixi ya Ngola, o ima yabande kyavulu. Phala o jiphange jetu, kwa abhonzele dingi kusumba makudya.

 O filiyale ya Brazil a abhingi phala kukwatekesa o jiphange mu ixi ya Ngola, mu kwatumikisa kudya. Phala kukalakala kyambote ni kitadi phala kukwatekesa, o ibuka yakukwatekesa akexile mutokwesa phala kumona se makudya ebhi eji sumba ni kyebhi kyeji kwa tumikisa, ni kwila asumbu makudya avulu. Kyenyiki, phala kusumba ni kutumikisa o ji kit ja makudya, angastala 22 ajidolale mba (14.146 a jikwanza), maji kala kit imoxi mba kaxa yakudya mwexile 20 a jikilu ja makudya, kala loso, fejá, ni máji. Katé mu kithangana kyenyiki, atumikisa kya 33.544 a jikiti mba jikaxa ja makudya, kwatenesa kya 654 a jitonelada. O kikwatekesu kiki ni ima yasangela o jiphange mu ixi ya Ngola, yakwatekesa kudikila 50.000 a athu!

 Ihi ibanza o jiphange jetu yalungu ni kikwatekesu kiki? Alexandre, watungu mu sanzala imoxi yadikexidila, mu ixi ya Ngola, wambe: “Kiki kilondekesu kya kwila Jihova wangi zolo, ni kwila ki ngala ubheka. Eme ngala ni valolo phala o kilunga kya Jihova!” Mariza, mama usasa o twana ubheka, wambe: “Jihova wevu o misambu yami. Ngisakidila kyavulu mwene ni kilunga kyê!”

 Kyangala mba kukamba mvula ku Zimbabwe. Ku muvu wa sidivisu wa 2020, mu ixi ya Zimbabwe kwabhiti kyangala kyadikota, yabhekela nzala ku mazunda ni mazunda a athu. Jimidi ni jimidi ja Jimbangi ja Jihova ku ixi yiyi ka kexile ni kudya kwasoko.

 Asokejeka ibuka itanu ya kukwatekesa, phala kukwatekesa o jiphange kusanga kudya. Hama ni jihama ja jiphange akwatekesa mu kusobhesa o makalu mâ, kusokejeka o makudya, ni kwizalesa o makalu ni ima yosangele. c Ku muvu wa sidivisu wa 2020, angastala 691,561 ajidolale mba (444.673.723 a jikwanza) phala kukwatekesa kudikila 22.700 a athu ndenge!

 Sayi bhabha, kyoso kyabhixila o kikwatekesu, o jiphange ka kexile dingi ni makudya mu jinzo jâ. Ene asakidila Jihova kyoso kyatambula o makudya. Sayi yá amateka kwimba mwimbu wa Utuminu.

 Sayi dyembu abhangemu yônge ni athu atungumu, yalungu ni makudya exile mu sangela ku kibuka kimoxi ki kibhanga mbandu ya jinguvulu (ONG). Jimbangi jiyadi ja Jihova atudi atungu mu mbanza yenyoyo, a i mukyonge kiki. Kuma akexile mufunga o kyonge ni ima ya jinguvulu, mu kiki o jiphange jiyadi ja ahatu ka xikina kubhanga yexile mwajijidika kubhanga phala kutambula o kudya. Kyoso ene kyatundu mu kyônge kiki, o athu akexile mwa lokalala ni kwa zwela: “Kanenu kuvutuka dingi bhabha phala kubhinga kudya!” Maji, mu kubhita semana jiyadi, o jiphange jetu abhixila mu mbanza yenyóyo, anga abhana kudya ku jiphange jetu jiji ja ahatu—ande mwene dya kubhixila o kikwatekesu kya kibuka ki kibhanga mbandu ya jinguvulu ONG!

 O kikwatekesu kyabhana mu ixi ya Zimbabwe, kyabhana we umbangi wambote. Mu kifika, tala yabhiti ni Prisca, watungu mu dyembu. Sumbala ni ibhidi yejila mukonda dya kyangala, Prisca wexile mubhaka o ji kwarta ni ji Sesa joso phala kuboka, ne mwene mu kithangana kyoso o athu akexile mupelepalala o mavu phala kukuna. O jivizinyu exile mumuxongwena ni kwamba: “Eye wanda bhangesa o mwiji wé kufwa ni nzala mukonda dya kuboka kuku.” Prisca wexile mwa tambwijila: “Jihova nuka wanda xisa o jiselevende jê ubheka.” Mu kubhita tu izuwa, mwene watambula kudya kwejila mu kilunga kyetu. Sayi jivizinyu adiwana ni kima kiki, anga amwambela: “Nzambi nuka wakuxisa, mukiki etu twamesena kudilonga dingi yalungu ni mwene.” Sambwadi dya jivizinyu jê amukwivwa kya o yonge ya kilunga yene mubhita mu ladyu.

 Kyoso ki tuya ni kukingila o dizubhilu, twanda suluka mu kudibhana ni mavuwa. (Matesu 24:3, 7) Tu sakidila kyavulu o kitadi ki mwene mu sangela bhukaxi ka maukexilu akusangela utusanga mu sayite donate.pr418.com O kitadi ki usangela, kitena kukwatekesa yó amutala hadi, mu kithangana kyabhindamena.