Mbeji joso, etu tukala ni hanji ya kumona o minangu ni jividyu a jilondekesa mu JW Broadcasting. Maji-phe, jiphange javulu ku África kene mutena kumona o jiprograma jiji bhukaxi ka internete. Mukonda dyahi?

 Jimbandu javulu ku África kubhonza phala kubokona mu internete. Mu ididi mwala o Internete, ki ikalakala ni lusoso mba ita kalu yavulu. Mu kifika, sayi kizuwa kafunga ka Ilunga ku Madagascar watenene kubaxala o programa ya JW Broadcasting mu kididi kya kumatala. Mwene wafutu 16 ajidolale mba (10.288 a jikwanza) kiki kyatundu o kitadi ki nganyala o athu mu semana imoxi! a

 Sumbala ni ibhidi yiyi, mazunda a athu mu África amutena kya kumona o JW Broadcasting sé kukalakala ni Internete. Kyebhi kyene?

 Tunde ku muvu wa 2017, o athu a tungu ku África subsaariana amutena kya kutala o JW Broadcasting bhukaxi ka kanale kamutelembe wa inzunzumbya wa satellite. Phala kumona o kanale kaka ki kubhingi ku kafuta, yene ibhita mu 24 a ji ola mu kizuwa, mu 7 dya izuwa ku semana, ni mu 16 a madimi.

 Phala kubhanga kiki, o Jimbangi ja Jihova asumbu sidivisu ya televizá ya broadcast phala kubhitisa o milongi bhukaxi ka satellite. O satellite itwene mukalakala nayu ibhixila katé ku 35 a jixi ku África subsaariana. Ku mbeji twene mu futa 12,000 ajidolale mba (7.716.000 a jikwanza). Sayi bhabha abhingi kufuta dingi kitadi kyengi, phala kubhitisa minangu mba izulukutu yamubhita mu ola ni mu kithangana kimoxi kya kizuwa (em directo), mu kanale kengi. Kiki kikwatekesa hama ni jihama ja athu kumona o yônge ya makota ni yônge yengi yakatunda kumoxi ni ajitu a betele.

 Athu avulu, katé mwene yó ki Jimbangi ja Jihova ene mu mona o konale ka JW bhukaxi ka satellite mu mitelembe wa izunzumbya ku mabhata mâ. Maji sayi jiphange javulu ka mutena kusumba o iselekete yabhingi phala kutena kutala o kanale bhukaxi ka satellite. Phala ku akwatekesa ate o iselekete yiyi ku 3.670 ndenge a Ididi ya Ubhezelu, mu kiki o jiphange atena kusistila o JW Broadcasting kwenyoko. O iselekete yiyi itena kuta 70 ajidolale mba (45.010 a jikwanza) phala o Ididi ya Ubhezelu yala kya ni mutelembe wa izunzumbya mba projector. Se mu Kididi kya Ubhezelu sémwé o iselekete yiyi, yene yoso itena kuta 530 ajidolale mba (340.790 a jikwanza).

 O jiphange jetu awabhela kyavulu o kanale kaka. Sayi kafunga ku Camarões wambe: “Phala o mwiji wami, yiyi yedikala o maná mu kikangalakata.” Odebode, phange yadiyala ku Nigeria, wambe: “Eme ni mwiji wami twene mutala o kanale kaka, mu izuwa itatu ku semana. O twana twetu tutatu twamala, akingila ni hanji yoso o kithangana kiki. Kate mwene sayi bhabha ene abhinga phala kuta o kanale ka JW.” Rose, watungu we ku Nigeria, wambe: “Nga sanguluka mu kwamba kwila muveji dya kutala ola joso o jihundu mu mutelembe wa inzunzumbya, kindala ngene mutala dingi o kanale ka JW. Kyoso ki ngexile mutala o jihundu nga kexile mu thathamana kyavulu mukonda dya ima ingexile mumona, o atesá yami yexile mu banda kyavulu. Maji o JW Broadcasting ingitululukisa, ingiswinisa we! Yene o kanale ingawabhela dingi. Yiyi dibesá dya dikota dya Jihova.”

 Sayi kafunga ka ilunga mu ixi ya Moçambique wambe kwila mu sirkwitu yê, o Ididi yoso ya Ubhezelu yala ni iselekete itambula o sinale ya satellite. O jiphange mu Ilunga yiyi akalanga kubhixila ola imoxi ndenge phala kusistila o JW Broadcasting bhukaxi ka satellite.

 Ku muvu wa 2019 o kanale kaka akalakala nakyu phala kubhitisamu o madiskulusu abetakota a kyônge kyadikota kya bhiti ku Johannesburg, ku África do Sul, ni mu divwa dya ididi yengi; yalungu we ni madiskulusu abhange o athu atokala ku Kibuka Kya Utuminu. Phange Sphumelele, ukalakala mu kibuka kya Broadcasting ku filiyale ya África do Sul wambe: “M’ukulu twexile mu bhitisa o madiskulusu bhukaxi ka internete. Maji kwabhingile kukala ni internete yambote ni kusumba internete. O kanale ka JW bhukaxi ka satellite yawabha dingi, ki ite kalu.”

 Twasakidila o kitadi ki mwene musangela phala o kikalakalu ku mundu woso, jiphange jetu javulu ku África atena kumona o JW Broadcasting bhukaxi ka satellite. Tusakidila ni muxima woso o kitadi ki mwene musangela mu maukexilu avulu akusangela utusanga mu sayite donate.pr418.com.